Sordel. Planher vuelh en Blacatz en aquest leugier so,

Sordel. 

Planher vuelh en Blacatz en aquest leugier so,

ab cor trist e marrit, et ai en be razo,

qu'en lui ai mescabat senhor et amic bo

e car tuit l'aip valen en sa mort perdut so:

tant es mortals lo dans qu'eu non ai sospeisso

que ja mais si reveigna, s'en aital guiza no

qu'om li traga lo cor, e qu'en manjo l baro

que vivon descorat, pueis auran de cor pro.

Premiers manje del cor, per so que grans ops l'es,

l'emperaire de Roma, s'el vol los Milanes

per forsa conquistar, car lui tenon conques,

e viu deseretatz, malgrat de sos Ties.

E deseguentre lui manj' en lo reis frances,

pueis cobrara Castella qu'el pert per nescies;

mas si pesa sa maire, el no n manjara ges,

car ben par a son pretz qu'el non fai ren que l pes. 

Del rei engles me platz, car es pauc coratjos,

que manje pro del cor, pueis er valens e bos

e cobrara la terra, per que viu de pretz blos,

que l tol lo reis de Fransa, car lo sap nualhos.

E lo reis castelas tanh qu'en manje per dos,

car dos regismes ten, e per l'un non es pros;

mas s'el en vol manjar, tanh qu'en manj' a rescos,

que, si l mair' o sabia, batria l ab bastos.

Del rei d'Arago vuelh del cor deia manjar,

que aisso lo fara de l'anta descargar,

que pren sai de Marselha e de Millau, qu'onrar

no s pot estiers per re que puesca dir ni far.

Et apres vuelh del cor don hom al rei Navar,

que valia mais coms que reis, so aug comtar.

Tortz es, quan Dieus fai home en gran ricor poiar,

pos sofracha de cor lo fai de pretz baissar.

Al comte de Toloza a ops qu'en manje be,

si l membra so que sol tener ni so que te;

quar si ab autre cor sa perda non reve,

no m par qu'ela reveigna ab aquel qu'a en se.

E l coms proensals tanh qu'en manje, si l sove

c'oms que deseretatz viu gaire no val re,

e si tot ab esfors si defen ni s capte,

ops l'es manje del cor pel greu fais qu'el soste.

Li baro m volran mal de so que ieu dic be;

mas ben sapchan qu'ieu ls pretz aitan pauc com il me.

Bels Restaurs, sol qu'ab vos puesca trobar merce,

a mon dan met cascun que per amic no m te.

Na Tibors. Bels dous amics, ben vos posc en ver dir

Na Tibors.

Florissait en 1232. Hist. génér. de Provence, T. II, p. 415. 

Sainte Palaye. Manuscrit du Vatican 3207.

Na Tibors si era una dompna de Proensa, d'un castel d'en Blacatz que a nom Sarrenom. Corteza fo et enseignada, avinens e fort maistra; e saup trobar. E fo enamorada e fort amada per amor; e per totz los bons homes d'aqela encontrada fort honrada; e per totas las valens dompnas mout tensuda e mout obedida. E fetz aquestas coblas e mandet las al seu amador.

Bels dous amics, ben vos posc en ver dir

Qe anc no fo q'eu estes ses dezir,

Pos vos con... per fin amans;

Ni anc no fu q'eu non agues talan,

Bel dous amics, que soven nous vezes,

Ni anc no fo sazons que m'en pentis;

Ni anc no fo se vos n'anes iratz...

Blancatz (Blacatz, Blacas). En Raïmbautz, ses saben

Blancatz. (Blacatz, Blacas)

Florissait en 1195. Mort vers 1225. Hist. génér. de Provence. T. II, p. 396.

7225.

En Blancatz si fo de Proensa, gentil bars et autz e rics. E plac li dons e domneis, e guerra e messios, e cort et mazans e bruda, e chanz e solatz, e tuich aquels faich per qu'om bons a pretz e valor. Et anc no fo hom à qui tant plagues prendre com à lui donar. El fo aquel que mantenc lo desmantengutz e anparet los desanparatz. Et on plus venc de temps, plus crec de larguessa, de cortezia e de valor, d'armas e de terra e de renda e d'onor, e plus l'ameren li amic, e li enemic lo tensen plus: e crec sos sens e sos sabers, e sa gaillardia e sa drudaria.

7225, 7698, M.

En Raïmbautz, ses saben

Vos fara pros domn'amor

Complid', o per vostr' onor

Fara cuidar à la gen,

Ses plus, qu'il es vostra druda.

E s'ar no sabes cauzir

Lo meils, segon qu'auzetz dir,

Vostra razos er vencuda.

Blacas, d'aquest partimen

Sai leu triar lo melhor:

A lei de fin amador

Mais volh aver cauzimen,

Tot soavet e ses bruda, 

De madomna cui dezir, 

Que fol creire ses jauzir: 

Que long'amors es refuda.

Raïmbautz, li conoissen

Vos o tenran à folor,

Et à sen li sordejor;

Quar per jauzir solamen

Laissatz honor mantenguda.

D'aitan nous podez esdir,

Que pretz no s fassa grazir

Sobr' autres faitz à saubuda.

Blacas, tan m'es avinen

Quant ab midons cui ador

Posc jazer sotz cobertor,

Ren als no m'es tan plazen 

Co quan la posc tenir nuda.

Doncs com par qu'ab fals mentir 

Poscatz ma razon delir?

Mil tans val saber que cuda.

En Raïmbautz, qui soven

Deroca son joinedor,

Que l val si non a lauzor

Ni non pot aver guiren?

No pretz honor esconduda,

Ni carboncle ses luzir,

Ni colp, qui no'l pot auzir,

Ni olh sec, ni lengua muda.

Blacas, beus dic veramen (be us)

Que am trop mais frug que flor;

E mais ric don de senhor

Que si m pagava del ven.

Ja ab promessa perduda

Lonc temps no m pot retenir

Cilh per cui plang e sospir,

S'ab gaug entier no m'ajuda.

Blacas. Blacatz,

Blacas.

Lo belh dous temps mi platz
E la gaya sazos
E 'l chans dels auzellos;
E s' ieu fos tant amatz
Com sui enamoratz,
Fera gran cortezia
Ma bella douss' amia;
E pus nulh be no m fai,
Las! e doncx que farai?
Tant atendrai aman
Tro morrai merceyan,
Pus ilh vol qu' aissi sia.

Aissi m suy autreyatz
Ab leial cor a vos,
Bella dompna e pros,
Que nulh autre solatz
Ni autr' amor no m platz
Ni autra drudaria,
Ni mos cors no s cambia;
Per vos, domna, morrai:
Quar me trobatz verai,
Vos en prendetz lo dan;
E non es benestan
Qu' hom eys los sieus aucia.

Dompna, vostra beutatz,
E las bellas faissos,
E 'l belh huelh amoros,
E 'l gen cors ben tallatz
Don sui empreyzonatz,
De vostr' amor que m lia,
Si be 'l truep ab fadia,
Ja de vos no m partrai;
Que maior honor ai
Sol en vostre deman,
Que s' autra m des bayzan
Tot quant de vos volria.

Be m tengra per honratz
E per aventuros,
S' aprop cent braus respos
En fos d' un joy paguatz:
Ai! domna, umilitatz
E merces no m valria;
Mes m' avetz en tal via
Don no m desviarai,
Que mos fis cors s' atrai
A vostra beutat gran
Que m fai sufrir l' afan,
Em destrenh nueg e dia.

Si per sufrir en patz
Mais d' autra res qu' anc fos,
Ni per far voluntos
Las vostras voluntatz,
Domna, m' ochaizonatz,
A vos non eschairia
Quar ilh non es ges mia,
Ni ves vos non l' aurai;
Ans franchamen m' apai,
Quan vey vostre semblan;
E quan vos sui denan,
Tot tort vos fugiria.

Belha Capa, on qu' ieu sia,
Vos am e us amarai
Ab leyal cor verai,
Per so quar valetz tan,
Quar ieu e 'l plus prezan
Volem vostra paria.

//

https://en.wikipedia.org/wiki/Blacatz

Blacatz, known in French genealogy as Blacas de Blacas III (1165–1237), was the feudal lord of Aups and a troubadour. Sordello composed a lament (planh) on his death, inviting the kings of his time to share and eat the heart of Blacatz and thus acquire a portion of his courage.

He was the father of the troubadour Blacasset.

Renat Nelli, Ecrivains anticonformistes du moyen-âge occitan. Paris, 1977.

https://fr.wikipedia.org/wiki/Blacas_de_Blacas

Blacas de Blacas, né vers 1180 et mort vers 1235, dit le Grand guerrier et connu aussi sous le nom de Blacatz, fut seigneur d'Aups, de Vérignon, de Baudinard, de Carros, de Châteauneuf, de Thorenc, de Tourtour, et autres villages.

Il était aussi remarquable guerrier que bon troubadour. Il se distingua parmi les plus vaillants chevaliers de la cour du comte Raimond Bérenger IV de Provence. Son fils Boniface de Blacas lui succéda comme seigneur et épousa Ayceline de Moustiers; il fut aussi troubadour, sous le nom de Blacassetz.

Les Blacas sont une maison française, très ancienne, qui tire son nom du château d'Aups (en Provence).

https://archive.org/stream/BiographiesDesTroubadoursChabaneau/Les_biographies_des_troubadours_en_langu#page/n95/mode/2up

https://archive.org/stream/BiographiesDesTroubadoursChabaneau/Les_biographies_des_troubadours_en_langu#page/n101/mode/2up