Mostrando entradas con la etiqueta emperaire. Mostrar todas las entradas
Mostrando entradas con la etiqueta emperaire. Mostrar todas las entradas

sábado, 24 de octubre de 2026

Sordel. Planher vuelh en Blacatz en aquest leugier so,

Sordel. 

Sordel, Sordello, Goito, Goit

Planher vuelh en Blacatz en aquest leugier so,
ab cor trist e marrit, et ai en be razo,
qu'en lui ai mescabat senhor et amic bo
e car tuit l'aip valen en sa mort perdut so:
tant es mortals lo dans qu'eu non ai sospeisso
que ja mais si reveigna, s'en aital guiza no
qu'om li traga lo cor, e qu'en manjo l baro
que vivon descorat, pueis auran de cor pro.
Premiers manje del cor, per so que grans ops l'es,
l'emperaire de Roma, s'el vol los Milanes
per forsa conquistar, car lui tenon conques,
e viu deseretatz, malgrat de sos Ties.
E deseguentre lui manj' en lo reis frances,
pueis cobrara Castella qu'el pert per nescies;
mas si pesa sa maire, el no n manjara ges,
car ben par a son pretz qu'el non fai ren que l pes. 
Del rei engles me platz, car es pauc coratjos,
que manje pro del cor, pueis er valens e bos
e cobrara la terra, per que viu de pretz blos,
que l tol lo reis de Fransa, car lo sap nualhos.
E lo reis castelas tanh qu'en manje per dos,
car dos regismes ten, e per l'un non es pros;
mas s'el en vol manjar, tanh qu'en manj' a rescos,
que, si l mair' o sabia, batria l ab bastos.
Del rei d'Arago vuelh del cor deia manjar,
que aisso lo fara de l'anta descargar,
que pren sai de Marselha e de Millau, qu'onrar
no s pot estiers per re que puesca dir ni far.
Et apres vuelh del cor don hom al rei Navar,
que valia mais coms que reis, so aug comtar.
Tortz es, quan Dieus fai home en gran ricor poiar,
pos sofracha de cor lo fai de pretz baissar.
Al comte de Toloza a ops qu'en manje be,
si l membra so que sol tener ni so que te;
quar si ab autre cor sa perda non reve,
no m par qu'ela reveigna ab aquel qu'a en se.
E l coms proensals tanh qu'en manje, si l sove
e si tot ab esfors si defen ni s capte,
ops l'es manje del cor pel greu fais qu'el soste.
Li baro m volran mal de so que ieu dic be;
mas ben sapchan qu'ieu ls pretz aitan pauc com il me.
Bels Restaurs, sol qu'ab vos puesca trobar merce,
a mon dan met cascun que per amic no m te.

Folquet de Romans. Far vuelh un nou sirventes,

Folquet de Romans.

Folquet de Romans si fo de Vianes, d'un borc que a nom Romans.

e dirai de pretz on es,
s om tot no l demanda.
Pretz sojorn' ab los cortes
e no i quier liuranda
mas joi e valor,
e ten celui per senhor
qui l da tal vianda.
Pretz vol ome conoissen
ab fina largueza,
franc et umil e plazen
e ses avoleza;
a celui se don' e s ren
e i a s'amor meza.
Mas paucs n'a conques,
qu'en cen baros non a tres
complitz de proeza.
Ja mais negus mos amics
no vuelh rics devenha,
pos mos senher Frederics,
que sobre totz renha,
era larcs ans que fos rics;
er li platz que tenha
la terr' e l'aver:
aisso m'en comta per ver
cascus qui que n venha.
Mas d'una re si acert (sia cert?)
qu'als savis aug dire:
qui tot vol tener tot pert.
En aiso se mire
e tenha donar ubert,
que l roda no s vire
so desus desotz,
qu'al virar faria totz
sos enemics rire.
E lau Deu que sus l'a mes
e l'a dat corona,
e son cosin lo marques,
que cascus razona
que venir l'en deu grans bes;
e il razos es bona,
qu'ieu vi, so us autrei,
l'amor que cel d'Est li fei
e l coms de Verona,
Per qu'eu li vuelh cosselhar,
car l'am ses bauzia,
que sos amics tenga car
e rics tota via,
que ben a poder de far,
miels c'om qu'el mon sia,
fatz d'ome valen:
vec vos doble falhimen
si non o fazia!
Emperair', ie us vuelh preiar
que ja mal no us sia,
s'ieu s dic mon talen,
que car vos am coralmen,
vos mostr' aital via.
N'Otz del Carret, be us tenc car,
car en Lombardia
no sai plus valen,
ni negus no m'en desmen
de ben qu'eu en dia.

Romans-sur-Isère

martes, 6 de octubre de 2026

29. Elia Cairel. Pos cai la foilla del guarric

29. Elia Cairel.

Secondo il testo costituito dal Rochegude (Parnasse Occitanien, p. 109) su C E I R.

Elias Cairels, Carirel, Cayrel


Pos cai la foilla del guarric

farai un gai sonet novel,

que trametrai part Mongibel

al marques quel sobrenom gic

de Monferrat e pren cel de sa maire;

et a laissat so que conquis son paire.

mal ressembla lo filh Robert Guiscart, 

qu'Antiocha conques e Mongiscart.

Marques, los monges de Clunhic

volh que fasson de vos capdel,

o siatz abbas de Cistel; (Cluni; Císter, Cistell)

pos lo cor avetz tan mendic,

que mais amatz dos buous e un araire 

a Monferrat, qu'alhors estr' emperaire: 

ben pot hom dir qu'anc mais filh de lhaupart

nos mes en crotz a guiza de rainart.

Gran gaug agron tug vostr'amic, 

quant agues laissada la pel

don folres la cap' el mantel: 

quar totz cuideron estre ric

cilh que per vos son liurat a maltraire, 

qui son tondut et an paor del raire. 

quascus aten socors de vostra part: 

si noi venetz, qui dol i a sil gart. 

Marques, li baron vair' e pic

an contra cel trait un cairel 

que lor tornara sul capel.

e de l'emperador Enric

vos dic aitan que be semblal rei Daire, 

qui sos baros gitet de lor repaire, 

dont il ac pois de morir gran reguart; 

mas mantas vetz quis cuida calfar s'art. 

Lo regisme de Salonic,

ses pereir' e ses manganel, 

pogratz aver, e mant castel

d'autres qu'ieu no mentau ni dic. 

per dieu, marques, Rotlan dis e sos fraire, 

e Guis marques e 'n Rainaut lor cofraire, 

Flamenc, Frances, Borgonhon e Lombart

van tug dizen que vos semblatz bastart. 

Vostr' ancessor, so au dir e retraire, 

foron tug pros; mas vos non soven gaire. 

sil revenir no prendetz geinh et art, 

del vostr' onor perdetz lo terz el quart.