Sainte Agnès. Rei glorios, verai lums e clardat.

Sainte Agnès.

Il Mistero provenzale di S. Agnese. Facs. in eliotipia dell' unico ms. con prefazione di E. Monaci, Rome 1880, t. 5-8. Sancta Agnes. Provenzalisches geistliches Schauspiel, herausgegeben von K. Bartsch, Berlin 1869, p. 18-23, l. 491-636. Comparé avec l'édition de M. Sardou, Nice 1877. - Grdr. § 53, p. 86. St. p. 55.

Modo veniunt ribaldi et circumdant eam in postribulo, et postea mater facit planctum in sonu albe: 

Rei glorios, verai lums e clardat. 

Et antequam dicat planctum, dicit istut romancium: 

"Ai, bella fila, ques aves?

Certas, no mi semblas, Aines.

Rei glorios, Sener, per qu'hanc nasqiei?

Morrir volgra lo jorn que t'enfantiei,

bela filla, quar s'anc n'aic alegranza,

ar n'ai mil tanz de dol e de pensansa, 

qe mala fosas nada.

Bella filla, per qe voles damnar

la tiua arma ni l cors fas tormentar?

Per que non vols nostra diuessa onrar,

q'il a poder ben o mal de tu far?

Per que iest aici torbada?"

Planctum sororis in eodem sonu:

"Bela sore, ieu morai de dolor,

qar non vei res qe ti faza socor;

per qe ai paor non prenas deisonor

per cesta gent avol e sens valor,

q'a mal iest destinada."

Alia cubula:

"Bella sore, en qal segle tenrai,

pueh qe de tu tan fort mi luniarai?

Ben sui certa que mais non ti veirai.

Dona mi 1 bais al partir q'en farai.

Qe Dieus ti don s'aiuda!"

Planctum beate Agnetis in sonu: 

El bosc d'Ardena justa l palais ausor, 

a la fenestra de la plus auta tor.

"Rei poderos, q'as faz los elemenz,

garda mon cors d'aqestas malas genz,

qe no l puscan tocar, Sener plasenz,

ni oresar, sias mi bons defendens,

Sener leals!"

Alia cubula:

"Tal dolor ai qe l cor mi vol partir,

qar nuda sui afr' aqesta gent vil.

Per lo mieu grat ades volgra morir,

sol q'el cel fos, on ai tot mon desir,

am mon Seinor."

Christus dicit arcangelo Michaeli ut tendat visitatum Ainen, et portet indumentum capillorum:

"Michel, vai vesitar Aines, la mia moller,

dona li aqest vestir q'il lo desira el qer.

E si neguns homs vans la toca ni la fer,

dona li de cest glasi, qes ieu t'en don poder,

e garda qe nulz homs non pusca am lui jhaser."

Modo dat ei Christus indumentum et ensem, et dicit ei quod, si aliquis tangit eam, det ei de gladio. Et vadit angelus ad eam et facit planctum in eodem sonu:

"Aines, le tieus maritz ti tramet cest vestir,

a mi fah mandament q'ieu ti deiha servir.

E si i a negun home qe ti vulla aunir,

a mi dat aqest glasi am qe l deiha auzir,

pueh l'arma el poz d'enfern vaga als diables servir."

Modo dat angelus Aineti indumentum capillorum et ponit ei in capite, et postea pergit ad postribulum et dicit meretricibus ut exeant estra. 

Et angeli proiciunt pannos ipsarum estra et verrant postribulum et ornant ipsum et cum aqua benedicta mundant ipsum.

Michel.

"Femnas, d'aqest alberc yches demantenent,

so us manda Jesu Crist, lo paire omnipotent.

Gitas for aqelz draps, qe son ore e pudent,

qe intrara za Aines q'es mollers verament

del fill Deu, Jesu Crist, so us dic certanament."

Modo exeunt omnes meretrices de postribulis et pannos suos proiciunt extra, et angeli aptant ipsum ut supra dictum et ipsi cum “asperges me” et tum Aines intrat domum illam ligata. Piria dicit aliis ganeis quando sunt extra scortum, si audiverunt cantus quos fecerunt ille aves.

"Aves ausit sos chanz q'an fah aicil aucel,

ni com nos an gitadas d'inz de nostre bordel

per sa femna qu'es presa, quar non vol asorar

la diuessa na Vestis ni l cenador amar?

Don cre que le sieus Dieus aiha mais de poder

qe non a nostra ydola qe non nos pot valer;

per q'ieu dic qe li anem totas ensems pregar

qes en nom del sieu Dieu nos deiha bateihar."

Elis meretrix respondit Pirie dicendo sic:

"Ara lo li anem dir ses gran bestenza far,

e qe totas ensems lo li deiham pregar."

Modo vadunt omnes meretrices ad virginem ut roget Deum quod vellit eis perdonare. Dicit Sansa Aineti sic:

"Domna, a tu venem, qe tu deihas pregar

lo Dieu que tu asoras, q'el nos vuella aiudar,

es en lo sieu sant nom nos deias bateiar,

qe nos no volem plus na Vestis asorar."

Aines respondit meretricibus quod libenter dabit eis babtismum, si volunt credere articulos fidei.

"Es ieu vos donarai baptisme de bon grat,

si creses los articles que cre li crestiandat.

D'autramenz le baptesmes no us seria autreihat."

Borgunda meretrix respondit Aineti:

"Domna, de mot bon grat creirem tot qant diras,

e volrem far e dir tot qant comandaras."

Modo dicit eis Aines quod istud est eis necese:

"Aizo vos a mestier qe sol un Dieu cresas,

cel q'a fah cel e terra; en aqel vos fisas

es en lo sieu car fill Jesu Crist qe nasquet

del ventre de la verge, qe hanc homs non i toqet;

es en aqel sant ventre el volc eser portaz

e per Sant Esperit fon lainz aspiraz.

E cresas qe per nos fon en la croz levaz,

per nostres grieus pecaz auniz e malmenaz;

pueh intret en enfern e de lainz nos trais:

vuella per sa bontat qe lai non tornem mais.

Cresas qe al ternz jorn el volc resucitar

es a l'asension lai sus el cel puihar.

E cresas q'el venra los morz e ls vius juihar

e la sia passion als mals requastenar.

Es aihas en la gleisa de Roma vostra fe

e tot cant vos dira ames es onres be.

E cresas que li mort ancars recitaran

es al jorn del jusisi en lur carnz tornaran.

Aizo sun li article de nostra sancta fe:

qi ben non los cresia non seria crestians be.

Mais si aizo voles creire, pues vos bateiharai

es aici com fisels crestians vos recebrai."

Piria respondit Aineti et dicit quod bene credent totum illud quod dixit.

"Domna, nos cresem ben tot zo que dih aves,

es aici com fisels crestians nos recebes."

Modo accipit Aines unum plenum vas aque benedicte et babtizat eas dicendo sic:

"Es ieu e nom de Jesu Crist

vos bateih, quar m'o aves reqist,

e prec vos qe non desnembres

con fun Dieus per nos en croz mes;

qe si ben vos en vol nembrar

pueh no us poires per ren damnar."

Modo tendunt omnes meretrices in medio campi et faciunt planctum omnes simul in sonu:

Bel paire cars, non vos vei res am mi.

Planctus.

"Bell Sener Dieus, qes en croz fust levaz

es al tern jhorn de mort resucitaz,

tu sias grasiz, qar forem de pecat

e de follor.

Sancta Maria, maire del creator,

prega ton fill per ta sancta douzor

q'el nos perdon e nos done s'amor,

si a lui plai."

Raimbaut de Vaqueiras. Era pot hom conoisser e proar + Truan, mala guerra

Raimbaut de Vaqueiras.

I. 

Era pot hom conoisser e proar

que de bos faitz ren Deus bon gazardo,

qu'al pro marques n'a fait esmend' e do,

e il fai son pretz sobre ls melhors poiar

tant que l crozat de Frans' e de Campanha

l'an quist a Deu per lo melhor de totz

per recobrar lo sepulcr' e la crotz

on fon Jesus, que l vol en sa companha,

l'onrat marques, et a il Deus dat poder

de bos vassalhs e de terr' e d'aver

e de ricor per melhs far so que l tanha.

Tant a d'onor e vol onratz estar,

qu'el onra Deu e pretz e messio

e si mezeis que, s'eron mil baro

ensems ab lui, de totz si sap honrar,

qu'el honra ls seus et honra gent estranha.

Per qu'es desus quan autre son desotz,

qu'a tal honor a levada la crotz

que non par ges mais honors li sofranha,

qu'ad honor vol est segl' e l'autr' aver,

Deus a l dat forsa, genh e saber

co ls aian dos, e tant quan pot s'en lanha.

Cel que fetz air' e cel e terr' e mar

e freit e caut e ploia, vent e tro,

vol qu'el seu guit passen mar tuit li bo,

si cum guidet Melchion e Gaspar

en Bethleem, que l plan e la montanha

nos tolon Turc, e Deus no n vol dir motz.

Mas a nos tanh, per cui fo mes en crotz,

que lai passem; e qui que sai remanha

vol s'avol vid' e sa greu mort vezer,

qu'en lait peccat estam qu'om deu temer,

don quecs er soutz s'en flum Jordan se banha.

Mas tan nos fai nostres peccatz torbar

que mort vivem e no sai dire quo,

qu'un non i a tan galhart ni tan pro,

qu'a un plazer non ai' autre pesar,

ni es honors qu'ad anta no s'afranha,

quar contr' un gaug a l plus rics mil corrotz.

Mas Deu es gauz per qu'om si senh' en crotz,

per que non pot perdre qui lui gazanha:

per qu'eu am mais, s'a lui ven a plazer,

de lai morir que sai vius remaner

en aventura, fos mi' Alamanha.

Deus se laisset vendre per nos salvar,

e'n receup mort e'n sofri passio,

e l'auniron per nos Juzeu fello,

e'n fon batutz e liatz al pilar

e fo per nos en tormen e en fanha,

e correiatz de correias ab notz

e coronatz d'espinas en la crotz:

per qu'a dur cor totz hom que l dan non planha

que ns fan li Turc que volon retener

la terr' on Deus volc vius e mortz jazer,

don nos eschai grans guerr' e grans mesclanha.

Nostr' estol guit sans Nicolaus de Bar,

e il Campanhes dressen lor gonfano,

e l marques crit Monferrat e Leo,

e l coms flamencs Flandres als grans colps dar,

e feira i quecs qu'espaz' e lansa franha,

que leu aurem los Turcs sobratz e rotz

e cobrarem el camp la vera crotz

qu'avem perdud; e il valen rei d'Espanha

fassan grans osts sobre Maurs conquerer,

que l marques vai ost e setge tener

sobre l soudan e pass' en breu Romanha.

Nostre Senher nos mand' e ns ditz a totz

qu'anem cobrar lo sepulcr' e la crotz:

e qui volra esser de sa companha,

moira per lui, si vol vius remaner

en paradis, e fassa son poder

de passar mar e d'aucir la gen canha.

Francs Cavaliers, per cui fas sos e motz,

no sai si m lais per vos o m leu la crotz;

ni sai cum an ni sai consi m remanha,

quar tan mi fai vostre bels cors plazer,

qu'eu mor si us vei e, quan no us posc vezer,

cuit morir sols ab tot' autra companha.

II.

Truan, mala guerra

sai volon comensar

domnas d'esta terra

e vilas contrafar.

En plan o en serra

cuidan ciutat levar

ab tors:

quar tan poia l'onors

de leis, que sotzterra

lor pretz e l seu ten car,

qu'es flors

de totas las melhors:

na Biatritz. Car tan lor es sobreira

qu'encontra leis faran totas senheira

e guerr' e foc e fum e polvereira.

La ciutatz s'ajosta,

e fan murs e fossatz.

Domnas ses semosta

i venon de totz latz,

si que pretz lor costa

e jovens e beutatz.

E m pes

que l filha del marques

n'aura dura josta;

car a conques en patz

totz bes

e totz bos aibs cortes:

e quar es pros e franch' e de bon aire,

non estara plus en patz que sos paire,

que tornatz es a lansar et a traire.

Domnas de Versilha

volon venir en l'ost,

Sebeli e Guilha,

e na Riqueta tost;

la mair' e la filha

d'Amsiza, quan que cost.

Apres

ven de Lenta n'Agnes,

e de Ventamilha

na Guilhelm' a rescost.

Empres

er la ciutatz en pes.

De Canaves i ven molt gran companha,

de Surian, e domnas de Romanha,

na Tomazin' e l domna de Suranha.

Engles e Garsenda

e Palmeir' e n'Auditz,

n'Aud' e na Berlenda

n'Agnes e n'Eloitz, 

volon que lor renda

joven na Biatritz;

si no,

las domnas de Ponso

en querran esmenda.

Car lai, part Mon Senitz,

somo

la ciutatz contenso,

qu'ades guerrei leis qu'es tan bon' e bela,

que sos gens cors tol a la damizela

et a totas color fresqu' e novela.

Maria la Sarda

e l domna de San Jortz,

Berta e Bastarda,

mandon tot lor esfortz,

que joves Lombarda

no rest de sai los portz.

E sai

qu'a na Biatritz plai,

quar lor reiregarda

non pot esser tan fortz

qu'esglai

lo seu fin pretz verai.

Donan lor senh, cavalcon ab gran joia;

fag an ciutat et an li mes nom Troia;

poestat fan de midons de Savoia.

La ciutatz se vana

de far ost en arrenc,

e sona l campana,

e lo velhs comuns venc

e ditz per ufana

que chascuna desrenc.

Pois ditz

que l bela Biatritz

es tan sobeirana

de so que l comuns tenc

c'aunitz

n'es totz e desconfitz.

Trompas sonon e la poestatz cria:

"Demandem li beutat e cortezia,

pretz e joven." E totas cridon: "Sia!"

La ciutatz si voia

e movon lor carros,

e l velhs comuns poia,

e geton en lor dos

cuirassas de troia

ab que cobron lor os.

Gambais

an et arcs e carcais,

e non temon, ploia

ni mals temps no lor nos.

Oimais

veirem de grans assais.

De totas partz comenson a combatre;

na Biatritz cuidan de pretz abatre;

mas non lor val, s'eran per una quatre.

Per lor murs a fendre

fan engenhs e carels

e calabres tendre,

gossas e manganels,

foc grezesc acendre,

e fan volar cairels.

De jos

trencan murs ab bossos.

Per tal no s vol rendre

lo seus gentils cors bels

joios,

fatz de belas faissos.

Totas cridan: "Aiuda, tras l'esponda!"

l'un' a l'autra; la tersa ten la fronda,

e trazon tuit li genh a la redonda.

Na Biatritz monta,

e va s de pretz garnir;

ausberc ni porponta

non vol, e vai ferir.

Cel' ab cui s'afronta

es certa de morir;

e jonh

et abat prop e lonh.

Fait a mainta jonta

si que l'ost fai partir;

pois ponh

tant que l carros desjonh.

Tanta n'a prez' e derrocad' e morta,

que l velhs comuns s'esmai' e s desconorta

tro que Troia l'enclaus dedins la porta.

Na Biatritz, be m plai quar etz estorta

a las velhas, que l vostres gens cors porta

pretz e joven, qu'a lor proeza morta.

Bels Cavaliers, vostr' amors mi conorta

e m dona joi e m'alegr' e m deporta,

quant autra gens s'esmai' e s desconorta.

Bertran de Born. Be m platz lo dous temps de pascor

Bertran de Born.

2701, 7225, 7698.

Bertran de Born si fo un castellans del evescat de Peiregors, vescoms d'Aut fort, un castel que avia prop de mil homes. Et avia fraires e cujava ls deseretar, si no fos lo rei d'Englaterra. Totz temps ac guerra con totz los sieus vezins, con lo comte de Peiregors, e con lo vescomte de Lemoges, e con son fraire Constanti, e con Richartz, tan quan fo coms de Peitieus. Bons cavalliers fo e bons guerriers, e bon domnejaire, e bons trobaire; e savis e ben parlans, e saup ben tractar mals e bens. 

Seingner era, ves quan se volia, del rei Enric e del fils de lui; mas totz temps volia que ill aguessen guerra ensems lo paire e lo fils, e'l fraire l'un con l'autre. E totz temps volc que lo reis de Fransa e'l reis d'Engleterra aguessen guerra essems; e s'il aguen patz ni treva, ades se penet con sos sirventes de far e de mostrar com cascuns era desonratz en aquella patz. E si n'ac de grans bes e de grans mals. Mot fe be sirventes et anc no fes mas doas cansos. El rei d'Arago donet per molher las cansos d'en (G.t) Giraut de Bornelh als sieus sirventesc. Et aquel que cantava per el avia nom Pepiol (Papiol). Et era azautz e cortes; e clamava Rassa lo coms de Bretanha, e'l rei d'Englaterra Oc e No; e'l rei jove so filh, Marinier. E metia tot son sen en mesclar guerras: e fes mesclar lo paire e'l filh d'Englaterra, tan que'l rei jove fo mortz d'un cairel en un castel d'en Bertran de Born.

En Bertran si s vanava qu'el cujava tan valer, que no s pensava que tot son sen l'agues mestier. E pueis lo rei lo pres; e quan fo pres el li demandet si avia tot son sen: que aras vos aura ops. Et el respos, qu'el avia tot lo sen perdut; quar tot lo perdet quan lo rei jove mori. Adoncs se ploret lo rei de so filh; e perdonec li, e l vesti, e l donet terras et honors. E visquet longamen él segle, e pueis se rendet en l'orde de Cistel.

3794, 7225-6, 7614, C.

Be m platz lo dous temps de pascor

Que fai foillas e flors venir;

E platz me quant aug la baudor

Dels auzels, que fan retentir

Lor cant per lo boscatge;

E platz mi quan vei sobre'ls pratz

Tendas e pavaillos fermatz;

Et ai gran alegratge,

Quan vei per campaigna rengatz

Cavaliers e cavals armatz.

E platz mi quan li corredor

Fan las gens e l'aver fugir;

E platz me quan vei apres lor

Gran ren d'armatz ensems venir;

E platz m'en mon coratge,

Quan vei fortz castels asejatz

E barres rotz et esfondratz;

E vei l'ost él rivatge

Tot entorn claus de bons fossatz,

Am lissas et am pals serratz.

Et atressi m platz de senhor

Quan ven premiers à l'envaïr

En caval armat ses temor,

C'aissi fai los sieus enardir

Ab valen vassalatge;

E pois que l'estors es mesclatz,

Quascus deu esser acesmatz

É segr'el d'agradatge:

Quar hom non es à dreg prezatz

Tro qu'a mantz colps pres e donatz.

Lansas e brans, elms de color,

Escutz trencar e desgarnir

Veirem à l'entrar de l'estor,

E manz vassals ensems ferir;

Don anaran aratge

Cavals dels mortz e dels nafratz.

Quan seren en l'estor intratz,

Ja nuls hom de paratge

No pens mas d'asclar caps e bratz: 

Que mais val mortz que vius sobratz.

Ieus dic que tant no m'a sabor

Manjars ni beure ni dormir,

Coma quant aug cridar: à lor!

D'ambas dos partz; et aug enguir

Cavals voiz per l'erbatge;

Et aug cridar: aiatz! aiatz!

E vei cazer per los fossatz

Paucs e grans per l'ombratge; 

E vei los mortz que pels costatz 

An los penons ab los cendatz.

Pros comtessa, per la meillor

Q'om posqu'en tot lo mon cauzir

Vos ten hom, e per la gensor

Q'anc si mires ni ja se mir.

Bietritz, d'aut paratge,

Bona domn'en ditz et en fatz,

Fons on sorzon totas beutatz,

Bella ses maïstratge,

Vostre ric pretz es tan pojatz

Que sobre totz es enansatz.

Donzella d'aut linhatge,

Tal en cui es tota beutatz,

Am fort e sui per leis amatz;

E dona m tal coratge,

Que ja no pens esser sobratz

Per un dels plus outracujatz.

Baros, metetz en gatge

Castels o villas o ciutatz,

Enans c'usquecs nous guerrejatz.

7225, 7614.

Domna, pois de mi nous cal,

E partit m'avetz de vos

Senes totas ocaizos,

No sai o m'en quieira;

Que jamais

Non er per mi aitan jais

Cobratz. E si del semblan

No trob domn' à mon talan;

Que vailla vos qu'ai perduda,

Jamais no volh aver druda.

Pois non posc trobar egal

Tan bell' e que fos tan pros,

Ni sos rics cors tan joios,

De tan bella teira,

Ni tan gais,

Ni sos rics pretz tan verais;

Irai per tot acaptan

De cascun' un bel semblan,

Per far domna soicebuda,

Tro vos me siatz renduda.

Fresca color natural

Pren, Bel Cebelin, de vos,

Eill dous esguart amoros:   

E fatz gran sobreira

Quar rei lais,

Quan res de be nous sofrais.

Midons na Elis deman

Son adreg parlar gaban,

Qu'en don à midons ajuda:

Pois non er fada ni muda.

De Chales la vescomdal

Volh que mi don ad estros

La gol' e las mans amdos.

Pois ten ma careira,

No m biais,

Vers Rocachoart m'eslais

Als pes n'Agnes que m daran:

Qu'Yseut la domn' à Tristan,

Qu'en fo per totz mentaguda,

No'ls ac tan bels à saubuda.

N'Audiartz, si be m vol mal,

Volh que m don de sas faissos,

Que l'estes gen liasos; 

Equar es enteira,

Qu'anc no s frais

S'amors ni s volv' en biais.

A mon Meils-de-be l deman

Son adreit nou cor prezan,

De que par à la véuda

La fassa bon tener nuda.

Domna Faidid' atretal

Volh sas bellas dens en dos,

L'acuillir e'l gent respos

Don es presenteira.

Dins son ais

Mos Bels-Mojols volh que m lais

Sa gaies'e son bel gran;

Equar saub son ben estan

Far, don es reconoguda,

E no s'en cambia ni s muda.

Bel-seigner, ieu nous quier al

Mas que fos tan cobeitos

D'aquesta com soi de vos.

Q'una lecadeira

Amors nais,

Don mos cors es tan lecais,

Mais volh de vos lo deman

Que d'autra tener baisan.

Doncs midons per que m refuda,

Pois sab que tan l'ai volguda?

Papiol, mon Aziman

M'anaras dir en cantan,

Qu'amors es desconoguda

Sai, e d'aut bas cazeguda.

2701, 7225-6, 7614, M.

S'abrils e foillas e flors,

E'l bel matis e'l clar ser

E'l ric joi quez ieu esper

No m'ajudon et amors;

E'l rossinholet qu'aug braire,

E'l nou temps vertz e grazitz

Que ns adutz jois e doussors,

E'l cortes pascors floritz

Midons son ardit no l creis,

O no l merma l'espavens,

Greu m'en venra jauzimens.

Domna, s'ieu quezi socors

Ves vos, non o fi de ver; 

E veus m'al vostre plazer, 

Mi e mos cantz e mas tors. 

E pren comiat del repaire 

On fui tan gent aculhitz, 

On reina pretz e valors. 

E cel que m'en te faiditz,

Per honor de si meteis, 

En fa bos acordamens 

Ab sol los afizamens.

Vostre reptars m'es sabors 

Ric; quar tan cujatz valer, 

Que ses donar per temer 

Volriatz aver lauzors;

E qu'om nous auzes retraire 

S'usquecs fai que descauzitz. 

Mas semblaria m temors 

S'us n'era per mi cobritz

Coms ni vescoms, dux ni reis:

Mas faitz vostres fagz tan gens 

Queus en segan ditz valens.

Dos n'i a guerrejadors, 

Quar an de mal far lezer, 

Que no s sabon captener 

Nul temps meins d'enginhadors, 

Tan amon lansar e traire;

E trob los totz jorns garnitz

Com en Vivian de cors.

Mas ieu no lur soi aizitz; 

Qu'anc à bon pretz non ateis

Rics hom, si jois e jovens

E dos no li'n fo guirens. 

D'autres n'i a bastidors 

Rics homes de gran poder, 

Quar sabon terra tener 

E fan portals e bestors: 

De caus e d'aren' ab caire

Fan murs e voutas e vitz.

E vei los bos manjadors

E fan lurs dos plus petitz, 

Per que lur pretz no lor creis:

Quar aitals captenemens

No val mest las bonas gens.

D'autres n'i a cassadors 

Per la costuma tener, 

Que s fan ric home parer, 

Quar amon cas et austors, 

E corn e taborelaire. 

E vei los tan freolitz 

E mermadas lurs valors; 

E lur pretz es tan frezitz, 

Que res mas bestias o peis 

No lor es obediens,

Ni fa lors comandamens.

Res dels rics tornejadors, 

Si tot s'i gaston l'aver, 

No pot à mon cor plazer, 

Tan los trob galiadors. 

Ric hom que per aver traire

Sec tornejamen plevitz

Per penre sos vavassors, 

Non l'es honors ni arditz,

Mas el non estreing correis, 

Sol qu'ab el s'en an l'argens, 

S'om pois s'en es maldizens.

Rics homes volh qu'ab amors

Sapchan cavallier aver,

E que l sapchon retener

Ab be fag et ab honors;

E qu'om los trob ses cor vaire,

Francs e cortes e cauzitz,

E larcs e bos donadors;

Qu'aissi fon pretz establitz

Qu'om guerrejes ab torneis:

E quaresmes et avens

Fesson soudadiers manens.

Na Tempra, jois m'es cobitz,

Qu'ieu n'ai mai que s'era reis,

Que'l fel mesclat ab eissens

M'es esdevengutz pimens.

Papiol, sias tan arditz,

Pren mon cant e vai n'ab el

A 'n Oc e No: quar prezens

Li fatz de mans digz cozens.

35. Guglielmo de la Tor. La treva. Pos n'Aimerics a fait far mesclança e batailla

35. Guglielmo de la Tor. *

Secondo il testo edito dal Suchier (Denk. I, 323).

La treva.

Pos n'Aimerics a fait far mesclança e batailla 

de na Salvaga, on prez es e valors senz failla, 

e de na Biatrisz sa seror ques trabailla

de tot ço mantener c'a fina valor vailla, 

eu vueill far venir tals que partan lor barailla 

a treva, que non voill del tot la definailla.

Na Biatriz i ven d' Est cui fins prez capdella, 

del marqueset d'Est moiller, on valors renovella,

e de Ravenna i ven n' Esmilla cui apella

fis prez, e de Magon na Biatriz la bella,

e n'Alazaiz sa sor qui sap ja la novella,     (Azalaïs, Azalais)

e de Bresaina i ven madompna n'Adonella.

E de Soraigna i ven na Sandra la cortesa 

e na Berta en cui es beutaz e valors mesa; 

na Mabillia i ven qu' es de totz bes apresa. 

pueis i ven n'Agnes d'Arc on nuilz mals non adesa 

e de Casalot ven na Sufia c'an presa 

jois e prez e valors a lor part e conquesa. 

E de Ponçon i ven n' Esmilla la prezada,

de Cantacabra i ven la bella e l'ensegnada, 

na Caracosa, qu' es per los valens amada.

e de Sarzan i ven n'Aiglina la lauzada, 

e cellas de Plozacs cui jois e prez agrada 

venon a esperon a la treva nomnada.

De Luna eissamen i venon senz faillida 

las dompnas cui jovenz ni valors non oblida; 

e de Casellas pueis venon ses far gandida

las dompnas c'an fin prez ab proesa conplida. 

e de Romaigna i venon las dompnas cui jois guida 

e de Castel i ven na Bruna la grazida.

E del Carret i ven na Comtensos qui zenza

chascuns jorns en fin prez ez en fina valenza. 

e de Coissan i ven n'Averz c'a s'entendenza 

en mantener honor e fina conoissenza. 

aquestas qu'eu ai dit totas ses retenenza, 

venon las trevas far, qu'en aissi lor agenza. 

Aras vos dic que son vengudas ses doptanza

las dompnas e si fan enaisi l'acordanza, 

qu'en las doas serors non aian mais erranza, 

e que la terva dur ses far nulla mesclanza; (terva : treva : tregua)

e s'om de l'una di neguna ren d'onranza, 

que l'autra s' i acort e que n'ai' alegranza. 

Ez enaissi sera la lor trev' alegranza 

e plaira ben als pros lo plaiz e l'acordanza.

* Dalla Biografia, secondo il testo edito dallo Chabaneau (op. cit. p. 104): Guillem de la Tor si fon joglars e fon de Peiregorc, d'un castel qu' om ditz la Tor. e venc en Lombardia; e sabia cansos assatz e s'entendia e chantava ben e gen, e trobava; mas quan volia dire sas cansos, el fazia plus lonc sermon de la razon que non era la cansos. e tolc moiller a Milan... e la menet a Com...

20. Rambaldo di Vaqueiras. Aras cant vei verdejar

20. Rambaldo di Vaqueiras. *

La prima poesia è data secondo il testo ricostituito da P. Meyer (Recueil d'anciens textes bas-latins, provençaux et français, Paris, 1874, p. 89); 

per la seconda si dà la lezione del Bartsch (Crest. prov. p. 128); 

per la terza la lezione d'J pubbl. dallo Stengel (Rivista di filologia romanza, I, 33; cf. Crescini, Araistrigò, Padova, 1887).

Aras cant vei verdejar

pratz e vergiers e boscatges

voil un descort comensar

d'amor per qu' ieu vauc a ratges:

c'una domnam sol amar, (domna 'm : me)

car camjatz l'es sos coratges,

per qu'ieu fauc desacordar

los motz els sons els lengatges.

Ieu so quel que ben non aio,

ni encora non l'averò

per abrilo ni per maio, 

si per ma dona no l'ò; 

e s'entendo son lengaio

sa gran beutat dir non so. 

plus fresqu' es que flor de glaio

e ia no m'en partirò.

Bele douse dame chiere, 

a vos mi don e m'otroi; 

ja n'aurai mais joi' entiere

si ne vos ai e vos moi. 

molt estes male guerriere 

si je muer par bone foi, 

mais ja per nule maniere 

nom partrai de vostre loi.

Dauna, io mi rent a bos, 

coar es la mas bon' e bera

c'anc fos, e gaillard' e pros, 

ab que nom fossetz tan fera. 

mout abetz beras haisos

ab color fresqu' e noera. 

bos m'abetz, e sibs agos 

nom sofraisera hiera.

Mas tan temo vostro pleito 

todo 'n soi escarmentado, 

per vos ai pen' e maltreito

e mio corpo lazerado.

la not cant jatz en mio leito

soi mochas vetz resperado; 

per vos era non porfeito; 

faillit soi en mon cuidado, 

mais que faillir non cuide io. 

Bels Cavaliers, tant es cars 

lo vostr' onratz senhoratges 

que cada iorno m'esglaio. 

oimè! lasso, que farò 

si cele que j'ai plus chiere

me tue, ne sai por quoi?

ma dauna, he que dei bos 

ni peu cap santa Quitera, 

mon corasso m'avetz traito

e mot gen favlan furtado.

Truan, mala guerra sai volon comensar

domnas d'esta terra e vilas contrafar;

en plan o en serra cuidan ciutat levar

ab tors: quar tan poja l'onors

de leis que sotzterra lor pretz el seu ten car,

qu'es flors de totas las melhors

na Biatritz; car tan lor es sobreira 

qu'encontra leis faran totas senheira

e guerr' e foc e fum e polvereira. 

La ciutatz s'ajosta e fan murs e fossatz;

domnas ses semosta i venon daus totz latz,

si que pretz lor costa e jovens e beutatz;

em pes quel filha del marques

n'aura dura josta, car a conques en patz

totz bes e totz bos aibs cortes:

e quar es pros e franch' e de bon aire,

non estara plus en patz que sos paire,

que tornatz es a lansar et a traire.

Domnas de Versilha volon venir en l'ost, 

Sebeli e Guilha e na Riqueta tost;

la mair' e la filha d'Amsiza, quan que cost; 

apres ven de Lenta n'Agnes,

e de Ventamilha na Guilhelm' a rescost.

empres er la ciutatz en pes;

de Canaves i ven molt gran companha,

de Surian e domnas de Romanha,

na Tomazin' el domna de Suranha.

Engles e Garsenda e Palmeir' e n'Auditz,

n'Aud' e na Berlenda, n'Agnes e n' Eloitz

volon que lor renda joven na Biatritz;

sino, las domnas de Ponso

en querran esmenda, e lai part Mon Senitz

somo la ciutatz contenso,

qu'ades guerrei leis qu'es tan bon' e bela, 

que sos gens cors tol a la damizela

et a totas color fresqu' e novela.

Maria la Sarda el domna de San Jortz, 

Berta e Bastarda, mandon tot lor esfortz,

que joves Lombarda no rest de sai los portz: 

e sai qu'a na Biatritz plai,

quar lor reiregarda non pot esser tan fortz

qu'esglai lo seu fin pretz verai.

donan lor senh, cavalcon ab gran joia,

fag an ciutat et an li mes nom Troia, 

poestat fan de mi dons de Savoia.

La ciutatz se vana de far ost en arrenc, 

e sonal campana, e lo velhs comuns venc, (sona 'l : la)

e ditz per ufana que chascuna desrenc; 

pois ditz quel bela Biatritz

es tan sobeirana de so quel comuns tenc, 

c'aunitz n'es totz e desconfitz. 

trompas sonon e la poestatz cria: 

demandem li beutat e cortezia, 

pretz e joven; e totas cridon: sia!

La ciutatz si voja e movon lor carros, 

el velhs comuns poja, e geton en lor dos 

cuirassas de troja ab que cobron lor os: 

gambais an et arcs e carcais,

e non temon ploja, ni mals temps no lor nos. 

oimais veirem de grans assais.

de totas partz comenson a combatre,

na Biatritz cuidan de pretz abatre;

mas non lor val, s'eran per una quatre.

Per lor murs a fendre fan engenhs e carels, 

e calabres tendre, gossas e manganels,

foc grezesc acendre e fan volar cairels:

de jos trencan murs  ab bossos.

per tal nos vol rendre lo seus gentils cors bels

joios, fatz de belas faissos.

totas cridan: ajuda tras l'esponda !

l'un' a l'autra; la tersa ten la fronda,

e trazon tuit li genh a la redonda.

Na Biatritz monta, e vas de pretz garnir;

ausberc ni porponta non vol, e vai ferir;

cel' ab cui s'afronta es certa de morir;

e jonh et abat prop e lonh.

fait a mainta jonta si que l'ost fai partir;

pois ponh tant quel carros desjonh.

tanta n'a prez' e derrocad' e morta, 

quel velhs comuns s'esmaj' es desconorta, 

si qu'a Troia l'enclaus dedins la porta.

Na Biatritz, bem plai quar etz estorta 

a las velhas, quel vostres gens cors porta 

pretz e joven qu'a lor proeza morta.

Bels Cavaliers, vostr' amors mi conorta 

em dona joi e m'alegr' em deporta, 

quant autra gens s'esmaj' desconorta.

Valen marques, ja non dires de no, 

Que aitals es, e vos sabes ben, co 

Me tinc ab vos a lei de vassal bo, 

Cant assailhis a Cart entr' Ast e No,

Cant quatre sen cavalier a tenso

Vos encausavon feren az espero,

Que nos tengron ab vos mas sol trei companho; 

Can vos tornes e feris de rando,

Pueis vos dupteron mais non fai grua falco, 

Et hieu tornei a vos als magers obs quei fo, 

Que hieu e vos levem malamen del sablo 

N' Albert marques, qu' era cazutz jos de l'arso. 

Et ai estat per vos en mainta greu preiszo

Per vostra guerra, e n' ai a vostre pro 

Fag maint asaut e ars mainta maiszo 

E pres maint colp d'outra la garniszo;

E vos cobri a Messina d'un gros gambaiszo, 

En la batailha vos vinc en tal sazo, 

Queus ferion pel peitz e pel mento 

Dartz e cairels, sagetas, lanseo, 

Lansas e bran e coutel e fausso. 

Pueissas prezes Randas e Paterno, 

E Lissel e Termen e Lendin e Aido 

E Pale e Pazerma e Qualatagiro.

Fui als premiers sotz vostre gonfano; 

E cant' anes per crozat ves Saisso, 

Hieu non avia en cor, dieus m' o perdo, 

Que passes mar, mai per vostre resso 

Levei la cros e pris confessio. 

Adoncx era pres lo fort castel Babo

E no m' avion re forfag li Grifo, 

Quel vinc ab vos guerrejar a bando 

Entorn Blaquerna sotz vostre gonfano.

E portei armas a lei de Bramansso 

D'elm e d'ausberc e de gros gambaiszo, 

Em combatei sotz la tor al peiro 

Ei fui nafratz d' outra la garniszo 

E portei armas aitan pres del domo 

Tro que cazec l' emperador fello,

Sel que destruis son frair' ab trassio. 

Can vil gran fum e la flam' el quarbo 

El mur traucat en maint luec ses bon so 

Eus vi el camp per combatr' a bando 

Ab tan gran gaug ses tota failhiszo, 

Que dels lur eron sent per un per raszo, 

E vos penses de far defensio,

El coms de Flandres e Franses e Breto, 

Alamans e Lombartz e Borgonho 

Et Espanhols, Proensals e Gasco, 

Tug fom rengat, cavalier e pezo,

E l'emperaire ab lo cor al talo 

Esperonet son malvais companho; 

Plen d' avolesza pueis volgron li gloto, 

Nos fom austor et ilh foron aigro, 

E cassem los si com lops fai mouto; 

E l' emperaire fugit s' en a lairo 

E laisset nos palais Boqualeo 

E sa filha ab la cara faisso.

...

E franc vassal, can ser a senher bo, 

Pretz l' en rema e an bon guizardo; 

Perq' ieu esper de vos esmend' e do, 

Senher marques.

* Biografia, v. in Facsimili di antichi manoscritti, tav. 2; inoltre, dallo Chabaneau (op. cit. p. 86): 

... Et apellava la Bel Cavalier; e per aiso l'apelava enaisi que a 'n Raembaut segui aitals aventura, que podia vezer madona Biatritz quant el volia, sol qu'ela fos en sa cambra, per un espiraill don neguns non s'apercebia. et un jorn venc lo marques de cassar & entret en la cambra e mes la soa espaza a costa d'un leit e tornet s'en foras. e madona Biatritz remas en cambra e despoillet se son sobrecot e remas en gonella. e tolc l'espaza e se la ceins a lei de cavallier, e trasia la for del fuer e getet la en alt, e pres la en sa ma e menet se l'al bratz d'una part e d'autra de l'espasa, e tornet la costa del leit. et en Raembautz de Vaqueiras vezia tot so que vos ai dich per lo spiraill. don per aiso l'appellet pois totas vez Bel Cavalier en sas chansos...