Guillem de Berguedan. Chansoneta leu e plana; Mataplana; A, marques, marques, marques,

Guillem de Berguedan.

Chansoneta leu e plana,

leugereta, ses ufana,

farai eu de mo marques,

del trachor de Mataplana,

qu'es d'engan farsitz e ples.

A, marques, marques, marques,

d'engans etz farsitz e ples.

Marques, ben aion las peiras

a Melgurs de pres Someiras,

on perdetz de las denz tres; 

ni ten dan que las primeiras

i son e no i paron ges.

A, marques, marques, marques,

d'engans etz farsitz e ples.

Del bratz no us pretz una figa,

que cabrella par de biga

e portatz lo mal estes;

obs i auria ortiga

que l nervi vos estendes.

A, marques, marques, marques,

d'engans etz farsitz e ples.

Marques, qui en vos se fia,

n'i a amor ni paria,

gardar se deu totas ves,

com que s'ane de clar dia,

de noit ab vos non an ges.

A, marques, marques, marques,

d'engans etz farsitz e ples.

Marques, ben es fols qui s vana

c'ab vos tenga meliana,

meins de braias de cort ves,

et anc fils de cristiana

peior costuma no mes.

A, marques, marques, marques,

d'engans etz farsitz e ples.

Aimerics de Sarlat. Fis e leials e senes totz engans,

Aimerics de Sarlat.

7225.

N Aimerics de Sarlat si fo de Peiregors, d'un ric borc que a nom Sarlat. 

E fo fort subtils de dire e d'entendre, e venc trobaire; mas no fe mas una canson.

2701, 3794, 7225, 7614, 7698, C.

Fis e leials e senes totz engans,

Aissi com cel qu'a tot conques amors

Aurai en patz sufertas mas dolors,

Que no m'anei plangen ni rancuran;

Ans ai amat longamen desamatz

Vostre gen cors, domna cui me soi datz:

E pos merces ab vos re no m valria.

Partirai m'en. Ieu? no, que non poiria.

Ans atendrai sufren e mercejan

Tro que de vos aia qualque secors,

Qu'à tot lo mens m'er l'atendres honors,

Bona domna, si tot trai greus afan;

Quar trop val mais rics esperars onratz

Q'un avol dos don hom no fos pagatz:

Per queus serai amics ses felonia

Tro queus apel senes mentir amia.

Bona domna foldat fas per semblan,

Quar en cantan retrai vostras lauzors

E la beutat don sobratz las gensors.

Ops me fora queus anes oblidan;

Qu'orgolh von creis eus merm' umilitatz

On plus vos vau membran vostras beutatz,

Ni la ricor qu'es aut sobre la mia: 

Dir n'ai donc mal? Non ieu, que mentiria.

Mil vetz m'aurai acordat en pessan

Cossius pregues, pois rete m'en paors;

Quar oblidar me fai vostras lauzors,

Si com hom fai dins del Tertre camian

Que s'oblida so don es plus membratz, 

Qu'ieu quan vos vei soi del tot oblidatz:

Mas per so m plai quar falhimens seria

S'ieu per deman lo bon solatz perdia.

Domna be sai qu'à vostra valor gran

M'aonda cor e sofranh nie ricors;

E si del plus podetz faire clamors,

Vos et amors volh siatz à mon dan.

E si per so, domna, m'ocaizonatz

Quar no soi rics, sera tortz e peccatz:

Que tan no val neguna manentia

Endreg d'amor com fis cor ses bauzia.

Pros comtessa, lo nom de Sobeiratz

Es lonh auzit e per tot eissaussatz: 

Per qu'ieu no m part de vostra senhoria,

Ni no farai aitan com vius estia.

XI, Peire Vidal, pois far m' aven tenson,

XI.

Peire Vidal, pois far m' aven tenson,

No us sia greu, si us deman per cabal

Per cal razon avetz sen tan venal

En mains afars que no us tornon a pron,

Et en trobar avetz saber e sen;

E qui ja viels en aital loc aten,

Et en joven n' es atressi passatz,

Meins a de ben que si ja no fos natz.

Blacatz, non tenc ges votre chan per bon,

Car anc partis plaich tan descominal;

Qu' ieu ai bon sen e fin e natural

En totz afars, per que m par ben qui m son;

Et ai m' amor messa e mon joven

En la melhor et en la plus valen;

Non vuoill perdre los guizardos ni 'ls gratz,

E qui s recre es vilans e malvatz.

Peire Vidal, ja la vostra razon

Non vuoill aver ab mi dons que tan val;

Qu' ieu ill vuoill servir a totz jorns per engal,

E d' ela m platz que m fassa guizardon;

Et a vos lais lo lonc atendemen

Senes jauzir, qu' ieu vuoill lo jauzimen;

Car loncs atens senes joi, so sapchatz,

Es jois perdutz, qu' anc uns non fon cobratz.

Blacatz, ges ieu no sui d' aital faisson

Cum vos autres, a cui d' amor non cal;

Gran jornada vuoill far per bon ostal,

E lonc servir per recebre gent don;

Non es fis drutz cel que s camja soven

Ni bona domna cella qui l' o cossen;

Non es amors, ans es engans proatz,

S' uoi enqueretz, e deman o laissatz.

    Blacas et Pierre Vidal.