Albertetz de Gapenses, Sestaro, Sisteron. Gaucelm Faiditz, eu vos deman

Albertetz de Gapenses o de Sestaro. (Sisteron)

Florissoit en 1215. Hist. génér. de Provence. T. II, p. 410.

7225-6.

Gaucelm Faiditz, eu vos deman

Qual vos par que sion major

O li ben o li mal d'amor,

E digatz m'en vostre semblan;

Que'l ben es tan dous e tan bos

E'l mal tan durs et angoissos,

Qu'en quascun podetz pro cauzir

Razos, s'o voletz mantenir.

Albertz, li maltrag son tan gran

E'ls bes de tan fina sabor,

Greu trobaretz mais amador

Non anes él cauzir dubtan.

Mas ieu dic que'l bes amoros

Es majer que'l mal per un dos

Ad amic que sab gen servir,

Amar, e celar e sufrir.

Gaucelm, ja no vos en creiran

Li conoissen entendedor,

Que vos e l'autre trobador

Vei qu'ades vos anatz claman:

E pois ieu aug dire à vos

Et als autres en lor cansos,

Qu'anc d'amor nous poguetz jauzir:

On son aquest ben queus aug dir?

Albertz, mant fin leial aman

An fait per descujar clamor,

Qu'ieu vei qu'il prendon gran honor 

E gran be cazen e levan.

E pois es en amar razos

Que'l mals deu esser bes e pros;

E tot quant en pot avenir

Deu drut en be prendr' e grazir.

Gaucelm, cil qu'aman ab engan

No senton maltrag ni dolor;

Ni hom no pot fort gran valor

Aver ses pen' e ses afan;

Ni nuls hom no pot esser pros

Ses maltrag ni far messios;

Et amors fetz n Andrieu morir,

Qu'anc bes que fos no l poc garir.

Albertz, tut li maltragz e'l dan

Perdon lor fors' e lor vigor,

E tornan en doussa sabor

Lai on nul bes s'en trai enan:

Que ja amics, pos er joios,

Non er membratz qu'anc iratz fos,

Aissi fa'l bes lo mal fugir:

Donc es el majer ses fallir.

Cadenet. L'autrier lonc un bos folhos

Cadenet.

Florissait en 1180. Hist. génér. de Provence. T. II, p. 384.

7225.

Cadenet si fo de Proensa, d'un castel que a nom Cadenet, qu'es en la riba de Durensa él comtat de Forcalquier. Fils fo d'un paubre cavallier; e quant el era enfant, lo castel de Cadenet si fo destrutz e raubatz per la gent del comte de Tolosa, e li ome de la terra mortz, et el pres e menat en Tolsan per un cavalier qu'avia nom Guillem de Lantar; et el lo noiri en sa maison. Et el venc bos, bel e cortes, e saup ben trobar e cantar e parlar; et apres à trobar coplas e sirventes. E parti se del seingnor que l'avia noirit et anet s'en per cortz; e fez se joglar e fazia se apellar baguas. Lonc temps anet à pe desastrucs per lo mon. E venc s'en en Proensa, e nuillz hom no lo conoissia; e fes se clamar Cadenet, e comenset à far cansos bonas e bellas. En Raimonz Leugier, de dos fraires del evesquat de Nissa, lo mes en arnes et en honor: en Blancatz l'onora e l fetz grans bens. Longa sazon ac gran ben e gran honor; e pois el se rendet à l'Ospital e lai definet. E tot lo sieu faig eu saubi per auzir e per vezer.

7225.

L'autrier lonc un bos folhos

Trobei en ma via

Un pastor mot angoissos

Cantan; e dizia

Sa cansos: amors,

Ie m clam dels lauzenjadors;

Quar la dolors

Qu'a per els m'amia

Mi fai pietz que'l mia.

Pastre, lauzengier gelos

M'onron quascun dia;

E dizon qu'ieu soi joios

De tal drudaria

Don mi creis honors;

E non ai d'autre socors.

Pero'l paors

Que cil n'an seria 

Vertatz, s'ieu podia.

Senher, pos lo fol ressos

De lor gelozia

Vos platz, pauc es amoros; 

Que lor felonia

Part mans amadors: 

Qu'ieu pert midons pels trachors.

Et es errors

E dobla folia

Qui en lor se fia.

Pastre, ieu no soi ges vos;

Que'l maritz volria 

Bates midons à sazos, 

Qu'adoncs la m daria; 

Quar per aitals flors 

Las an li gelos pejors: 

Qu'ab las melhors

Ten dan vilania

Ei val cortezia.

XV, Ples de tristor, marritz e doloiros

XV.

Ples de tristor, marritz e doloiros

Comens est planh per lo dan remembrar

E per lo dol, que tart deu oblidar,

Que Narbones sosten tant angoissos,

Per la greu mort del senhor de Narbona,

Del vescomt En Amalric mo senhor,

Don deu aver trebalh tota gens bona

E la sua pus lonc temps e maior.

Qui senhor pert aver deu gran dolor,

Quan l' a humil e franc, ses forsa far,

E 'l pot ab be a son voler menar,

Et es senher naturals ab honor;

Doncx perdut l' a Narbones e Narbona,

Don deu esser totz lo pobles ploros,

Quar elh era la pus nobla persona

Per dreg dever que d' est lenguatge fos.

Si de poder estes tan auctoros

Com de dever fazen son benestar,

Fera de si per tot lo mon parlar

Per ardimen, per sen e per faitz bos,

Qu' ab Narbones tot sol et ab Narbona

S' es d' enemicx honratz, don a lauzor

Elh e sas gens, qui liautatz razona,

Quar senhor an ab bona fe amor.

Anc nulh vil fag vergonhos ab follor

Ni ab enjan no 'l vi hom comensar,

Ans s' es volgutz ab liautat menar

Part son poder, fazen faitz de valor,

E plazia 'l tant lo faitz de Narbona

Qu' autres estars non l' era saboros,

Ni anc nulh temps ab voluntat fellona

A son poble non fon contrarios.

Dieus, de salvar las armas poderos,

Per merce us prec que denhetz perdonar,

Senher, si us platz, a l' arma, e luec dar

En paradis entr' els sans pres de vos,

De mo senhor N Amalric de Narbona,

E son poble gardatz de deshonor,

E sos efans, aissi quon dreitz o dona,

Tengan en patz lur terra ses clamor.

Si s pessa ben lo pobles de Narbona

Quals dans li es la mortz de mo senhor,

Del conortar leu non a razon bona,

Ans l' a mout gran qu' en sospir e qu' en plor.

Aissi cum suelh del senhor de Narbona

Chantar ab gaug, ne chanti ab dolor,

Quar l' ai perdut, de que ai ma persona 

Ab marrimen plena de gran tristor.

Giraud Riquier.