Ms. de Paris, lat. 1139, fol. 49. - Paul Meyer, Anciennes poésies religieuses en langue d'oc, Paris 1860, p. 18-19 (Bibliothèque de l'École des Chartes, 21e année, Paris 1860, p. 496-97). - Grdr. § 10, p. 10.
Versus sancte Marie.
O Maria, Deu maire,
domna, preia per nos
to fil, lo glorios.
E lo pair' aissamen
preia per tota jen;
e c'el no nos socor,
tornat nos es a plor.
Confession.
Eva creet serpen
un agel resplanden;
per so nos en vai gen:
Deus n'es om veramen.
Car de femna nasquet,
Deus la femna salvet,
e per quo nasquet hom
que garit en fos hom.
Eva, moler Adam,
quar creet lo Setam,
nos mes en tal afan
per qu'avem set e fam.
Eva mot foleet,
quar d'equeu frut manjet
que Deus li devedet,
e cel que la creet.
E c'el no la'n crees
e deu fruit no manjes,
ja no murira hom
chi ames nostre Don;
Mas tan fora de gen
ch'aner' a garimen;
cil chi perdut seran
ja per re no foran.
Adam menjet lo fruit
per que fom perdut tuit:
Adam no creet Deu,
a tot nos en vai greu.
Deus receubt per lui mort
e la crot a gran tort,
e resors al tert dia,
si com o dii Maria.
Aus apostols cumtet
e dis c'ap Deu parlet,
qu'eu poi de Galilea
viu lo verem angera.
Vida, qui mort aucis,
nos donet paradis;
gloria aisamen
nos do Deus veramen!
