Guillem Ademar ou Aymar.
2701, 7225, 7614.
Guillem Ademar fon de Gavaudan, d'un castel que a nom Merueis. Gentils hom era, filh d'un cavallier que non era rics ni manens:
el seingner de Merueis si l fetz cavallier. Et el era valens e gen parlans, e fon bos trobaires. E non poc mantener cavalaria e fes se joglars. E fon mot grazit per là on estet, per los baros e per las domnas; e fes mantas bonas chansos. E cant ac lonc temps vescut el se rendet à l'orde de Granmon, e là muri.
3794, 7225-6, 7614, 7698, C, M.
El temps d'estiu quan par la flor él brolh
E son bradiu li auzelet d'orgolh,
Ai pessamen d'amor qui m dezacolh,
Que nulla re tan no dezir ni volh.
Ai! douss' amia,
Malaus viron me olh
Si cauzimens no m guia.
Vejaire m'es qu'ieu no soi cel que solh,
Si m'a sospres us grans mals don mi dolh.
Don ieu morrai, si la dolor no m tolh
Ab un dous bais dins cambras o sotz folh.
Ai! douss' amia,
Malaus viron me olh
Si cauzimens no m guia.
Membreus, domna, quan me dest senhoriu.
De vos servir m'autrei tan com eu viu.
Tortz er sius prec, qu'anc ren no vos forfiu,
Ja no m poscan dan tener enemiu.
Ai! douss' amia,
Qu'à son coral amiu
No deu hom far guanchia.
Neguna res non es ta fort esquiu
Com es d'amor lauzenjador bradiu,
Qu'aia poder que menta so que pliu;
Mas fos verais e tengues so que diu.
Ai! douss' amia,
Qu'à son coral amiu
No deu hom far guanchia.
Ieu ai ja vist home, que conois fort
Et a legit negromansi' e sort,
Trahit per femn' à peccat et à tort;
Et ieu, lasset, no m'en tenc per estort.
Ai! douss' amia,
Guidatz me à bon port,
Si dieus vos benezia.
Jamais no volh cant ni ris ni deport,
S'era no m fai la bell' ab si acort.
Si'n breu de temps no fai de que m cofort.
Ai! douss' amia,
Guidatz me à bon port,
Si dieus vos benezia.
