Albertz Marques. Domna, à vos me coman,

Albertz Marques.

2701, 7225.

Albertz Marques si fo dels marques de Malespina. Valens hom fo e larcs, e cortes et enseignatz; e sab ben far coblas e sirventes e cansos.

2701.

Domna, à vos me coman,

Qu'anc res mai non amei tan.

Amics, be vos dic eus man

Qu'ieu farai vostre coman.

Domna, trop mi vai tarzan.

Amics, ja noi auretz dan.

Domna, à la mia fe

Morrai s'aissi gaire m te.

Amics membre vos de me,

Qu'ieus am de cor e de fe.

Domn'aiatz en donc merce.

Amics, si aurai eu be.

Be soi gai et amoros, 

Domna, per l'amor de vos. 

Amics, lo meu cor joios 

Es vostre tota sazos.

Domn'autrejatz lo me vos? 

O ieu, amics bels e bos.

Domna, per vos me cofort

E fas canson e deport. 

Amics, ges non avetz tort,

Que be sabetz queus am fort.

Domna, qo er del conort?

Amics, bona fe vos port.

Be soi garitz ab aitan, 

Domna, de pen' e d'afan. 

Amics, sufren, mercejan

Conqueron li fin aman.

Domna, trop me greva'l dan. 

Amics, ieus reten baizan.

Domna, doncs à vos mi ren

De mas junchas humilmen. 

Marques, en trop d'onramen

Cujatz pujar veramen.

Domna, qu'ieus am finamen.

Marques, e tu fas no-sen.

Domna, molt ai gran talan

Queus tengues à mon coman.

Marques, be m n'irai gardan

E dizetz folia gran.

Domna, ja noi agratz dan.

Marques, no m'en pliu en tan.

XI, Mantas vetz sui enqueritz

XI.

 

Mantas vetz sui enqueritz

En cort cossi vers no fatz,

Per qu' ieu vuelh si' apelatz,

E sia lurs lo chauzitz,

Chanso o vers aquest chan;

E respon als demandan

Qu' om non troba ni sap devezio,

Mas sol lo nom, entre vers e chanso.

 

Qu' ieu ai motz mascles auzitz

En chansonetas assatz,

E motz femenis pauzatz

En verses bos e grazitz;

E cortz sonetz e cochans

Ai ieu auzit en verses mans,

E chansos ai auzidas ab lonc so,

E 'ls motz d' amdos d' un gran, e 'l chan d' un to.

 

E s' ieu en sui desmentitz

Qu' aisso no sia vertatz,

No er hom per me blasmatz,

Si per dreg m' o contraditz;

Ans n' er sos sabers plus grans

Entr' els bos, e 'l mieus mermans,

Si d' aisso m pot venser segon razo;

Qu' ieu non ai ges tot lo sen Salamo.

 

Quar es de son loc partitz

Domneys, que ja fon prezatz,

Mi sui alques desviatz

D' amor, tan n' estauc marritz!

Qu' entr' amairitz et amans

S' es m' es us pales enjans,

Qu' enjanan cre l' us l' autre far son pro,

E no i guardon temps ni per que ni quo.

 

Qu' ieu vi, ans que fo faiditz,

Si fos per amor donatz

Us cordos, qu' adreg solatz

N' issia e ricx covitz;

Per que m par que dur dos tans

Us mes no fazia us ans,

Quan renhava domneys ses tracio;

Greu es qui ve com es e sap com fo.

 

E non es tan relenquitz,

Sitot mi sui dezamatz,

Qu' ieu no sia enamoratz

De tal qu' es sima e razitz

De pretz, tan qu' a me es dans;

Pus la valors e 'l semblans

Son assemblat en tan bella faisso

Qu' om no i pot neys pessar meliurazo.

 

Ai! belh cors cars, gen noiritz,

Adregz e gen faissonatz,

So qu' ie us vuelh dir devinatz;

Qu' ieu no sui ges tant arditz

Que us prec que m' ametz, abans

Vos clam merce merceyans.

Sufretz qu' ie us am e no us quier autre do,

E ges d' aquest no m devetz dir de no.

 

Vas Malespina vai chans

Al pro Guillem qu' es prezans,

Qu' elh aprenda de tu los motz e 'l so,

Qual que s vuelha per vers o per chanso.

 

Na Beatritz d' Est, l' enans

De vos mi platz, que s fai grans;

En vos lauzar s' en son pres tug li bo,

Per qu' ieu de vos dauri mon vers chanso.

 

Aimeri de Peguilain.