Richart de Berbezilh.
Atressi cum lo leos
que es tant fers quan s'irais
de son leonel, quan nais
mortz ses alen e ses vida,
et ab sa votz quan l'escrida
lo fai reviur' et anar,
atressi pot de mi far
ma bona domn' et amors
e m garir de mas dolors.
Totas las gaias sazos
venon, et abrils e mais:
ben degra venir oimais
la mia bon' escarida;
trop s'es amors endormida
que m donet poder d'amar
ses ardimen de preiar.
Ai, quantas bonas honors
m'a tout temens' e paors!
Rics fora lo guizardos
e mout fis e mout verais;
per que m'abellis lo fais,
si sa merces no m'oblida.
Aissi cum de nau perida,
don res non pot escampar
mas per forsa de nadar,
atressi for' eu ressors,
domn', ab un pauc de socors.
Marrit mi ten e joios,
soven chan, soven m'irais,
soven magrisc et engrais,
c'aissi s'es en mi partida
amors joioz' e marrida;
ab rire et ab jogar,
ab consir et ab pensar
mostra sas ricas valors
a mi entre ls ris e ls plors.
Totas las bellas faissos
del mon son en vos, e mais,
domna, c'anc bes no i sofrais,
de totas valors complida.
Si fossetz d'amar ardida,
ren no i pogr' om meillurar:
ab tot so etz vos ses par,
d'onor, e de beutat flors.
Domna, Deus vos sal e us gar,
c'om ren non pot meillurar
en vostras finas lauzors;
mas per vos m'auci amors.
