Guillems Figuieira, Figuera. No m laissarai per paor

Guillems Figuieira.

7225.

Guillems Figuera si fo de Tolosa, fils d'un sartor et el fo sastre. E quant li Frances aguen Tolosa si s'en venc en Lombardia. E sap ben cantar, e fez se joglar entre los (citaudis) citadins. Non fo hom que saubes caber entre'ls baros ni entre la bona gen, mas mout se fez grazir als arlots et als putans et als hostes taverniers. E s'el vezia bon home de cort venir lai on el estava, il n'era tristz e dolens; et ades se penava de lui abaissar e de levar los arlotz.

7225, 7614.

No m laissarai per paor

Q'un sirventes no labor

En servir dels fals clergatz;

E quan sera laboratz,

Conoisseran li pluzor 

L'engan e la felonia

Que mou de falsa clerzia;

Que lai on an mais forsa ni poder

Fan plus de mal e plus de desplazer.

Aquist fals prezicador

An mes lo segl' en error;

Qu'il fan los mortals peccatz.

Pos cels cui an prezicatz

Fan so que ven far à lor,

E tug segon orba via:

Doncs si l'uns orbs l'autre guia

No van andui en la fossa cazer?

Si fan, so dis dieus qu'en sab be lo ver.

Vers es que nostre pastor

Son tornat lop raubador,

Qu'il rauban devas totz latz.

E mostran semblan de patz,

E confortan ab doussor

Las oveillas noit e dia,

Pos quas las an en bailia

Et il las fan morir e decazer

Ist fals pastor, don ieu m'en desesper.

Pois fan autre dezonor

Al segl' et à dieu major;

Que s'un d'els ab femna jatz,

Lendema tot orrezatz

Tenra'l cors nostre senhor;

Et es mortal eretgia:

Que nul preire no deuria

Ab sa putan orrezar aquel ser

Que lendeman deja'l cors dieu tener.

E si vos en fatz clamor,

Seran vos encuzador

E seretz n'escumenjatz;

Ni, s'aver no lor donatz,

Ab els non aures amor

Ni amistat ni paria.

Vergina Sancta Maria,

Domna sius platz laissas me'l jorn vezer

Que 'ls posca pauc dubtar e mens temer.

Vai sirventes, ten la via,

E di m'à falsa clerzia 

Qu'aicel es mortz qui s met en son poder:

Qu'à Toloza ne sab hom be lo ver.

Bertran Carbonel. Per espassar l'ira e la dolor

Bertran Carbonel.

Florissoit en 1200. Hist. génér. de Provence. T. II, p. 403.

2701.

Per espassar l'ira e la dolor

Qu'ai dins mon cor, e per confizamen

Qu'ai bon en dieu, fas lo comensamen

D'un sirventes contra la gran folor

Que fals clergue fan sotz bella semblansa;

Qu'il dizon be, mas en vei ses dubtansa

Qu'il fan tot mal, don ieu ai dolor gran,

Quar cel que vai la lei de dieu mostran

Degra ben far e seguir dreg semdier:

Mas cobeitat fai home messongier.

Laia cauza es tengud' al doctor,

So dis Catos, quan nescis lo repren:

E qui mais val mais fai de falhimen,

Quan falh en re, que us hom ses valor.

Qui prezica qu'aiam en dieu fiansa

E fassam be per la su' amistansa

Certas ben dis; mas lo repres deman

Qu'o dis per que fai nul fach mal estan;

Que honestat non porta costalier

Ni fier ni franh ni fai fach de murtrier.

Ai! fals clergue, messongier, traïdor,

Perjur, lairo, putanier, descrezen,

Tan fatz de mal quascun jorn à prezen

Que tot lo mon avetz mes en error.

Anc Sans Peire non tenc captal en Fransa

Ni fetz renou, ans tenc drech la balansa

De liautat: no fatz vos pas semblan,

Que per argen anatz à tort vedan?

Pueis n'absolvetz, pueis nos datz empachier

Pueis ses argen noi trob'om dreichurier.

No m crezatz pas si fol entendedor

Blasme totz clercs, mas los fals solamen;

Ni d'autra part no vazan entenden

Qu'aisso diga per dubtansa de lor:

Mas que m plagra fezesson acordansa

Dels reis que an guerr'e dezacordansa,

Si qu'outra mar passesson est'autr' an

El Papa ab els, e lai fezesson tan

Que crestiantat s'en dones alegrier:

E valgra mai, qu'encar son sà guerrier.

Ar es ben drech, pos ieu n'ai dich blasmor,

Que'l be que fan laus e vaza dizen:

Drap de color e vaissela d'argen

Refudan tot per dieu nostre senhor. 

Aissi ls gart dieus de mal e de pezansa

Com els non an ni orgolh ni bobansa,

Ni riquezas no van cobezejan,

Ni joc d'amor; mas autre dieu non an.

Adoncs mostran quan mueian qu'en l'armier

S'en vai l'arma e la carn él carnier.

Al plus privat Proensals ses dubtansa

Que huei viva e de mais d'alegransa

Vai sirventes, à cel on quar lai van

Miei sirventes, dir que'l pretz qu'entrenan

Sosten que l gart de fals clercs; quar leugier 

Son à mal far e fals e messongier.

2701.

Tan rics clergues vei trasgitar

Enaissi co'l trasgitaire, 

Que'l filha qu'an de comaire

Fan lor nept' al maridar. 

Et atrob ne d'autres fols vers

Quez an tan d'ipocrisia, 

Qu'om no conois lor bauzia 

Ni l'engans don lor ven l'avers.

Falses clergues, e qual devers

Es fassas tan gran folia, 

E que'l be mostres tot dia? 

Es fols doncs vostres volers. 

Bos pastres no deu hom pregar 

Sas fedas per nul afaire; 

E que vos o vulhatz faire 

Qu'es pastor, fariatz à cremar.

Qui ben vol de dieu prezicar

No deu esser fols ventaire 

Quar fols es lo prezicaire

Que ben ditz e vol mal far. 

E fols si no l destrenh temers,

E fols qui s fenh que bos sia,

E fols cel que dieus oblia,

E fols qui sec sos vas plazers.

On que s'an lo devis poders

Sab qu'als clers fai bona via;

E sab be la trichairia

Dels fals ples de malsabers; 

E sab com per outracujar

An portels tras lor repaire, 

Per on intran li cofraire 

Vergonhos quan van cofessar.

Lo mal qu'il fan deu hom blasmar

E'l be grazir e retraire.

Ufana no lor plai gaire,

Qu'aisso lor posc ieu lauzar,

Ni rics manjars ni rics jazers,

Ni orgolh ni felonia;

Mas empero tota via

Fan so qu'à dieus es desplazers.

Cel hom cui es fis pretz vers,

Sirventes, e cortezia,

Al mieu car senhor t'envia

Dir qu'ie l prec que s gar de fals clers;

E qu'ieu soi sieus ses bauzia

Per far e dir totz sos plazers.