Cercamons. Quan l'aura doussa s'amarzis

Cercamons.

7225.

Cercamons si fo uns joglars de Gascoingna, e trobet vers e pastoretas à la usanza antiga. E cerquet tot lo mon lai on poc anar, e per so fez se dire Cercamons.

2701, 7225.

Quan l'aura doussa s'amarzis

E'l folha cai de sul verjan,

E l'auzel canton lor latis,

Et ieu de sai sospir e can

D'amor que m te lassat e pres;

Et ancar no l'aic en poder.

Las! qu'ieu d'amor non ai conquis

Mas las trebalhas e l'afan;

Ni res tan greu no covertis

Com so que plus vai deziran;

Ni tal enveja no fai res

Com aisso qu'om no pot aver.

Pero d'un joi m'en esjauzis

D'una, qu'anc re non amei tan.

Quan son ab lei si m'esbaïs

Qu'ieu no sai dire mon talan;

E quan m'en vau vejaire m'es

Que tot perda'l sen e'l saber.

Tota la gensor qu'anc hom vis

Encontra leis no pretz un gan.

Quan tot lo segle brunezis

Lai on ilh es aqui resplan. 

Dieus mi respit tro qu'ieu l'agues

O qu'ieu la vej' anar jazer.

Ni mor, ni viu, ni no garis,

Ni mal no sent e si l'ai gran;

Quar de s'amor no soi devis,

Ni no sai que n'aurai ni quan:

Qu'en lieis es tota la merces

Que m pot sorzer o decazer.

Totz trassalh e bran e fremis 

Per s'amor dormen e velhan. 

Tal paor ai que no m falhis,

No sai pensar com la deman.

Mas servir l'ai dos ans o tres,

E pois be leu sabrai lo ver.

S'ela no m vol, volgra moris

Lo dia que m pres à coman. 

Ai! dieus, quan suavet m'aucis

Quan de s'amor mi fes semblan!

Quar mort m'a e no sai per ques,

Qu'ieu mas una no volh vezer.

Gaug ai s'ela m'enfoletis

O m fai muzar o vau badan;

Et es me bel si m'escarnis,

O m torn atrac o m vauc enan;

Qu'aprop lo mal m'en venra bes

Ben tost, s'à lieis ven à plazer.

Per lieis serai totz fals o fis

O vertadiers o ples d'engan,

O totz vilas o totz cortes,

O trebalhiers oab plan deman. (o ab)

Cercalmon ditz: greu er cortes

Hom que d'amor se desesper.

Las! cui que plass' o cui que pes

Ela m pot si s vol retener.

Na Castelloza. Amic, sius trobes avinen,

Na Castelloza.

7225.

Na Castelloza si fo d'Alvergne, gentils domna moiller del Truc de Mairona; et amet n Arman de Breon, e fetz de lui sas cansos. Et era una domna mout gaia e mout enseignada, e mout bela.

7225, M.

Amic, sius trobes avinen,

Humils e franc e de bona merce,

Beus amera. Quant era m'en sove

Queus trob ves mi e mal e fel e tric

E m fatz cansos per tal que fass'auzir

Vostre bon pretz; don eu no m posc sofrir

Que nous fassa lauzar à tota gen,

On plus mi faitz mal et aziramen.

Jamais nous tenrai per valen

Nius amarai de bon cor per ma fe.

Per ver veirai si ja m valria re

Sius mostrava cor felon et enic.

Non farai ja, qu'eu no volh poscas dir

Qu'eu anc ves vos agues cor de faillir;

Qu'auriatz pois qualque razonamen

S'ieu fazia ves vos nul fallimen.

Eu sai be qu'à mi esta gen, 

Si be dizon tug que mout descove

Que domna preia cavallier de se,

Ni que l tenha tostemps tan lonc prezic.

Mas cel qu'o ditz no sab ges be cauzir,

Qu'eu volh pregar enans que m lais morir:

Qu' él pregar ai mant dous revenimen

Quan prec cellui don ai greu pessamen.

Assatz es fols qui me repren

De vos amar, pos tan gen mi reve;

E cel qu'o ditz no sab que s'es de me,

Ni nous vit ges abs uels si com vos vic

Quan me dissetz que non agues consir,

Que qualqu'ora poiri' endevenir

Qu'eu n'auria encora jauzimen:

De sol lo ditz n'ai eu lo cor jauzen.

Tot' autr' amor teing à nien;

E sapchas ben que mais jois no m soste

Mas lo vostre, que m'alegr' e m reve 

On mais en sent d'afan e de destric:

E cug ades per plan essai jauzir

De vos amic, qu'eu no posc convertir;

Ni joi non ai ni socors non aten

Mas sol aitan com n'aurai en dormen.

Oi mais no sai queus me presen,

Qu'essaiat ai et à mal et à be

Vostre dur cor don lo meus no s recre;

E nous o man qu'eu mezeis jaus o dic. 

E morrai me si no m volez jauzir 

De qualque joi; e si m laissatz morir

Faretz peccat e seretz n'en tormen,

E seretz en blasmatz vilanamen.

7225, M.

Ja de cantar no degr'aver talan,

Quar on mais cant e pieitz mi vai d'amor; 

Que planc e plor fan en mi lor estatge, 

Quar en mala merce

Ai mes mon cor e me;

E s'in breu no m rete,

Trop ai fac lonc badatge.

Ai! bels amics, sivals un bel semblan

Me faitz enan qu'eu moira de dolor.

Que l'amador vos tenon per salvatge

Quan joi no m'ave 

De vos, don no m recre

D'amar per bona fe

Tostemps ses cor volatge.

E ja ves vos non aurai cor truan

Ni ples d'engan, si tot vos n'ai pejor,

Qu'à grant honor m'o tenc en mon coratge.

Ans pens, quan m'en sove,

Del ric pretz queus mante;

E sai ben queus cove

Domna d'aussor paratge.

Despois vos vi faitz ai vostre coman;

Ez anc per tan, amics, nous aic melhor: 

Que pregador no m fan re ni messatge

Que ja m viretz lo fre.

Amics non fassatz re.

Equar joi no m soste,

Ab pauc de dol non ratge.

Si proi agues ben m'enibrer, qu'antan 

Aic vostre gan qu'embliei à gran temor. 

Pois ac paor quei aguessetz damnatge

De cella quius rete,

Amics; per qu'eu dese

Lo torniei: quar ben cre

Que no n'ai poderatge.

Dels cavalliers conosc quei fan lor dan,

Quar ja pregan domnas plus qu'ellas lor; 

Qu'autra ricor noi an ni senhoratge.

Que pois domna s'ave

D'amar, pregar deu be

Cavallier, si'n lui ve

Proess'e vassalatge.

Domna n'Almirs ancse

Am so don mal me ve;

Quar cel que pretz mante

A ves me cor volatge.

Bels-noms, ja no m recre

De vos amar jasse;

Quar i trob bona fe,

Bontatz e ferm coratge.

7225, M.

Mout avetz fag lonc estatge

Amics, pos de mius partitz; (mi us)

Et es me greu e salvatge,

Quar me juretz e m plevitz

Quez als jorns de vostra vida

Non acses domna mas me:

E si d'autra vos perte,

Mi avetz mort' e traïda,

Qu'avi' en vos m'esperansa

Que m'amassetz ses dubtansa.

Bels amics, de fin coratge

Vos amei, pos m'abelitz:

E sai que fatz ai folatge,

Que plus m'en es escaritz,

Qu'anc no fis ves vos ganchida

E si m fazetz mal per be.

Beus am e no m'en recre:

Mas amor m'a tan sazida,

Qu'ieu no cre que benanansa

Posc' aver ses vostr' amansa.

Mout aurai mes mal uzatge

A las autras amairitz;

Qu'om sol trametre messatge

E motz triatz e cauzitz;

Ez ieu tenc me per guerida,

Amics, à la mia fe,

Quan vos prec, qu'aissi m cove:

Que'l plus pros es enriqida,

S'a de vos qualqu'aondansa

De baisar o de coindansa.

Mal agu' ieu s'anc cor volatge 

Vos aic nius fui camiairitz;

Ni drutz de negun paratge

Per me no fon encobitz.

Ans soi pensiv' e marida (marrida)

Quar de m'amor nous sove; 

E si de vos joi no m ve 

Tost me trobarez fenida: 

Qu'à petit de malanansa

Mor domna s'om noca l lansa.

Tot lo maltrag e'l damnatge

Que per vos m'es escaritz,

Vos fai grazir mon linhatge;

E sobre totz mos maritz.

E s'anc fes vas me faillida,

Perdon laus de bona fe;

E prec que venhatz à me,

Depois quez aurez auzida

Ma canso: queus fatz fiansa

Sai trobetz bella semblansa.