Cercamons.
7225.
Cercamons si fo uns joglars de Gascoingna, e trobet vers e pastoretas à la usanza antiga. E cerquet tot lo mon lai on poc anar, e per so fez se dire Cercamons.
2701, 7225.
Quan l'aura doussa s'amarzis
E l'auzel canton lor latis,
Et ieu de sai sospir e can
D'amor que m te lassat e pres;
Et ancar no l'aic en poder.
Las! qu'ieu d'amor non ai conquis
Mas las trebalhas e l'afan;
Ni res tan greu no covertis
Com so que plus vai deziran;
Ni tal enveja no fai res
Com aisso qu'om no pot aver.
Pero d'un joi m'en esjauzis
D'una, qu'anc re non amei tan.
Quan son ab lei si m'esbaïs
Qu'ieu no sai dire mon talan;
E quan m'en vau vejaire m'es
Que tot perda'l sen e'l saber.
Tota la gensor qu'anc hom vis
Encontra leis no pretz un gan.
Quan tot lo segle brunezis
Lai on ilh es aqui resplan.
Dieus mi respit tro qu'ieu l'agues
O qu'ieu la vej' anar jazer.
Ni mor, ni viu, ni no garis,
Ni mal no sent e si l'ai gran;
Quar de s'amor no soi devis,
Ni no sai que n'aurai ni quan:
Qu'en lieis es tota la merces
Que m pot sorzer o decazer.
Totz trassalh e bran e fremis
Per s'amor dormen e velhan.
Tal paor ai que no m falhis,
No sai pensar com la deman.
Mas servir l'ai dos ans o tres,
E pois be leu sabrai lo ver.
S'ela no m vol, volgra moris
Lo dia que m pres à coman.
Ai! dieus, quan suavet m'aucis
Quan de s'amor mi fes semblan!
Quar mort m'a e no sai per ques,
Qu'ieu mas una no volh vezer.
Gaug ai s'ela m'enfoletis
O m fai muzar o vau badan;
Et es me bel si m'escarnis,
O m torn atrac o m vauc enan;
Qu'aprop lo mal m'en venra bes
Ben tost, s'à lieis ven à plazer.
Per lieis serai totz fals o fis
O vertadiers o ples d'engan,
O totz vilas o totz cortes,
O trebalhiers oab plan deman. (o ab)
Cercalmon ditz: greu er cortes
Hom que d'amor se desesper.
Las! cui que plass' o cui que pes
Ela m pot si s vol retener.
