Chanson de la Croisade Albigeoise (Murel, Muret)

Chanson de la Croisade Albigeoise.

Histoire de la croisade contre les hérétiques Albigeois, écrite en vers provençaux, publiée par M. C. Fauriel, Paris 1837, p. 212-224, v. 2970-3139 (F). La chanson de la croisade contre les Albigeois p. p. P. Meyer, Paris 1875/79, I, 133-140 (M). Le passage choisi raconte la bataille de Muret (1213). Cf. L. Kraack, Ueber (über) die Entstehung und die Dichter der Chanson de la croisade contre les Albigeois, Marburg 1884. 

Grdr. § 16, p. 16. St. p. 38.

Li donzel van tost diire al conselh principal

qu'els fassan de Murel issir l'ost comunal

e que no i trenquen plus ni bareira ni pal, (barreira : barrera)

mas que ls laisso lains estar totz de cabal,

e que s'en torn cascus als traps per son cabal, (traps : tendes)

que l bos reis lor o manda ab cor emperial;

qu'en Simos i vindra avan de l'avespral, (Simón de Monfort, Montfort)

e vol lo lains pendre mais qu'en autre logal.

E ls baros, cant o auzo, eisson tuit comunal 

e van s'en per las tendas, cascus vas son fogal,

e manjuio ne bevon, li pauc e l maioral.

E cant agron manjat, viron per un costal

lo comte de Montfort venir ab so senhal

e mout d'autres Frances, que tuit son a caval.

La ribeira resplan co si fosso cristal

dels elmes e dels brancs, qu'eu dig, per sant Marsal,

anc en tan pauca gent no vis tan bon vassal.

E intran a Murel per mei lo mercadal

e van a las albergas com baron natural

e an pro atrobat pa e vi e carnal.

E pois a l'endema, can viro lo jornal,

lo bos reis d'Arago e tuit li seu capdal (Pedro II, al 1213)

eison a parlament defora en un pradal,

e lo coms de Tholoza e l de Foih atertal, (Toulouse; Foix; atretal)

e lo coms de Cumenge ab bon cor e leial

e mout d'autres baros, en Ugs, lo senescal,

e ls borzes de Toloza e tuit li menestral: (burguesos de Toulouse)

e l reis parlet primers.

Lo reis parlet primers, car el saup gent parlar.

"Senhors", so lor a dit, "auiatz que us vulh monstrar.

Simos es lai vengutz e no pot escapar.

Mas pero eu vos vulh d'aitant asabentar,

que la batalha er abans de l'avesprar.

E vos autres siats adreit per capdelar (vos autres : vosaltres; vatres)

e sapjatz los grans colps e ferir e donar,

que, si eran detz tans, si ls farem trastornar."

E lo coms de Toloza se pres a razonar:

"Senher, reis d'Arago, si m voletz escoutar,

eu vo n diirei mo sen ni que n'er bo per far. (yo vos diré mon señ)

Fassam entorn las tendas las barreiras dressar,

que nulhs om a caval dins non posca intrar.

E si venoi lh Frances, que vulhan asautar,

e nos ab las balestas les farem totz nafrar.

Cant auran les cabs voutz, podem los encausar (los caps girats)

e poirem los trastotz aisi desbaratar."

So ditz Miquel de Luzia: "Jes aiso bo no m par

so que ja l reis d'Arago fassa cest malestar.

E es mout grans pecatz, car avetz on estar,

per vostra volpilhia us laichatz deseretar."

"Senhors," so ditz lo coms, “als non pusc acabar.

Ers sia co us vulhatz, c'abans de l'anoitar

veirem be cals sira darriers al camp levar.”

Ab tant cridan: "Ad armas!" e van se tuit armar,

entro sus a las portas s'en van esperonar

si que an los Frances trastotz faits ensarrar.

E per meia la porta van las lansas gitar,

si que l d'ins e l de fora contendon sul lumdar

e s gieten dartz e lansas e s van grans colps donar,

d'entrambas las partidas ne fan lo sanc raiar,

que trastota la porta veiratz vermelheiar.

Can aicels de la fora no pogron dins intrar,

dreitament a las tendas s'en prendo a tornar;

ve ls vos asetiatz totz ensems al dinnar!

Mas Simos de Montfort fai per Murel cridar,

per trastotz los osdals, que fassan enselar

e fassan las cubertas sobre ls cavals gitar,

que veiran dels de fora si ls poiran enganar.

A la porta de Salas les ne fan totz anar.

E cant foron de fora pres se a sermonar:

"Senhors, baro de Fransa, no us sei nulh conselh dar,

mas qu'em vengutz trastuit per nos totz perilhar.

Anc de tota esta noit no fi mas perpensar,

ni mei olh no dormiron ni pogron repauzar.

E ai aisi trobat e mon estuziar

que per aquest semdier nos covindra passar,

c'anem dreit a las tendas com per batalha dar;

e si eison de foras, que ns vulhan asaltar,

e si nos de las tendas no ls podem alunhar,

no i a mas que fugam tot dreit ad Autvilar."

Ditz lo coms Baudois: "Anem o esaiar; (le compte Bauduen)

e si eisson de fora, pensem del be chaplar,

que mais val mortz ondrada que vius mendigueiar." (honrada)

Ab tant Folquets l'avesques los a pres a senhar, (Folquet de Marsella)

Guilheumes de la Barra los pres a capdelar

e fe ls en tres partidas totz ensems escalar

e totas las senheiras el primer cap anar; (y totes les señeres, siñals)

e van dreit a las tendas.

Tuit s'en van a las tendas per meias las palutz,

senheiras desplegadas e ls penos destendutz,

dels escutz e dels elmes on es li ors batutz,

e d'ausbercs e d'espazas tota la plasa'n lutz.

E l bos reis d'Arago, cant los ag perceubutz,

ab petits companhos es vas lor atendutz.

E l'ome de Tolosa i son tuit corregutz,

que anc ni coms ni reis no n fon de ren creutz.

E anc non saubon mot tro ls Frances son vengutz,

e van trastuit en la on fo l reis conogutz.

El escrida: "Eu so l reis?" Mas no i es entendutz

e fo si malament e nafratz e ferutz

que per meia la terra s'es lo sancs espandutz;

e loras cazec mortz aqui totz estendutz.

E l'autri, cant o viro, teno s per deceubutz;

qui fug sa, qui fug la, us no s'es defendutz.

E li Frances lor corro e an totz los destrutz

e an les malament de guiza combatutz,

c'aicel que vius n'escapa se te per ereubutz.

Entro sus al Rivel es lo chaples tengutz,

e l'ome de Tolosa, c'als traps son remazutz,

estero tuit ensemps malament desperdutz.

E'n Dalmatz d'Enteiselh es per l'eiga embatutz (l'aiga : aigua)

e crida: "Deus, aiuda! grans mals nos es cregutz,

que l bos reis d'Arago es mortz e recrezutz,

e tant baro dels autres que so mortz e vencutz:

ja mais tan grans dampnatjes non sera receubutz.

Ab tant es de Garona fors de l'aiga issutz,

e l pobles de Toloza, e lo grans e l menutz,

s'en son trastuit ensems ves l'aiga corregutz,

e passon cels que pogon, mas mouts n'a remazutz,

l'aiga qu'es rabineira n'a negatz e perdutz,

e remas ins el camp trastotz le lor trautz:

don fo lo grans dampnatges per lo mon retendutz,

car mans om i remas totz mortz e estendutz,

don es grans lo dampnatges.

Mout fo grans lo dampnatges e l dols e l perdemens,

cant lo reis d'Arago remas mort e sagnens,

e mout d'autres baros, don fo grans l'aunimens

a tot crestianesme et a trastotas gens.

E ls omes de Tholosa, totz iratz e dolens,

aicels qui son estortz, que no son remanens,

s'en intran a Tolosa dedins los bastimens.

E'n Symos de Montfort, alegres a jauzens,

a rentengut lo camp, don ac mans garnimens,

e mostra e retra trastotz sos partimens.

E lo coms de Tolosa es iratz e dolens

ez a dig al capitol, ez aquo bassamens,

que al mielhs ques els poscan fassan acordamens,

que el ira al papa far sos querelhamens,

qu'en Simos de Montfort ab sos mals cauzimens

l'a gitat de sa terra ab glazios turmens.

Poih issic de sa terra e sos filhs ichamens;

e ls homes de Tolosa, cum caitius e dolens,

s'acordan ab Simo e li fan sagramens,

e redo s a la gleiza a totz bos cauzimens.

E l cardenals trames a Paris ichamens

al filh del rei de Fransa c'ades venga correns.

Ez el i es vengutz, bautz e alegramens,

ez intran a Toloza trastot comunalmens

e perprendo la vila e los albergamens

ez albergon ab joia dedins los pazimens.

E ls omes de la vila dizon: "Siam suffrens;

suffram so que Deus vol trastot paziblamens;

que Deus nos pot aidar que es nostre guirens."

E l filhs del rei de Fransa, qu'es de mal consentens,

Simos e l cardenals e'n Folcs mescladamens

an dig en lor secret c'an lo barreiamens 

per trastota la vila e pois lo focs ardens. 

E'n Simos se perpensa, que es mals e cozens,

que, si destrui la vila, non er sos salvamens;

que mais val sia seus totz l'aurs e totz l'argens.

E poih fo entre lor aitals emprendemens

ques umplan los valatz, e nulhs om defendens

no si posca defendre ab negus garnimens,

e trastotas las tors e ls murs e ls bastimens,

que sian derrocatz e mes en fondemens.

Aisi fo autreiatz e dig lo jutjamens,

e'n Simos de Montfort remas terra tenens

de trastotas las terras ques eran apendens

al comte de Tholosa ni als seus ben volens,

qu'el es dezeretatz ab fals prezicamens;

e l reis torna s n'en Fransa.

Guillem de Saint-Gregori. Be m platz lo gais temps de Pascor

Guillem de Saint-Gregori.

Be m platz lo gais temps de Pascor 

que fai foillas e flors venir,

e platz mi quand aug la baudor

dels auzels que fan retentir

lor chan per lo boscatge;

e platz me quand vei sobre ls pratz

tendas e pavaillos fermatz,

e ai gran alegratge

quand vei per campaigna rengatz

cavalliers e cavals armatz.

E platz mi quan li corredor

fan las gens e l'aver fugir,

e platz mi quand vei apres lor

gran ren d'armatz ensems venir;

e platz m'e mon coratge

quand vei fortz chastels assetgatz (assetjatz)

e ls barris rotz et esfondratz,

e vei l'ost el ribatge,

qu'es tot entorn claus de fossatz

ab lissas de fortz pals serratz.

Et atressi m platz de seignor

quand es primiers a l'envazir, (invadí; invadir; atacá; atacar)

en caval, armatz, ses temor,

c'aissi fai los seus enardir

ab valen vassalatge;

e pos que l'estorns es mesclatz,

chascus deu esser acesmatz

e segre l d'agradatge,

que nuills hom non es ren prezatz

tro qu'a mains colps pres e donatz.

Massas e brans, elms de color,

escutz traucar e desgarnir

veirem a l'intrar de l'estor,

e mains vassals ensems ferir;

don anaran a ratge

caval dels mortz e dels nafratz.

E quand er en l'estor intratz,

chascus hom de paratge

non pens mas d'asclar caps e bratz,

que mais val mortz que vius sobratz.

E us dic que tant no m'a sabor

manjars ni beure ni dormir

cuma quand aug cridar: "A lor!"

d'ambas las partz, et aug bruir

cavals voitz per l'ombratge,

et aug cridar: "Aidatz, aidatz!" (ajudéu!; ayudad!)

e vei cazer per los fossatz

paucs e grans per l'erbatge,

e vei los mortz que pels costatz

ant los tronçons ab los cendatz. (ant : an : han : tenen; tienen)

Pros comtessa, per la meillor

c'anc se mires ni mais se mir

vos ten hom, e per la gensor

domna del mon, segon qu'aug dir.

Biatritz, d'aut lignatge,

bona domn' en ditz et en fatz,

fons lai on sortz tota beutatz,

bella ses maestratge,

vostre rics pretz es tant poiatz

que sobre totz etz enansatz.

Baron, metetz en gatge

castels e vilas e ciutatz

enans qu'usquecs no us guerreiatz.

Troubadours inconnus, peu importans. Albertetz Cailla, Alegret - Saill d'Escola

Troubadours inconnus, ou dont les articles sont peu importans, selon Millot. Hist. littéraire des troubadours. T. III, p. 386.

Albertetz Cailla.

7225.

Albertetz Cailla si fo uns joglars d'Albezet. Hom fo de pauc vallimen; mas si fo amatz entre sos vesins e per las domnas d'Albeges. E fes una bona canson; e fes sirventes: mas el non issi de la soa encontrada.

Alegret.

3794, 7226.

Ara pareisson ll'aubre sec

E brunisson li elemen,

E vai la clardatz del temps gen,

E vei la bruma qui fuma,

Don desconortz ven pel mon à las gens;

E sobretot als auzels, que son mec

Per lo freg temps qe si lur es prezens.

E per pauc que totz vius no sec

D'un gran mal que m fer en la den,

Quan mi sove de l'avol gen

Cui mal escaseditz bruma.

Mas que m'en val precs ni castiamens?

Qu'anc albres sec flor ni frug no redec,

Ni malvatz hom no pot esser valens.

Jovent vei fals e flac e sec,

Qu'à pauc de cobeitat no fen.

Qui pros fon ara s'en repen,

Et es ben d'avols escuma,

Qu'anc proeza un dia no fon sens.

E se'l bos fatz à la fin no parec,

Tot quant a fag le senhers es niens.

Larguetatz se planh d'un mal sec, 

Qu'a penas au ni vei ni sen;

Greu mal n'a mas peger l'aten, 

Qu'ades la pel' e la pluma 

Escassedatz, una vertitz tenens 

Que creis er tant et entre'ls plus rics crec, 

Q'us per oc dir non auz' obrir las dens.

Aquels son dins e defor sec

Escas de fag e larcs de ven;

E pagan home de nien,

Qez aitals es lur costuma; 

Et enujos, volpils e recrezens,

Qu'entre mil un non vei ses qualque dec, 

Mas le senhor de cui es Occidens.

Qu'el non a cor ges flac ni sec

Com an pel mon poestatz cen,

Qu'en lui s'apila e s'apen

Proeza sivals ab pluma.

Per tot vola sos pretz entre'ls valens

Sobre trastotz; et aug o dir à quec

Qu'el es le miells dels reis plus conoissens.

Pels maritz drutz vei tornar sec

Domnei, quar l'uns l'autre cossen.

Qu'il sieu con laiss' e l'autrui pren,

Él fron li'n sors un' estruma

Que lli er jasse mentre viva parvens:

E coven se qu' é l'enap ab que bec

Lai lo cogos beva sai lo sufrens.

Huei mais fenirai mon vers sec,

E parra pecs al non saben

Si non a dobl' entendemen.

Qu'ieu sui cell que'ls motz escuma

E sai triar los auls dels avinens:

E si fol ditz qu'aissi esser non dec,

Traga s'enan, qu'Alegret n'es guirens.

Si negus es del vers contradizens

Fassa s'enan, qu'ieu dirai per que m lec

Metr' en est vers tres motz de divers sens.

Almucs de Castelnou et N'Iseus de Capnion.

Sainte Palaye. Manuscrit du Vatican 3207.

N'Iseus de Capnion si preget ma dompna Almucs de Castelnou qu'ela perdones à'n Gigo de Tornen, q'era sos cavaliers, et avia faich vas ella gran faillimen, e no s'en pentia ni non demandava perdon.

Dompna n'Almucs, sious plages

Beus, volgra pregar d'aitan,

Qe l'ira e'l mal talan

Vos fezes tenir merces

De lui qe sospir' e plaing,

E muor langrat e s complaing,

E quier perdon humilmen.

Beus fatz per lui sagramen,

Si tot li voletz fenir,

Q'el si gart meilz de faillir.

Ma dompna n'Almucs, la cals volia ben à'n Gigo de Torno (Tornen), si era mout dolenta car el non demandava perdon del faillimen, e respondet à ma dompna n'Iseus si com dis aqesta cobla.

Dompna n'Iseus, s'ieu saubes 

Q'el se pentis de l'engan 

Q'el a fait vas mi tan gran, 

Ben sera dreich qe n'agues

Merces; mas à mi no s taing, 

Pos qe del tort no s'afraing

Ni s pentis del faillimen, 

Qe n'aia mais chauzimen.

Mas si vos faitz lui pentir, 

Leu podes mi convertir.

Arnaut Plages.

3794, 7226, 7698.

Be volgra midons saubes

Mon cor aissi com ieu'l sai;

E que l plagues qu'ieu fos lai

On es sos gais cors cortes.

E si dic sobransaria...

Digas, e cujas que sia?

Ieu non, que no m sent tan rics.

Suefre, mas no t'amendics

Que de ben leu s'avenria.

Avenir? dieus o volgues!

No pot lo? Per dieu si fai.

E quom? Ieu vos o dirai.

Digatz com. S'à lieis plagues.

Plazer à lieis! Cum plairia?

Levet, s'amors o volia.

Amors? Oc. Iest li enemics?

Ieu non, ans estauc enics

A quascun que la galia.

Suefre, qu'enquer n'auras bes.

E com? Que'ls mals ades n'ai.

Mals? Ja no digas jamai.

E per que? Quar ges non es.

Non es mals qu'aissi m'aucia

Languen? Lo non, qu'en un dia

Er tos bes si no t'en gics,

Ab sol que no la cambics.

E morrai? Oc, si s volia.

Si s vol? Oc. Valra m merces?

Ab cui? Ab leis? Oc. No sai.

E per que? Quar no s'escai,

Que trop t'iest en ric loc mes.

Rics? Per crotz, ben o sabia.

E doncs no fezist follia?

Laissa t'en. No m'en castics,

Qu'aisso no t'es mas destrics,

Que ja no m'en laissaria.

No t'en laissarias ges?

Non ieu. Doncs aissi o fai

Com ieu t'o ensenharai.

Sias adreitz e cortes,

Francs e de bella paria;

E fai so que ben estia

Quan poiras, e no t'en trics,

Qu'aissi deu renhar amics.

Oc? E mielhs, si mielhs podia.

Na Felipa, s'ieu avia

Tal rictatz don ieu fos rics,

Atressïus seri' amics

De ben dir si com solia.

Canso'n Castella ten via

Al rei, qu'adoba'ls destrics.

Qu'om pren ab los avols rics,

Quant es en lur companhia.

Azemar lo negres.

7225.

N Azemar lo negres si fo del Castel vieil d'Albin. Cortes hom fo e gen parlans; e fo ben honrat entre las bonas gens, per lo rei Peire d'Aragon e per lo Comte de Tolosa, per aquel que fon dezeretatz, qui l donet maisons e terras à Tolosa.

7225-6.

Ja d'ogan pel temps florit,

Ni per la sazon d'abril

No fera mon cant auzir.

Mas cella que s fai grazir

A tot lo mond' et à dieu

M'a mes en sa senhoria,

E vol que tostemps mai sia

Totz mos afars en son fieu.

E quar m'a d'autras partit

E vol qu'en s'amor m'apil,

Fassa m denan se venir

E do m so qu'ieu plus dezir.

Qu'ilh sab be tot quan volh ieu.

Pero no dic qu'en un dia

Me don tot quant ieu volria;

Mas d'aisso que l'es plus lieu.

Que'l cor él cors m'a sazit,

E m mes en estrech cortil 

Don jamais no volh issir; 

Que so l dis al departir 

Qu'aissi m tengues tot per sieu, 

Qu'autra part non i avia: 

E s'ieu pogues dir fos mia, 

Plagra m à cui que fos grieu.

Mas ieu no l'ai tan servit

Qu'en posc' aver joi tan vil;

Ans sai que m'er à suffrir

Mans mals si m'en volh jauzir.

Pero quant hom vei romieu

Cochat, s'almorna l fazia

Honors e bes li seria:

Domna, vos m'en faitz en brieu.

Qu'aissi m'an vostr' olh ferit

Éls meus d'un esgard gentil,

Qu'ins él cor lo m fan sentir; 

E noi a mas del morir,

Si vos que tenetz lo mieu

No m socoretz, douss' amia: (socorretz)

Mas ieu m'en lau totavia 

Des que m mandetz en un brieu.

Domna, quan be m'o cossir,

No sai autra de sotz dieu

Que bona ni bella sia,

Que si de vos aprendia

Non meillures tot lo sieu.

Traduction de cette pièce.

Aux chansons j'avais dit adieu,

Quoique la saison soit nouvelle;

Mais il faut obéir à celle

Qui plaît au monde ainsi qu'à dieu.

Elle m'a dans sa seigneurie,

De son fief dépend mon avoir;

Et je n'ai plus d'autre vouloir

Que d'être son serf pour la vie.

Désormais mon sort sera doux,

Elle m'a promis sa tendresse:

Depuis ce moment je la presse

De m'appeler à ses genoux.

Non pas que mon amour prétende

En un seul jour tout obtenir:

Ce qui peut lui mieux convenir,

Voilà ce que je lui demande.

Saisi, dans ses fers arrêté,

Je trouve la charge légère;

Et cette prison m'est trop chère

Pour réclamer ma liberté.

Content d'être sien sans partage

Heureux de vivre sous sa loi,

Si je puis dire elle est à moi,

Les envieux mourront de rage.

Pour nourrir cet espoir flatteur

Je n'ai pas d'assez longs services;

Et par de constans sacrifices 

Je dois mériter ce bonheur. 

Mais puisqu'une main charitable

Fait l'aumône au pauvre passant, 

Pourquoi ma dame à son amant 

Serait-elle moins secourable?

Vos yeux, pleins de cette candeur

Qui malgré soi force à se rendre,

M'ont frappé d'un regard si tendre

Qu'il a pénétré dans mon cœur.

Je mourais sans votre assistance,

Douce beauté, c'en était fait;

Mais j'ai reçu votre billet,

Et je conserve l'espérance.

Q'une autre soit et bonne et belle,

Je n'en connais point sous les cieux

Qui ne changeât de bien en mieux

En vous choisissant pour modèle.

Bernat.

2701, 7698.

Gausselm, no m puesc estener

Qu'ab vos iratz no contenda,

Que talan ai que defenda

Las domnas à mon poder,

Que vos aug descaptener.

Q'una m rent cortez' esmenda

Que m'avia fag doler,

Per qu'ieu en lur captener

Tanh que mos bels ditz despenda.

Bernat, be sapchatz de ver

Que no vezem que be prenda

A nul qu'en domna s'entenda.

Per qu'ieus o fauc ans saber

Que fol von fassatz tener

Ni qu'ela s'amor vos venda;

E noi metatz vostr' aver,

Que be poiratz decazer,

S'aviatz mil marcx de renda.

Gausselm, nous des plus paor

De mi qu'ieu eis ni temensa;

Qu'en tal domn' ai m'entendensa, 

Cui ser e prec et azor,

Que sab valer part valor. 

Mas vos i faitz gran falhensa 

Quar descaptenes amor;

Qu'amor melhura'l melhor 

E l'aut auss' e'l gensor gensa.

Bernat, per so n'ai temor

Quar conosc la mens-valensa;

Qu'elas ab bela parvensa

Fan lo for del brezador

E tornon hom à folor:

E quan l'an en lor tenensa,

Segon que dizon l'auctor,

Meton l'en tan gran error

Don ja non aura guirensa.

Gausselm, e com auzatz dir

Qu'engans si' en amor fina

Vas cui tot lo mon aclina?

Qu'ella fai gent esbaudir

L'irat e'l paupr' enrequir

Ab una cuenda mezina;

Que ja pois al mieu albir

Hom no pot dolor sentir,

Mas ela l sia vezina.

Bernat gardatz de trahir

D'esta vostr' amor frairina,

En cui malvestat s'aizina.

Mas si l voletz ben servir

Ni sos talans ademplir,

Corba'lh be soven l'esquina;

E gardatz vos al partir

Que nous puesca escarnir,

Qu'ela sab trop de rapina.

Gausselm en vos no taïna

Vilas motz ni lagz à dir;

Per qu'ieu volh aissi fenir

Ma razo qu'es bon' e fina.

Bernat, anc d'amor canina

No vim nuls home jauzir;

E si non voletz gequir,

Tireus lo cat per l'esquina.

Bertrans del Pojet, Poget o Puget.

7225.

Bertrans del Pojet si fo un gentils castellans de Proensa, de Teunes, valenz cavalliers e larcx e bons guerriers. E fes bonas cansos e bons sirventes.

7225-6, 7614.

De sirventes aurai gran ren perdutz;

E perdrai en encaras un o dos

Éls rics malvatz on pretz es remazutz,

Qu'à lor no platz donars ni messios,

Ni lor platz res que taingn' à cortesia,

Mas be lor platz quant ajoston l'argen:

Per so mais n'a cel que lo met pus gen,

C'onors val mais quez avol manentia.

Ja no serai desmentitz ni vencutz

Qu'anc hom escas no fon aventuros;

E se n'i a un qu'en sia cregutz,

Donc el n'a fait alcun fac vergonhos.

Qu'avers no vol solatz ni leugaria,

Ni vol trobar home larc ni meten,

Ans lo vol tal qu'estei aunidamen

E tal qu'endur so que manjar deuria.

Que val tesaurs qu'ades es rescondutz

Ni qual pro tenc à nul home qu'anc fos?

Aitan n'ai eu, sol no sia mogutz,

Com an aquill que'l tenon à rescos.

Qu'à mi non cost' un denier si s perdia,

Et ill an tot l'esmai e'l pensamen;

E quan perdon l'aver perdon lo sen,

Et à mi an pro donat de que ria.

Per valens faitz es hom meils mantengutz,

Et aculhit et honratz per los bos;

E n'es hom meils desiratz e volgutz, 

E'n pot menar plus onratz companhos. 

Que malvestatz ab pretz no s'aparia 

Ni s'acordon per lo meu ensien; 

Que pretz vol dar e metre largamen, 

E malvestatz estreing e serr' e lia.

Lai à'n Guillem Augier, on pretz s'eslutz,

Tramet mon cant, quar il es cabalos;

E'ls enemics ten sobratz e vencutz,

Et als amics es francs et amoros,

Larcs et adregz e senes vilania;

E tot quant a don' e met e despen,

E non o fai ges ab semblan dolen;

Per qu'eu val mais, ja tan pauc non metria.

Elias Fonsalada.

7225.

N Elias Fonsalada si fo de Bargairac, del evesquat de Peiregors. Bels hom fo molt de la persona, e fo fils d'un borges qui se fes joglar: en Elias fo joglars atressi. No bon trobaire mas noellaire fo; e saup ben estar entre la gen.

Pons Fabre, d'Uzes.

2701, 3794, 7226, C.

Locs es qu'om se deu alegrar:

E si tot no soi amaire,

Si volh ïeu esser cantaire

Et à locs mon saber mostrar.

Qu'ieu dic que paucs ni grans avers

No val saber, qui l'avia;

Quar d'apenre quascun dia

Creis als plus savis lor volers.

Ses mezura sens ni sabers

No val ni gran manentia:

Pero locs es que seria

Dans trop gardars e reteners.

Locs es qu'om deu otrapassar,

Locs de calar, locs de braire,

Locs de donar, locs d'estraire,

Locs de sen, locs de follejar.

Qui son bon pretz vol tener car

No sia fols ni gabaire;

Quar fols es qui vol retraire

So que sab ni fai à celar:

E fols qui vol dir totz sos vers

E fols qui en fol se fia,

Fols qui falh e no s castia,

E fols qui sec totz sos volers.

Quascus deu entendr' en plazers,

Gardan se de vilania;

E que fassa quascun dia

De ben segon qu'es son poder.

Quar pos que s vol desmezurar

Son pretz no pot durar gaire;

Quar mezur' essenh' à faire

So per que bon pretz pot durar.

Qui gran cor a de larguejar

Saber deu don o pot traire: 

No dic qu'om se dej' estraire

De valer, ni no s tanh à far. 

Grans afans es lo conquerer,

Mas gardar es majestria;

E qui pert per sa follia

No sab quals afans es querers.

Garins lo Brus.

7225-6, 7698, M.

Noitz e jorn sui en pessamen

D'un joi mesclat ab marrimen;

E no sai à qual part m'apen,

Aissi m'an partit engalmen

Mezur' e leujairia.

Mezura m ditz suau e gen 

Que fassa mon afar ab sen;

E leujairia la m desmen,

E ditz que si trop m'i aten

Ja pros no serai dia.

Mezura m'a essenhat tan

Qu'ie m sai alques gardar de dan,

De fol e de datz e de fan;

E sai be cobrir mon talan

De so que plus volria.

Leujairia no m pres' un guan

S'ieu no fau so que'l cor me man,

E tuelh' e do e l'aver s'an:

Quar qui plus n'a plus pren d'engan

Quan ven à la partia.

Mezura m fai soven estar

De manh rir' e de trop jogar,

E m veda quan vuelh mal parlar;

Ni si vuelh trop mon aver dar

Ella m ditz que m n'estia.

Leujairia m tol mon pessar,

E m ditz que per trop castiar

Non dei ges mon talan laissar;

Quar si tot fatz quan poirai far

Non er la colpa mia.

Mezura m ditz qu'ieu non domnei

Ni ja per domnas no follei,

E s'amar vuelh esguar ben quei;

Quar si penre vuelh tot quan vei

Leu m'en segra folia.

Leujairia m mostr' autra lei,

Qu'abratz e percol e manei

E fassa so qu'al cor m'estei;

Quar si no fatz mas tan quan dei

Meta m en la monjia.

Mezura m ditz non si' escas

Ni ja trop d'aver non amas,

Ni non dar ges tot quan que as;

Quar si dava tot quan mi plas

Pueis de que serviria?

Leujairia m'esta de las

E ditz mi, e tira m pel nas,

Amics, ben leu deman morras:

E doncs pus seras mortz él vas

Avers pueis que t faria?

Mezura m ditz suau e bas

Qu'ieu fassa mon afar de pas.

E leujairia ditz: que fas?

Fai ades aita quan poiras,

Que'l terminis s'enbria.

Messatgier lo vers portaras

N Eblon de Senhas, lo m diras

Si cum Brus loil envia;

Al partir lo m saludaras

E pueis ma douss' amia.

E digas me quan tornaras

Quals d'aquestz dos cosselhs penras;

Qu'ieu vuelh n'aias la tria.

Guirautz d'Espanha, de Tolosa.

7226, 7698.

S'ieu en pascor no cantava,

Pos la fresca fuelha creis

E la blaua flor pareis,

Si negus hom m'en blasmava

No m'en meravellaria,

Quar seria

Ben razos que m'en blasmes;

Per qu'ieu tenc cantar apres:

Mas pauc mi val mos cants, tant es valens

Silh de cui cant ab qui m falh cauzimens.

E sembla m qu'autres deuria

Esser sos captenemens

Ves mi, que l sui bevolens

Plus que dire no l sabria;

Qu'ilh m'es orgolhoz' e brava,

E semblava

Ses orgolh ans qu'ieu l'ames.

Mas si cauzimens estes

En loc d'orgolh en lieis, ieu fora reis

Del joi d'amor, tan valgra mos domneis.

Ai! las, e tan ben m'estava

Tro qu'amors tan aut m'empeis!

Qu'anc pueis no fui mieu mezeis,

Qu'adoncs orgolh no duptava.

Pero no m'en planheria

En tal guia

Per que midons me perdes;

Que'l loc on ilh ten sos pes

M'es mil aitans per vezer pus plazens,

Que tot quan vei entre las autras gens.

Quar en lieis es cortezia,

Beutatz et ensenhamens;

Et à laus dels conoissens

Fin pretz e plazen paria.

E si d'orgolh si lonhava

O s mermava,

Ab que merces s'aprusmes

Tan q'un pauc de mi l membres,

Non es él mon de nulla de las leis

Tan plazen cors, ni anc genser no s seis.

Lai entr'els flums d'Ertz e Sava

Es, don m'en ven dous aureis

Tempratz, no trop caut ni freis,

Que ma dolor assuava,

Tan qu'ieu crei que si sabia

L'amor mia,

Cum l'am, ja plus no m dones

Sol mos cants auzir denhes,

Qu'ieu seria del sieu bel cors jauzens:

Ni non volh re don sos pretz valgues mens.

Aissi cum li plaira sia,

Qu'ie l serai obediens,

Quar ges nuls afortimens

Contra lieis pro no m tenria.

Ans sai que si m desviava

Ni ponhava

Quossi sos cors m'azires,

Que mortz m'en penri' ades

Et ab un pauc, tan m'en ven grans esfreis

Per sol est dig no pren gran malaveis.

Senher n Autrejatz, ades

Vos aug lauzar lueng e pres:

E s'ieu midons e vos no vei breumens,

Lo valens coms Carles n'er malmerens.

Girautz de Salaingnac.

7225.

Girautz de Salaingnac si fo de Caersin, del castel de Salaingnac. 

Joglars fo, ben adreg hom fo e ben cortes, e trobet ben e gen cansons e descortz e sirventes.

7225.

Esparviers et austors,

E guirfals prendedors,

E falcos voladors,

E smirles montadors

Voill eu, e pro de renda 

Am que met' e despenda, 

Qu'enaissi m'er honors; 

Que à totz los meillors 

Voill far don et esmenda.

Mos levrers volvedors, 

Liamers frezadors 

Voill e los venadors, 

E chins de sers odors, 

E qu'eu lo glat entenda; 

Be m platz aital fazenda: 

E voill bos cantadors 

E bos violadors,

Car solas si remenda.

Palafres ambladors,

Beus e plan portadors, 

E destres corredors, 

Mans seingnals de colors

Voill eu e manta tenda;

E qu'om per tot mi venda 

Tan qu'en don' als plusors. 

Als grans et als menors

Voill donar lor vivenda.

Reis et emperadors, 

Ducs, marques e comtors, 

Castellans, valvasors

Tant es grans ma ricors

Queus voill, à mi s'atenda

E mos pretz noi descenda. 

Tant voill d'envaïdors,

Que castel fort ni tors 

Contra mi no s defenda.

Los livres dels auctors

Sai, e dels ancessors

Los sens e las follors.

Res no m faill mas amors, 

O genser qui port benda 

Voilla c'à mi se renda. 

Si tot s'es caps e flors 

De totas las gensors,

De mi merces vos prenda.

Hameus de la Broqueira.

7698.

Mentre que'l talans mi cocha,

Ei amors, si amors,

Cantarai tot à estros

De vos, car mi faitz amar 

Celeis que no m vol jauzir 

Ni de sos hueils esguarar. 

Per qu'ieu m'azir,

Aisso m destrui,

Mas lo joi de leis quar l'am me desdui.

Per leis soi plus leu que trocha,

Ei amors, si amors,

Ieu fora plus deleitos

De burdir e de cantar

S'ela m volgues aculhir. 

Mas aco l'es greus à far, 

C'on plus dezir

Son cors me fui:

Mas lo joi de leis quar l'am me desdui.

Bel cors, gens, dreitz, bela bocha, 

Ei amors, si amors,

Et a blancas dens, hueils dos,

E vejaire fresc e clar.

Ins é mon cor vos remir,

Quar per vos vei pretz levar 

Et enrequir.

Cascus en brui,

Mas lo joi de leis quar l'am me destrui.

Non aic mais dolor ni cocha,

Ei amors, si amors,

Ni trebalh tan perillos

Com aicel que m fai estar 

Per midons en gran cossir;

E no m'en vol ajudar. 

Ben dei morir,

Aisso m destrui;

Mas lo joi de leis quar l'am me destrui.

Si'l sieu cors ab lo mieu locha,

Ei amors, si amors,

Cal que l'us sobres d'amdos

Be m'en deuria prezar.

Oc ieu be senes faillir,

S'aquest plaitz pot acordar

Ni avenir,

Morrai per lui;

Mas lo jois de leis quar l'am me destrui.

N Uc de la (Balcalairia) Bacalairia.

7225.

N Ucs de la Bacalairia si fo de Limozi, de là on fo Gauselm Faiditz. 

Joglars fo de pauc valor, e pauc anet e pauc fo conogutz; e si fes de bonas cansos, e fetz un bon descortz e de bonas tensos. E fo cortes home, ben adreich e ben enseingnatz.

2701, 7225-6.

Per grazir la bon' estrena

D'amors que m ten en capdel,

E per aleujar ma pena,

Vuelh far alb' ab son novel.

La nueg vei clar' e serena,

Et aug lo cant d'un auzel

En que mos mals se refrena;

Don quier lo jorn et apel.

Dieus! qual enuech

Mi fai la nuech!

Per qu'ieu dezir l'alba.

Qu'ieu jur pels sans evangelis

Quez anc Andrieus de Paris,

Floris, Tristan ni Amelis

No foron d'amor tan fis.

Depus mon cor li donelis

Un pater noster non dis,

Ans qu'ieu disses qui es in celis

Fon ab lieis mos esperis.

Dieus! etc.

En mar, en pla ni en roca

No posc ad amor gandir.

Mai non creirai gen badoca

Que m fasson de lieis partir;

Qu'aissi m punh al cor e m toca,

E m tol manjar e dormir,

Que s'ieu er' en Antioca

Ieu volri' ab lieis morir.

Dieus! etc.

Amors, ieu saupra gen tendre

E penre ors o lhaupart,

O per far fort castel rendre;

Mas ab vos no trob nul art

Ni no m plai ab vos contendre.

Qu'aissi com a major part

Sui plus volpils al defendre,

E n'ai mil tans de regart.

Dieus! qual enuech

Mi fai la nuech!

Per qu'ieu dezir l'alba.

Na Bierris de Romans.

C.

Na Maria, pretz e fina valors,

E'l joi e'l sen e la fina beutatz,

E l'aculhir e'l pretz e las onors

E'l gent parlar e l'avinen solatz,

E la doz car' e la gaia cuendansa,

E'l dous esgart e l'amoros semblan

Que son en vos, don non avetz engansa,

Me fan traire vas vos ses cor truan.

Per que vos prec sius platz que fin' amors,

E gausiment e doutz humilitatz,

Me posca far ab vos tan de socors

Que mi donetz, bella domna, sius platz

So don plus ai d'aver joi esperansa;

Car en vos ai mon cor e mon talan,

E per vos ai tut so qu'ai d'alegransa,

E per vos vauc mantas vetz sospiran.

E car beutatz e valor vos enansa

Sobre totas, q'una nous es denan,

Vos prec sius platz, per so queus es onransa,

Que non ametz enjendidor truan.

Bella domna cui pretz e joi enansa

E gent parlar, à vos mas coblas man;

Car é vos es gaess' et alegransa,

E tot lo ben q'om en domna deman.

Peire Bremonz lo tortz.

7225.

Peire Bremonz lo tortz si fo un paubres cavalliers de Vianes; e fo bons trobaire, et ac honor per totz los bons homes.

Peire del Vilar.

2701, 7226.

Sendatz vermelhs, endis e ros,

E tendas e traps desplejar,

Elmes et ausbercs flamejar

E brandir lansas e bordos,

E cairels dessarrar espes,

E ferir de bran de manes

Veirem en breu, que'l lhaupart fenh

Que sai per flor culhir s'espenh.

Pecs er si ses pro companhos

Se pleja de las flors triar.

Pero si ben vol anparar

Lo castel, l'ala ni'l bastos,

Passar pot Escots et Engles,

Noroecx et Irlans e Gales:

Mas tart n'aurail flor de ver senh

Si de larc despendre s'estrenh.

E si l plai bella messios,

Gen prometre, largamen dar, 

Semblara del linhatge car

Don foro'ls fraires valoros,

N Anrics, en Richartz, en Jofres;

E poira cobrar Guianes

E Normandia; don me senh

Car plus tost non troba mantenh.

Mot era genta l'ocaizos

Que flor pogues lhaupart mandar,

E sobre lui senhorejar;

E l'agues tot jorn à sos pros

Per un pauc que de lui tengues.

Mas la flor nasc en aital mes

Que per tot s'espan et atenh,

Si caut o freg non la destrenh.

E fora genser la razos

Que s coitesso del loc cobrar,

On per Melchion e Gaspar (Melchior ou Melchor.)

Fon adzoratz l'altisme tos,

Que quan l'us a l'autre comes.

Car ses la decima non es

Us tant caut qu'en armes un lenh,

Ni'n bastis trabuquet ni genh.

Al valen gai coms de Rodes

Tramet mon novel sirventes,

Que si l plai de s'amor mi denh

Far alque novel entresenh.

Estiers do, qu'ieu non vuelh ni'n pren,

Mas honor de son bel captenh.

Peire Guillem.

7225.

Peire Guillems si fo de Tolosa, cortes hom e ben avinenz d'estar entre las bonas genz. E fez ben coblas, mas trop en fazia; e fez sirventes joglaresc e de blasmar los baros. E rendet se à l'ordre de l'Espaza.

Peire Milon.

7225.

M.

Qant hom reigna vas cellui falsamen

Qui l'onr' el serv' e l'ama finamen,

Ses traïmen, per piegz deu hom tener

De lui que d'autre, qui vol dir lo ver.

Per qe? Car cel en cui hom plus se fia

Sens fadia pot meils l'om enganar,

Qe cel de qui hom sap qe s deu gardar.

Per qu'eu o teing plus à mal eissamen

A la falsa non fer' az autra gen

Del faillimen que m fes, c'ab ferm voler

L'ai servida de trastot mon poder.

Pero nuls hom tan servir non poiria;

S'il servia malvaz seignor avar,

Que ja'n pogues bon guizardon cobrar.

Per qu'eu m'en part ses tot atendimen

De s'amistat, que non ai plus talen;

E si m'enten en tal, c'al meu parer

De sa ricor non pot nuls hom saber

Meillor de lei ni ab plus cortesia,

Ni que sia plus d'avinent afar,

Ni miels sapcha rire ni gen parlar.

Ni ges non cre, segon qe m'es parven,

Qu'om sapch' él mon plus bella re viven,

Ni qui plus gen sapcha pretz mantener.

E si m'a dit q'eu aia bon esper

Él seu ric joi, e que l'am ses bauzia

Totavia: car si ben o sai far

Bon causimen poirai ab lei trobar.

E pois lei platz c'aia entendimen

Él seu bel cors amoros e plazen,

Tan fermamen m'a tot al seu plazer,

C'altra del mon no m pot mais retener.

Amor m'a mes, que m ten per lei e m lia,

En tal via c'un jorn me fa pensar,

Et un autre mi fa rir' e cantar.

Peire de Valeria.

7225.

Peire de Valeria si fo de Gascoingna, de la terra d'en Arnaut-Guillem de Marsan. Joglars fo él temps et en la sazon que fo Marcabrus; e fez vers tals com hom fazia adoncs, de paubra valor, de foillas e de flors, e de cans e de ausels. Sei cantar non aguen gran valor ni el.

Pistoleta.

Florissait en 1230. Hist. génér. de Provence. T. II, p. 414.

7225.

Pistoleta si fo cantaire d'en Arnaut de Maruoill e fo de Proensa; e pois venc trobaire e fez cansos con avinens sons. E fo ben grazitz entre la bona gen; mais hom fo de pauc solatz, e de paubra enduta, e de pauc vaillimen. E tolc moiller à Marseilla; e fes se mercadier e venc rics; e laisset d'anar per cortz.

2701, 7226.

Manta gent fas meravelhar

De mi quar no cant plus soven;

Pero quascus sab son afar,

Et ieu sai lo mieu eissamen.

Qui gais non es cum cantara?

E si canta qui l'auzira,

Ni à cui plai jois ni solatz?

Que'l plus jauzens mi par iratz,

E'l plus larcs escas e marritz:

Per que mon cant s'es adormitz.

Pauc si fai rires ab plorar

Ni paupres d'aver ab manens;

Et escura nuech ab jorn clar,

E qui re no val ab valen;

E pauc cavalier ab vila,

Ni us malautz ab autre sa;

Et erguelh ab humilitat,

E larguez' ab escassedat,

E cortes entre'ls descauzitz,

Plus qu'austors mudatz ab soritz.

Tals tolh que deuria donar,

E tals cuja dir ver que men;

Tals cuja s autrui galiar

Que si mezeis lass' e repren;

E tals se fi' en lendema

Que ges no sab si'l se veira;

E tals es savis apellatz

Que fai e ditz de grans foudatz;

E tals es apellatz petitz

Quan s'escai es pros et arditz.

No vuelh en cort ses gaug estar, 

Ni ab baro desconoissen;

Ni no m'azaut de trop gabar, 

Ni de companha d'avol gen. 

Mas lo coms de Savoya m'a 

Per amic e tostemps m'aura, 

Quar el es savis e membratz

E mante proez' e solatz,

Et es de totz bos aips complitz:

Ben aia huei aital razitz!

De tal sui hom que non a par

De beutat ni d'ensenhamen;

E no m'en posc gaire lauzar,

Enans en plang e'n plor soven.

E domna si merce non a 

Del sieu, doncas de qui l'aura? 

Qu'amada l'aurai desamatz

Tan qu'autre s'en for' enoiatz; 

Et ieu, on plus mi fai ni m ditz

De mal, en sui plus afortitz.

Domna estortz for' e gueritz 

Si'l be qu'ieu dic mi fos grazitz.

Pons d'Ortafas.

2701, 7226.

Si ai perdut mon saber

Qu'à penas sai on m'estau,

Ni sai d'on ven ni on vau,

Ni que m fauc lo jorn ni'l ser.

E soi d'aital captenensa

Que no velh ni posc dormir,

Ni m plai viure ni morir,

Ni mal ni be no m'agensa.

A per pauc no m desesper 

O no m ren monge d'Aniau, 

O no m met dins un loc frau 

On hom no m pogues vezer. 

Quar trahitz soi en crezensa 

De cella qu'ieu plus dezir, 

Que m fa suspiran languir 

Quar mi franh ma covinensa.

Ja mai non cug joi aver

Ni un jorn estar suau.

Pos midons m'a solatz brau

Ni me torn' en noncaler,

No sai on m'aia guirensa;

Qu'on plus ieu pes e cossir

Quo l pogues en grat servir,

Adoncs creis sa malvolensa.

A gran tort me fai doler.

Qu'ieu sia pendut en trau

Si ja segui autr' esclau

Pos m'ac pres en son poder,

Ni fis endreg lieis faillensa;

Mas sol aitan so m'albir

Quar la tem e n'aus ben dir,

E quar li port bevolensa.

Per re no m posc estener

Qu'ieu no l'am e no la lau;

Quar la gensor qu'om mentau

Es, e non ment, e dic ver,

Ab que prezes penedensa

Del greu mal que m fai sufrir:

E si s denhes convertir

Er complida sa valensa.

Ieu soi aissel que no tensa

Ab sidons ni no m'azir,

Ni m sai de res enardir

Mas de so qu'à leis agensa.

E soi sel que fai semensa,

E sai celar e cobrir

Meils qu'autre drutz, e grazir

Qui m fa secors ni valensa.

Rainautz e Jaufre de Pons.

7225.

Rainautz de Pons si fo gentils castellans de Saint Onge, de la marqua de Peitieu, e seingner del castel de Pon, que sabia trobar. En Jaufre de Pon si era uns cavalliers del castel e que sabia asi trobar, e fazia tensos con Rainautz de Pon.

Richautz de Tarascon.

Florissait en 1210. Hist. génér. de Provence. T. II, p. 409.

7225.

Richautz de Tarascon si fo uns cavalliers de Proensa, del castel de Tarascon. Bons cavalliers fo d'armas, e bons trobaire e bon servire; e fez bons sirventes e bonas cansos.

7225, 7614.

Ab tan de sen com dieus m'a dat

Sui crezens en la fe d'amor,

Car hom no pot aver honor

Si non fa so qu'il a mandat.

E'l mandamens es tan grans pros

A cel qui de bon cor lo fai,

Que pois n'es en pretz cabalos:

Gardatz si fa ben qui s n'estrai.

C'aissi fon partit et egat

En la cort del ver dieu d'amor,

A dreit per lial jutjador;

Per qu'i' eras o tenc per proat,

Que qui de son poder es bos

Per bo l deu hom tener ses plai:

E s'ama non am' en perdos,

Que per dreitz amairitz l'escai.

Mos ditz blasmaran li blasmat

E cel que son fals ves amors;

E las falsas e'l trichador

An l'us l'autr' aissi galiat,

Que cascuna n'a almens dos

E cascuns d'els doas o mai:

Don, pois es l'engans tracios,

Il gardon com be lor estai.

Quan dui cor en un' amistat

S'acordon per lial amor,

Aquilh an de fin joi la flor.

Et ieu c'o dic sai la vertat;

E par als ditz de mas cansos

Et en so qu'eras vos dirai,

Que non canta hom cossiros

Per dreit ni marritz quant ha jai.

Aital domna com per orat

Am joves et es caps d'amor,

Oills rizens ab fresca color,

Et a son cors bel e delgat,

Lis e gras, gai et amoros,

Mil tans gensor que dir no sai,

D'aut paratj' ab bellas faissos;

Et es tot bon quan ditz ni fai.

Bonaventura, tant es pros

E bella, que cascus retrai

So qu'eu voill e que m platz de vos;

E tuit remanon en verai.

Saill d'Escola.

7225.

Saill de Scola si fo de Barjairac, d'un ric borc de Peiregorc, fils d'un mercadier; e fez se joglar e fes bonas cansonetas. Et estet com na Inermada de Narbona; e quant ella mori el se rendet à Bragairac, e laisset lo trobar e'l cantar.