Serveri, de Girona. A greu pot hom conoisser en la mar

Serveri, de Girona. (Guillem de Cervera, cerverí)

2701, 7226.

A greu pot hom conoisser en la mar 

Cami, si tot s'en passa linhs e naus, 

O si tot s'es la mar plan' e suaus

Pot greu l'aigua planamen mezurar;

Encaras mens ve ni conois ni sap 

L'engenh e'l mal qu'en falsa femna cap.

E qui l'auzel ve contra'l cel volar 

Greu pot saber lo loc on s'an ni s paus;

E las folhas d'un pin e de dos faus

Pot greu él cel las estelas comtar:

Encaras mens cre que ses dan escap 

Qui vil femna acolh dins en son trap.

E cel qui ve per una roc' anar

Una serpen, ab que'l ver dire n'aus,

Greu i ve pas, cami, tras ni esclaus,

On posc' aissi com la serpens passar;

Encaras mens, e non o dic à gap,

D'avols femna estors que non mescap.

A greu pot hom lo solelh atuzar,

E tant obrar que blasmes sia laus;

Et ors, anhels; e gals, gruas e paus;

E la luna quant es creissens mermar:

Encaras mens cre que nul ben acab

S'ab femna vil vol jazer sotz un drap.

E pot hom greu los quatre vens liar

Si que'ls tenha dins sa maison enclaus;

Et un leo, quant es esquius e braus,

Pot greu aissi com caval enfrenar:

Encaras mens pot venir à bon cap

Ab vil femna que tot be no l'arrap.

La domn' al Cartz e Sobrepretz an cap

D'ensenhamen e de laus ses tot gap.

Al rei Peire nul autre rei no sap,

Per qu'ab dieu tra totz sos faitz à bon cap.

Gaubert Amiels. Breu vers, per tal que mens y poing,

Gaubert Amiels.

7225.

Gaubertz Amiels si fo de Gascoingna, paubres cavalliers e cortes e bons d'armas. E sap trobar; e non entendet mais en domna plus gentil de se; e fes los sieus vers plus mezuratz de hom que anc mais trobes.

7225, M.

Breu vers, per tal que mens y poing,

Fas, e que sia leu apres;

Qu'eu son trobaires, mas non ges

De cels rics que s fan auzir loing.

E s'anava mos cants tro lai

Don la razos ven à mi sai,

Ja no volria plus anes.

De trop ric' amor non ai soing,

Sol de mon paratge n'agues;

Que'l poders ni'l semblan non es

E mi, ni sui fatz, dieus el doing,

D'enquerre ric joi ni s'escai;

N'esdevenir que ben o sai,

Noi poiria quan bei poignes.

Mais dei donc amar é mon poing

Un bel auzelet qu'eu tengues,

Qu'al cel doas gruas o tres

Qu'eu no prengues; ni no somoing

Domna d'amar s'à far no fai.

Ja'l fol cabrier no semblarai

Qu'enques la reïna l'ames.

Las ricas cimas no caloing,

Lais las als domnadors cortes;

C'una conois que m'a conques,

Tal que de Paris troc' al Groing

Genser non es, ni miels no m vai

A nulla de fin pretz verai

Ab poder que la ten en pes.

Ad aquesta soplei e joing

Mas mans per referre merces,

Que la benanans' on m'a mes

Me va miels; e ges no m vergoing

Si trop rica domna non ai,

Que'l sen e la beutat l'estai

Tan aut que paucas li son pres.

De ma ricor, ni mens ni mai

Am; e conois que miels m'estai

Que si trop altament ames.