Clara d'Anduza. En greu esmai et en greu pessamen

Clara d'Anduza.

7226.

En greu esmai et en greu pessamen

An mes mon cor et en granda error

Li lauzengier e'l fals devinador,

Abaissador de joi e de joven;

Quar vos qu'ieu am mais que re qu'él mon sia

An fait de me departir e lonhar,

Si qu'ieu nous posc vezer ni remirar,

Don muer de dol e d'ir' e de feunia.

Cel que m blasma vostr' amor ni m defen

No podon far en re mon cor melhor,

Ni'l dous desir qu'ieu ai de vos major,

Ni l'enveja ni'l dezir ni'l talen.

E non es hom, tan mos enemics sia,

Si l n'aug dir ben que no l tenha en car;

E si'n ditz mal, mais no m pot dir ni far

Neguna re quez à plazer me sia.

Ja nous donets, bels amics, espaven

Quez ieu ves vos aia cor trichador,

Ni queus camge per nul autr'amador,

Si m pregavon d'autras domnas un cen;

Qu'amors, que m te per vos en sa bailia,

Vol que mon cor vos estuj'e vos gar;

E farai o: e s'ieu pogues emblar

Mon cors, tals l'a que jamais no l'auria.

Amics, tan ai d'ira e de feunia

Quar no vos vei, que quant ieu cug cantar

Plang e sospir; per qu'ieu no posc so far

A mas coblas que'l cor complir volria.

Guillaume de la Tour. Qui sap sufrent esperar

Guillaume de la Tour.

Qui sap sufrent esperar

Son bon seingnor, molt greu es

C'un temps no ill en veingna bes,

S' el li sap sirven mostrar

Son affar,

Quar servirs tot ben atrai;

Per qu' eu mon leial cor ai

Et aurai

Totz temps en amar servir,

E ja no m' en voill partir.

E s' ieu tot m' o volgues far,

Eu no m' en poiria ges

Partir, enaissi m' a pres

Ses joi, que no m vol donar:

Mas clamar

No m' en dei, ni non farai;

Que farai donc? atendrai

E veirai

S' amors me volra garir

Del mal dont soven sospir.

E pois d' aitan conortar

Mon cor, que greu er cortes

Tengutz cel, ni ben apres,

Cui amors non fai amar;

Per que m par

Qu'es fols cel qi s' en estrai;

Qu' eissamen sap donar jai

Cum esmai

Amors, mas mi fai languir,

Quar sap q'eu la sai blandir...

Per qu' eu no m voill ja loinar

De vos, domna, car conques

Aves tot so q'om pogues

De ben dire ni pensar:

Gen parlar,

Cortesia, pretz verai

Don lausors fina s retrai,

Solatz gai,

Gen rire, gent acuillir,

Beutat, la gensor que s mir.

E pois tuit li benestar

Son en vos, ben es ma fes

Que i degues esser merces,

Que me fezes mon mal amar

Adousar;

Que ja tant quant eu viurai,

Mon cor de vos non partrai;

Que de lai

Dont hom se cuida enrequir,

Part hom molt greu son desir.

Per qu' eu, domna, enriquirai

Per vos, o per vos morai;

Car ben sai

Que d' als non posc enreqir,

Gardatz cum m' en dei partir!