Biographies, Guillems de Capestaing + Peire Vidals + Bertrans de Born

Biographies des troubadours. 

I.

Guillems de Capestaing si fo us cavalliers de l'encontrada de Rossilhon que confinava con Cataloigna e con Narbones. Mout fo avinenz hom de la persona e prezatz d'armas e de servir e de cortesia. Et avia en la soa encontrada una dompna que avia nom ma dompna Sermonda, moilher d'en Raimon de Castel-Rossilhon, qu'era mot rics e gentils e mals e braus e fers et orgoillos. E'n Guillems de Capestaing si amava la dompna per amor, e cantava de lieis e'n fazia sas cansons. E la dompna qu'era joves e gentils e bella e plaissenz si ll volia ben maior que a ren del mon. 

E fon dich a'n Raimon de Castel-Rossilhon. Et el, cum hom iratz e jelos, enqueric lo faich e saup que vers era, e fetz gardar la moilher fort. 

E quand venc un dia, Raimons de Castel-Rossilhon trobet passan Guillem de Capestaing ses gran compaignia, et aucis lo, e trais li lo cor del cors e 

fetz lo portar a un escudier a son alberc, e fetz lo raustir e far pebrada e fetz lo dar a manjar a la moilher. E quand la dompna l'ac manjat, en Raimons li dis aque el fo. Et ella, quand o auzi, perdet lo vezer e l'auzir; e quand ella revenc si dis: “Seigner, ben m'avetz dat si bon manjar que ja mais no n manjarai d'autre.” E qand el auzi so qu'ella dis, el correc 

sobre lieis ab l'espaza e volc li dar sus en la testa. Et ella s'en anet al balcon e se laisset cazer jos, e fon morta. La novella cors per Rossilhon e per tota Cataloigna qu'en Guillems de Capestaing e la dompna eran enaissi malamen mort, e qu'en Raimons de Castel-Rossilhon avia dat lo cor d'en Guillem a manjar a la dompna. Mout en fo grans dols e grans tristezza per totas las encontradas, e l reclams venc davan lo rei d'Aragon que era seigner d'en Raimon de Castel-Rossilhon e d'en Guillem de Capestaing. E venc s'en a Perpignan en Rossilhon, e fetz venir Raimon de Castel-Rossilhon denan si. E quan fo vengutz, si l prendre fetz e tolc li totz sos chastels e ls fetz desfar, e tolc li tot quant el avia, e lui en menet en preisson. Guillem de Capestaing e la dompna fetz penre e fetz los portar a Perpignan e metre en un monumen denan l'uis de la gleiza, e fetz desseignar desobre l monumen cum ill erant estat mort; et ordenet per tot lo comtat de Rossillon que tuit li cavalier e las dompnas lor venguesson far anoal chascun an; e'n Raimons de Castel-Rossilhon moric dolorosamen en la preison del rei d'Aragon.

(Vore Lo Decamerón en chapurriau, Guiglielmo Guardastagno + Guiglielmo del Rosselló)

II. 

Peire Vidals, si com ieu vos ai dig, s'entendia en totas las bonas domnas e crezia que totas li volguesson be per amor. E si s'entendia en ma domna n'Alazais, qu'era molher d'en Barral, lo senhor de Marselha, lo quals volia melhs a Peire Vidal qu'az ome del mon, per lo ric trobar e per las ricas folias que Peire Vidals dizia e fazia; e clamavan se abdui Rainier. E Peire Vidals si era privatz de cort e de cambra d'en Barral plus qu'ome del mon. E'n Barrals si sabia be que Peire Vidals se entendia en la molher, e tenia lo i a solatz e tuit aquilh qu'o sabion e si s'alegrava de las folias qu'el fazia ni dizia. E la domna o prendia en solatz, si com fazian totas las autras domnas, en que Peire Vidals s'entendia, e cascuna li dizia plazer e lh prometia tot so que lh plagues e qu'el demandava; et el era si savis que tot o crezia. E quan Peire Vidals se corrossava ab ela, en Barrals fazia ades la patz e lh fazia prometre tot so qu'el demandava. 

E quan venc un dia, Peire Vidals si saup qu'en Barrals s'era levatz e que la domna era tota sola en la cambra. Peire Vidals intra en la cambra e venc s'en al leit de ma domna n'Alazais e troba la dormen, et aginolha se davan ella e baizet li la boca. Et ela sentit lo baizar e crezet que fos en Barrals, e rizen ella se levet, e vit qu'el era l fols de Peire Vidal e comenset a cridar et a far gran rumor. E vengron las donzelas de lains, 

quant o auziron, e demanderon: "Quez es aisso?" E Peire Vidals s'en issit 

fugen, e la domna mandet per en Barral, e fetz li gran reclam de Peire Vidal, que la avia baizada; e ploran l'en preguet qu'el en degues penre venjansa. Et en Barrals, si com valens hom et adregz, si pres lo fait a solatz e comenset a rire et a repenre la molher, car ela avia faita rumor d'aisso que l fols avia fait: mas non la poc castiar qu'ela non mezes en gran rumor lo fait e cercan et enqueren lo mal de Peire Vidal, e grans menassas fazia de lui. Peire Vidals per paor d'aquest fait montet en una nau et anet s'en en Genoa. E lai estet tro que pueis passet outra mar ab 

lo rei Richart, que lh fo mes en paor que ma domna n'Alazais li volia far 

perdre la persona. Lai estet longa sazo, e lai fetz maintas bonas chansos, recordan del baizar qu'el avia emblat. E dis en una chanso que dis

"Ajostar e lassar,"

que de leis non avia agut negun guizardo: 

"mas un petit cordo;

si aigui, qu'un mati

intrei dins sa maizo

e lh baizei a lairo

la boca e l mento."

Et en autre loc el dis:

"Plus honratz fora qu'om natz,

si l bais emblatz mi fos datz

o neis autreiatz."

Et en autra chanso el dis:

"Be m bat amors ab las vergas qu'eu colh,

car una vetz en son reial capdolh

l'emblei un bais, don tan fort mi sove.

Ai! Tan mal viu qui so qu'ama no ve."

Aissi estet longa sazo outra mar, que non auzava venir ni tornar en Proensa. E'n Barrals que li volia aitan de be, com avetz auzit, si preguet tan sa molher, qu'ela li perdonet lo fait del baizar e lo i autreget en do. E'n Barrals si mandet per Peire Vidal e si l fes mandar gracia e bona volontat de sa molher, e que vengues a sa molher. Et el venc ab gran alegreza a Marselha, et ab gran alegreza fo receubutz per en Barral e 

per ma domna n'Alazais. E autreget li lo baizar en do qu'el li avia emblat, 

[e fo li tot perdonat.] don Peire Vidals fetz esta chanso que ditz:

"Pos tornatz sui en Proensa," 

[la qual vos auziretz.]

III. 

Ben avetz entendutz los mals qu'en Bertrans de Born remembret que l reis d'Arago avia fachs de lui e d'autrui. Et a chap d'una gran sazo, qu'el n'ac apres d'autres mals qu'el avia fachs, si lo lh volc retraire en un autre sirventes. E fo dich a'n Bertran qu'un chavalier avia en Arago, que avia nom (nEspanhols) n'Espanhols, et avia un bo chastel mout fort que avia nom Castellot et era proprietatz d'en Espanhol et era en la frontereza dels Sarazis, don el fazia gran guerra als Sarazis. E l reis si entendia mout en aquel chastel, e venc un jorn en aquela encontrada, e nEspaingnols si lh venc encontra per servir lo e per envidar lo al sieu chastel, e menet lo charamen, lui ab tota soa gen. E l reis, quan fo dedintz lo chastel, lo fetz penre et menar deforas e tolc li lo chastel. -

E fo vertatz que, quan lo reis venc al servizi del rei Henric, lo coms de Tolosa si l desconfis en Guasconha e tolc li be cinquanta chavaliers; e l reis Henrics li det tot l'aver que lh chavalier devian pagar per la reenzo, et el no l paguet, l'aver, als chavaliers, anz l'en portet en Arago. E lh chavalier eissiron de preiso e pagueron l'aver. - E fo vertatz qu'us joglars, que avia nom Artusetz, li prestet dos cens marabotis, e menet lo ben un an ab se e no lh en det denier. E quan venc un dia, Artusetz joglars si si mesclet ab un Juzieu, e lh Juzieu li vengron sobre e nafreron 

Artuset malamen, lui et un son conpanho. Et Artusetz e l companhs auciseron un Juzieu, don li Juzieu aneron e reclam al rei e pregueron lo qu'el en fezes vendeta e que lor des Artuset e l conpanho per aucire, e qu'ilh li darian dos cens marabotis. E l reis los lor donet amdos e pres los dos cens marabotis. E lh Juzieu los feiron ardre lo jorn de la Nativitat de Crist, si com dis Guilhems de Bergueda en un sieu serventes dizen en el mal del rei:

“E fetz una mespreiso

don hom no l deu razonar,

que l jorn de la naissio

fetz dos crestias brusar:

Artus ab autre son par,

e no degra aissi jutjar

a mort ni a passio

dos per un Juzieu fello."

Don us autre, que avia nom Peire joglars, li prestet deniers e chavals, et aquel Peire joglars si avia grans mals dichs de la vielha reina d'Englaterra, la quals tenia Font-Ebrau, que es una abadia, on se rendon totas las vielhas richas. Et ela lo fetz aucire per paraula del rei d'Arago.

E totz aquestz laitz fachs remembret en Bertrans de Born al rei d'Arago en aquest sirventes que dis:

"Quant vei pels vergiers despleiar

los cendatz grocs, indis" et cetera.

___

Lo reis Henrics d'Englaterra si tenia assis en Bertran de Born dedintz Autafort e l combatia ab sos edificis, que mout li volia gran mal, quar el crezia que tota la guerra que l reis joves, sos filhs, l'avia facha, qu'en Bertrans la lh agues facha far, e per so era vengutz denan Autafort per lui deseretar. E l reis d'Arago venc en l'ost del rei Henric denan Autafort. E quan Bertrans o saup, si fo mout alegres que l reis d'Arago era en l'ost, per so qu'el era sos amics especials. E l reis d'Arago si mandet sos messatges dintz lo chastel, qu'en Bertrans li mandes pa e vi e charn, et 

el si l'en mandet assatz. E per lo messatge per cui el mandet los presens, el li mandet pregan qu'el fezes si qu'el fezes mudar los edifizis e far traire en autra part, que l murs on ilh ferian era tot rotz. Et el, per gran aver del rei Enric, el li dis tot so qu'en Bertrans l'avia mandat a dir. E l reis Henrics si fetz metre dels edifizis plus en aquela part on saup que l murs era rotz, e fo lo murs ades per terra e l chastels pres.

E'n Bertrans ab tota sa gen fo menatz al pavilho del rei Henric, e l reis lo 

receup mout mal, e l reis Henrics si lh dis: "Bertrans, Bertrans, vos avetz dich que anc la meitatz del vostre sen no us ac mestier nuls temps; mas sapchatz qu'ara vos a el be mestier totz." "Senher," dis en Bertrans, 

“el es be vers qu'ieu o dissi, e dissi be vertat." E l reis dis: "Ieu cre be qu'el vos sia aras falhitz." "Senher" dis en Bertrans, “be m'es falhitz."

"E com?" dis lo reis. "Senher," dis en Bertrans, “lo jorn que l valens joves reis, vostre filhs, morit, ieu perdei lo sen e l saber e la connoissensa."

E l reis, quant auzit so qu'en Bertrans li dis en ploran del filh, venc li grans dolors al cor de pietat et als uolhs, si que no's poc tener qu'el no 

pasmes de dolor. E quan el revenc de pasmazo, el crida e dis en ploran: "En Bertrans, en Bertrans, vos avetz be drech et es be razos, si vos avetz perdut lo sen per mo filh, qu'el vos volia mielhs que ad home del mon. Et ieu, per amor de lui, vos quit la persona e l'aver e l vostre castel, e vos ren la mia amor e la mia gracia, e vos do cinc cens marcs d'argen per los dans que vos avetz receubutz." E'n Bertrans si lh chazet als pes, referen li gracias e merces. E l reis ab tota la soa host s'en anet.

Raimon d'Avinho. Sirvens sui avutz et arlotz,

Raimon d'Avinho.

Sirvens sui avutz et arlotz, 

e comtarai totz mos mestiers:

e sui estatz arbalestiers

e portacarn e gualiotz

e rofians e baratiers

e pescaires et escudiers,

e sai ben de peira murar,

pero de cozir non trop par,

e mauta portei mantas ves,

et ai mais de cent auzels pres;

e sui trobaires bels e bos,

qu'eu fas sirventes e tensos,

e sui joglars desavinens

e de set ordes sui crezens.

E fui mazeliers e fis datz,

e corregiers fui lonjamens,

e sai far anels bels e gens

e rateiras per penre ratz,

e far ausbercs e garnizos,

e sai far putas e lairos,

e sancnei bras, e fui boviers

e mais d'un mes mercadaniers,

e sai far arcas e vaissels,

penches e fus e cascavels,

e sai far galeas e naus,

coutels et espazas e faus;

e sai esser pestres e cocs,

e sui bos meges, quant es locs.

E fui clergues e cavaliers

et escrivas e taverniers,

e sai far selas et escutz,

e sai ben penher e far glutz,

e sai teisser e far carbo,

e sai faire de gal capo,

e sai far teules e capels,

e sai far gipas e gipels,

e sai far lansas e bordos,

e sui espessials trop bos,

e sai batre lan e deniers,

e sui fort cortes aguilliers,

e sui cambiaires leials,

e sui enves las femnas fals.

E fis estueiras e tamis,

e serquei aur e pueis m'assis

a cavar argen ben tres ans,

e fui corrieus arditz e grans,

e sai far fres et esperos,

e budelliers fui a sazos,

e fis caus e fui campaniers,

e sai ben esser falconiers,

e fui portiers e barufautz

e gacha per fregz e per cautz,

e billaires e berretiers,

e fui de seda bos obriers,

et engienhs fis, si Dieus mi gar,

e cordas e pairols sai far.

Ancar n'ai agutz de melhors,

qu'eu gardei fedas et anhels,

e fui crestaires de porcels,

e teis fil de maintas colors,

e toquei azes e saumiers,

e fui mai de dos ans porquiers,

e fui penchenaire de li,

e guardei mais d'un an moli,

e fui manescals de cavals

e guardei eguas per las vals,

e fui fabres e pelleciers,

si m'aiut Dieus, e sabatiers;

qui m'en vol creire, bos fols sui,

e savis be, quan trop ab cui.

E fis olas e fui sauniers,

e fui cassaires e veiriers,

e fis pargamins e fossatz,

e sai liar radels erratz.

E taillei borsas e vendei

plom per argen, e pois menei

orps e devinc redons e gras,

e fui barbiers, e paniers fas.

Aimeric de Pegulhan. Domna, per vos estauc en greu turmen ++

Aimeric de Pegulhan.

I. 

“Domna, per vos estauc en greu turmen.”

"Senhor, que fols faitz, qu'eu grat no us en sen."

"Domna, per Deu aiatz en chauzimen."

"Senher, vostres precs i anatz perden."

"Bona domna, ja us am eu finamen."

"Senher, et e us volh peitz qu'a l'autra gen."

"Domna, per so n'ai eu lo cor dolen."

"Senher, et eu alegre e jauzen."

"Domna, ja mor per vos ses nulh confort."

"Senher, ben trop n'auretz fag lonc acort." 

"Domna, ja es ma vida peitz de mort."

"Senher, so m platz, sol qu'eu s non aia tort."

"Domna, de vos non ai mas desconort."

"Senher, e doncs cuiatz que us am per fort?"

"Domna, ab un semblan m'agratz estort."

"Senher, respeit no n aiatz ni conort."

"Domna, vauc doncs alhors clamar merce."

"Senher, anatz de sai: qui vos rete?"

"Domna, no posc, que vostr' amors me te."

"Senes conselh, senher, o fa de me."

"Domna, trop mal mi respondetz ancse."

"Senher, car peitz vos volh qu'az autra re."

"E doncs, domna, no m faretz ja nulh be?"

"Senher, aissi er cum dizetz, so cre." -

"Amors, gitat m'avetz a no m'en cal."

"Amics, per Deu, no us en posc far ren al."

"Amors, e vos ja meretz de tot mal."

"Amics, per so us en trairai san e sal."

"Amors, per que m fetz chauzir domn' aital?"

"Amics, eu vos mostrei so que mais val."

"Amors, no posc sofrir l'afan coral."

"Amics, per so queiram autre logal."

"Amors, en tot quan faitz vos vei falhir."

"Amics, a gran tort me voletz laidir."

"Amors, e doncs per que ns voletz partir?"

"Amics, car greu m'es quan vos vei morir."

"Amors, ja no cugetz qu'alhors me vir."

"Amics, per so pensatz del ben sofrir."

"Amors, sembla us si ja n poirai jauzir?"

"Amics, oc vos, sufren et ab servir."

II.

Si cum l'albres que per sobrecargar

franh se mezeis e pert son fruit e se,

ai eu perdut ma bela domn' e me,

e mos engenhs se franh per sobramar.

Pero, sitot me sui apoderatz,

anc jorn no fi mon dan ad escien,

anceis cuit far tot so que fatz ab sen:

mas er conosc que trop sobra l foudatz.

E non es bo qu'om sia trop senatz

que a sazos no sega son talen,

e si no i a de cascun mesclamen,

non es bona sola l'una meitatz.

Ben esdeven hom per sobresaber

nescis e'n vai maintas vetz foleian;

per que s'eschai qu'om an en loc mesclan

sens ab foudat, qui ls sap gen retener.

Las, qu'eu non ai mi mezeis en poder,

ans vau mon mal enqueren e cercan,

e volh trop mais perdre e far mon dan

ab vos, domna, qu'ab autra conquerer.

Qu'ades cuit far en aquest dan mon pro

e que savis ab aquesta folor;

pero a lei de fol fin amador

m'avetz ades, on peitz mi faitz, plus bo.

No sai nulh a “oc" per qu'eu des vostre "no";

pero soven tornon mei ris en plor,

et eu cum fols ai gaug de ma dolor

e de ma mort, quan vei vostra faisso.

Co l bazalesc qu'ab joi s'anet aucir, (basilisco)

quant el miralh se remiret e s vi,

tot atressi etz vos miralhs a mi,

que m'aucietz quan vos vei ni us remir.

E no us en cal quan mi vezetz morir,

abans o faitz de mi tot atressi

cum de l'enfan qu'ab un maraboti

fai hom del plor laissar e departir;

e pois, quant es tornatz en alegrier

et hom l'estrai so que l donet e l tol,

et el adoncs plor' e fai maior dol

dos aitans plus que no fetz de primier.

Teriaca, ges vostre pretz no col

de melhurar, qu'oi val pro mais que hier. (oi : hodie : huy, hui, avui, hoy)

III. 

En aquel temps que l reis mori nAnfos, (n'Anfos : Alfonso II de Aragón)

e sos bels filhs plazens, cortes e bos,

e l reis Peire, de cui fon Aragos, (Pedro II)

e n Diegos, qu'era savis e pros,

e l marques d'Est e l valens Salados,

adoncs cugei que fos mortz pretz e dos,

si qu'eu fui pres de laissar mas chansos:

mas ar los vei restauratz ambedos.

Pretz es estortz qu'era gastz e malmes,

e dos garitz del mal qu'avia pres,

qu'un bon metge nos a Deus sai trames

deves Salern, savi e ben apres,

que conois totz los mals e totz los bes

e meizina cascun segon que s' es,

et anc loguier no n demandet ni n pres,

ans los loga, tant es francs e cortes.

Anc hom no vi metge de son joven

tan larc, tan bel, tan bon, tan conoissen,

tan coratgos, tan ferm, tan conqueren,

tan ben parlan ni tan ben entenden:

que l ben sap tot e tot lo mal enten,

per que sap melhs meizinar e plus gen,

e fai de Deu cap e comensamen,

que l'ensenha gardar de falhimen.

Aquest metge sap de metgia tan

et a l'engenh e l sen e l saber gran,

qu'el sap ensems gazanhar meizinan

Deu e l segle (gardatz valor d'enfan!)

que l seu perden venc, meten e donan,

sai conquerir l'emperi alaman.

Oimais cre ben, cor que i anes doptan,

los faitz qu'om ditz d'Alixandre comtan.

Aquest metge savis de qu'eu vos dic

fon filhs del bon emperador Enric,

et a lo nom del metge Frederic

e l cor e l sen e l saber e l'afic: 

don seran ben meizinat sei amic

e i trobaran conselh e bon abric.

De lonc sermo devem far breu prezic,

que ben cobram lo gran segon l'espic.

Ben pot aver lo nom de Frederic,

que l dig son bon e l fag son aut e ric.

Al bon metge maistre Frederic

di, metgia, que de metgar no s tric.

//

Jeu-parti entre Savaric de Mauleon, Gaucelm Faidit et Uc de la Bacalaria. Gaucelm, tres jocs enamoratz

Jeu-parti entre Savaric de Mauleon, Gaucelm Faidit et Uc de la Bacalaria. 

“Gaucelm, tres jocs enamoratz

partisc a vos et a'n Ugo,

e chascus prendetz lo plus bo

e laissatz me qualque us volhatz.

Una domn' a tres preiadors,

e destrenh la tan lor amors

que, quan tuit trei li son denan,

a chascun fai d'amor semblan:

l'un esgard' amorozamen,

l'autr' estrenh la man doussamen, 

al tertz caussiga l pe rizen.

Digatz al qual, pos aissi es,

fai maior amor de totz tres?”

“Senh'en Savaric, ben sapchatz

que l'amics recep plus gen do,

qu'es francamen, ses cor felo,

dels bels olhs plazens esgardatz.

Del cor mou aquela doussors,

per qu'es cen tans maier honors.

E del man tener dic aitan,

que non li ten ni pro ni dan,

qu'aital plazer comunalmen

fan domnas per acolhimen.

E del caussigar non enten

que la domn' amor li fezes,

ni deu per amor esser pres.”

“Gaucelm, vos dizetz so que us platz,

for que non mantenetz razo,

qu'en l'esgardar non conosc pro

a l'amic, que vos razonatz;

e s'el i enten, es folors,

qu'olh esgardan lui et alhors

e nulh autre poder non an.

Mas quan la blanca mas ses gan

estrenh son amic doussamen,

l'amors mou del cor e del sen.

E'n Savarics, car part tan gen,

mantenga l caussigar cortes

de pe, qu'eu no l mantenrai ges.”

“Senher, pos lo melhs mi laissatz,

mantenrai l'eu, ses dir de no;

don dic que l caussigars que fo

faitz del pe fo fin' amistatz,

celada de lauzenjadors,

e par be, pos aital socors

pres l'amics rizen caussigan,

que l'amors es ses tot enjan.

E qui l tener de la man pren

per maior amor fai nonsen.

E d'en Gaucelm no m'es parven

que l'esgart per melhor prezes,

si tan com ditz d'amor saubes.”

“Senher, vos que l'esgart blasmatz

dels olhs e lor plazen faisso,

no sabetz que messatgier so

del cor que ls i a enviatz;

qu'olh descobron als amadors

so que reten el cor paors;

don totz los plazers d'amor fan.

E maintas vetz rizen gaban

caussiga l pe a mainta gen

domna ses autr' entendemen.

E'n Ugo mante falhimen,

que l teners de man non es res,

ni non cre qu'anc d'amor mogues.”

“Gaucelm, encontr' amor parlatz,

vos e l senher de Malleo,

e pareis ben a la tenso,

que ls olhs que vos avetz triatz

e que razonatz pels melhors

an trahitz mains entendedors.

E de la domn' ab cor truan,

si m caussigava l pe un an,

non auria mon cor jauzen.

E de la man es ses conten

que l'estrenhers val per un cen,

car ja, si al cor non plagues

l'amors, no l'agr' al man trames.”

“Gaucelm, vencutz etz el conten

vos e'n Ugo, certanamen,

e volh qu'en fassa l jutjamen

mos Gardacors que m'a conques,

e na Mari' on bos pretz es.”

“Senher, vencutz no sui nien,

et al jutgar er ben parven,

per qu'eu volh que i si' eissamen

na Guilhelma de Benaugues (Benauges)

ab sos ditz amoros cortes.”

“Gaucelm, tant ai razo valen

qu'amdos vos fortz e mi defen;

e sai un' ab gai cors plazen

en que l jutjamens fora mes,

mas pro vei n'i a mais de tres.”

Gaucelm Faidit. Lo rossinholet salvatge + Ara nos sia guitz + Al semblan del rei ties,

Gaucelm Faidit.

I.

Lo rossinholet salvatge

ai auzit, que s'esbaudeia

per amor en son lengatge,

e m fai si morir d'enveia,

car leis cui dezir

no vei ni remir

ni no m volgr' ogan auzir.

Pero pel dous chan

qu'el e sa par fan

esfortz un pauc mon coratge,

e m vau conortan

mon cor en chantan,

so qu'eu no cuidiei far ogan.

Empero nul alegratge

no m don'al cor res qu'eu veia,

per qu'eu conosc mon folatge.

Ben es dreitz qu'aissi m n'esteia

e deu m'avenir,

car per fol consir

laissei mon cor ajauzir;

don sui en afan

e n'ai ir' e dan

e conosc en mon coratge

qu'ai perdut est an,

qu'anc non aic joi gran

ni re que m vengues a talan.

E sitot planh mon damnatge,

mos cors aclin' e sopleia

vas leis que a senhoratge

en mi, e tanh qu'esser deia,

qu'anc no m poc plus dir,

quan venc al partir.

Mas sa cara lh vi cobrir,

e m dis sospiran:

“A Deu vos coman!”

E quan pens en mon coratge

l'amoros semblan,

a pauc en ploran

no m'auci, car no lh sui denan.

Mi dons, que te mon coratge,

prec, si com cel que merceia,

que no m'aia cor salvatge,

ni fals lauzengiers no creia

de mi, ni s'albir

qu'eu vas autra m vir,

que per bona fe sospir

e l'am ses enjan

e ses cor truan,

qu'eu non ai ges tal coratge

com li fals drut an,

que van galian;

per qu'amors torna en soan.

Anc no falsei mon coratge

vas leis, cui mos cors s'autreia,

pos l'aigui fait homenatge,

e non ai cor que m recreia

ja del seu servir.

Cui qu'enoi ni tir,

seus sui e no posc giquir

de leis tan ni quan,

qu'autra no deman,

ni non es en mon coratge

res qu'eu volha tan:

per que la reblan,

mas mas jontas, humilian.   (mas mas : les meues mans juntes)

Chansos, de te fatz messatge

e vai ades e despleia

lai on jois a son estatge,

a mi dons que tan m'agreia;

e pos li tan dir

qu'eu mor de desir.

E s'il te denha acolhir,

vai li remembran, -

e no t'ans tarzan, - (y no te vaigues tardán)

lo consirier e l coratge,

e l'amor tan gran

don mor deziran,

car no la remir en baizan.

Na Maria, tan

avetz de pretz gran,

per que son tuit d'agradatge

mei dich e mei chan,

per la lauzor gran

que eu dic de vos en chantan.

II.

Ara nos sia guitz

lo vers Deus, Jesu Critz,

car de franca gen gaia

sui per lui partitz,

on ai estat noiritz

et honratz e grazitz.

Per so l precs no l desplaia,

s'eu m'en part marritz.

Ai, gentils Lemozis,

el vostre dous pais

lais de bela paria

senhors e vezis

e domnas ab pretz fis,

pros de gran cortezia;

don planh e languis

e sospir noit e dia.

Mas qualsque sia l critz

del remaner auzitz,

ja nuls bes, que m n'eschaia;

ni rics locs aizitz

no m tenra, ni conquitz,

s'avia ls votz complitz,

qu'apres calenda maia

no sia garnitz

del torn, si Deus l'aizis;

e s'a lui platz ma fis

en leial romania,

lo tot li grazis.

Pero mas joins aclis

prec vas sa senhoria

que ls portz e ls camis

nos adreis vas Suria.

Honratz es e grazitz

cui Deus non es falhitz,

que Deus vol et assaia

los pros e ls arditz,

et aquels a chauzitz,

e laissa los aunitz

et l'avol gen savaia

per cui es traitz.

Ai, caitiu, mal assis,

vos eis vos etz aucis,

qu'avers e manentia

vos tol paradis,

qu'avars etz e ressis,

tan qu'us far no poiria

qu'a Deu abelis:

per que Deus vos desfia.

Oimais es Antecritz

al dan del mon eissitz,

que totz lo bes s'esmaia

e l mals es salhitz,

que ls fals prins a sazitz

e pres et endormitz

escartatz, que ls esglaia

e ls te morns e tritz,

que l reis, cui es Paris,

vol mais a saint Daunis

o lai en Normandia

conquerr' esterlis

que tot quan Safadis 

a ni ten en bailia:

don pot esser fis

qu'aissi com deura sia.

Ar laissem los giquitz

remazutz escarnitz,

et ab obra veraia

de bona razitz

sia per nos servitz

lo vers sains Esperitz,

cui pregem que ns atraia

ab faitz afortitz

a dan dels Sarrazis,

si qu'en sia conquis

lo sains locs, e la via

fass' als pelegris,

que nos tolc Saladis,

don la vergena pia

cui Deus benezis

nos sia garentia.

Bels dous Maracdes fis,

vos e ls pros Peitavis

sal Deus e na Maria

qu'a bon pretz conquis.

E ma domna Elis

sapcha be, ses bauzia,

qu'eu li sui aclis

on qu'eu an ni m'estia.

III.

Al semblan del rei ties,

quan l'ac vencut l'emperaire

e il fetz tirar, quan l'ac pres,

sa carret' e son arnes,

don el chantava l maltraire,

vezen la roda virar,

e l ser plorav' al manjar,

chant, on plus ai malanansa,

quan consir qu'en alegransa

me pot mos maltraitz tornar;

e plor, quan vei joi ni be

als autres, e mi sove

qu'eu n'aic pro; er no n ai re,

Qu'en aital trebalha m te

pres amors e'n gran balansa;

e no sai ren dir per que,

mas car aten sa merce,

vencutz ses dezesperansa;

e car no m recre d'amar,

que d'als no m pot encolpar,

tan li sui fizels amaire,

a lieis, cui non aus retraire

ni descobrir mon pensar.

Pros domn' ab gen cors cortes,

tan tem lo pretz qu'en vos es

e las grans valors e ls bes.

Pero no m dezesper ges

ni m'es semblan ni veiaire

qu'en vos no sia merces,

que l vostre cors ben apres,

humil, franc e de bon aire

vei e l ric pretz valen car

e l dous ris e l gen parlar,

joios ab gaia semblansa.

E car non trobatz egansa

de beutat el mon ni par,

aisso m tira si el fre

e m tol l'ardit e m rete

qu'eu no us aus preiar de re.

Car maintas sazos m'ave

qu'ab tota fait' acordansa

domna us cug preiar de me,

e pois, quan mos cors vos ve,

m'espert e no n ai membransa

mas sol de vos esgardar,

e no us sai ni us aus preiar

ni l'amor no us posc estraire.

Doncs gran merce pogratz faire

si m dessetz ses demandar,

que non es tan pauca res

qu'eu del vostre don agues,

quez a gran no la m tengues.

Per qu' enans que l bruitz vengues

ni fals lauzengiers trichaire

l'amor que us ai conogues,

fora gen, s'a vos plagues,

de conoisser mon afaire,

pos eu no l vos aus mostrar.

Qu'un honrat do m pogratz far,

si, ses tota malestansa,

sofrissetz qu'a vostr' onransa

fosson mais tuit mei chantar.

E l plus lais, que be s cove;

mas d'aisso no cug ni cre,

s'eu l'enquer, que m'en malme.

E pos de vos no m recre

ni de la vostra fiansa,

don eu autrei per jasse

mon chant e ma leial fe.

Si vostra valors m'enansa,

honors vos er, ses doptar.

Vos sabetz co s tanh a far,

qu'eu no us dic ni pauc ni gaire,

mas tan qu'umils merceiaire

vos sui ab fin cor e clar.

E s'aesmes ni saubes

qu'auzes mais dir ni degues,

del plus me for' entrames.

A Ventadorn volh retraire

que la domna non a par

de beutat ab complitz bes,

e si'n Maracdes saubes

so qu'eu sai, be l fora pres.