Aimerics de Belenoi. Pos lo gai temps de pascor

Aimerics de Belenoi.

2701, 7225.

N Aimerics de Belenoi si fo de Bordales, d'un castel que a nom Lesparra, neps de maestre Peire de Corbiac. Clercs fo, mas fez se joglar; e trobet bonas cansos, e bellas et avinens, d'una domna de Gascoingna que avia nom Gentils de Ruis, e per lei estet lonc temps en aquella encontrada. Pois s'en anet en Cataloingna, et estet lai tro qu'el mori.

2701, 7225-6.

Pos lo gai temps de pascor

Renovel' e ve

Vestit de folh e de flor,

Cantarai de se,

Qu'atressi s'es mos pessatz

De fin joi renovelatz;

Quar mos sobransiers volers, 

A cui no platz vils plazers, 

A trobat à son talen

Domna de cor e de sen,

Orgolhoza et humil, 

De captenemen gentil.

Amar me fai ad honor 

Mo fin cor ancse, 

Ses blasmes e ses folor 

D'autrui e de me.

Qu'anc no m'abelis beutatz, 

Ni paratge ni rictatz, 

Si noi fos sens e sabers, 

Que fan far e dir plazers; 

E gardar de fallimen

Domn' e cel qu'à lieis'enten: (liei s'enten)

Et ai cor tan senhoril

Quaz autr'amor no m'apil.

Mas qui vol d'entendedor

Proar s'ama be,

Guart so sen e sa valor

E cossi s capte.

Que s'es ben enamoratz, 

Li fag el ditz el solatz

Seran plus ric que'l devers.

Qu'amors non es mas plazers,

E tug bel captenemen

Movon d'amar leialmen:

Mas ieu no trob entre mil

Un qu'é los sieus fagz no guil.

Qui vol apenre d'amor

Amar li cove,

Que ja per essenhador

Non apenra re.

Que fin'amor, so sapchatz, 

Non es als mas voluntatz 

Qu'adutz ins él cor vezers,

Don la rete bels plazers, 

E viu de dous pessamen: 

Per q'usquecs am'et enten 

En aut loc o en sotil, 

Ves que s'a ric cor o vil.

Mas tant a fina valor

Cella que m mante,

Que no tem lauzenjador

Ni fals digz so cre.

Que'l sieu gen cors, ric, prezatz,

Complitz de totas beutatz,

Conois messonjas e vers,

Per que no tem far plazers

Qu'ab sen soana e pren;

E jutja tan leialmen

Que'l palais ten per cortil,

Tan son siei fag agradil.

Ni ieu plus no vau queren

Terra ni baro ni gen:

Tug autre fag mi son vil, 

Tan son li vostre gentil.

XXXI, Qui se membra del segle qu' es passatz (Sordel)

XXXI.

 

Qui se membra del segle qu' es passatz

Com hom lo vi de totz bos faitz plazen,

Ni com hom ve malvais e recrezen

Aquel d' aras, ni com er restauratz

Non er per cel qui venra plus malvatz,

Totz hom viura ab gran dolor membran

Cals es ni fo ni er d' aissi enan.

 

Mas non es dreitz c' om valens ni prezatz

Se recreza per aital membramen,

Ans taing s' esfortz tot jorn plus vivamen

C' om sufra 'l fais de pretz qu' es mesprezatz;

Car cel n' a mais que plus fort n' es cargatz,

E car es dreitz s' esforso ill prezan

De ben, on plus l' avol s' en van laisan.

 

En plus greu point non pot nuillz esser natz

Com cel que pert dieu e 'l segl' eissamen,

Tot aital son li trist malvatz manen

C' an mes a mort domnei, joi e solatz;

Tan los destreing non fes e cobeitatz

C' onor e pretz en meton en soan,

E dieu e 'l mon en geten a lor dan.

 

Ai! com pot tan esser desvergoignatz

Nuls hom gentils que an' enbastarden

Son lignatge per aur ni per argen;

Que l' avers vai leumens e la rictatz,

E 'l vida es breus, e la mortz ven viatz;

Per c' om degra leialmen viure aman,

Deu retener del mon grat gen regnan.

 

Dels maiors mov tota la malvestatz

E pois apres de gra en gra deissen

Tro als menors, per que torn en nien

Fins jois e pretz, e qui vol pretz ni 'l platz

Pot l' aver leu, car tan n' es granz mercatz

Que per cinc solz n' a hom la peza e 'l pan,

Si 'l tenon vil li ric malvatz truan.

 

Na Gradiva, qui que estei malvatz,

Per vos n' azir malvestat et enjan,

Et am valor e joi e pretz e chan.

 

Al rei tramet mon sirventes viatz

Cel d' Aragon, qu' el fais lo plus pesan

Sosten de pretz, per qu' el ten entre man.

 

Sordel.

XXVII, Ab greu cossire Fau sirventes cozen; Bernard Sicart de Marjevols.

XXVII.

Ab greu cossire

Fau sirventes cozen; 

Dieus! qui pot dire 

Ni saber lo turmen,

Qu' ieu, quan m' albire,

Suy en gran pessamen;

Non puesc escrire

L' ira ni 'l marrimen,

Qu' el segle torbat vey,

E corrompon la ley

E sagramen e fey,

Q' usquecx pessa que vensa

Son par ab malvolensa,

E d' aucir lor e sey,

Ses razon e ses drey.

Tot jorn m' azire

Et ai aziramen,

La nueg sospire

E velhan e dormen;

Vas on que m vire,

Aug la corteza gen

Que cridon Cyre

Al Frances humilmen:

Merce an li Francey,

Ab que veio 'l conrey,

Que autre dreg no y vey.

Ai! Toloza e Proensa

E la terra d' Agensa,

Bezers e Carcassey

Quo vos vi e quo us vey!

Cavallairia,

Hospitals ni maizos,

Ordes que sia

No m' es plazens ni bos;

Ab gran bauzia

Los truep et orgulhos,

Ab simonia,

Ab grans possessios; 

Ja non er apellatz

Qui non a grans rictatz

O bonas heretatz;

Aquelhs an l' aondansa

E la gran benanansa;

Enjans e tracios

Es lor cofessios.

Franca clercia,

Gran ben dey dir de vos,

E s' ieu podia

Diria 'n per un dos;

Gen tenetz via

Et ensenhatz la nos;

Mas qui ben guia

N' aura bos gazardos;

Res no vey que us laissatz,

Tan quan podetz donatz,

Non autz cobeytatz,

Sofretz greu malanansa

E vistetz ses coinhdansa;

Mielhs valha dieus a nos

Qu' ieu no dic ver de vos!

Si quo 'l salvatges

Per lag temps mov son chan,

Es mos coratges 

Qu' ieu chante derenan;

E quar paratges

Si vai aderrairan,

E bos linhatges

Decazen e falsan,

E creys la malvestatz,

E 'ls baros rebuzatz,

Bauzadors e bauzatz

Valor menon derreira

E deshonor primeyra;

Avols ricx e malvatz

Es de mal heretatz.

Rey d' Aragon, si us platz,

Per vos serai honratz.

Bernard Sicart de Marjevols.