Bertolome Zorzi.
Aissi co l fuocx consuma totas res,
consuma amors el cor, oi s denha assire,
tot pensamen que lh pogues contradire,
Per que mos cors contradir no i pot ges, (no hi pot gens)
qu'el es en lui assis ab tal esfortz
que, sitot eu m'era ab lui acordatz,
pel dan que m fetz antan la dura mortz
de laissar chan et amoros solatz,
ops m'es qu'er chant e sia enamoratz.
Pero d'aitan puosc dir que m'es ben pres
c'a dreich ne pot totz hom esser chausire,
cum en lieis es complidamen totz bes,
qu'il es tant pros, francha, bella e cortes,
c'aissi cum es d'un fruich gensatz uns ortz, (fruit, fruita; hort, ort)
es lo segles de lieis totz enansatz;
qu'en lieis reviu jois, dompneis e deportz,
que moriron, quand fui del gaug mermatz,
qu'en lieis m'er gen, s'a Dieu platz, restauratz,
E car aten que mon gaug restaures,
ben dei ponhar d'esser adreich servire;
per qu'ai pausat mon cor e mon desire (pausat : posat, ficat mon cor)
en far e dir tot so qu'a lieis plagues.
Mas si ja fos que grazir lo m denhes,
tot atressi cum guida rics conortz
cellui qu'en mar es a perilh estatz,
quan ven en luoc on aisitz l'es bons portz,
guidera m gaugz e conortz da totz latz, (goch; conort : consol)
e seria m de tot mal eslonhatz. (alluñat, apartat)
Mas si noi s tanh que grazir lo m degues,
per merce lh prec que mos digz non l'azire;
c'aissi cum es de quant Dieus vol grazire
rendutz qu'estai penedens e confes,
enten grazir tot cant faire m volgues,
qu'estiers fora trop sobranciers mos tortz;
car de l'afan qu'en s'amor fos donatz
seria honratz cel cui s'atanh Guisortz,
tant sobreval sos adreitz cors prezatz,
per que m'es bel tot aisso qu'a lieis platz.
Qu'ab tal voler sui a lieis servir mes
que d'als non ai penssamen ni cossire,
mas cum pogues tant per lieis far e dire (per ella, per nella)
qu'en retener mi per sieu s'acordes;
e del mais fos cum a lieis agrades,
car sol fos faitz en lieis aitals acortz,
volria amors c'a mi vengues la sortz (voldríe amor que a mí vinguere)
d'esser de joi senes par avondatz (abundat de alegría : joi)
e sobre totz fins amans afinatz.
Pero tals m'a ses tot aisso conques
que m plagra neus si 'la m volia aucire;
per qu'eu no m planc, si 'la m fai greu martire, (si ella me fa)
ben c'a morir m'en avenra, so m pes, (avindrá; aixó me penso)
si no m'en val chausimens e merces;
car mi destrenh us desirs qu'es tant fortz (un dessich qu'es tan fort)
qu'ieu sui aissi de paor tormentatz (que yo soc aixina de paor)
cum tormenta temenssa e desconortz (temó y desconsol)
lo faisan qu'es en tal albre pausatz (faissán; faisán; abre, albre posat)
Ai, pros dompna sobrevalens, no us pes
si 'naissi us sui de m'amor descobrire, (enaissi)
qu'estiers non puosc de mort esser gandire,
tant m'a greumen mos desirs sobrepres,
car en vos a so qu'estort m'agra ades,
sol vos preses d'omilitat recortz:
per c'atressi cum malautes grevatz
quier lai socors don pot esser estortz,
vos clam merce per Dieu e per pietatz
que de la mort estorser mi deiatz.
Amors, breumens serai joios o mortz,
tant fortz desirs avetz en mi pausatz;
mas car convens totas res vostr' esfortz,
en bon esper m'en remanc conortatz,
car segon dreich valer m'en deuriatz.
Si be m desplai trop mais anta que mortz
per vos, dompna, covens e digz passatz,
car vos etz pretz, capdels, valors e portz,
sens et abrics, estatges e beutatz,
per qu'ieu non puosc a dreich esser blasmatz.
