Ballades et danses.
I.
Mort m'an li semblan que ma dona m fai
e li seu bel oil amoros e gai.
Qu'eu non trob conseil, s'eu de li non l'ai;
per qu'eu joinchas mas denant li venrai,
preiant humilment, quant far o poirai?
que m facha socors, sevals d'un dolz bai.
Lo seus cors es blancs com neus sobre glai,
fresca sa colors cum rosa de mai,
e l seu cabil sor cum aurs, de que m plai,
dolza e plaisens plus qu'eu dir non sai.
Anc Deus non en fes de tant bela mai,
ni non volc que fos, per qu'eu l'amarai
de bon cor toz temps tant quant eu viurai
e pos serai morz, s'eu lo poder n'ai.
Mos Bels Conorz val d'autras tantas mai
cuma aurs vil (?) veire soz un ric palai.
II.
D'amor m'estera ben e gent,
s'eu ma dona vis plus sovent.
Balada faz ab coindet son,
qu'a ma bela don a randon,
quar ai estat tant lonjament.
E prec, si plaz, no m'ochaison,
quar estauc sai en Aragon
ab lo rei qu'a bon prez valent.
Mais on qu'eu sia seus mi son,
e vauc m'en lai ad esperon
per descolpar de falliment.
Gen me feiron mei oil ric don,
quant mi mostreron sa faison
e sa bela bocha rizent.
Bella domna, gentil faizon,
que baisson amor per nient.
Balada, vai ad esperon
e saluda m leis de cui son,
quar manten valor e jovent.
III.
Coindeta sui, si cum n'ai greu cossire,
per mon marit, quar ne l voil ne l desire.
Qu'eu be us dirai per que son aissi drusa:
quar pauca son, joveneta e tosa,
e degr' aver marit, dont fos joiosa,
ab cui toz temps pogues jogar e rire.
Ja Deus no m sal, si ja'n sui amorosa:
de lui amar mia sui cobeitosa,
anz, quant lo vei, ne son tant vergoignosa
qu'eu prec la mort que l venga tost aucire.
Mais d'una ren m'en son ben acordada:
si l meus amics m'a s'amor emendada,
ve l bels espers, a cui me son donada;
plaing e sospir, quar ne l vei ne l remire.
E dirai vos de que m sui acordada:
que l meus amics m'a longament amada;
ar li sera m'amors abandonada
e l bels espers, qu'eu tant am e desire.
En aquest son faz coindeta balada
e prec a toz que sia loing cantada
e que la chant tota domna ensegnada
del meu amic, qu'eu tant am e desire.
IV.
Pres soi ses faillencha
en tal bevolencha,
don ja no m partrai;
e quan m'en pren sovenencha
d'amor conssi m vai,
tot quan vei m'es desplazencha,
e tormenz qu'ieu n'ai m'agencha
per leis qu'ieu am mai.
Hai, s'en brieu no la vei, brieumen morrai.
En amor londana
ha dolor probdana:
per mi eis o sai,
sospir e'n dic hai.
Mortz fos ieu, que l via es plana,
quar non hai razon certana,
d'anar soven lai.
Hai, s'en brieu no la vei, brieumen morrai.
Ses par de proecha
es e de belecha,
ab fi prez verai;
e sa naturals blanchecha
sembla nieus quant chai,
e la calors no i es mecha
pegnen, anz sobra freschecha
de roza de mai.
Hai, s'en brieu no la vei, brieumen morrai.
