Biographies, Guillems de Capestaing + Peire Vidals + Bertrans de Born

Biographies des troubadours. 

I.

Guillems de Capestaing si fo us cavalliers de l'encontrada de Rossilhon que confinava con Cataloigna e con Narbones. Mout fo avinenz hom de la persona e prezatz d'armas e de servir e de cortesia. Et avia en la soa encontrada una dompna que avia nom ma dompna Sermonda, moilher d'en Raimon de Castel-Rossilhon, qu'era mot rics e gentils e mals e braus e fers et orgoillos. E'n Guillems de Capestaing si amava la dompna per amor, e cantava de lieis e'n fazia sas cansons. E la dompna qu'era joves e gentils e bella e plaissenz si ll volia ben maior que a ren del mon. 

E fon dich a'n Raimon de Castel-Rossilhon. Et el, cum hom iratz e jelos, enqueric lo faich e saup que vers era, e fetz gardar la moilher fort. 

E quand venc un dia, Raimons de Castel-Rossilhon trobet passan Guillem de Capestaing ses gran compaignia, et aucis lo, e trais li lo cor del cors e 

fetz lo portar a un escudier a son alberc, e fetz lo raustir e far pebrada e fetz lo dar a manjar a la moilher. E quand la dompna l'ac manjat, en Raimons li dis aque el fo. Et ella, quand o auzi, perdet lo vezer e l'auzir; e quand ella revenc si dis: “Seigner, ben m'avetz dat si bon manjar que ja mais no n manjarai d'autre.” E qand el auzi so qu'ella dis, el correc 

sobre lieis ab l'espaza e volc li dar sus en la testa. Et ella s'en anet al balcon e se laisset cazer jos, e fon morta. La novella cors per Rossilhon e per tota Cataloigna qu'en Guillems de Capestaing e la dompna eran enaissi malamen mort, e qu'en Raimons de Castel-Rossilhon avia dat lo cor d'en Guillem a manjar a la dompna. Mout en fo grans dols e grans tristezza per totas las encontradas, e l reclams venc davan lo rei d'Aragon que era seigner d'en Raimon de Castel-Rossilhon e d'en Guillem de Capestaing. E venc s'en a Perpignan en Rossilhon, e fetz venir Raimon de Castel-Rossilhon denan si. E quan fo vengutz, si l prendre fetz e tolc li totz sos chastels e ls fetz desfar, e tolc li tot quant el avia, e lui en menet en preisson. Guillem de Capestaing e la dompna fetz penre e fetz los portar a Perpignan e metre en un monumen denan l'uis de la gleiza, e fetz desseignar desobre l monumen cum ill erant estat mort; et ordenet per tot lo comtat de Rossillon que tuit li cavalier e las dompnas lor venguesson far anoal chascun an; e'n Raimons de Castel-Rossilhon moric dolorosamen en la preison del rei d'Aragon.

(Vore Lo Decamerón en chapurriau, Guiglielmo Guardastagno + Guiglielmo del Rosselló)

II. 

Peire Vidals, si com ieu vos ai dig, s'entendia en totas las bonas domnas e crezia que totas li volguesson be per amor. E si s'entendia en ma domna n'Alazais, qu'era molher d'en Barral, lo senhor de Marselha, lo quals volia melhs a Peire Vidal qu'az ome del mon, per lo ric trobar e per las ricas folias que Peire Vidals dizia e fazia; e clamavan se abdui Rainier. E Peire Vidals si era privatz de cort e de cambra d'en Barral plus qu'ome del mon. E'n Barrals si sabia be que Peire Vidals se entendia en la molher, e tenia lo i a solatz e tuit aquilh qu'o sabion e si s'alegrava de las folias qu'el fazia ni dizia. E la domna o prendia en solatz, si com fazian totas las autras domnas, en que Peire Vidals s'entendia, e cascuna li dizia plazer e lh prometia tot so que lh plagues e qu'el demandava; et el era si savis que tot o crezia. E quan Peire Vidals se corrossava ab ela, en Barrals fazia ades la patz e lh fazia prometre tot so qu'el demandava. 

E quan venc un dia, Peire Vidals si saup qu'en Barrals s'era levatz e que la domna era tota sola en la cambra. Peire Vidals intra en la cambra e venc s'en al leit de ma domna n'Alazais e troba la dormen, et aginolha se davan ella e baizet li la boca. Et ela sentit lo baizar e crezet que fos en Barrals, e rizen ella se levet, e vit qu'el era l fols de Peire Vidal e comenset a cridar et a far gran rumor. E vengron las donzelas de lains, 

quant o auziron, e demanderon: "Quez es aisso?" E Peire Vidals s'en issit 

fugen, e la domna mandet per en Barral, e fetz li gran reclam de Peire Vidal, que la avia baizada; e ploran l'en preguet qu'el en degues penre venjansa. Et en Barrals, si com valens hom et adregz, si pres lo fait a solatz e comenset a rire et a repenre la molher, car ela avia faita rumor d'aisso que l fols avia fait: mas non la poc castiar qu'ela non mezes en gran rumor lo fait e cercan et enqueren lo mal de Peire Vidal, e grans menassas fazia de lui. Peire Vidals per paor d'aquest fait montet en una nau et anet s'en en Genoa. E lai estet tro que pueis passet outra mar ab 

lo rei Richart, que lh fo mes en paor que ma domna n'Alazais li volia far 

perdre la persona. Lai estet longa sazo, e lai fetz maintas bonas chansos, recordan del baizar qu'el avia emblat. E dis en una chanso que dis

"Ajostar e lassar,"

que de leis non avia agut negun guizardo: 

"mas un petit cordo;

si aigui, qu'un mati

intrei dins sa maizo

e lh baizei a lairo

la boca e l mento."

Et en autre loc el dis:

"Plus honratz fora qu'om natz,

si l bais emblatz mi fos datz

o neis autreiatz."

Et en autra chanso el dis:

"Be m bat amors ab las vergas qu'eu colh,

car una vetz en son reial capdolh

l'emblei un bais, don tan fort mi sove.

Ai! Tan mal viu qui so qu'ama no ve."

Aissi estet longa sazo outra mar, que non auzava venir ni tornar en Proensa. E'n Barrals que li volia aitan de be, com avetz auzit, si preguet tan sa molher, qu'ela li perdonet lo fait del baizar e lo i autreget en do. E'n Barrals si mandet per Peire Vidal e si l fes mandar gracia e bona volontat de sa molher, e que vengues a sa molher. Et el venc ab gran alegreza a Marselha, et ab gran alegreza fo receubutz per en Barral e 

per ma domna n'Alazais. E autreget li lo baizar en do qu'el li avia emblat, 

[e fo li tot perdonat.] don Peire Vidals fetz esta chanso que ditz:

"Pos tornatz sui en Proensa," 

[la qual vos auziretz.]

III. 

Ben avetz entendutz los mals qu'en Bertrans de Born remembret que l reis d'Arago avia fachs de lui e d'autrui. Et a chap d'una gran sazo, qu'el n'ac apres d'autres mals qu'el avia fachs, si lo lh volc retraire en un autre sirventes. E fo dich a'n Bertran qu'un chavalier avia en Arago, que avia nom (nEspanhols) n'Espanhols, et avia un bo chastel mout fort que avia nom Castellot et era proprietatz d'en Espanhol et era en la frontereza dels Sarazis, don el fazia gran guerra als Sarazis. E l reis si entendia mout en aquel chastel, e venc un jorn en aquela encontrada, e nEspaingnols si lh venc encontra per servir lo e per envidar lo al sieu chastel, e menet lo charamen, lui ab tota soa gen. E l reis, quan fo dedintz lo chastel, lo fetz penre et menar deforas e tolc li lo chastel. -

E fo vertatz que, quan lo reis venc al servizi del rei Henric, lo coms de Tolosa si l desconfis en Guasconha e tolc li be cinquanta chavaliers; e l reis Henrics li det tot l'aver que lh chavalier devian pagar per la reenzo, et el no l paguet, l'aver, als chavaliers, anz l'en portet en Arago. E lh chavalier eissiron de preiso e pagueron l'aver. - E fo vertatz qu'us joglars, que avia nom Artusetz, li prestet dos cens marabotis, e menet lo ben un an ab se e no lh en det denier. E quan venc un dia, Artusetz joglars si si mesclet ab un Juzieu, e lh Juzieu li vengron sobre e nafreron 

Artuset malamen, lui et un son conpanho. Et Artusetz e l companhs auciseron un Juzieu, don li Juzieu aneron e reclam al rei e pregueron lo qu'el en fezes vendeta e que lor des Artuset e l conpanho per aucire, e qu'ilh li darian dos cens marabotis. E l reis los lor donet amdos e pres los dos cens marabotis. E lh Juzieu los feiron ardre lo jorn de la Nativitat de Crist, si com dis Guilhems de Bergueda en un sieu serventes dizen en el mal del rei:

“E fetz una mespreiso

don hom no l deu razonar,

que l jorn de la naissio

fetz dos crestias brusar:

Artus ab autre son par,

e no degra aissi jutjar

a mort ni a passio

dos per un Juzieu fello."

Don us autre, que avia nom Peire joglars, li prestet deniers e chavals, et aquel Peire joglars si avia grans mals dichs de la vielha reina d'Englaterra, la quals tenia Font-Ebrau, que es una abadia, on se rendon totas las vielhas richas. Et ela lo fetz aucire per paraula del rei d'Arago.

E totz aquestz laitz fachs remembret en Bertrans de Born al rei d'Arago en aquest sirventes que dis:

"Quant vei pels vergiers despleiar

los cendatz grocs, indis" et cetera.

___

Lo reis Henrics d'Englaterra si tenia assis en Bertran de Born dedintz Autafort e l combatia ab sos edificis, que mout li volia gran mal, quar el crezia que tota la guerra que l reis joves, sos filhs, l'avia facha, qu'en Bertrans la lh agues facha far, e per so era vengutz denan Autafort per lui deseretar. E l reis d'Arago venc en l'ost del rei Henric denan Autafort. E quan Bertrans o saup, si fo mout alegres que l reis d'Arago era en l'ost, per so qu'el era sos amics especials. E l reis d'Arago si mandet sos messatges dintz lo chastel, qu'en Bertrans li mandes pa e vi e charn, et 

el si l'en mandet assatz. E per lo messatge per cui el mandet los presens, el li mandet pregan qu'el fezes si qu'el fezes mudar los edifizis e far traire en autra part, que l murs on ilh ferian era tot rotz. Et el, per gran aver del rei Enric, el li dis tot so qu'en Bertrans l'avia mandat a dir. E l reis Henrics si fetz metre dels edifizis plus en aquela part on saup que l murs era rotz, e fo lo murs ades per terra e l chastels pres.

E'n Bertrans ab tota sa gen fo menatz al pavilho del rei Henric, e l reis lo 

receup mout mal, e l reis Henrics si lh dis: "Bertrans, Bertrans, vos avetz dich que anc la meitatz del vostre sen no us ac mestier nuls temps; mas sapchatz qu'ara vos a el be mestier totz." "Senher," dis en Bertrans, 

“el es be vers qu'ieu o dissi, e dissi be vertat." E l reis dis: "Ieu cre be qu'el vos sia aras falhitz." "Senher" dis en Bertrans, “be m'es falhitz."

"E com?" dis lo reis. "Senher," dis en Bertrans, “lo jorn que l valens joves reis, vostre filhs, morit, ieu perdei lo sen e l saber e la connoissensa."

E l reis, quant auzit so qu'en Bertrans li dis en ploran del filh, venc li grans dolors al cor de pietat et als uolhs, si que no's poc tener qu'el no 

pasmes de dolor. E quan el revenc de pasmazo, el crida e dis en ploran: "En Bertrans, en Bertrans, vos avetz be drech et es be razos, si vos avetz perdut lo sen per mo filh, qu'el vos volia mielhs que ad home del mon. Et ieu, per amor de lui, vos quit la persona e l'aver e l vostre castel, e vos ren la mia amor e la mia gracia, e vos do cinc cens marcs d'argen per los dans que vos avetz receubutz." E'n Bertrans si lh chazet als pes, referen li gracias e merces. E l reis ab tota la soa host s'en anet.

Aimeric de Pegulhan. Domna, per vos estauc en greu turmen ++

Aimeric de Pegulhan.

I. 

“Domna, per vos estauc en greu turmen.”

"Senhor, que fols faitz, qu'eu grat no us en sen."

"Domna, per Deu aiatz en chauzimen."

"Senher, vostres precs i anatz perden."

"Bona domna, ja us am eu finamen."

"Senher, et e us volh peitz qu'a l'autra gen."

"Domna, per so n'ai eu lo cor dolen."

"Senher, et eu alegre e jauzen."

"Domna, ja mor per vos ses nulh confort."

"Senher, ben trop n'auretz fag lonc acort." 

"Domna, ja es ma vida peitz de mort."

"Senher, so m platz, sol qu'eu s non aia tort."

"Domna, de vos non ai mas desconort."

"Senher, e doncs cuiatz que us am per fort?"

"Domna, ab un semblan m'agratz estort."

"Senher, respeit no n aiatz ni conort."

"Domna, vauc doncs alhors clamar merce."

"Senher, anatz de sai: qui vos rete?"

"Domna, no posc, que vostr' amors me te."

"Senes conselh, senher, o fa de me."

"Domna, trop mal mi respondetz ancse."

"Senher, car peitz vos volh qu'az autra re."

"E doncs, domna, no m faretz ja nulh be?"

"Senher, aissi er cum dizetz, so cre." -

"Amors, gitat m'avetz a no m'en cal."

"Amics, per Deu, no us en posc far ren al."

"Amors, e vos ja meretz de tot mal."

"Amics, per so us en trairai san e sal."

"Amors, per que m fetz chauzir domn' aital?"

"Amics, eu vos mostrei so que mais val."

"Amors, no posc sofrir l'afan coral."

"Amics, per so queiram autre logal."

"Amors, en tot quan faitz vos vei falhir."

"Amics, a gran tort me voletz laidir."

"Amors, e doncs per que ns voletz partir?"

"Amics, car greu m'es quan vos vei morir."

"Amors, ja no cugetz qu'alhors me vir."

"Amics, per so pensatz del ben sofrir."

"Amors, sembla us si ja n poirai jauzir?"

"Amics, oc vos, sufren et ab servir."

II.

Si cum l'albres que per sobrecargar

franh se mezeis e pert son fruit e se,

ai eu perdut ma bela domn' e me,

e mos engenhs se franh per sobramar.

Pero, sitot me sui apoderatz,

anc jorn no fi mon dan ad escien,

anceis cuit far tot so que fatz ab sen:

mas er conosc que trop sobra l foudatz.

E non es bo qu'om sia trop senatz

que a sazos no sega son talen,

e si no i a de cascun mesclamen,

non es bona sola l'una meitatz.

Ben esdeven hom per sobresaber

nescis e'n vai maintas vetz foleian;

per que s'eschai qu'om an en loc mesclan

sens ab foudat, qui ls sap gen retener.

Las, qu'eu non ai mi mezeis en poder,

ans vau mon mal enqueren e cercan,

e volh trop mais perdre e far mon dan

ab vos, domna, qu'ab autra conquerer.

Qu'ades cuit far en aquest dan mon pro

e que savis ab aquesta folor;

pero a lei de fol fin amador

m'avetz ades, on peitz mi faitz, plus bo.

No sai nulh a “oc" per qu'eu des vostre "no";

pero soven tornon mei ris en plor,

et eu cum fols ai gaug de ma dolor

e de ma mort, quan vei vostra faisso.

Co l bazalesc qu'ab joi s'anet aucir, (basilisco)

quant el miralh se remiret e s vi,

tot atressi etz vos miralhs a mi,

que m'aucietz quan vos vei ni us remir.

E no us en cal quan mi vezetz morir,

abans o faitz de mi tot atressi

cum de l'enfan qu'ab un maraboti

fai hom del plor laissar e departir;

e pois, quant es tornatz en alegrier

et hom l'estrai so que l donet e l tol,

et el adoncs plor' e fai maior dol

dos aitans plus que no fetz de primier.

Teriaca, ges vostre pretz no col

de melhurar, qu'oi val pro mais que hier. (oi : hodie : huy, hui, avui, hoy)

III. 

En aquel temps que l reis mori nAnfos, (n'Anfos : Alfonso II de Aragón)

e sos bels filhs plazens, cortes e bos,

e l reis Peire, de cui fon Aragos, (Pedro II)

e n Diegos, qu'era savis e pros,

e l marques d'Est e l valens Salados,

adoncs cugei que fos mortz pretz e dos,

si qu'eu fui pres de laissar mas chansos:

mas ar los vei restauratz ambedos.

Pretz es estortz qu'era gastz e malmes,

e dos garitz del mal qu'avia pres,

qu'un bon metge nos a Deus sai trames

deves Salern, savi e ben apres,

que conois totz los mals e totz los bes

e meizina cascun segon que s' es,

et anc loguier no n demandet ni n pres,

ans los loga, tant es francs e cortes.

Anc hom no vi metge de son joven

tan larc, tan bel, tan bon, tan conoissen,

tan coratgos, tan ferm, tan conqueren,

tan ben parlan ni tan ben entenden:

que l ben sap tot e tot lo mal enten,

per que sap melhs meizinar e plus gen,

e fai de Deu cap e comensamen,

que l'ensenha gardar de falhimen.

Aquest metge sap de metgia tan

et a l'engenh e l sen e l saber gran,

qu'el sap ensems gazanhar meizinan

Deu e l segle (gardatz valor d'enfan!)

que l seu perden venc, meten e donan,

sai conquerir l'emperi alaman.

Oimais cre ben, cor que i anes doptan,

los faitz qu'om ditz d'Alixandre comtan.

Aquest metge savis de qu'eu vos dic

fon filhs del bon emperador Enric,

et a lo nom del metge Frederic

e l cor e l sen e l saber e l'afic: 

don seran ben meizinat sei amic

e i trobaran conselh e bon abric.

De lonc sermo devem far breu prezic,

que ben cobram lo gran segon l'espic.

Ben pot aver lo nom de Frederic,

que l dig son bon e l fag son aut e ric.

Al bon metge maistre Frederic

di, metgia, que de metgar no s tric.

//

19. Amerigo di Peguilhan. Sicum l'albres que per sobrecargar

19. Amerigo di Peguilhan. *

La prima di queste poesie, che chiude la serie delle citate nel De Vulgari Eloquentia é data secondo la lezione di B pubblicata dal Diez (Altromanische Sprachdenkmale, Bonn, Weber, 1846, p. 95) e dal Mahn (Gedichte der Troubadours, n. 344). 

Per la seconda, con la quale si entra nella serie delle poesie relative a cose d'Italia o composte da Italiani, si segue la lezione di D (in Cavedoni, Ricerche storiche intorno ai Trovatori provenzali accolti ed onorati nella corte dei marchesi d'Este nel secolo XIII, Modena, Soliani, 1844, p. 5); 

per la terza e la quarta la lezione pubblicata dal Mahn (Werke der Troubadours, II, 165 e 172); 

per la quinta e la sesta la lezione pubblicata dal Raynouard (Choix, IV, 61; Lexique Roman, I, 433). (Ed. Ramón Guimerá Lorente, Moncho de Beseit.)

Sicum l'albres que per sobrecargar

fraing si mezeis e pert son fruig e se,

ai eu perdut ma bella dompna e me, 

e mos engeins se fraing per sobramar. 

pero sitot me sui apoderatz,

anc jorn non fi mon dan ad escien, 

anceis cuich far tot so que fatz ab sen; 

mas er conosc que trop sobra il foudatz. 

E non es bon c'om sia trop senatz

que a sazos non sega son talen; 

e si noi a de chascun mesclamen, 

non es bona sola l'una meitatz. 

ben esdeven hom per sobresaber

nescis e'n vai maintas vetz follejan; 

per que s'eschai qu'om an en luoc mesclan 

sen ab foldat, quils sap gen retener.

Las, qu'ieu non ai mi mezeis en poder,

anz vau mon dan enqueren e cercan, 

e vuoill trop mais perdre e far mon dan 

ab vos, dompna, c'ab autra conquerer, 

c'ancse cuig far en aquest dan mon pro

e que savis en aquesta follor. 

pero a lei de fol fin amador

m'avetz ades, on pieitz mi faitz, plus bo.

Non sai nuill hoc, per qu'ieu des vostre no;

pero soven tornon mei ris en plor, 

et eu cum fols ai joi de ma dolor

e de ma mort, quand vei vostra faisso. 

col basalencs c'ab joi s'anet aucir, 

quand el miraill se remiret eis vi: 

tot atressi etz vos miraills a mi, 

que m'aucietz, quan vos vei nius remir. (ni us)

E nous en cal, quan mi vezetz morir, (no us)

abanz o faitz de mi tot atressi 

cum de l'enfan c'ab un maraboti 

fai hom del plor sebrar e departir; 

e puois quand es tornatz en alegrier 

et hom l'estrai so queil donet eil tol, (que il; e il)

et el adoncs plora e fai major dol 

dos aitans plus que no fetz de primier.

Tiriaca, jes vostre pretz non col

de meillurar, c'uoi valetz mais que hier. (uoi : lat. hodie : huy : avui)

Za non cuidei quem pogues oblidar 

lo danz c'ai pres d'amics e de segnors; 

mais lo granz danz oblid om pel majors, 

c'aizo es danz que nos pot emendar, 

quel meillor cors del mond el mels apres 

lays m'o; que tuz sabez ben del marques 

d'Est, cals era, no vos cal laudar ges; 

morz es; mas eu no cre q'e negun temps

morisson tan de bon costum esemps.

Qu'el fo savis e conoiscenz, e sap far 

a mesura, tan qu'era sa valors

el plus aut grad pozad e sos prez sors; 

e sostenir que nos pogues baisar 

la saup ab sen; pois fo larcs e cortes, 

humils als bos et als mals d'orgoils ples, 

e bos d'armas, adreichs en totas res, 

e vertadiers a son poder tuz temps, 

quel cor el sen i mes el fait esemps. 

Autre dol hai que m'es greus a durar 

del gai compte Verones, qu'era flors

de grant beutat e de tuz beus colors. 

quil seu bos aips vos volia contar, 

nols poria toz retrair' en un mes; 

ne non es hom que tener se pogues, 

sels audia, que de cor non plangues, 

per zo car mai no falliran null temps

aquest dui dol que son vengut esemps. 

Segner marques, vos fasiaz donar

a tals cui ja dar no fora sabors; 

pois fasiaz al menuz donadors 

creiser lor dons, cant audian parlar

del vostre fait cum era sobremes.

qui fara mai los bels dons nils granz bes? 

ni de cal cort venra tan ric arnes 

cum fazia de la vostra tuz temps, 

car negus tan cum vos non dava esemps? 

Segner marques, que faran li zuglar, 

a cui fezes tanz dons, tantas honors? 

mas un conseill no sai als trobadors: 

laissos morir et anous lais cercar; 

car sai no vei guaire qui de lor pes, 

car vos noi ets nel valenz coms noi es.

pauc nos laisset Deus ves que trop n'a pres,

si laisset tan, qu'el durera toz temps

planz e sospirs e dolors tot esemps. 

Aquel ver Deus que fo et er toz temps, 

los meta amdos en paradis esemps.

Selh que s'irais ni guerrey' ab amor, 

ges que savis no fai al mieu semblan; 

quar de guerra ven tart pro e tost dan, 

e guerra fai mal tornar en pejor;

en guerra trop, per qu'ieu non la volria, 

viutat de mal e de ben carestia;

e fin' amors, sitot mi fai languir,

a tant de joy quem pot leu esjauzir.

Quel plazer so plus que l'enuey d'amor, 

el be quel mal el sojorn que l'afan, 

el gaug quel dol el leu fays quel pezan,

el pro quel dan son plus el ris quel plor.

non dic aissi del tot que mal noi sia,

el mal qu' om n' a val mais que si 'n gueria, 

quar selh qu'ama de cor non vol guerir, 

del mal d'amor, tant es dous per sufrir. 

Enquera truep mais de ben en amor, 

quel vil fai pros el nesci gen parlan, 

e l'escars larc e leyal lo truan, 

el folh savi el pec conoissedor,

e l'orgulhos domesg' e humilia,

e de dos cors fai un, tan gen los lia; 

per qu'om non deu ad amor contradir,

pus tan gen sap comensar e fenir.

S'ieu l'ai servit, pro n' ai cambi d'amor, 

ab que ja plus nom fassa mais aitan;

qu' en mainh locs m'a fag tan aut e tan gen, 

don ja ses lieys no pogr' aver honor, 

e moutas vetz mi gart de vilania, 

que ses amor gardar no m'en sabria; 

e manhs bos motz mi fai pessar e dir, 

que ses amor noi sabria venir.

Bona dona, de vos tenc e d'amor 

sen e saber, cors e cor, motz e chan; 

e s'ieu res fatz que sia benestan, 

devetz n' aver lo grat e la lauzor 

vos e amors, quem datz la mayestria; 

e si ja plus de ben no m'en venia, 

pro n' ai cambi, segon lo mieu albir; 

e si plus fos, be saubral plus grazir. 

Chansos, vai t'en de ma part e d'amor 

al pro al ric al valen al prezan,

a cui servon Tyes et Alaman,

e sopleyo cum bon emperador; 

sobrels majors a una majoria: 

honor e pretz, larguez' e cortezia; 

larcs es de cor, d'amar e de servir, 

valens de fag per ric pretz conquerir.

Bona domna, la genser etz que sia, 

vas vos azor e soplei nueg e dia; 

jamais de vos no me volrai partir, 

qu' en tot lo mon non pogra miels chauzir.

Mantas vetz sui enqueritz

en cort cossi vers no fatz, 

per qu'ieu vuelh si' apelatz 

e sia lurs lo chauzitz: 

chansos o vers aquest chans.

e respon als demandans,

qu' om non troba ni sap devezio,

mas sol lo nom, entre vers e chanso.

Qu'ieu ai motz mascles auzitz

en chansonetas assatz,

e motz femenis pauzatz

en verses bos e grazitz;

e cortz sonetz e cochans

ai ieu auzit en verses mans,

e chansos ai auzidas ab lonc so,

els motz d' amdos d' un gran el chan d'un to.

E s'ieu en sui desmentitz,

qu' aisso no sia vertatz;

no er hom per me blasmatz, 

si per dreg m'o contraditz; 

ans n'er sos sabers plus grans 

entrels bos el mieus mermans, 

si d'aissom pot venser segon razo; 

qu' ieu non ai ges tot lo sen Salamo. 

Quar es de son loc partitz 

domneys, que ja fon prezatz, 

mi sui alques desviatz

d'amor, tan m' estauc marritz! 

qu' entr' amairitz et amans

s'es mes us pales enjans,

qu' enjanan cre l' us l' autre far son pro,

e noi guardon temps ni per que ni quo. 

Qu'ieu vi, ans que fo faiditz,

si fos per amor donatz

us cordos, qu' adreg solatz

n' issia e ricx covitz;

per quem par que dur dos tans

us mes no fazia us ans,

quan renhava domneys ses tracio;

greu es qui ve com es e sap com fo. 

E non es tan relenquitz,

sitot mi sui dezamatz, 

qu' ieu no sia enamoratz

de tal qu' es sima e razitz

de pretz, tan qu'a me es dans;

pus la valors el semblans

son assemblat en tan bella faisso, 

qu' om noi pot neys pessar meliurazo. 

Ai, belh cors cars, gen noiritz,

adregz e ben faissonatz,

so qu' ieus vuelh dir devinatz;

qu' ieu no sui ges tan arditz

qu' eus prec que m'ametz, abans

vos clam merce merceyans.

sufretz qu' ieus am e nous quier autre do, 

e ges d'aquest nom devetz dir de no. 

Vas Malespina vai, chans,

al pro Guillem qu' es prezans, 

qu'elh aprenda de te los motz el so, 

qual ques vuelha per vers o per chanso. 

Na Beatriz d'Est, l' enans

de vos mi platz ques fai grans;

en vos lauzar s' en son pres tug li bo, 

per qu' ieu de vos dauri mon vers chanso.

Era par ben que valors se desfai,

e podetz o conoisser e saber, 

quar selh que plus volia mantener 

solatz, domney, largueza ab cor verai, 

mezura e sen, conoissensa e paria,

humilitat, orguelh ses vilania,

els bons mestiers totz ses menhs e ses mai,

es mortz, Guillems Malespina marques,

que fo miralhs e mayestre dels bes.

De bons mestiers el mon par non li sai,

qu'anc non fon tan larcs, segon mon parer, 

Alixandres de manjar ni d'aver,

qu'elh non dis non quil quis, ni trobet plai;

ni ges d'armas Galvains plus non valia, 

ni non saup tan Yvan de cortezia, 

nis mes Tristans d'amor en tan d'assai; 

hueymais non er chastiatz ni repres 

negus, si falh, pus lo miralhs noy es.

On son eras siei dig plazent e guai 

e siei fag plus poderos de poder

quels autres fagz fazian desvaler? 

oi dieus! cum son escurzit li clar rai 

qu'alumavan Toscana e Lombardia, 

per que quascus anava et venia

ab lo sieu nom, ses dopte e ses esmai! 

qu'aissi saup pretz guizar, tan fon cortes, 

cum l'estela guidet los reys totz tres.

Per cui venran soudadier de luenh sai

nil ric joglar quel venian vezer? 

qu'elh sabia honrar e car tener 

plus que princeps de sai mar ni de lai, 

e manhta gens ses art, ses joglaria, 

per lo sieu don on negus non falhia; 

que manh caval ferran e brun et bai

donava plus soven et autr' arnes

de nulh baron qu'ieu anc vis ni saubes. 

Belhs senher cars, valens, e que farai? 

ni cum puesc sai vius ses vos remaner? 

quem sabiatz tan dir e far plazer 

qu'autre plazers contral vostrem desplai; 

que tals per vos m'onrava e m'aculhia 

que m'er' estrans, cum si vist no m'avia: 

ni ja nulh temps cambi non trobarai 

ni esmenda del dan qu'ai per vos pres, 

ni eu non cre qu'om far la m'en pogues. 

Lo senher qu'es una persona en tres, 

vos valha aissi cum ops ni cochaus es.

Li folh el put el filhol 

creisson trop, e no m'es belh;

el croy joglaret novelh, 

enveyos e mal parlan, 

corron un pauc trop enan, 

e son ja li mordedor

per un de nos, duy de lor, 

e non es qui los n'esquerna. 

Greu es quar hom lor acol, 

e non lor en fai revelh; 

non o dic contra 'n Sordelh, 

qu'el non es d'aital semblan, 

ni nos va ges percassan 

si col cavalier doctor; 

mas quan falhol prestador, 

non pot far V ni VI terna. 

Lo marques part Pinairol, 

que ten Saluz e Revelh, 

no vuelh ges que desclavelh 

de sa cort ni an lunhan 

Persaval, que sap d'enfan

esser mayestre tutor;

ni un autre tuador,

qu'ieu no vuelh dir, de Luzerna.

Aitals los a com los vol

lo marques d'Encantarelh, 

Nicolet, el trufarelh

que venon ab lui e van, 

e non del tot per lor dan, 

bes son trobat d'una color; 

a tals vassals tal senhor; 

dieus lor don vita eterna!

Ar veiretz venir l'estol 

ves Malespina el tropelh, 

donan la carn e la pelh; 

et ades on piegz lor fan 

e menhs de merce lor an; 

trop son li combatedor

e pauc li defendedor;

mortz son si dieus nols governa.

Estampidas e rumor

sai qu'en faran entre lor 

menassan en la taverna.

* Biografia, secondo il testo edito dallo Chabaneau (op. cit. p. 75): 

N'Aimerics de Peguilha si fon de Tolosa, fils d'un borges qu'era mercadiers que tenia draps a vendre. et apres cansos e sirventes, mas molt mal cantava. et enamoret se d'una borgeza sa vezina, & aquela amors li mostret trobar, e si fetz de leis mantas bonas cansos. mas lo maritz se mesclet ab lui e fetz li desonor; e'n Aimericx s'en venget, qu'el lo ferit d'una espaza per la testa, per quel covenc a issir de Tolosa e faidir. et anet s'en en Cataluenha, e 'n Guillems de Berguedan si l'aculhit; & el enanset lui e son trobar, en la primeira chanso qu'el avia faita, tan qu'el li donet son palafre e son vestir: e presentet lo al rei n' Anfos de Castella, quel crec d'aver e d'armas e d'onor. et estet en aquelas encontradas lonc temps; pueis s'en venc en Lombardia, on tug li bon home li feiron gran honor: e lai definet en eretgia, segon c'om ditz.

17. Giraldo di Bornelh, Si per mon Sobretotz no fos,

17. Giraldo di Bornelh. *

La prima poesia è secondo il testo pubblicato dal Raynouard (Lexique roman, 1, 379); (Ed. Ramón Guimerá Lorente) per la seconda si riproduce il testo pubblicato pure dal Raynouard (Choix des poésies originales des Troubadours, IV, 290); (Ed. Ramón Guimerá Lorente) per la terza e la quarta si dà la lezione del canz. A, con correzioni da C per la terza, e da B per la quarta.

Si per mon Sobretotz no fos,

quem ditz qu'ieu chant e sia gays,

jal suaus temps, quan l'erba nays,

ni pratz ni rams ni bosc ni flors,

ni durs senhers ni van' amors

nom pogram metre en eslays:

mas d'aissom tenc ab lui

que, pos joys falh e fui,

merma pretz e barnatz;

e pois las poestatz

s' estraigneron de jay,

de quan quel piegers fay

no fon per mi lauzatz;

qu'aissim suy cosseillatz,

que nul ric non envey

que trop mal senhorey.

Selha vetz eral segles bos

quan per tot aondava jays,

e selh grazitz on n'eral mays,

e pretz s' aveni' ab ricors;

ar appell' om pros los pejors

e sobrier selh que pieitz s' irais;

e selh que mais adui

cum ques pot de l'autrui,

sera plus envejatz.

de quem tenh per forsatz,

qu'om d'avol plait savay

cuelha bon pretz veray

don degr' esser blasmatz,

e vos, quar non pessatz

sis tanh qu'om pretz autrey

a sel que lag feuney.

Mal fon capdelada razos

des qu'om tenc per pros los savays,

els francs els cortes els verays

razonet hom per sordejors,

e moc la colpa dels aussors

quant de vers brezillet ni frays,

qu'eras no sai per cui

tol hom l'onor selui

que n'era adreit cazatz;

e sils encoreillatz

diran que ben estay;

mas selh qu' ieu no diray,

sera trop miells armatz;

e pueis sius embarjatz

de pretz ni de domney,

mens avetz el conrey.

Ieu vi qu'om prezava chansons

e que plasia tresc' e lays,

mas eras vei pus que hom s'estrays

de solatz ni de fagz gensors,

ni l'afars dels fis amadors

se viret de dreit en biays,

que totz devers defui;

que ja s'om se deblui

las carns nils vis nils blatz,

e se l' acompagnatz,

a pretz non o tenray

ni crezutz non seray;

mas nom segral peccatz,

que lai val pauc rictatz

qui la men' a desrey,

ni dreg non sec ni ley.

Er aug del rey qu'era plus pros

e plus valens en totz assays

de totz selhs que vianda pays,

que sobret mejans e majors,

e crec sos pretz e sas honors

e non temia afan ni fays;

que si lo planhon dui, 

lo ters lor o destrui; 

quem par mal ensenhatz, 

qu'ieu non cug qu'anc fos natz, 

de Karlemagn' en say, 

reys per tant bel essay 

mantengutz e prezatz; 

mas ja leu non crezatz 

qu'afars tant mal estey 

qu'esems lo plaignon trey. 

E que val doncs bella faissos 

ni grans poders qu'aissi s'abays? 

e ja passava part Roays

lo noms el pretz e la paors, 

entrels pagans galiadors

qu'anc us sols areire nols trays;

per que falh quis desdui, 

pus aissi leu s'esdui

so qu'om plus vol nil platz, 

de qu'ieu tenc per grevatz 

selhs que mais podon say, 

si non adobon lay; 

quan camjaran rictatz, 

qu'ajan qualque solatz 

de lur gran galaubey 

denant lo major rey. 

Quel trefas segles envejos

dona piegz, s'elh que plus s'atrays

non a suenh mas quel cors s'engrays,

e fassa cum ques pot son cors,

e l'arma pert ses lo socors

de lui cui sos covens a frays;

qu'om tan gen no s'estui

ni nos serra nis clui

de belhs murs dentelhatz, 

quan sera lai passatz 

al port on no s'eschay, 

qu'om merme son esmay 

totz non sia enserratz; 

per qu'es conseills senatz

qu'om de sai se castey, 

que sos tortz de lai nol grey.

Per solatz revelhar, quar es trop endormitz,

e per pretz qu'es fayditz aculhir e tornar,

mi cuyei trebalhar; mas er men sui giquitz, 

per so quar sui falhitz, quar non es d'acabar; 

cum plus m'en ven voluntatz e talans, 

plus creys de lai lo dampnatges el dans. 

Greu es a sofertar, a vos o dic qu'auzitz 

cum era jois grazitz e tug li benestar, 

hueymais podetz jurar que ja de fust no vitz

ni vilas miels formitz estra grat cavalgar:

lagz es l'afars e greus e malestans 

don hom pert Dieu e reman malanans. 

Ieu vi torneis mandar e segre gens garnitz, 

e pueys del miels feritz una sazo parlar; 

ar es pretz de raubar buous, motos e berbitz;

cavaliers si' aunitz ques met a domnejar, 

pus que toca dels mans motos belans, 

ni que rauba gleizas ni viandans.

On son gandit joglar qu'ieu vi gent aculhitz, 

qu'a tal mestier fo guitz que solia guidar? 

e vey senes reptar anar tals escarits, 

pus fon bos pretz failhitz que solia menar 

de companhos, e no sai dire quans, 

gent en arneis e bels e benestans.

E vi per cortz anar de joglaretz petitz

gen caussatz e vestitz, sol per domnas lauzar;

ar non auzon parlar, tant es bos pretz delitz, 

dont es lo tortz issitz d'elas mal razonar. 

diatz de quals d'elhas o dels amans, 

ieu dic de totz, quel pretz n'a trag enjans. 

Qu'ieu eys que suel sonar totz pros hom issernitz, 

estauc tant esbaitz que nom sai cosselhar;

qu'en luec de solassar aug en las cortz los critz,

qu'aitan leu s'es grazitz, de lans e de bramar 

lo comtes entre lor cum us bos chans 

dels rics afars e dels temps e dels ans. 

Mas a cor afrancar, que s'es trop endurzitz, 

non deu hom los oblitz nils viels faitz remembrar

que mal es a laissar afar pus es plevitz, 

el mal don sui guaritz nom qual ja mezinar;

mas so qu'om ve, volv e vir en balans, 

e prenda e lais e forss' e dams los pans. 

D'aitan me puesc vanar qu'anc mos ostaus petitz

no fon d'els envazitz; sels cui aug totz duptar

anc no fetz mas honrar los volpils mal arditz;

doncs mos senher chauzitz si deuria pensar

que non l'es ges pretz ni laus ni bobans 

qu'ieu quem laus d'el sia de lui clamans.

Eras non plus per que no m'o demans, 

que blasmes er, si vau d'aissi clamans, 

so dil Dalphins que conois los bons chans.

Er auziretz encabalitz chantars, 

q'ieu sui amics encabalitz e pars; 

aujatz si fo anc mais dicha 

tant grans foillia en chantan; 

greu n'escamparai ses dan, 

s'ab lieis m'apareil ni m'ec 

cui sui plus liges que sers.

terra, tu cum o sofers?

Ai, tantas vetz m'a trait necis parlars 

joi d'entrels mans, per qen devenc liars!

el cors, pois en ren s'aficha

don s'alegra tan ni qan, 

volgra ieu chantes gaban, 

q'era tro que s'esparec

tenial dreg per envers, 

tant fui ves amor esmers.

E qen diretz si l'esciens es rars 

el cors es leus? valram ja sobramars? 

non jes, tant es auta e richa

cella, cals remaigna ab tan. 

ja ren laus no mi valran, 

c'ades magrezisc e sec,

mou mas chanssos e mos vers

cum fols de saber esters.

Anc nuills effreis non fo valens ni cars

tro que moc loing de joi sobregabars;

e pois dic c'amors me tricha

per un petit de semblan,

et ieu pert per so que nom blan

lieus parlars, c'us dans men crec

quem ten pres plus greu q'en fers

per ti, bocha, qe 'n mal mers.

Aras nom letz qan mi valgra prejars; 

qerre merce si fai que mos trobars,

pois tant s'es m'amors africha

c'autra non qier nin deman,

clamail merce, qui qeil chan

celliei cui deschausir lec;

fouz descuidatz e despers,

tot trobaras so que quers.

El bes qet fetz, si n'eras el fuoc ars,

poz loill grazir; fo doncs mas us baisars?

folla res e cel que picha

non vai l'obra meilluran; 

ben as pauc saber d'enfan

e sit fetz mais que non dec;

piejer que cill de Beders

tu cals merces l'en refers?

Tal que lai dreitz mos huoills on bat la mar

el cors es fis e doutz e francs e clars

vas celliei on jois s'abricha

loing d'avol pretz e d'engan

e de mi qen vauc pensan,

per q'en magrezisc e 'n sec, 

volven de tort en travers 

plus abronquitz d'un covers

E cuidatz setz m'enuoi ni dejunars

nim tenga dan non fai c'us doutz penssars

m'aduria ab una nicha

san e let al cap d'un an.

fol, c'as dig? pauc t'en creiran

de so c'anc vers non parec;

si fara si loil enquers

mos Lignaure lai part Lers. 

Joios qui per bon eders 

no s' alegra, fols es mers.

Sim sentis fizels amics

per ver encusera amor, 

mas er men lais per paor 

qem dobles l'anta el destrics; 

mas aisso puosc dir ses dan,

c'anc d'engan ni de no fe

nom membret, puois amai be; 

anz n'ai sofertz de grans mals, 

c'aissi s'aven als leials.

E si non grana l'espics 

si cum pareis a la flor, 

cujatz que plass'al seignor? 

anz l'en creis ira e genzics; 

e par que consir de l'an 

en avan, car sap e ve

que sos affars noill ave; 

q'ieu vi c' us jorns ferials 

m'era mieiller c' us nadals. 

E vi ja mentr'era rics, 

segon lo temps q'era cor, 

q'ieum tenia a desonor

mainz plaitz don er sui abrics; 

c'um vencutz sofrire, qui blan

soffertan, qe pietz l'en ve 

so que plus li desconve, 

qe segon qe l'era egals, 

l'amors era ab mi cabals. 

Aujatz, joves ni antics, 

puois en sa baillia cor, 

tri de dos mals lo major, 

non farial reis Lodoycs. 

deu hom ben doncs rire d'aman 

qui l'afan d'amor soste 

e nol sap loignar de se, 

puois ve que li retz venals 

es doncs dans d'amor' aitals. 

Eraus semblara prezics

mos chans; mas si Dieu ador, 

peç' a non vitz amador

cui meins noca anta ni trics;

mas per mieills assire mon chan, 

vau cercan bos motz en fre

que son tuit cargat e ple

d'us estrains sens naturals;

mas non sabon tuich de cals.

E sitot s'enfeing enics

per espaventar los lor,

si plans valors noi acor,

pauc i val precs ni chastics.

deus om doncs aucire prejan?

dreig n'ai gran, qu'ieu sai e cre,

mas jes non o dic per re,

q'alz verais amics corals

non vai enan lor captals.

* Biografia, secondo il testo edito dallo Chabaneau (op. cit. p. 14): 

Girautz de Borneill si fo de Lemozi, de l'encontrada d'Esidueill, d'un ric castel del vescomte de Lemoges. e fo hom de bas afar, mas savis hom de letras e de sen natural. e fo meiller trobaire que negus d'aquels qu'eron estat denan ni foron apres lui; per que fo appellatz maestre dels trobadors, & es ancar per totz aquels que ben entendon subtils ditz ni ben pauzatz d'amor e de sen. fort fo honratz per los valens homes e per los entendens, e per las dompnas qu'entendian los sieus maestrals ditz de las soas cansos. e la soa vida si era aitals que tot l'ivern estava a scola & aprendia, e tota la estat anava per cortz, e menava ab se dos cantadors que cantavan las soas cansos. non volc mais moiller, e tot so qu'el gazaingnava dava a sos paubres parens & a la gleisa de la vila on el nasquet; la qual gleisa avia nom & a encaras Saint Gervasi.

Girautz de Borneil si amava una dompna de Gascoina que avia nom n'Alamanda d'Estanc. mout era prezada dompna de sen e de... valor e de beutat, & ella si sofria los precs e l'entendemen d'en Giraut, per lo gran enansamen qu'el li fazia de dretz e d'onor e per las bonas chansos qu'el fasia d'ella, don ella s'en deleitava mout, per qu'ella las entendia ben. lonc temps la preget, & ella com bels ditz e com bels honramenz e com bellas promissions se defendet de lui cortezamen, que anc noil fetz d'amor nil det nuilla joia, mas un son gan; dont el visquet lonc temps gais e joios, e pueis n'ac mantas tristessas quant l'ac perdut; que madomna n'Alamanda, quan vi qu'el la preissava fort qu'ella li fezes plaser d'amor, e saub qu'el avia perdut lo gan, ella s'en corozet del gan, dizen que mal l'avia gardat, e qu'ella noil daria nulla joia ni plaser noil faria mais d'amor, e que so qu'ella li avia promes li desmandava, qu'ella vesia ben qu'el era fort loing eissitz de sua comanda. quant Girautz ausi la novella ocaison el comjat que la domna li dava, mout fo dolens e triz...

Per la dolor e per l'ira qu'en Girautz de Borneil ac de la mort del rei Richart d'Engleterra, e per l'engan que l'a fait la sua dompna n'Alamanda, si s'era laissatz de chantar e de trobar e de solatz. mas en Ramons Bernartz de Rovigna, qu'era trop valens hom de Gascoingna e trop sos amics, com qui el clamava se Sobretotz, lo preget e volc qu'el chantes e fos gais, don el fetz aquesta chanso que diz: Si per mon Sobretotz non fos...

Girautz de Borneil, quan Guis lo vescoms de Lemotges l'ac fait raubar la sua maiso de sos libres e de tot son arnes, e vi que pretz era fugitz e solatz adormitz e dompneis mortz e proesa faillida e cortezia perduda & enseignamenz volz en deschausiment, e que engans era entraz en amdoas las parz, en las amairessas & en los afans el se volc penar de recobrar solatz e joi e pretz, e si fetz aquesta chanson que diz: Per solatz reveillar.