Aiso son las naturas d'alcus auzels e d'alcunas bestias.

Aiso son las naturas d'alcus auzels e d'alcunas bestias.

Del pol. 

La natura del pol es que canta lo vespre, can sent venir la nuech, pus soven; e l mati, can sen venir lo jorn, canta pus soven; e vas la mieia nueg engrueissa sa vot e canta pus larc e pus clar.

- De l'aze. 

La natura de l'aze es que canta, cant a fam et on mais se trebalha. 

- Del lop. 

La natura del lop es que, can ve hom' enans c'om lo veya, el li tol lo parlar. E si l'ome lo ve enans, l'ome li tol la forsa. Et a l col tan rot que no l pot plegar. E so que cassa va fort luenh de sa lobeyra; e cant vol intrar en cortal, va fort suau, e can mena segle ab sos pes, el pren son pe a mors fort e rege, et aysi s'en venja.

- Del grilh.

Lo grilh a tal natura que tant ama son cantar e tan s'en delecha que no s percassa de vianda e mor cantan.

- Del signe. 

Lo signes a tal natura que, can deu morir, canta tan clar que, si hom li ve denan ab esturmens, el si acordara ab los esturmens; adoncx conoys hom que deu morir.

- Del ca. 

Lo ca, cant a manjat et es sadol e ples, el geta so que a manjat; e cant a fam, o torn' a manjar.

- De la vibra. 

La vibra, can ve home nut, ela non l'auza regardar de paor; e cant lo ve vestit, no l preza re e sauta li desus. 

- Del simi. 

Lo simi vol centrafar (contrafar) tot cant ve far. E cant hom lo vol penre, hom se met en loc que lo veya, e caussa unas sabatas ab corregas e pueys laissa las sabatas e va s metre a una part. E l simi va e fay aital; 

e cant es caussatz, hom lo pren. 

- Del corp. 

Lo corp, cant a sos corbatos, que son ses pluma e no semblan paire ni 

mayre, ja non lur donara clam ni cosselh, tro que an pluma e que ls semblo. E cant troba home mort, premieiramen li manja los huelhs e per los huelhs lo servel.

- Del leon. 

Can lo leon a preza e home li passa denan, ja no l tocara, que passar y pot set vetz, sol que l'home no l regarde. Mas si l'ome lo garda, el es tan senhorilh que cui' esser deceubutz, car esgart d'ome es tan senhoril, e per so el laisa la cassa e cor vas hom e l cofon. E cant hom lo cassa que ve que no s pot defendre e l'aven a fugir, el cobri sas pezadas ab la coa dereire, per so c'om no veya son esclau. E can la leonessa a leonat, el nais mort; e tres jorns lo paire crida e rugis sobre el e fay lo vieure.

- De la mostela. Can la mostela a son mostelon qu'es natz, ela l muda per paor c'om no lo y emble; e si hom lo y men' a mort, ab c'om lo y rendes, ela l revieu. 

- Del calandri. 

Si l calandri porta hom denan un malaute et hom lo geta sul lieg, e lo calandri gara lo malaute en la cara, senhal es de guerir; e si l gira la coa, es senhal de mort.

- Serena canta tan dossamen que tot hom que l'auia, ven vas ley, e non pot estar que no s'adorma; e cant es adormit, ela l met mort. 

- De aspis. 

Aspis es la serp que garda lo basme; e cant hom vol aver del basme, hom lo adormis ab esturmens, e pren hom del basme; e can ve que es enganatz, el se clau la una aurelha ab la coa e freta tan l'autra per terra, tro que tota l'a clauza, per so que non auia los esturmens e velha.

- Del merle. 

Merles noiris hom volontiers; e non canta mas tres mes de l'an, e fa l pus plazen can que auzel que sia.

- De l'huelh de veire. Huelh de veire es un petitet auzel blanc e vert, et a la pus sotil vista que res que sia, que be veiria tras un paret.

- De la talpa.

Talpa no ve, ans a los huelhs desotz lo cuer, e sen pus fort d'autra bestia, e vieu de pura terra.

- Del pluvier. 

Pluvier vieu de pur aire del cel. 

- De la salamandra. 

Salamandra vieu de pur foc; e de son pel fa hom un drap que foc no l pot cremar. 

- De l'eranh. 

Eranh vieu de pur' aiga.

- De la trida. 

Can la trida a sos cadels, e ls cassadors la casson que l volon emblar sos tridos, els meton miralhs per aqui on els van e prendo sos tridos; e cant 

la trida a perdutz sos cadels, ela torna forssenada e sec per esclau los cassadors e troba los miralhs e mira se, et a tal gaug, can se ve, que tota sa dolor pert et aisi s'oblida de sos tridos. 

- De l'unicorn.

Hunicorn es la pus salvatja bestia que sia, que non es res que l'auzes 

esperar, ab un corn que a sul cap; et a ta gran plazer de flairor de pieuzela e de verginitat que, cant los cassadors lo volo penre, els li meton el pas una pieussela; e can la ve, el s'adorm e sa fauda, et adoncx es pres. 

- De la pantera. La pantera a tan dous ale e tan be flairan, que tot' autra bestia, pueys que l'a vista, no s vol d'ela partir, tro qu'es morta, per la flairor de l'ale.

- De las gruas. Gruas an tal natura que s'ajuston en grans tropels; e lur natura fa las trop dormir, e la una fay la garda, can las autras dormo; e per tal que la garda no s'adorma, ela met a sos pes de petitas peiretas, per tal que non puesca estar ferma, car lur natura es que dormon en pes.

- Del paon. 

Paon, tota la garda que a, es en regardar sa coa.

- De l'argus. 

Argus es homs que a cen huelhs, e dorm de dos en dos huelhs, et enaisi velha tostemps. 

- De la randola. 

Randola, qui trazia los huelhs a sos randolos e ls y tornava, la maire los 

fay revezer; e no manja ni pais mas en volans, e non a paor d'auzel de cassa.

- Del pellica.

Pellicans es us auzel que ama mot sos poletz; e cant sos pols lo senton venir, els baton lurs alas e donon ne al pellican per los huelhs; e l  pellican es tan ergulhos e de tal natura que totz los aussi; e cant ve que son mortz, el a gran dol e leva l'ala et ab lo bec obri son costat et arroza ls de son sanc, e tornon vieus. 

- Del castor.

Lo castors es una bestia que a un membre que porta medecina, e per aco lo cassa hom; e can ve c'om lo cassa, a gran paor de mort e sap que per lo membr' es cassatz, c'aital es sa natura; et el lo pren ab las dens et arraba lo s e laissa l cazer el sol, e ls cassadors venon aprop e, can vezon lo membre, prenon lo e laisso l anar; enpero d'an en an remet lo membre. 

- Del pic. 

Pic a aital natura que fai son nis en albre cavat, e cant hom li tapa son nis ab que que sia, el va per una erba e toca lo n, e tantost es hubert.

- De l'erisso. 

Erisso a tal natura que se met en las grans bartas et en las grans rodas d'espinas que no l puesca hom penre, que per totas partz ponh; e garda que sia en loc pres de pomier, que dins de la barta puesca manjar. 

- De la cocodrilla. 

Cocodrilha es una bestia mala; e can ve hom, ela l devora tot, e cant lo a manjat, ela lo plora totz los temps que vieu. Et estalva se que una serp, que a nom idre, ven vas la cocodrilla e fa se adormitz; e can la cocodrilla ve que l'idres dorm, ela l devora en un morcel; e can lo idre ve qu'es el ventre de la cocodrilla, el li trauca los costatz e va fora gauzens, e la cocodrilla mor.

- De l'idre. 

Idre es una serp que, cant hom li talha una testa, el ne met doas; e d'aquel idre s'a paor la cocodrilla. 

- De la vibra.

Can la vibra vol aver paria de sa par, el met son cap en la boca bayan de 

la femela; e la femela estrenh li tan fort lo bec e l cap al mascle que 

mantenen mor; e la femela reman prenhs de doas vibras, mascle e feme; e can devon naysser, els salhon per l'esquina, e la maire mor; et enaisi el mon non son mas dos. 

- De la simia.

La simia fay dos simos; e cant hom la cassa, ela met sel que mens ama sul col, e tenga se, si s vol; e sel que mays ama, lo maior, met entre sos bras, e fug ab dos pes. E cant ve que non li val re, per tal que puesca mielhs fugir ab catre pes, ela laissa sel que mays ama, e fug s'en ab lo menor.

Peire Guillem. Lai on cobra sos dregs estatz,

Peire Guillem, nouvelle allégorique.

Ms. de Paris, fr. 22543, fol. 147 (R). - Grdr. § 19, p. 22. St. p. 46.

Lai on cobra sos dregs estatz,

que naicho las flors per los pratz,

e brotono bruelh e boscatge,

e son gai li auzel salvatge

e li albre vestit de nuo,

ieu m'estava a Castelnuo.

E levie me un jorn mate: (y me vach eixecá un día pel matí)

era dos temps, clars e sere, (dous: dols; cla, seré, sereno)

ses bruma e ses ven e ses nauza, (ses : sense)

el temps que chanta la alauza, (laudeta, lauzeta, alouette)

lai en Pascor. (primavera)

Et ieu volgui vas mo senhor

anar, que te cort a Murel, (Muret, v. 1213.)

per que l'anar me fo plus bel,

e cochie fort mos cavaliers (cochie : vach doná pressa; cochar)

que digo a lors escudiers

que prenguan lors armas de briu,

qu'enquer passarem Corbairiu, (Corbolium, Corbeil?)

si l dia dura.

Ab tant anie m'en l'anbladura

tot mon cami,

parlan d'en Folcuens e d'en Gui,

cal amet mai.

Ab tant vec vos venir de lai

un cavazier, (cavalier, cavallier; caballé)

bel e gran e fort e sobrier

e lonc e dreg e ben talhatz! (lo contrari a Mario Sasot)

Dir vos ai a que l conoscatz:

tot so que l ve de lhui fa festa,

que l peal a bloy sus en la testa, (pel rubio; bloy, bloi; blonde)

e fon per la cara vermelhs,

car tocat l'i ac lo solelhs,

qu'escapatz fo del clar mati.

Et anc nulhs hom que fos aqui

non vi plus gay ni menhs iros.

Los huelhs ac vars e amoros,

e l nas fo bels e gen formatz,

e las dens foro, so sapchatz,

plus blancas que non es argens;

la boca fresca e rizens;

larc ac lo col, la gola blanca

plus que neus ni flors sus en branca;

amplas espallas e costatz, (com Daniel Vives Albesa)

e pels flancs fon gros e cairatz;

lonc cors e dalgatz per sentura: (prim; delgat; delgado)

e fon larcs per la forcadura,

cambas e coichas de faisso.

El pe portet un sabato

de safis, fag ab esmerauda,

de l'autre pe anet en caussa.

Et el anet vestit de flors,

totas de diversas colors;

mantel e blial de violas

portet, e sobrecot de rozas,

e caussas de vermelhas flors,

que negus hom non vi gensors;

et ac el cap una garlanda

de flor de gaug ab alamanda.

E dirai vos del palafre

cals fo, que non mentrai de re:

la coa ac negra e l'una anca,

e l'autra com avori blanca; (avori : evori : ivory : marfil)

e l'espalla drecha ac biza,

e la senestra tota griza, (esquerra, zurda)

la cri e la testa vermelha,

et ac gruegua l'una aurelha, (y teníe groga una orella)

e per l'al res el fo ferrans,

e no fon trop pauc ni trop grans.

De la sela, senes messonja,

puesc vos dire cossi fo conja:

tug li arsso foro de jaspe

e la sotzsela d'un diaspe,

e l cuer fo d'una serpentina

que valc tot l'aver de Mecina. (Messina)

L'us estriop fo de calssadoine (v. estruep; estribo)

e l'autre fo de cassidoine.

Lo fre ni l peitral, ses doptansa,

comprar no poiria l rei de Fransa,

e que lhi valgues l'emperaire;

car tot lo tesaur del rei Daire

valo doas peiras que i so;

et anc lauram d'aital faisso

non vi mais nuls hom bateiatz;

que l'aver de trenta ciotatz

val lo carboncles qu'es al fre,

que la nug escura al sere

vira cum pel bel jorn d'estiu.

Anc cavasier plus agradiu

no vitz, plus bel ni plus auzart.

Et anet li de l'autra part

una dona mial tans plus bela

que glai ni flor, can renoela;

ni neu ab gel, can cai en branca,

non es de la mitat tant blanca

cum la gola ni ls pes ni ls mas. (gola, peus, mans)

E de la cara soi certas

qu'es plus blanca e plus colorada

que roza de mai brotonada:     (rosa de mach; rosa de mayo)

veus tota sa fina color!

E portet garlanda de flor

eus cabels que son lonc e saur,

que per ma fe sembleron d'aur,

tant foron belh e resplandens.

Huels amoros, gais e plazens (ulls; una de les varians)

ac, e non cara estrunada,

e fon graila e grassa e dalgada,

e no portet vestir de sirgua,

ans portet be vestir de lhirgua,

mantel e blial e gannacha.

Plus fo escaficha e be facha

que dona qu'hom puesca trobar;

car anc Dios non formet sa par (Deu, Deus)

de gran beutat e de cunhtia.

E que voletz que plus vos dia? (y qué voléu que mes tos diga)

Que l fre e l peitral e la sela     (freno, pitral, cadira : silla)

val mai que l'aver de Castela (Castella, Castilla)

ab los cinc regemes d'Espanha. (los sing reinos de España)

E l palafre fon de Bretanha,

e es plus vertz qu'erba de prat,

e fo vermelha la mitat,

e la cri e la coa saissa;

e per la cropa una faissa (grupa, faixa)

ac plus blanca que flor de lir; (mes blanca que flo de lis: lliri)

e valc dos tans, senes mentir,

que l palafre del cavasier.

Ab tant vec vos un escudier

e una donzela apres! (y una donsella después, detrás)

E fo m veiaire que portes

un arc d'alborn, bel per mezura,

e tres cairels a la sentura

don l'us es resplendens d'aur fi

e l'autre d'acier peitavi,

gent furbit e gent afilat; (afilat, esmolat)

e l ters es de plum roilhat, (plom)

ab una asta torta de boih,

ab que fier tot amador moih

e amairitz, cant vol trair.

De la donsela, ses mentir,

no sai si s'es bruna ni blanca,

que ls cabels li van tro part l'anca,

si que cobren tota la sela,

qu'om non ve arsso ni sotzsela;

davan li van tro a l'artelh.

E portet un blial vermelh;

mas ieu no sai si s'es be facha, (pero yo no sé si está ben feta)

que, cum si agues capa o gannacha, (com si tinguere capa, garnacha)

la cobro per tot li cabelh.

Et anc no vitz plus bel parelh

del donzel et de la donzela.

E que cuiatz que faria ela?

Anet chantan un chan noel,

si qu'entendo l boi e li auzel

e s'en laissavo de chantar. (s'en dixaben o dixáen de cantá)

E chantet gent, azaut e clar,

e dih: "Dona ses amador

e cavasier senes amor

deuria 'n aze cavalguar,

per tal qu'om los pogues triar

de mest cels qu'amon leialmen;

e dona c'ama per argen

ni sap son mercat al colgar,

volgra l'avengues ad anar

en camia desafiblada."

Ab tant vec vos per meg l'estrada

venir la dona e l cavasier!

Et ieu saludie los premier 

e dissi: "Senher, Dios vos sal

e vos gart d'ira e de mal,

vos, la dona e la companhia."

Et el dih: "Dios vos benezia,

Peire Guillem, e us laih trobar

dona que us am de cor leial,

que tant lonc tems l'avetz sercada."

“Senher, et ieu ja l'ai trobada,

de cui soi ieu mial tans que mieus.”

"E vos podetz ben esser sieus,

Peire Guillem, qu'ilh non es vostra."

“Senher, pel bel semblan que m mostra

me teni de lies per paguatz."

“Aichi paih hom d'amor los fatz,”

dih la dona, “bels amics fraire.”

“Dona, e s'ieu l'am ses cor vaire,

no me pot be valer merces?”

"Amics, e merces, en que n'es, 

que anc noca fo en son repaire?”

"E i fo, dona, ges non a gaire,

que volc qu'eu fos ses autre sieus."

"A mal senhor laissa hom sos fieus,

amics," so dih lo cavasiers.

"E qui no pot passar estiers,

senher, per que los laissara?"

"Peire Guillem, car servira

cum hom forssatz, c'als non pot faire".

"Senher, per l'arma vostre paire,

diguatz me, don me conoissetz,

mas ta soven me mentavetz?

Car remanetz enuegh ab mi,

car anc per ma fe non aigui

un osde que tant m'abelis,

ni anc nulh tems home no vis

que ta be fos per tos tems vostre.

Doncs estatz ab mi que us o mostre,

qu'eu vos o quier per amor Dio."

"E no remanra aitant lio,"

s'a ditz la dona, “mas li platz.

Mas pres de fontaina e de pratz

nos matetz, e pres de boscatge,

car li castel nos so salvatge;

mas nos partim dels Catalas,

que menhs n'i trobam de vilas

que de gentils de l'encontrada."

“Dona, en bela alberguada

estaretz, e luenh de castel.

En un verdier, claus de rauzel,

estaretz sotz un bel laurier, (v. novas del papagai)

on cor fontaina sul gravier,

fresca, freja, clara e genta."

"Aital fontaina m'atalenta,"

dih la dona e l cavasier.

Arnaut de Carcasses, novas del papagai. Dins un verdier de mur serat

Arnaut de Carcasses, nouvelle. novas del papagai.

 

 

 

 

Dins un verdier de mur serat

a l'ombra d'un laurier folhat

auzi contendr' un papagay

de tal razo com ye us dirai.

Denant una don' es vengutz

et aporta l de lonh salutz

e a l dig: “Dona, Dieus vos sal,

messatje soy, no us sapcha mal

si vos dic per que soy aissi

vengutz a vos en est jardi.

Lo mielher cavayer c'anc fos,

e l pus azautz e l pus joyos,

Antiphanor, lo filhs del rey,

que basti per vos lo torney,

vos tramet salutz cen mil vetz

e prega us per mi que l'ametz,

car senes vos no pot guerir

del mal d'amors que l fay languir,

e nuilhs metges no ilh pot valer

mas vos que l'avetz en poder.

Vos lo podetz guerir, si us platz;

sol que per mi li trametatz

joya que l port per vostr' amor,

l'auretz estort de sa dolor.

Encara us dic mays per ma fe

per que l devetz aver merce:

car, si us play, morir vol per vos

mays que d'autra viure joyos."

Ab tan la dona li respon

et a li dig: "Amic, e don

sai es vengutz e que sercatz?

Trop me paretz enrazonatz;

car anc auzetz dir que dones

joya ni que la prezentes

a degun home crestia,

trop vos es debatutz en va.

Mas car vos vey tan prezentier,

podetz a mi, en sest verdier,

parlar o dir so que volres,

que no y seretz forsatz ni pres.

E peza m per amor de vos,

car es tan azautz ni tan pros,

car m'auzetz dar aital cosselh."

"Dona, et ieu m'en meravelh

car vos de bon cor non l'amatz."

“Papagay, be vuelh que sapjatz

qu'eu am del mon lo pus aibit.”

"E vos cal, dona?" "Mo marit."

“Jes del marit non es razos

que sia del tot poderos:

amar lo podetz a prezen;

apres devetz seladamen

amar aquel que mor aman

per vostr' amor, ses tot enjan."

"Papagay, trop es bels parliers;

par me, si fossetz cavayers,

que jen saupratz dona preiar.

Mas jes per tan non vuelh laissar

qu'eu no us deman per cal razo

dey far contr' aissel trassio

a cuy ay plevida ma fe."

"Dona, so vos dirai yeu be:

amors non gara sagramen,

la voluntatz sec lo talen."

"Vos be dizetz, si Dieus m'aiut;

ab tan vos ai yeu doncx vencut,

qu'eu am mo marit may que re

que si' el mon, de bona fe,

e lunh autr' amador no vuelh.

Com auzatz dir aital erguelh

qu'eu am la on mos cors non es?"

"Dona, erguelh non dic yeu ges;

par me que us vulhatz corrossar.

Pero, si m voletz escotar,

ja per razo no us defendretz

d'Antiphanor que non l'ametz.

Be us dic que dreitz es veramen

que devetz amar a prezen

vostre marit mays c'autra re;

apres devetz aver merce

d'aissel que mor per vostr' amor.

No vos membra de Blancaflor

c'amet Floris ses tot enjan,

ni d'Izeut que amet Tristan,

ni de Tisbe cant al pertus

anet parlar ab Piramus,

c'anc nulhs hom non l'en poc tornar?

En lieys vos podetz remirar.

Cal pro y auretz, s'Antiphanor

languis per vostr' amor ni mor?

Lo dieus d'amor e sas vertutz

say que vo n rendran mals salutz,

et yeu meteys, que dezir n'ay

de vos, tot lo mal que poiray,

s'en breu d'ora no m'autreyatz

que, s'el vos ama, vos l'amatz."

"Papagay, si Dieus m'acosselh, 

encara us dic que m meravelh,

car vos tan gent sabetz parlar.

E pus tant me voletz preiar

d'Antiphanor, vostre senhor,

ieu vos reclam pel Dieu d'amor,

anatz vos en, que trop estatz,

e pregui vos que li digatz

qu'eu m'acordaray en breumen

e ilh mostraray tot mon talen.

E si tant es que m vuelh' amar,

d'aitan lo podetz conortar

que pels vostres precx l'amarai

e ja de luy no m partiray.

E portatz li m aquest anel,

qu'el mon non cug n'aya pus bel,

ab sest cordo ab aur obrat,

que l prengua per ma amistat.

E gardatz vos que non estetz:

en sest verdier m'atrobaretz."

Ab tan lo papagays respon:

"Dona," fay s el, "si Dieus be m don,

mot a aisi azaut prezen,

et yeu portar l'ay veramen;

e car avetz tan bel esgart,

saludar l'ay de vostra part.

Dona, sel Dieus que no mentic

vos do d'Antiphanor amic,

e m lays vezer c'abans d'un an

l'ames de cor ses tot enjan."

Ab tan parton lor parlamen.

De layns, car ac gran talen

de la don' e d'Antiphanor,

del vergier joyos ses demor

dreg a son senhor es vengutz

e comta l com s'es captengutz:

premeiramen l'a comensat

lo gran pretz e la gran beutat

de la domna, si m'aiut fes;

e d'aisso a fait que cortes.

Pueys li a dig: "Senher, ja mays

non er noiritz tals papagays,

que tan digua per son senhor

com yeu ay dig per vostr' amor.

Dins el verdier m'aney suau:

no volia qu'en mon esclau

se pogues metre nulha res;

may volri' esser soutz que pres.

La dona trobey veramen,

de vostr' amor li fi prezen,

e tramet vos aquest anel,

qu'el mon non cug n'aya pus bel,

ab sest cordo ab aur obrat,

que l prendatz per sa amistat.

E prendetz lo per su' amor,

que Dieus vo n do be et honor.

Mas jes no say per cal razo

non prenguam sonh ni ochaizo

que puscam el verdier intrar:

jes no vos en say cosselhar.

Mas yeu metray foc a la tor

et al solier, per vostr' amor;

e can lo focs er abrassatz,

poiretz intrar per esperatz

ab vostra dona domneyar,

e lieys tener et abrassar."

Antiphanor respon breumen

"Tornatz premier al parlamen

a lieys parlar, si a vos platz:

doncx sestas razos li mostratz."

Ab tan parto s'en ambeduy.

Mot es lo papagays vas luy

fizels amicx e ses enjan.

Vas lo verdier s'en vay volan.

La dona trobet sotz un pi,

saludet la en son lati:

"Dona, aisel Dieus que vos fetz

vos done so que mays voletz

e us gar de mal e d'encombrier,

sol que lo vostre cavayer

vulhatz amar tan lialmen

com el fay vos ses falhimen."

"Papagay, si m'acosselh Dieus,

si trastotz lo mons era mieus,

tot lo daria de bon cor

per l'amistat d'Antiphanor.

Mas aquest verdier es trop claus

e las gardas non an repaus,

devo velhar tro al mati,

car lunha nueg non prendo fi."

"Dona, e no y sabetz cosselh?"

“Ieu no, e no m'en meravelh,

si vos cosselh non y sabetz.”

"Si fas, dona: ar m'entendetz.

Ieu tornaray vas mo senhor,

c'ay laissat cossiros d'amor.

Encar' anueg l'en menaray ...

al pe del mur l'en aduray:

fuoc grezesc portaray, si us play,

ab que metray fuoc al cloquier

et a la tor et al solier.

E cant lo focs sera enpres,

ilh y corran tug demanes,

que l voldran per fort escantir.

E vos no metatz lonc albir:

pessatz de luy e faitz l'intrar;

adoncx poiretz ab luy parlar.

E s'aquest cosselhs vos par bos,

ab mal grat qu'en aya l gilos

poiretz ab luy aver delieg

e jazer ab el en un lieg."

Ab tan la dona ditz: "Platz me,

et anatz lo querre desse."

Ab tan lo papagays vay s'en

vas Antiphanor, que l'aten.

Sobre son caval l'a trobat,

de son garnimen adobat;

elm et ausberg viest sobre si

e caussas de fer atressi;

sos esperos d'aur tenc caussatz,

s'espaza sencha a son latz.

E l papagays li venc denan.

"Senher," fay s el, "al mieu semblan

anueg veiretz aisela re

que may amatz per bona fe.

Vostra dona us manda per mi

c'anetz vas lieys tot dreg cami

viatz, e cavalguatz suau:

lunhs hom no sapcha vostr' esclau,

ni lunha res, ses devinar,

no puesca saber vostr' afar.

Mas foc grezesc nos fay mestier

en ola de fer o d'assier;

ieu l'enpenray entre mos pes,

faitz me l liurar tost et ades."

Antiphanor isnelamen

li'n fay liurar a son talen.

Tan cavalguero per viguor

que la nueg foro prop la tor.

Las gaitas sono pel cloquier,

l'una va e l'autra l'enquier.

Devo velhar tro al mati,

car lunha nueg no prendran fi.

Ab tan Antiphanor dissen,

et a pauzat son garnimen

de pres son caval, tot entier,

mas solamen son bran d'assier

que volc portar senh a son latz;

e no l'es ops, d'aisso m crezatz,

car ses temens' ab cor segur

es vengutz tro al pe del mur.

E l papagays de l'autra part

intr' el verdier, car trop l'es tart

de metre foc, car so senhor

laisset tot sol senes paor.

Denan la dona venc premiers;

aisi com si fos esparviers

s'anet pauzar denan sos pes,

e pueys l'a dig tot en apres:

"Dona, mo senhor ay laissat

al portal maior dezarmat.

Pessatz de luy e faitz l'intrar,

qu'ieu vauc lo castel abrandar."

"Papagay, per mon essien,

fag n'ay ieu tot l'assermamen.

Las claus del castel ai pres mi:

vec las vos sus aquest coissi!

Anatz metre foc al castel."

Anc may no cug per lunh auzel

fos aitan ricx faitz assaiatz,

com aquest er, ni comensatz.

E l papagays seladamen ...

de las la tor prop del terrier

lor vay metre foc al solier.

Devas quatre locx s'es empres,

e l critz se leva demanes:

"A foc!" crido per cominal.

E la dona venc al portal 

e a ubert senes comjat

de las gachas e mal lor grat.

Antiphanor intr' el vergier:

en un lieg dejos un laurier

ab sa dona s'anet colcar.

E lunhs homs non o sap contar,

lo gaug que fo entre los dos,

cals pus fo de l'autre joyos.

Veiaire lor es, so m'es vis,

c'aquo sia lor paradis;

grans gaugz es entre lor mesclatz.

E l focs fo tost azamortatz,

ab vinagre l fan escantir.

E l papagays cuget morir,

tal paor ac de son senhor.

A l'enans que poc venc vas lor

e es se prop del lieg pauzatz

e a lor dig: "Car no us levatz?

Anatz sus e departetz vos,

que l focs es mortz tot ad estros."

Antiphanor ab cor marrit

s'es levatz e pueys li a dit:

“Dona, que m voldretz vos mandar?”

"Senher, que us vulhatz esforsar

de far que pros tan can poiretz

en est segle tan cant viuretz,"

fay se vas el, baiza l tres vetz.

Antiphanor s'en torna leu

com filhs de rey ab son corrieu.

So dis nArnautz de Carcasses 

que precx a faitz per mantas res

e per los maritz castiar

que volo lors molhers garar,

que ls laisso a lor pes anar,

… que may valra,

e ja degus no y falhira.

 

Daude de Pradas, li auzel cassador. (Fragment) Cora e consi trag' om auzel de ni.

Daude de Pradas, li auzel cassador.

Cora e consi trag' om auzel de ni.

Oimais deu hom dire consi

e coras lo trag' om de ni:

aprop nou jorns que seran nat;

car adoncs son alques fermat

et an de forsa lor cap pres

que las planetas hi an mes.

Lo matinet ab la frescor,

can son deju e ses calor,

ab mas nudas los deu hom penre,

tot suau e gen, car son tenre,

e deu gardar ben autressi

que ill paire no sion prop d'aqui;

car tals n'i a, son tan esquiu

que pois no tornon a cel niu.

Li falco gran batailla rendon

a cels que lor auzelos prendon.

En rams foillatz fassa portar

cascuns per si, ab gent anar,

e porte ls hom en un pauc desc,

e desobre sion li ram fresc,

e per dedins sion folrat

ab pels de lebre o de cat

o d'autra calque pel moleta,

qu'en l'anar no ls nafre vergueta.

Cant a maizo es hom tornatz,

de gent pauzar sia membratz:

frevol son, no s podon sufrir,

maizo lor cove a bastir...

que hom apella per so ferma.

E tot per so que meills hi cresca

meta i hom jonc e foilla fresca.

 

Consi deu hom tener l'auzel can l'a gitat de gabia et ensenhar d'esser privat.

Aissella noit com l'aura pres,

pos que li get li seran mes,

gran pesa lo deu hom tener.

Mas pois lo deu hom far sezer

en tal perga que s'an crotlan;

car adoncas non a talan

de moure; ans cuida cazer,

et esforsa s de meills tener.

Abans de jorn deu hom levar

per son auzel a regardar,

e tenga l'om tro al mati

abans qu'en la perga torn si.

Et entretan c'om lo tenra,

la man senestra crotlara

e l man destra mene ill denan

per so que s'an adomesjan; (pera que se vaigue domesticán)

ab un bastonet bel e pla

adop las penas, s'ops li a. (las penas : les plomes o plumes)

Pois que s'ira aprivadan,

hom li mostre la carn denan.

E s'el hi vol lo pe estendre,

hom non lo i deu per re defendre,

mas laisse la ill, e mange la

a son plazer sobre la ma.

E qui vol aver son auzel,

gart si be que ja no l'apel

ni l'escrit ni l fassa venir,

entro que l'auze ben gequir

tot sol, tant l'ai' aprivadat.

Car molt l'aura tost adobat.

Pois er privatz e faitz maniers,

mas ges ... can l'a mestiers.

Que ges, per coita d'auzelar,

no l fassa trop per temps volar.

Car aital us coma penra

de premier, aital lo tenra.

Per so fail gardar del malvetz;

mas tota la premeira vetz

que nuill auzel penra per se,

laisse lo ill, e per nuilla re

no venga ves lui trop corren,

mas tot suau e belamen

s'an apropchan e senes brui;

car si trop bruen cor ves lui,

malvezar l'a d'esser ratier.

Aissi deu far lo jorn premier:

a son talan deu manjar pro,

c'aissi l'a hom privat e bo.

Tot aquel jorn e l'endema

non penra plus; mas can venra

dreit al ters jorn, seguramen

pot auzelar a son talen,

e pois tot jorn si com volra,

aitan com sas ben estara.

Cant auzels a febre.

Si vostr' auzel febre destrenh,

ges d'esser malautes no s fenh,

ans es malautes per daveras; (sino que está dolén de veres, verdat)

et auiatz las ensenhas veras

per que o conoisseretz leu:

lo cap te bas et er fort greu

que un pauc no l'aia enflat;

sa pluma li trembla e ill bat,

e si noca si te tot dreg,

ben fai parer que aia freg.

E los oills te claus per dormir,

so que pren, non pot degerir;

az oras gieta so que manja, (gite : vomite; gitá : tirá, vomitá)

qu'en la gorga res no s'estanca.

Un jorn manja coitozamen,

autre non vol manjar nien;

un jorn tot a sa gorga te

que non espenh neguna re.

Magres si te et afamatz

e tot jorn estai esmagatz.

Can vostr' auzel veiretz aital,

sapchaz que febres li fai mal.

Per febre lo sol hom sancnar:

mas hom qui be non o sap far

no s'en deu per re entremetre,

que ades li poiria metre

en nervill flecme o en vena,

que ill seria poissas grans pena.

Pero qui sancnar l'en volia,

la camba dreita l liaria (la cama dreta li lligaríe)

ben estreg ab una correia; (ben estret en una correcha)

e ben cove fort clar hi veia,

car las venas son tant sotils

coma seria uns prims fils.

Per mei de la camba d'avan

a una veneta plus gran

que las autras venas non so

c'adoncas paron de viro;

per mal de febre trenca s ill,

c'aissi gueris d'aquel perill.

Desotz el pe un' autra n'a

que per batige s trencara.

E dereires sobre l talo

n'a un' autra, que ill fai gran pro

cant hom per gota sanc l'en trai.

Pero contra febre us dirai,

per so que sancnar no l vos cailla, (pera que sangrál no tos calgue)

metzina que non aura failla.

Del suc de l'arsemiza ill datz,

et aqui la carn li moillatz.

Autra l'en faretz eissamen

que trobaretz bona e valen.

D'un' erba que a nom lentilla,

qu'en aiga nais per meravilla

et estai per tot l'an verdeta

et es pauca e redondeta,

polvera'n faitz, e mange ne (pols ne feu, y que ne minjo)

vostr' auzels, e garis lo be.

E qui l banha en aquel bro (y qui lo bañe en aquell caldo)

on grua cueis, es li fort bo. (aon grulla se cou, li es mol bo)

Cant auzels a mal de rof.

Car uns mals sol un autr' adure,

can non es qui premier en cure.

Apres febres solon aver

auzel grans mals per noncaler.

Rof e tesga son li peior,

car per rof sofron tal dolor

el cap, que l cap e l'oill lor enflon

tan fort c'apenas pois dezenflon,

e soven fora de la testa

lor geta ls oills fors de la testa.

La raitz del rafe penretz,

tres petitas ne triaretz,

e d'estafizagra tres gras,

de pebre dos entiers e sas,

e de girofle tres clavels,

de ginebre que sia bels

tot lo pezan de dos deniers,

de serbe trenta gras entiers.

Aisso tot ensemps trusaretz,

et en aprop vos hi metretz

aitan de sain d'una troia (tan de sagí de una gorrina : truja)

que de porsel fo plena e voia;

de tot l'als si posca defendre.

Cant l'aures fait en l'ola fendre,

en aquel sain buillira (en aquell sagí bullirá)

tot ensemps, e tant cozera (tot jun, y tan courá)

ab un pauc d'aiga solamen

que s'i metra premeiramen,

que las raitz amenuziscon

e que totas envaneziscon.

Cant er coit, ans que sia freg,

colatz o per un drap estreg,

et en aprop conseill que s meta

en una boissa bella e neta.

Lo premier jorn ne donaretz

aitan can levar ne poiretz

ab la poncheta d'un coutel

sus en la carn a vostr' auzel.

E l'endema doas pinholetas,

que sion doas favas grossetas,

l'en donaretz, e pois quec jorn

donatz l'en tres, tro que sas torn.

___

Segon so c'avia promes,

mos romas del tot complitz es.

Pero, si negun n'i avia

mais ne saubes e meills dizia,

ja no s pense que m'enoges

ni mal d'enveia l'en portes.

Mas tals n'i a que s fan parlier

e no volon aver mestier

mas de maldire e de blasmar

so que no sabon esmendar,

ni non entendon neis que s'es.

E so ave de nesies,

car ben es nesis veramen

qui blasma so que non enten.

E qui faill per tal nosabensa

ges non es quitis de faillensa;

car nuills hom no fai maior pecca

de cel que per nonsaber pecca; 

e l proverbis consent hi be

que ditz aissi: "Fer qui non ve."

Car cecs e pecs an tal maneira

que negus non garda on feira;

que cel qu'es cecs no ve defor

e cel qu'es pecs no ve de cor;

et a n'i pro d'aitals cecs pecs

outracuiatz, travers, bavecs,

paire e fill de vilania,

auripelat de parlaria,

c'ades van metjan e megen

e cuion esser maldizen,

e ges no i podon avenir

c'adreitamen sapchont maldir. 

E lor maldigz non es neis mals,

qu'en dreit posca esser digz tals,

car en maldig a obs sabers,

sia l maldigz o fals o vers,

car mals digz, ses bendig, no ferma,

per si mezeis desvai e merma,

e maldigz ditz adreitamen

vens bendig dig nesiamen.

Maldig ben dig non tenc a mal,

car maldigz bendig soven val,

e per maldig, cant es cortes,

s'esmera e s meillura bes.

Maldig ben dig deu hom prezar,

car a ben auza contrastar.

Ja de bendig non er pariers

maldigz, si non es prezentiers,

e prezentiers non sera ja

si queacom bendig no i a,

e cel no i dira ja ben re

que non enten autrui ni se.

Ben es doncas meins que non res

avols maldigz que mal digz es.

Per so no m fan nuilla paor

vezat, badoc maldizedor:

fat maldizen giet a mon dan

et a gen corteza m coman.