Ballade. A l'entrada del tens clar, eya,

Ballade.

A l'entrada del tens clar, eya,

per joia recomençar, eya,

e per jelos irritar, eya,

vol la regina mostrar

qu'el' es si amoroza.

A la vi', a la via, jelos,

laissaz nos, laissaz nos

ballar entre nos, entre nos.

El' a fait per tot mandar, eya,

non sia jusqu'a la mar, eya,

piucela ni bachelar, eya,

que tuit non venguan dançar

en la dansa joioza. 

Lo reis i ven d'autra part, eya,

per la dansa destorbar, eya,

que el es en cremetar, eya,

que om no li voill' emblar

la regin' avrilloza.

Mais per nient lo vol far, eya,

qu'ela n'a sonh de viellart, eya,

mais d'un leugier bachelar, eya,

qui ben sapcha solaçar

la domna savoroza.

Qui donc la vezes dançar, eya,

e son gent cors deportar, eya,

ben pogra dir de vertat, eya,

qu'el mont non aia sa par

la regina joioza.

A la vi', a la via, jelos,

laissaz nos, laissaz nos

ballar entre nos, entre nos.

XXXVI, Falsedatz e desmezura

XXXVI.

 

Falsedatz e desmezura

An batalha empreza

Ab vertat et ab dreytura,

E vens la falseza;

E deslialtatz si jura

Contra lialeza;

Et avaretatz s' atura

Encontra largueza:

Feunia vens amor

E malvestatz honor,

E peccatz cassa sanctor

E baratz simpleza.

 

Si es hom que dieu descreza,

Sos afars enansa,

Ab que non aia grineza

Mas d' emplir sa pansa:

A cui platz dreitz e tortz peza

Soven a grevansa,

E qui s' enten en sancteza

Tray greu malanansa;

Et an l' enguanador

De lur afar honor;

Mas li mal entendedor

Jutjon per semblansa.

 

Aras es vengut de Fransa

Que hom non somona

Mas selhs que an aondansa

De vin e d' anona,

E qu' om non aia coindansa

Ab paupra persona,

Et aia mais de bobansa

Aquelh que meyns dona,

E qu' om fassa maior

D' un gran trafeguador,

E qu' om leve lo trachor,

E 'l just dezapona.

 

Coms Raymon, ducx de Narbona,

Marques de Proensa,

Vostra valors es tan bona

Que tot lo mon gensa;

Quar de la mar de Bayona

Entro a Valensa,

Agra gent falsa e fellona

Lai ab viltenensa;

Mas vos tenetz vil lor,

Que Frances bevedor

Plus que perditz ad austor

No vos fan temensa.

 

Ben volon obediensa

Selhs de la clercia;

E volon ben la crezensa,

Sol l' obra no y sia:

Greu lur veyretz far falhensa

Mas la nueg e 'l dia;

E no porton malvolensa

Ni fan symonia;

E son larc donador

E just amassador;

Mas li autres n' an lauzor,

Et ilh la folhia.

 

No sai dire l' error

Del segle fals traytor,

Que fai de blasme lauzor

E de sen folhia.

 

Dieu prec per sa doussor

Que ns gar d' enfernal dolor

E ilh verge Maria.

 

Pierre Cardinal.