Mayestre Peire de Corbian o Corbiac.
2701.
Domna des angels regina, (Domna, dels)
Esperansa dels crezens,
Segon que m comanda sens
Cant de vos lenga Romana;
Quar nuls hom just ni pecaire
De vos lauzar no s deu taire,
Com sos sens meils l'aparelha
Romans o lenga latina.
Domna, roza ses espina
Sobre totas flors olens,
Verga seca frug fazens,
Terra que ses labor grana,
Estela del solelh maire,
Noirissa del vostre paire,
Él mon nulla nous somelha
Ni londana ni vezina.
Domna, joves enfantina
Fos à dieu obediens
En totz sos comandamens.
Per que la gent crestiana
Cre ver e sab tot lo faire
Queus dis l'angel saludaire,
Quan receubes per l'aurelha
Dieus, quez efantes vergina.
Domna, vos etz l'aiglentina
Que trobet vert Moysens,
Entre las flamas ardens;
E la toison de la lana
Que mulhet dins la sec' aire,
Don Gedeons fon proaire:
E natura s meravelha
Com remazest enterina.
Domna, estela marina
De las autras plus luzens,
La mar nos combat e'l vens,
Mostra nos via certana.
Quar sins vols à bon port traire,
Non tem nau ni governaire,
Ni tempest quens desturbelha, (tempest')
Ni'l sobern de la marina.
Domna, metges e metzina,
Lectoaris et enguens
Los nafratz de mort guirens,
La vilheje onh e sana.
Dossa, pia, de bon aire,
Vos me fatz de mal estraire;
Quar perdutz es qui sonelha,
Que la mort l'es trop vezina.
Domn' espoza, filh' e maire,
Manda'l filh e prega'l paire,
Ab l'espos parl' e cosselha
Com merces nos si' aizina.
Pos dormen mas tuns esvelha
Ans quens sia mortz vezina.
