XIe-XIIe siècle.
Noël.
Ms. de Paris., lat. 1139, fol. 48. - Paul Meyer, Anciennes poésies religieuses en langue d'oc, Paris 1860, p. 15-17. (Bibliothèque de l'École des Chartes, 21e année, Paris 1860, p. 493-95) (M.).
Dans le rythme et la mélodie de l'hymne latine In hoc anni circulo.
J'ai omis les strophes latines, qui alternent avec les provençales.
- Grdr. § 10, p. 10.
Mei amic e mei fiel,
laisat estar lo gazel:
aprendet u so noel
de virgine Maria.
Lais lo m dire chi non sab,
qu'eu lo l dirai ses nul gab:
mout m'en issit a bo chab
de virgine Maria.
So sabjat, re qu'es be ver,
Deus i ven, per nos, maner
in te, virgo Maria.
“Non perdrai virginitat,
tos temps aurai chastitat,
si cum es profetizat,
pois er virgo Maria.”
“Eu soi l'angels Gabriel,
aport vos salut fiel:
Deus descen desus deu cel
in te, virgo Maria.”
Cum la reina l'enten,
si l respon tan piamen:
“Aco sia au so talen
e virgine Maria.”
Cum la reina l'auvit,
si l'amet e si u jauvit.
“Aco sia au so chausit
in te, virgo Maria.”
“Tu es mesatjes al rei,
si cum tu o dit, o crei:
a lui me do e m'autrei,
ego, virgo Maria.
Ancela soi Damrideu;
si cum tu dit o cre eu:
maire serai Damrideu
e pois virgo Maria.”
L'angels es deu cel vengut
e la dompna l'a creut:
per tal n'esmes ereubut
de virgine Maria.
Eu vos ai dit mon talan,
e vos diia en avan
chasques vers nous ab nou jan
de virgine Maria.
