Berrengiers de Palazol, Pararols ou Palou. S'ieu sabi' aver guizardo

Berrengiers de Palazol, Pararols ou Palou.

7225.

Berrengiers de Palazol si fo de Cataloingna, del comtat de Rossillon. Paubres cavalliers fo, mas adregz et enseingnatz, e bons d'armas. 

E trobet ben cansos: e cantava de n'Ermessen d'Avignon, moiller d'en Arnaut d'Avignon, fils de na Maria de Peiralada.

2701, 7226.

S'ieu sabi' aver guizardo

De canso, si la fazia,

Ades la comensaria

Cuendeta de motz e de so.

Que perdut n'ai mant bel cantar,

Per qu'eras m'en pren espavens;

E si n'ai estat alques lens,

No m'en deu hom ocaizonar.

Qu'amadaus aurai en perdo

Longuamen, en aital guia

A ma bela douss'amia,

Qu'anc re nous plac no m saupes bo;

Ni anc res no saubi pensar

Qu'à vos fos pretz ni honramens,

Qu'al tost far no fos plus correns

Que si'n degues m'arma salvar.

E ja dieus amia no m do

S'en lieis mos cors se fadia.

La flor de la cortezia,

Ella m'aura o autra no,

Quar sol à lieis m'estug e m gar:

E son aissi sieus solamens,

Qu'autre solas m'es eissamens

Co qui m fazia sols estar.

E no farai plus lonc sermo;

Quar on plus la lauzaria,

Del laus sol qu'en remanria

Cent domnas aurian ne pro;

Qui sabia ben devisar

Las beutatz e'ls ensenhamens,

E la cortezi' e lo sens

Aissi com s'escairia far.

Aissi fenira ma canso;

E no volh plus longa sia,

Que plus greu la n'apenria

Mo senher, e siei companho,

Lo coms Jaufres, que dieus ampar

Quar es adretz e conoissens;

E fai tan de rics fach valens,

Lauzengier no l pot encolpar.

L, Mout fort me sui d' un chan meravillatz (Barthélemi Zorgi)

L.

Mout fort me sui d' un chan meravillatz

Per lui qu' o fetz sitot es dreigz que m plaia,

Quar cel que es vailhenz ni enseingnatz

Deu ben pensar e gardar que retraia;

Quar nienz es q' om razonar pogues

Lo tort per dreig que 'ls pros no s conogues; 

E poda leu perdre mon escien

Son pretz aicel qui tort adreg defen.

Doncs, si ben fos premiers aconseilhatz,

Pueis d' escondir Genoes tant s' asaia,

Non crei qu' el chant agues mainz motz pauzatz

Qui membrar fan lor sobremortal plaia,

Que l' autreia c' abatutz e mespres

Totz lor affars pels Venecians es;

E l' uchaizos, qu' en pauz' en lur conten,

Non pot donar contra 'l mal guarimen.

Car hom non deu de ren esser blasmatz,

Si 'l fai co i s taing, n' es dreg que mal l' en chaia,

Doncs pueis tant gen gerreian ses guidatz,

No m par qu' en re lur descortz nogut n' aia;

C' anc al jostar no fo nuilh temps que res

Mas arditz cors failliment lor fezes,

Car il foron totas vez mais de gen

Gent acesmat e per un dos soven.

E l' auch retrair qu' il tengron afrenatz

Venecians, ja qu' era lor meschaia,

Mas cum ancse fon lur poders doptatz

Pelz Genoes, no s membre no il desplaia,

Qu' un de lor naus mena uns sols tres pres,

Mas escondir pogra meills per un tres,

C' anc non preiron Venecian conten

Non aguesson lauzor al fenimen.

Mas s' el volgues semblar enrazonatz,

Non degra pas dir razon tant savaia,

Ni que trei flac valgron trenta prezatz;

Pero dels tres no m par respos s' eschaia,

Don ieu m' enpas e dic so qu' es pales,

Que quant es meills als Venecians pres,

Adoncs reignon plus cortes d' avinen,

E no s' en van en re desconoissen.

Oimais mi par que ben sia quitatz

D' aisso qu' a dich, e, s' el no s' en apaia,

De Venecians, queira 'ls lor faitz honratz

E 'ls grans conquistz faitz ab valor veraia;

E cum eran vencutz los Genoes,

Et en anta l' emperador grec mes,

E jutgara pueis s' ill valon nien,

Qu' ieu non ai plus de respondre talen.

Valens domna, qu' en cel pais regnatz,

Per cui plaidei, pros e plazens e gaia,

Merce vos clam, qu' a mi valer deiatz,

Que tot quant auch ni vei lo cor m' esmaia,

E sui tant fort de vostr' amor empres

Que, si no vei vostre gai cors cortes,

Viure non puesc, so sapchatz veramen,

C' ab lo respeig que ieu n' ai muer viven.

Venecian, qui ditz que il Genoes

Vos an faitz dan ni us an en dolor mes,

Vostr' onrat prez non sap ni 'l dan coren

Que lor avez fait d' aver e de gen.

Bonifaci Calvo, mon sirventes

Vos man, e us prec qu' el dir no us enuei 'l ges, 

Quar del taisser grat cortezia m ren,

E maiormenz dels Genoes l' enten.

Barthélemi Zorgi.