Peire de Barjac, Tot francamen, domna, veing denan vos

Peire de Barjac.

7225.

Peire de Barjac si fo uns cavalliers compaignon d'en Guilhem de Balaun; e fo fort adreg e cortes, e tot aitals cavalliers com taingnia à Guilhem de Balaun. E si enamoret d'una domna del castel de Javiac, la moiller d'un vavassor, et ella de lui; et ac d'ellei tot so qe il plac. E Guilhem de Balaun sabia l'amor de lui e d'ella. E venc si c'una serra el venc à Javiac com Guilhem de Balaun, e fo sentatz à parlamen ab sa domna, et avenc si que P. de Barjac s'en parti malamen com gran desplazer, e com brau comiat qu'ella li det. E quant venc lendeman, Guilhem s'en parti e Peire com lui trist e dolenz. En G. demandet per que era tant tristz; et el li dis lo covinen. En Guilhem lo confortet, disen qu'el en faria patz. E no fon lonc temps que il foron tornat à Javiac, e fon faita la patz; e s'en parti d'ella con gran plazer que la domna li fetz. Et aqui son escrit lo comiat qu'el pres de lei.

7225.

Tot francamen, domna, veing denan vos

Penre comiat per tostemps à lezer;

E grans merces quar deingnastes voler

Qu'ieu mi tengues de vostr'amor plus gai

Tan quan vos plac. Mas aras, pos nous plai,

Es ben razos que si voletz aver

Drut d'autra part queus posca mais valer

Ieu' l vos autrei: ja pietz nous en volrai, (Ieu 'l) 

Ans aurem pois bon solatz entre nos,

Et estarem com si de re no fos.

Per so, domna, tostemps serai curos

De vostr' afar, qu' aisso 'n volh retener; 

Qu'ieu no lo posc gitar à non caler 

Aissi del tot, qu'enans vos servirai,

Fors que jamais vostre drutz no serai, 

Si be m deves encaras lo jazer 

Que m promezest quan n'aurias lezer. 

Non dic per so que negun soing non ai; 

Mas s'ieu en fos agutz ans poderos, 

Tal ora vi qu'ieu pogr' esser joios.

Mas vos cujas, quar ieu soi adiros,

Qu'aissi com soill non o diga de ver;

Mas d'er enan vos o farai parer:

Qu'ieu ai cauzit en lei cui amarai,

E vos avetz cauzit, si com ieu sai,

En un tal drut queus fara decazer;

Et eu en tal que vol pretz mantener,

En cui jovens s'apropch' e de vos vai:

Si tot non es de loc tan paratjos,

Il es assatz e plus bell' e plus pros.

E si'l jurars e'l plevirs de nos dos

Pot al partir de l'amor dan tener,

Anen nos en é las mas d'un prever,

Absolvetz mi et ieu vos solverai;

E pois poirem quascus d'aissi en lai

Plus lialmen bon'amor mantener.

E s'anc vos fis ren queus deja doler,

Perdonas me, qu'ieu vos perdonarai

Alegramen; qu'estiers non es ja bos,

Si de bon cor non es fatz lo perdos.

Mala domna trop mi fezes zelos

No fessi re mas al vostre plazer;

Quar hom zelos non a sen ni saber,

Ni res no sab lo mal que zelos trai,

Ni re zelos no sab que ditz ni fai

Ni nul zelos no pot en loc caber,

Ni patz non a zelos mati ni ser;

Per que vos deu plazer quan m'en partrai,

Qu'assatz val mais à celui qu'es lebros:

Qu'adoncs sivals no son tuit enoios.

Fe que m devetz, si tot soi adiros,

Prendatz comiat de mi, q'eu'l pren de vos.

Guillem de Balaun ou Balazuc. Mon vers mou mercejan ves vos,

Guillem de Balaun ou Balazuc.

2701.

Guillem de Balaun fo un gentils castellas de ves Monpeslier. 

Adretz cavayers fon e bon trobaires. Et enamoret se d'una gentil domna de Gavaudan, que avia nom madona Guilhalma de Javiac. Mot l'amet e la servi; e la dona l'amet tan que l dis e l fes so qu'el volc endreg d'amor.

Guilhem si avia un companho, per nom Peire de Barjac, valens et pros; et amava él castel una avinen dona, na Ivernenca, la cal tenia P. de Barjac per cavayer, e n'avia tot son plazer. Abdui eron drutz d'esta dona. Et avenc se qu'en Peire se corrosset ab sa dona, qu'ela li det comiat, don el s'en anet dolens. En Guilhem si l cofortet mot que no s desesperes, qu'el ne faria patz tantost cant tornaria à Javiac. Mot li fons grans lo termes ans que fos tornatz; e tantost cant en Guilhem fon tornatz, el fetz patz d'en Peire e de sa dona, don Peire fo alegres pus que quan la conques de premier. Don el mezeis o dis à 'n Guilhem. En Guilhem dis qu'el o volia esproar, si'l joi de recobrar s'amia era tan grans co'l premier. E fetz se fort iratz à sa dona, et estet se que no l mandet messatje ni salutz, ni no volc esser en tota l'encontrada d'ela. Don ela li mandet messatje ab letras amorosas, com ela s meravilhava com estava tan de lieys vezer. Et el com fols amans no volc auzir las letras, e fes donar comiat al messatje vilanamen. El messatje tornet s'en dolens comtar à sa dona com era estatz. La dona fon irada, et adordenet ab un cavayer del castel que sabia lo fag, que s'en anes à'n Guilhem de Balaun, e que saupes per que era aisi iratz contra ela; e si avia fag res encontra luy que el s'en degues venjar, que ela 'n venria ad esmendamen à son voler.

Lo cavayer s'en anet à'n Guilhem e fon mal recebutz. E can lo cavayer l'ac dic son voler, el dis que no l dissera la occayzo, car el sabia be qu'ela era tals, qu'el non volia esmenda ni l devia perdonar. Lo cavayer s'en tornet e dis o à la dona. Adonc ela l mes en soan del tot; et enaysi ela estet un gran temps.

E can venc jorn, en Guilhem se pensec com per son fol sen el perdia gran joy: montet en caval e venc s'en à Javiac; et alberget ab un borzes, que no volc venir en cort. Ma dona Guilhalma saup qu'el era en vila, e can venc la nueg, que las gens foron colcadas, et ela issi del castel ab una dona et una donzela e venc à l'alberc. E se fe mostrar on jazia Guilhem de Balaun, e venc s'en al lieg on jazia; e mes se de ginolh denan el e bayzet sa benda per lui bayzar, e querec li perdo del tort que non l'avia: et el non la volc recebre ni perdonar. E la dona parti se de lui ab cor que mais no l parles; e penedet se de so que avia fag. Et el remas iratz car avia fach tal folor; et levet se mati e venc s'en al castel, e dis que parlar volia ab ma dona Guilhalma per querre perdo. Madona Guilhalma cant o auzi fes li donar comiat, e dis no l veiria, e fes lo gitar del castel vilanamens. En Guilhem anet s'en trist e ploran; e la dona remas dolenta e penedens de la humilitat c'avia facha. Et enaysi estec lonc temps que la dona no lo volc vezer ni auzir; dont el adonc fes lo vers desesperat que di:

Mon vers mou mercejan.

En B. d'Anduza, qu'era'l melhor hom de la encontrada, saup lo fag d'en Guilhem e de la dona; e montet à caval e venc s'en à Balaun. E parlet ab en Guilhem, e dis li co s podia far qu'el ages tant estat de vezer sa dona. En Guilhem contet li tot lo fag e la foldat que li era venguda. En B. cant auzi la razo tenc s'o à gran isquern, e dis li qu'el ne faria patz: don el n'ac mot gran gaug, cant auzi que s'en volia entrametre.

En B. s'en parti e venc s'en à Javiac, e contet tota la razon d'en G. à la dona, e com el era mot trist e dolent per la folia que s'avia pensada: e comtet li tot l'esquern, com o fes per esproansa. E la dona respos que mot s'en tenia per falhida, car tant s'era humiliada ad el. En B. li dis, que per so li era à perdonar enans, per lo dreg que era sieu el tort d'en G. 

E preget la'n aytan caramen co poc ni saup, que per dieu e per merce li perdones; e qu'ela'n prezes venjansa can li plazeria. E la dona l respos que pus el o volia ela l perdonaria, enaisi que per la falha qu'el fag avia, que se traisses la ongla del det menor; e qu'el la y degues portar ab un cantar, reprenen se de la folia c'avia facha.

En B. d'Anduza, quan vi que alres far non podia, pres comiat; et anet s'en a'n G. e dis li la resposta de la dona. En G. quant auzi que perdon trobaria fo molt alegres; e rendet li gracias, car tan li avia acabat ab sa dona. Tantost mandet per un maestre, e fes se traire la ungla ab gran dolor qu'en sofri; e fes son vers e venc s'en à Javiac, el e mo senher B. Ma dona Guilhalma issi lor encontra: en G. gitet se de ginolhs denant ela, queren merce e perdo, e prezentet li la ongla. Ela fon piatoza e levet lo sus; et intreron se totz tres en una cambra, et aqui ela lo perdonet baysan et abrassan. E retrais li son cantar et ela l'entendet alegramen. 

E pueys ameron se pus fort trop que non avian fag enans.

2701, 7225-6.

Mon vers mou mercejan ves vos,

No per so, domna, qu'entenda

Que ja merce de meus prenda:

Tant es lo forfaitz cabalos,

Per qu'ieu si be m destrui no m planh.

Mas pos mi meteis ai perdut

E vos, que m faitz plus esperdut,

Si m pert mas paraulas be s tanh.

Tant es mos afars perilhos,

Qu'ieu no sai co m'i emprenda;

Que pregars qu'om no l'entenda 

Val pauc ad home sofrachos, 

Per qu'es dregz que malastruc s lanh.

E pois per home recrezut

Aug dir qu'anc dieus no fetz virtut:

Per qu'ieu prec ses cug de gazanh.

Be sai fallitz soi ad estros

E noi a mas qu'om me penda, 

Qu'ieu no soi qu'en dreg contenda: 

Pero be sai si'l premier fos, 

Dretz fora no m cregues companh. 

Mas si'l forfaitz fosson mort tut, 

Qu'om non agues merces avut, 

Mort e delit en foran manh.

Mala vengues aquel sazos,

Que mot crei que car lo m venda; 

Et està ben qu'ieu aprenda 

En qual guiza viu besonhos, 

Quar ges tan ric joi no m'atanh. 

Mas no sai co m'es avengut, 

Las! non avia 'l ben saubut. 

Aras lo sai, per que m complanh.

Domna, si ma mort vos es pros,

Ja non er qu'ieu me defenda

Ni no m'auretz major renda;

Et a'n pro qui es poderos

De celui vas qui a cor gran,

Et a l'ops que merce l'ajut;

Quar non es à merce tengut

Aisso en que'l poder sofranh.

Ai! las, ta mala fui iros

Quan baisset vas me sa benda,

E m quis francamen esmenda

De so don degr' esser cochos;

E m fi pregar d'avol barganh,

Don m'a mil vetz lo cor dolgut:

Qu'era m tengr' ieu per errebut

Si m saludes com un estranh.

Domna, si tot no m tanh perdos,

No laissarai nous mi renda

E mas mas no vos estenda,

Que merces vens los mals e'ls bos.

E si pietatz tan vos franh,

So qu'ieu non esper ni no cut,

Que m perdonetz tort conogut,

Si mais cai no m levetz del fanh.