Peire de Barjac.
penre comjat per tos temps a lezer,
e grans merces, quar anc denhetz voler
qu'eu mi tengues per vostr' amor plus gai,
tan can vos plac; mas aras, pos no us plai,
es be razos que, si voletz aver
drut d'autra part que us posca mais valer,
qu'eu l vos autrei: ja peitz no us en volrai,
ans n'aurem pois bon solatz entre nos
et estarem com si anc res non fos.
Mas vos cuidatz, car eu sui aziros,
aissi com soill, non o diga de ver;
mas derenan vos o farai parer:
qu'eu ai chauzit en leis cui amarai,
e vos avetz chauzit, qu'eu ben o sai,
en un tal drut que us fara dechazer,
et eu en tal que vol pretz mantener,
on s'apropcha jovens, e de vos vai.
Sitot no s'es de loc tan paratjos,
sivals el' es plus bela e plus pros.
Pero be us dic, totz temps serai clamos
de vostr' afar, qu'aisso n volh retener,
qu'eu non o posc gitar a nonchaler;
enans aissi del tot vos servirai,
fors que ja mais vostres drutz no serai,
si be m devetz encaras lo jazer
que m promezetz can n'auriatz lezer;
e non o dic per so car sonh no n ai,
ans s'eu n'agues estat tan poderos,
tal ora vi qu'eu fora plus joios.
E si l jurars ni l plevirs de nos dos
pot al partir de l'amor dan tener,
metam nos ams en las mas d'un prever,
e solvetz mi, et eu vos solverai;
e pois poirem cascus d'aqui en lai
plus leialmen bon' amor mantener:
e s'anc fezetz re que m deia doler,
e us en perdo tot so que m'en escai
tot francamen; qu'a mi non er ja bos,
si de bon cor non es faitz lo perdos.
Mala domna, tro que m fezetz gilos,
non amei re contra l vostre plazer;
mas anc gilos non ac sen ni saber,
ni ren no sap gilos que s ditz ni s fai,
ni hom no sap los mals que gilos trai,
ni patz non a gilos mati ni ser
ni en nulh loc gilos no pot caber,
per que vos deu plazer car m'en partrai;
qu'assatz val melhs a celui qu'es lebros,
que ges sivals tug no l son enoios.
Fe que m devetz, si be us sui aziros,
prendetz comjat de mi qu'eu l pren de vos.
.jpg "Pierre de Barjac. Peire de Barjac.")
