Guiraut de Calanso.
A leis cui am de cor e de saber,
domn' e seignor et amic, volrai dir
en ma chanso, si l platz qu'o deign' auzir,
del menor tertz d'amor son gran poder,
non sec razo, mas plana voluntat,
ni ja nuil temps no i aura dreit jutjat.
Tant es subtils qu'om non la pot vezer,
e corr tan tost que res no il pot fugir,
e fer tan dreg que res no il pot gandir,
ab dart d'acier, don fai colp de plazer,
on non ten pro ausbercs fortz ni espes,
si lansa dreit, e pois trai demanes
saietas d'aur ab son arc estezat,
pois lans' un dart de plom gent afilat.
Corona d'aur porta per son dever,
e no ve re; mas lai on vol ferir
no faill nuill temps, tan gen se'n sap aizir;
e vola leu, e fai si mout temer,
e nais d'azaut que s'es ab joi empres,
e quan fai mal, sembla que sia bes,
e viu de gaug e s defen e s combat,
e no i garda paratge ni rictat.
En son palais, on ela vai jazer,
a cinc portals, e qui ls dos pot obrir
leu passa ls tres, mas no n pot leu partir,
et ab gaug viu cel qu'i pot remaner;
e poia i hom per quatre gras mout les,
mas no i intra vilans ni mal apres,
c'ab los fals son el barri albergat
que ten del mon plus de l'una meitat.
Fors al peiro, on ela s vai sezer,
a un taulier tal co us sai devezir,
que negus hom no i sap nuill joc legir;
las figuras no i trop a son voler
et a i mil poinz, mas gart que no i ades
hom malazautz, de lait jogar mespres,
quar li point son de veire trasgitat,
e qui n fraing un, pert son joc envidat.
Aitan quan mars ni terra pot tener
ni soleils par, se fai a totz servir;
los us fai rics e ls autres fai languir,
los us ten bas e ls autres fai valer,
pois estrai leu so que gent a promes;
e vai nuda, mas quan d'un pauc d'orfres
que porta ceing; e tuit sei parentat
naisson d'un foc de que son assemblat.
Al segon tertz taing franquez' e merces,
e l sobeiras es de tan gran rictat
que sobre l cel eissaussa son regnat.
A Monpeslier, a'n Guillem lo marques
t'en vai, chanso; fai l'auzir de bon grat
qu'en lui a pretz e valor e rictat.
