51. Raimon de Tors. Amics Gauselm, si annatz en Toscana,

51. Raimon de Tors.

Dal canz. M.

Amics Gauselm, si annatz en Toscana, 

aturatz vos en la ciutat certana

dels Florentis c' om apella Florensa;

quar es mantenensa de vera valensa,

e meilhura e gensa ioi e chant e amor

ab francha captenensa e ab nobla ricor

d'onor 

vera ses failhensa, per q' ab seinhal de flor

secor

sos pres ses temensa e sa valen valor. 

Si lai voles aver en sovinensa

los valenz faz c' om sol far en Proensa,

d' en Barnabo acaptatz s' amistansa;

qar non l' a engansa de valor ni d'onransa, 

tan gen lai s' enansa denan los plus valenz, 

q' en Proensa e en Fransa seria avinentz

plazentz

e larcs ses duptansa e pros e conoissenz,

qar senz

mezura e bobansa e sos captenementz.

E si voles anar ab alegransa,

lo viage ajas en remenbransa

qe fes Tedals al rics cui Dieus manteinha;

qar el mon non reinha uns a cui mais deveinha

qe de tan lueinh vieinha a penre joi e chan,

ben i fos entreseinha de valen cors prezan,

qe man

son cui amor deinha qe tan ricor non han

jogan,

sol qeus en soveinha, ni res e deportan.

Prec vos qeus soveinha e qeus estei denan 

chantan

amors, qeus manteinha ab solaz e chan;

qe dan

no crei nus hom preinha pueis d'aqella ora enan.

anblan

roncin, qeus sosteinha, aures bai o ferran

ab tan

d' arnes qol coveinha, d'en Bernabo prezan;

Pueis, qant aures qeus coveinha, trazes vostre prez enan.

LVII, Tant m' es l' onratz, verays ressos plazens,

LVII.

Tant m' es l' onratz, verays ressos plazens, 

Ples de lauzor del senhor N Amalric,

Del mieu senhor, filh premier N Aymeric 

De Narbona, que mos cors n' es jauzens, 

Qu' entr' els Toscas s' es tan gent capdellatz 

Qu' els amicx a de la gleysa honratz,

E 'ls enemicx mortz e vencutz per guerra.

Mout es auutz belhs sos comensamens

De nobles faitz ab sen et ab cor ric

Que son semblan a l' aut dever antic,

Qu' el essenha d' onor esser manens

De Narbona, don sia dieus lauzatz;

Pero per Foys li ven de l' autre latz

Devers que s deu tener al sojorn guerra.

L' onratz Comus de Florensa valens

Ac bon cosselh, quan al rey lo queric

Per capitani, quar sey enemic

Ne son al bas, don es sieus l' onramens,

Per luy, don deu per tot esser lauzatz

E car tengutz, ab tot que aia patz,

Quar si honran, l' a gent honrat de guerra.

Si honran a honratz sos benvolens,

E Narbona e 'l bon rey que seguic,

E Foys e selh qu' en partida 'l noyric,

Quar anc no 'l fes nesciejar jovens,

Ans es ab sen curos et atempratz,

Don es per totz sos enemicx dubtatz

Tant que lur es sos ressos pieitz de guerra.

De dieu li ven sos bos captenemens,

Per qu' ieu li prec e li cosselh e 'l dic

Qu' el retenha, quon senhor ad amic,

Ab humil cor de totz vils faitz temens,

E creysser l' a en totas sas bontatz,

Si s' afortis contra vils voluntatz,

Quar aissi vens hom espirital guerra.

Lo senhor prec N Amalric qu' enansatz

Sia per luy sos pretz gent comensatz,

En totz sos faitz, aissi quon es per guerra.

Giraut Riquier.