Ms. de Modène, fol. 196d (D.), Ms. de Paris, fr. 12472, fol. 61 (f).
Cf. Mussafia, Del codice Estense di rime provenzali, Vienna 1867, p. 445 s. - Meyer, Recueil d'anciens textes, Paris 1877, I, 70 (Me.).
Per fin' amor m'esjauzira
tant quant fai chaut ni s'esfrezis.
Toz tems serai vas lei aclis,
mas non posc saber enquera
si poirai ab joi remaner
e m voldra per seu retener
cella cui mos cors dezira.
Seignors e dompnas guerpira,
s'a lei plagues qu'eu li servis.
E qui m diria m'en partis,
faria m morir des era,
qu'en autra non ai mon esper
noit ni jorn ni matin ni ser,
ni d'als mos cors no consira.
Ges tant leu no l'enquesira
s'eu sabes cant greu s'afranquis.
Anc res no fo, no s'umelis
vas amor; mas ill n'es fera,
e domna non pot ren valer
per riquesa ni per poder,
se jois d'amor no l'aspira.
Ja de sos pes no m partira,
si l plagues ni m'o consentis,
e sivals d'aitant m'enrequis
que disses que ma domna era,
e del plus fos al seu plazer,
de la menzonja o del ver,
c'ab sol son dig m'enrequira.
Entre joi remaing et ira
ades quant de leis mi partis;
qu'anc pois no la vi qu'ela m dis
que, si l'ames, ill m'amera.
Al re no sai del seu voler;
mas ben pot ma domna saber
qu'eu morrai si ganre m tira.
Genser domn'el mon no s mira,
bell' e blancha plus c'us hermis,
plus fresca que rosa ne lis.
Ren als no m'en desespera.
Dieus, si poirai l'ora veder
qu'eu posca pres de lei jazer!
Eu non, quar vas mi no s vira.
Toz mos talens m'ademplira
ma domna, sol d'un bais m'aizis,
qu'en guerreiera mos vezis
e fora larcs e donera
e m fera grazir e temer
e mos enemics bas chader
e tengra l meu e l garnira.
E pot ben ma domna saber
que ja nulz hom de mon poder
de meillor cor no ill servira.
E si m fezes tant de plazer
que m laisses pres de si jaser,
