Table alphabétique, Troubadours, pièces (FIN)

Table alphabétique Des Troubadours, desquels on trouve les vies ou des pièces dans ce Recueil.

(N. E. Les numéros de pièces et les pages sont omis.) 

A

ADEMAR ou AYMAR (Guillem)

AIMERICS de Sarlat

ALBERTETZ

ALBERTZ marques

ALEGRET

ALVERNHE (Peire d')

AMIELS (Gaubert)

ANDUZA (Clara d')

APCHIER (Garis d')

ARAGON (Lo reis n Amfos d')

ARAGON (Lo reis en Peire d')

AURENGA (Raimbaut d')

AURIAC (Bernat d')

B

Bacalairia (n Uc de la)

BALAUN (Guillem de)

BARJAC (Peire de)

BARJOLS (Elias de)

BAUS (Guillem del)

BELENOI (Aimeric de)

BERBEZILS (Richartz de)

BERGUEDAN (Guillems de)

BERMON Ricas novas (Peire)

BERNAT

BIERRIS de Romans (Na)

BLACASSET

BLACATZ

BLAI ou BRAU (Pere de)

BONELS (Jordan de)

BORN (Bertran de)

BORNEILL (Guirautz de)

BOSSINHAC (Peire de)

BREMONZ lo tortz (Peire)

BROQUEIRA (Hameus de la)

BRUNET (n Uc)

BRUS (Garins lo)

C

CABESTANH (Guillem de)

CADENET

CAILLA (Albertetz)

CAIRELS (Elias)

CALANSO (Guirautz de)

CALBO (Bonifaci)

CAPDUELH (Pos de)

CAPNION (n'Iseus de)

CARBONEL (Bertran)

CARDINAL (Peire)

CASTELLANA (Bonifaci de)

CASTELLOZA (Na)

CASTELNOU (Almucs de)

CASTELNOU (Raimon de)

CAVAILLON (Gui de)

CAZALS (Guillem-Peire de)

CERCAMONS

CIGALA (Lanfranc)

CORBIAN (Peire de)

D

DALFINS d'Alvernhe (Lo)

DANIEL (Arnaut)

DIA (la comtessa de)

DURAND (Peire)

DURFORT (Raimons de)

E

ESCOLA (Saill d'). 

ESPANHA (Guiraut d')

ESTEVE (Johan)

F

FABRE d'Uzes (Pons) 

FAIDIT (Gaucelm)

FIGUIEIRA (Guillem)

FOIS (lo coms de)

FOISSAN (lo morgue de)

FOLQUET de Lunel 

FOLQUET de Marselha

FOLQUET de Romans

FONSALADA (Elias)

G

GARDIA (Pons de la)

GAUCELM (Raimon)

GAVAUDA

GUILLEM (Peire)

L

LAFON (Bernat de)

LAMANON (Bertrans de)

M

MAENSAC (Peire de)

MAGRET (Guillem)

MARCABRUS

MARUELH (Arnaut de)

MILON (Peire)

MIRAVAL (Raimon de)

MONCUC (Bernat Arnaut de)

MONS (Nat de)

MONTANHAGOL (Guillem)

MONTAUDO (lo monges de)

N

NEGRES (Azemar lo)

NIELLA (Ogier)

O

OGIERS

ORTAFAS (Pons d')

P

PALAZIS

PALAZOL (Berrengiers de)

PEGULHA (Aimeric de)

PEIROLS

PEITIEUS (lo coms de)

PENA (n Uc de)

PERDIGOS

PISTOLETA

PLAGES (Arnaut)

POJET (Bertrans del)

PONS (Rainautz e Jaufre de)

PORCAIRAGUES (n'Alazais de).

PRADAS (Deude de).

PROENSA (la comtessa de) 

PROENSA (lo coms de)

PUEGSIBOT (Gaubert de)

R

RAIMONS (Peire)

RAINOLS d'At (Guillem)

RICHART (lo rei)

RIQUIER (Guiraut)

ROS (Guiraudo lo)

ROTGIER (Peire)

RUDEL (Jaufre)

S

SAINSIR

SALAINGNAC (Girautz de)

SALAS (Raimon de)

SALVATGE (Peire)

SANT ANTONI (lo vescoms de)

SANT CIRC (n Uc de)

SANT LEIDIER (Gausseran de)

SANT LEIDIER (Guillem de).

SAVARIC

SERVERI de Girona

SORDELS

T

TARASCON (Richautz de)

TIBORS (Na)

TOLOZA (lo coms de)

TOMIERS

TOR (Guillems de la)

U

UISSEL (Gui d')

V

VALERIA (Peire de)

VAQUEIRAS (Raimbaud de)

VENTADORN (Bernat de)

VENTADORN (Na Maria de)

VIDAL (Peire)

VILAR (Peire del)

Z

ZORZI (Bertolome)

Table alphabétique des pièces contenues dans ce recueil.

Ab joi et ab joven m'apais.

Ab l'alen tir vas me l'aire.

Ab tan de sen com dieus m'a dat.

A cantar m'er de so qu'ieu no volria. 

A greu pot hom conoisser en la mar. 

Alegrar me volgr' en cantan.

Amics, ab greu cossirier.

Amic sius trobes avinen.

Amics n Arnaut, cent domnas d'aut paratge.

Amors, be m platz e sap bo.

Amors me fai cantar et esbaudir.

Anc ieu non l'aic, mais ella m'a.

A penas vauc en loc qu'om no m deman.

Ar ab la forsa del frei.

Ara paresson ll'aubre sec.

Aras pos vei mon ben astruc.

Ar em al freg temps vengut.

A Sant Pos de Tomeiras.

Assatz sai d'amor ben parlar.

Atressi com Persavaus.

Aux chansons j'avais dit adieu.

Bel m'es quan d'armatz vei refrim.

Bel mes qu'ieu cant e condei.

Bels dous amics ben vos posc en ver dir.

Bels-gazanhs, s'à vos plazia.

Be m'a lonc temps menat à guiza d'aura.

Be m pac d'ivern e d'estiu.

Be m platz lo dous temps de pascor.

Ben aia'l messatgiers.

Ben a tengut dreg viatge.

Be tenh per fol e per musart.

Be volgra midons saubes.

Breu vers, per tal que mens i poing.

Cansoneta leu e plana.

Car' amiga douss' e franca.

Cossiros cant e planh e plor.

Cuendas razos e novelas plazens.

Dalfin, jeus voil déresnier.

D'Astarac venia.

De cantar m'era laissatz.

De jost' als breus jorns éls loncs sers.

Desemparatz ses companho.

De sirventes aurai gran ren perdutz.

Domna à vos me coman.

Domna des angels regina.

Domna, ieu vos sui messatgiers.

Domna n'Almucs sious plagues.

Domna n'Iseus, s'ieu saubes.

Domna per vos estauc en greu tormen.

Domna, pos de mi nous cal.

Domna, tan vos ai pregada.

Drogman senher, s'ieu agues bon destrier.

D'un sirventes m'es pres talens.

Él dous temps quan la flor s'espan.

Él mon non a neguna creatura.

Él temps d'estiu quan par la flor él bruelh.

Enaissi m pren com fai al pescador.

En est sonet cuend' e leri.

En est son fas cansoneta novela.

En greu esmai et en greu pessamen.

En Gui à tort me menassatz.

En la mar major son e d'estiu e d'ivern.

En loc de verjans floritz.

En Raïmbaut ses saben.

Entr' amor e pessamen.

Entre dos volers soi pensius.

En un sonet gai e leugier.

Era m requier sa costum' e son us.

Eras quan vei verdejar.

Er quan li rozier.

Escotatz, mas no sai que s'es.

Escur prim cantar e sotil.

Esparviers et austors.

Estat ai en greu cossirier.

Estat aurai de cantar.

Falsetatz e desmezura.

Farai un vers de dretz nien.

Fin joi me don' alegransa.

Fis e leials e senes totz engans.

Gaia pastorella.

Gaucelm Faiditz, eu vos deman.

Gaucelm, tres jocs enamoratz.

Gausselm, no m posc estener.

Ges si tot estan suau.

Guerr' e trebalhs e brega m platz.

Gui d'Uisel, be m peza de vos.

Huei mais noi conosc razo.

Ja de cantar no degr'aver talan.

Ja d'ogan pel temps florit.

La franca captenensa.

L'autre dia per un mati.

L'autre jorn m'anava.

L'autre jorn m'en pogei al cel.

L'autre jorn per aventura.

L'autrier de just' una via.

L'autrier él gai temps de pascor.

L'autrier fui en paradis.

L'autrier just' una sebissa.

L'autrier lonc un bos folhos.

L'autrier lo primier jorn d'aost.

L'autrier quan mos cors sentia.

L'autrier trobei la bergeira d'antan.

L'autrier trobei la bergeira, que.

La valors es grans e l'onors.

Leu cansoneta d'entendre.

Lo clar temps vei brunezir.

Locs es qu'om se deu alegrar.

Lo dos cossire.

Longamen ai atenduda.

Lo rossignolet salvatge.

Maîtres, maîtresses de chansons.

Mandat m'es que no m recreja.

Manta gens me mal razona.

Manta gent fas meravelhar.

Mantas vetz soi enqueritz.

Mas qui à flor se vol mesclar.

Mentre que'l talans mi cocha.

Mon cor s'alegr' e s'esjau.

Mon vers mou mercejan ves vos.

Mot eran dos miei cossir.

Mout avetz fag long estatge.

Mout es bona terr' Espanha.

Mout fai sobreira folia.

Na Maria, pretz e fina valors. 

Neu ni gel, ni plueja ni fanh. 

Noitz e jorn sui en pessamen. 

No m'agrad' iverns ni pascors. 

No m laissarai per paor. 

Non alegra cant ni critz.

Non es meravelha s'ieu can.

No posc sufrir qu'à la dolor.

Ogan al freg que fazia.

Peire Rotgier, à trassaillir. 

Peire Salvatg', en greu pessar. 

Per amor e per solatz.

Per dieu, Gui, mais amaria. 

Per espassar l'ira e la dolor.

Per fols tenc Polhes e Lombartz.

Per grazir la bon' estrena.

Per joi que d'amor m'avegna.

Per lo mon fan l'us dels autres rancura. 

Per mantas guizas m'es datz.

Per vos bella douss' amia.

Planher vol en Blacatz en aquest leugier so.

Pos am fin' amor m'acort.

Pos cai la folha del garric.

Pos lo gai temps de pascor.

Pos ma boca parla sens.

Pos tan me fors' amors que m'a fag entremetre.

Pos tornat soi en Proensa.

Pro ai del cant ensenhadors.

Quan cug cantar ieu planh e plor.

Quan la douss' aura venta.

Quan l'aura doussa s'amarzis.

Quan lo dous temps d'abril.

Quant amors trobet partit.

Quant hom regna vas cellui falsamen.

Quan vei far bo fag plazentier.

Qui ha talan de donar.

Qui per nesci cuidar.

Qui ve gran maleza faire.

Quora que m fezes doler.

Razos es qu'ieu m'esbaudei.

Reis, per que de mi cantatz.

Rics hom que greu ditz vertatz e leu men.

Rossinhol, en son repaire.

S'abrils e foillas e flors.

S'ara no poja mos cans.

Sendatz vermelhs, endis e ros.

Senheiras e cavals armatz.

Senh' en Raïmbaut, per vezer.

Senher coms, saber volria.

Senher, reis qu'enamoratz par.

S'es cantars ben entendutz.

Si ai perdut mon saber.

Si be m partetz, mala domna, de vos.

Si co'l paubre quan jatz él ric ostal.

S'ieu agues tan de saber e de sen.

S'ieu en cantar soven.

S'ieu en pascor no cantava.

S'ieu sabi' aver guizardo.

Si m vai ben quez ieu non envei.

S'ira d'amors tengues amic gauden.

Si tot l'aura s'es amara.

Tals cuja ben aver filh de s'espoza.

Tan mou de corteza razo.

Tan rics clergues vei trasgitar.

Tan son valen nostre vezi.

Tant ai mon cor plen de joia.

Tant ai sufert longamen greu afan.

Tant an ben ditz del marques.

Tartarassa ni voutor.

Tot francamen, domna, veing denan vos.

Trob be m'estera si s tolgues.

Una ciutatz fo, no sai quals.

Una grans amors corals.

Un estribot farai quez er mot maïstratz.

Us cavaliers si jazia.

Us novels pessamens m'estai.

Vai, Hugonet ses bistensa.

Vos que m semblatz dels corals amadors.

Fin du Parnasse occitanien.

Guirautz de Borneill. Alegrar me volgr' en cantan

Guirautz de Borneill.

7225, 7614, 7698.

Guirautz de Borneill si fo de Limozi, de l'encontrada d'Esidueill, d'un ric castel del visconte de Lemoges. E fo hom de bas afar, mas savis hom de letras e de sen natural. E fo meiller trobaire que negus d'aquels qu'eron estat denan ni foron apres lui; per que fo apellatz maestre dels trobadors, et es ancar per totz aquels que ben entendon subtils ditz ni ben pauzatz d'amor e de sen. Fort fo honratz per los valens homes e per los entendens, e per las dompnas qu'entendian los sieus maestrals ditz de las soas cansos. E la soa vida si era aitals que tot l'ivern estava à scola et aprendia, e tota la estatz anava per cortz e menava ab se dos cantadors que cantavan las soas cansos. Non vol mais muiller; e tot so qu'el gasaingnava dava à sos paubres parens et à la eglesia de la vila on el nasquet; la qual glesia avia nom et a encaras Saint Gervasi.

2701, 3794, 7225-6, 7614, M.

Alegrar me volgr' en cantan

O cantar per que m'alegres;

E si d'un sol pauc m'ajudes

Mon bel senher, ai ben talan,

Que ja per nauza ni per dan

Qui m creises, no m desconortes:

Qu'estiers no m fora frutz ni flors,

Ni gen pascors,

Joi ni solatz.

Mas valha m cauzimen, si l platz,

Que m'ajut bona sospeissos

En un vers far que sia bos.

E pero ben a mais d'un an

Qu'om me pregava qu'ieu cantes;

E fora bon que m n'esforses,

Si m pogues pagar del mazan.

Mas volh que'l cor s'acord' al can,

E que la boca rend'apres

Dels bels digz e dels faitz majors

Gratz e lauzors:

Quar si cantatz

De tal cui plass' eus sofr'en patz

Vostres precs e vostras cansos,

Pro von escai rics gazardos.

E seraus pretz, à mon semblan,

Si vostre cant meillur' ades;

E si ja vis que meillures

Lo mieus, qo fera son coman

Tostemps mais! E si ja d'afan

Qu'en agues trait me corailles,

Tostemps mi defendes amors

De sas honors;

E fos mostratz

Coma fol desaventuratz,

De joi dezamparatz e blos,

A cui no tanh honors ni pros.

Dieus! co m'er anatz regardan

Si ja vira que m'agrades!

E no ges per so qu'ieu cujes

Qu'en nulla re m'abelis tan.

Pro m'ave meils que no deman:

E cum, no m'o diras? fols es:

Ja sabs tu d'aquestz amadors

Leus parladors,

Que lor foudatz,

Quan lor afar s'es aviatz,

Lor tol plazer e ditz e dos;

E ls mena tristz e cossiros.

Per qu'ieu, que no m'azaut d'engan,

No volgra qu'autre m'ensenhes

So que mon joi me destorbes,

Ans agr'ops qu'empares enan.

E per so m vau sols alegran

E cossir com ja nʼatendes

Cosselh d'amics, quar de senhors

M'es lor acors

Sobretarzatz;

E lonh me de mos plus privatz,

Tan dubti que locs e sazos

M'embles qualque mot perilhos.

E no ges per so qu'ieu soan

Lor solatz, e mout no prezes

S'auzes dir, e que demandes

Aissels que venon ni que van,

Tals novas en qu'anes mesclan

So que negus non entendes.

Que per us prims entendedors

Me tol paors

E frevoltatz,

Quar no cug esser ben amatz,

Mans gabs, mans ditz, mans fagz ginhos

Per que fora bautz e joios.

Er diran tug qu'ieu dis ogan,

Qu'à tot home qui ben ames

Agr'ops un bon amic trobes

On de re no s'anes dubtan;

Quar us no sab de que ni quan

Li er ops qu'om lo cosselhes.

Per qu'ieu dic qu'als fis amadors

Es valedors

Cosselh privatz;

Quar greus er, si nous en gardatz,

Que l'un dels totz tres companhos

Nous sia soven enoios.

Quascus si gart si com ieu fatz

Tan be, Sobre-totz, que neis vos

No sabetz quals es ma rasos.

Ben leu m'an lai part los glotos,

O sai e lai, o sus o jos.

2701, 7226.

L'autrier lo primier jorn d'aost

Vinc en Proensa part Alest;

E cavalcav' ab semblan mest,

Qu'ira m tenia sobrieira,

Quant auzi d'una bergieira;

E fon just' un plaissaditz.

E quar fo suau lo critz

Don retendi la ribieira,

Vau m'en lai tot esbaïtz

On amassava favieira.

E si tot s'avia pel brost

E strecha'l gonella que vest,

Ans que li demandes: don est?

Ela m tenc à l'estrubieira;

Pois dis me: per qual dressieira

Vengues ni don es issitz?

Ja m sembla sias marritz.

No m'aiatz per trop parlieira,

Que quar es sols escaritz

Ai ben drech que vos enquieira.

Toza, beus dirai, quan que cost,

Pos tan gen m'en avetz enquist, 

Quals aventura m mena trist:

De bon' ami' ai nescieira

Que fos fin'e vertadieira;

Qu'eras me soi departitz

D'una falsa betairitz

Quem fa camiar ma carrieira;

E fora m capdels e guitz

Si no fos tan volatieira.

Senher franc, à qui que s'ajost

Ab ric'amor, non er, per crist,

Si tot sa pro auzit ni vist,

Ses clam; qu'una cavalieira

Vol be qu'om en fag o mieira

Sos bes e'l mal si oblitz;

Qu'ades, non es tan garnitz,

Tornaraus d'autra manieira;

Qu'estas autras camiairitz

Segon tost autra carrieira.

Toza, dieus volha que mi ost

Del mal que tanta pena m bast,

E perda'l dormir e'l depast.

Mas volh ab la senha nieira

No crezatz que plus vos quieira;

Per so quar gen m'aculhitz

Vos serai francs e cauzitz.

Quar cove queus en refieira

Merces quar nous enfugitz:

De lonh m'avizetz primieira.

Senher, be m'aura ops qu'en sost

Del fag, qu'enqueras l'oc non tast;

Que'l cors ai pauc e de sen cast,

Si beus mi fas prezentieira:

Pois cug segon ma paubrieira

Que m sia datz bos maritz.

Mas quar tan pauc m'enqueritz

Farai d'aitan que laugieira,

Qu'ab fis sagramens plevitz

Auretz m'amistat entieira.

Toza, be'n fora gauzitz:

Mas tant es ferma'l razitz

Que mou de lai part Lobieira,

Que'l mal, pois s'er endormitz,

Ai paor que pieitz me fieira.

Senher ges non es arditz,

Quar de mal queus er fugitz

Temetz que pois vos enquieira.

Mas pos tan m'es abelitz

Sojornem en est' ombrieira.

Toza, n'Escaruenh' es guitz

De pretz, que m det companhieira

Cortez' e finʼamairitz;

Per que' l mal me fug à tieira. (per que 'l) 

Senher un pauc es fallitz,

Qu'eras d'autra companhieira

Parletz que fossetz aizitz,

Si tot ses plus ufanieira.

2701, 3794, 7225-6, 7614, M.

No posc sufrir qu'à la dolor

De ma den la lengua no vir,

E'l cant à la novela flor

L'an quan vei los ramels florir. (Lanquan)

Doussa votz pel boscatge

Aug d'auzeletz enamoratz;

E si tot m'estau apessatz

Ni pres de mal usatge,

Quan vei camps ni vergiers ni pratz 

Ieu m renovel e m'asolatz.

Qu'ieu no m'esfors d'autre labor

Mas de cantar e d'esjauzir.

Q'una noich sommiei en pascor

Tal somni que m fetz esbaudir,

Q'us esparviers ramatge

S'era sus é mon ponh pauzatz

E semblava s adomesjatz:

Anc no vis tan salvatge;

Mas pois fo maniers e privatz

E de bos gets apreizonatz.

Lo somnhe dis à mon senhor

Qu'à son amic lo deu hom dir;

Et enarret lo m'en amor,

E m dis no podia falhir,

Que de l'aussor paratge 

Conquerrai tal amigu' en patz,

Quan be m'en serai trebalhatz,

Quanc hom de mon linhatge

Ni d'outra ma valor assatz

Non amet tal ni fon amatz.

Eras n'ai vergonh' e paor,

E m'esvelh en plang e sospir;

E'l somi tenc à grand folor

E no crei que posc' avenir.

Pero de fat coratge

No volh partir un ric pessatz,

Orgolhos e desmezurats;

Qu'apres nostre passatge

Crei qu'el somni sia vertatz,

Aissi dreg co m fon enarratz.

E pois auziretz cantador 

E cansos anar e venir; 

Qu'eras que tenon sai onor,

M'aven un pauc plus enardir

D'enviar mo messatge

Que parte nostras amistatz,

Que sai n'es faita la mitatz

Mas de lai non tenc gatge:

Pero ja non er acabatz

Nul fatz tro sia comensatz.

Qu'ieu ai vist acomensar tor

D'una sola peir' à bastir,

E cada pauc pojav' aussor

Tro que la podi' om garnir.

Per qu'ieu prenc vassalatge

D'aitan, si vos m'o cosselhatz,

Que'l vers quant er ben asomiatz

Trametrai él viatge,

Si trob que loi porte viatz,

Ab que s deport e s don solatz.

E vos entendedors vejatz,

Que sabetz mon lengatge,

Quora que fezes motz serratz,

S'ara los ai ben esclairatz. 

E soi m'en pels prims esforsats,

Qu'entendan quals cansos ieu fatz.

2701, 3794, 7225-6, 7614, 7698, M.

S'ara no poja mos cans

No sai com jamais s'enans;

E si no m val dos aitans

Que far no solia,

Ben auras dregz lo m soans.

E per que? no m'o demans,

Qu'ieu no t'o diria.

E seras mi drogomans?

A cui? leis cui soi comans.

E com entendra tos mans?

Ja d'aquo no t sia, 

Que'ls ditz els fatz els semblans,

El nom el pretz el bobans

T'er guitz en la via.

E tu ja t fas conoissens?

Ieu, oc. E tu non entens

Qu'ieu fas motz ben aprendens

E ses maestria?

Si fauc be; mas totz es sens.

Per que? quar vol tota gens

Li port garentia. 

Quo'l sieu bel cors avinens

Es assazats e manens

De tots bos ensenhamens 

E de cortezia,

Ja n'auras tu malvolens

Quar en trop lauzar t'emprens.

E qui m graziria?

Seus enemics e guerriers

No t falliran volontiers:

Q'us enoios fols parliers

Trob'om quascun dia.

Fors qu'ieu no soi sobransiers

Mas si la'n blasmav' Ogiers

Ieu l'en combatria.

Que'l sieu laus es dreituriers,

El nom vers, el pretz entiers;

E si m'era vis estiers

Que'l sieu laus es dreituriers, 

El nom vers, el pretz entiers 

E si m'era vis estiers

No m n'entrametria:

Qu'anc fort no fui sovendiers 

De tals lauzars plazentiers,

Ni non o faria.

E tu que tanh sos lauzars?

Ja m'en forsa sobramars.

Mais t'en valria calars.

Be ditz gran folia;

Que, per dieu, sol lo parlars

M'adutz tals quals bos pensars,

Q'usquecs me valria.

E si tos ditz no les cars

No t'en volgras esser pars?

Eu, no per re; que'l cujars

M'ajud' e m'enbria

So m'es vis tots mos afars;

E val en mais mos cantars

Per aital paria.

E s'il bos reis dels Navars

M'o lauza, de mantz blasmars 

Gaire no m daria.

2701, 7226.

S'es cantars ben entendutz

Ei sofris pretz e valor;

Per qu'es lag de trobador,

Des que son cant er saubutz,

Qu'el eis en sia lauzaire:

Que be pareis al retraire

Si l n'escai blasmes o laus.

E bos pretz reconogutz

Dur' ades d'una color, 

Si'l senher guara com cor,

Qu'aissi sera leu vencutz.

E qui fort es rabinaire

No sab ni no s pot estraire

Qu'ans termini no repaus.

E bon' amistat de drutz, 

Qui la noiris ab temor, 

Fa bon frug e bona flor, 

Qu'à quascus n'escai salutz.

E nous aizinets gabaire,

Si a ren fatz fis amaire;

Ans cove francs e suaus.

Qu'ieu ai d'amadors vist mutz,

Pois si feron gabador:

Quan guerra sors entre lor,

Lo gabar es remazutz

Escarnitz. Sobregabaire

Dins e defors son repaire

A pejor perilh que naus.

Lo vers auzit e mogutz

Coma de bon trobador,

Pois revertis en error

Lo cant quant era saubutz:

Q'us se fazia clamaire

Dels digz don autr'era laire, 

Com fes la gralha del paus.

Rics savis descazegutz

Pois foron larc donador;

Quar per agrei de folor

Remania lor pretz nutz.

E cui sens non es guidaire

No sab ni pot à cap traire,

Ans par à la fin bertaus.

Et ieu que soi sà vengutz,

Bos reis, per vostra valor;

E noi mou à, contador

Mas del vers quant er saubutz

Ves lo vostr'entier vejaire:

Quar sai quens etz guitz e paire

De pretz e tenetz las claus.

Et creis vos ades vertutz,

Qui que s vir de dretz en caire;

E dieus si l platz laus esclaire,

Qu'ieus am servir e non aus.

Raimbaut de Vaqueiras. Domna, tan vos ai pregada,

Raimbaut de Vaqueiras.

Connu par plusieurs pièces dès 1170. Hist. génér. de Provence. T. II, p. 387.

2701, 7614, 7698.

Raimbaut de Vaqueiras fo filh d'un paubre cavayer de Proensa, del castel de Vaqueiras, que avia nom Peirors, qu'era tengutz per mar.
E Raimbaut se fes joglars, et estet longamen ab lo princeps d'Aurenca Guillem del Baus. Ben sabia cantar e far coplas e sirventes; e'l princeps d'Aurenca si l fes gran be e gran honor, e'l fe conoisser e prezar. E pueis se parti de lui, e anet se à Monferrat à messier lo marques Bonifasi, et estec en sa cort lonc temps. E crec de sen e de saber e d'armas; et enamoret se de la seror del marques, madomna Biatris, que fo molher d'en Enric del Carret, e trobet de lieis mantas bonas cansos. Et apelava la Bels cavayers; e fon crezut qu'ela li volgues ben per amor.

Ben aves entendut qui fo Raimbaut de Vaqueiras, ni com venc en honor, ni per qui. Mas si vos vueill dire que, quant lo marques l'ac fac cavayer, Raimbaut s'enamorec de madomna Beatris sa seror, e seror de madomna Azalais de Salutz. Mot l'amet e la desiret, gardan que no fos sauput; e mot la mes en pretz, e mains amics li gazanhet e maintas amigas. Et ela l fazia gran onor d'aculhir; et el moria de dezir e de temensa, quar non l'auzava pregar d'amor ni far semblan qu'el entendes en ella. Mas com hom destreg d'amor si l dis qu'el amava una domna de gran valor, et avia gran prevadeza ab ela, e non li auzava dir lo ben que l volia ni mostrar, ni pregar d'amor, tan temia sa gran valor. E preguet la per dieu que li des conselh, si l diria son cor ni sa voluntat, o si morria celan et aman. Aquela gentil domna, madomna Biatris, quant aiso auzi e conoc la bona voluntat d'en Raimbaut, e denan era ben aperceubuda qu'el moria languen deziran per ela, si la toquet piatat et amor; e dis: Raimbaut, be cove que totz fis amics, si ama una gentil domna, que aia temensa à mostrar s'amor. Mas ans qu'el mueira si l don cosselh que lo l diga, e que la prec que l prenga per servidor e per amic. Et assegur vos be que si ella es savia e corteza, que no s'o tendra en mal ni en desonor, ans lo'n prezara mai e l'en tenra per meillor home. Et à vos don coselh que à la domna que amas digatz vostre cor, e la voluntatz que vos li avetz; e pregatz la que vos prenda per son cavayer. Que vos etz tals que non a dona él mon que per cavayer e per servidor nous degues retener; que madon'Azalais, comtessa de Saluza, sofri Peire Vidal; e la comtessa de Burlatz, Ar. de Maruelh; e madona Maria, Gausselm Faiditz; e la dona de Marselha, Folquet. Per qu'ieu vos do conseil et austorgui que vos, per la mia paraula e per la mia segurtatz, la pregues e l'enqueiras d'amor.

En Raimbaut, quant auzi lo cosselh e l'asseguramen que l donava, e l'autorc qu'ela li prometia, si li dis qu'ela era eisa la dona qu'el tant amava, e d'ela avia pres cosselh. E madona Biatris li dis que be fos el vengut; e que s'esforses de ben far e de ben dire e de valer, e qu'ela lo volia retener per cavayer e per servidor. Don Raimbaut s'esforset d'enansar son pretz tal quan poc, e fes adoncs aquesta canso que dis:

Era m requer sa costum' e son us.

Et esdevenc se que la domna se colquet dormir ab el; e'l marques, que tant l'amava, atrobet los dormen e fos iratz: e com savis hom no ls volc tocar. E pres son mantel e cobri los ne; e pres cel d'en Raimbaut et anet s'en. E quant en Raimbaut se levet conoc tot com era; e pres lo mantel al col et anet al marques dreg cami, e aginolhet se denan el e clamet merce. El marques vi que savia com s' er' avengutz; e membret li los plazers que li avia fatz en mans locs; e car li dis cubertamens, per que no fos entendutz al querre del perdo, que l perdonec car s'era tornatz en sa rauba, selh que o auziron se cujeron que o disses per lo mantel, car l'avia pres. El marques perdonet li, e dis li que mais no tornes à sa rauba. E no fo sauput mas per abdos.

Apres esdevenc se que'l marques ab son poder passet en Romania et ab gran ajuda de la gleiza, on conquis lo regisme de Salonic. Et adoncs fo cavayer en Raimbaut per los fatz que fes; e lai li donet gran terra e gran renda, e lai mori. E per los fatz de sa sor fetz una canso que trames à'n Peire Vidal, que di:

Cant ai ben dig del marques.

7225.

Domna, tan vos ai pregada,

Sius platz, qu'amar mi voillatz;

Qu'eu sui vostr' endomeniatz,

Quar es pros et enseignada

E totz bos pretz autreiatz,

Per que m plai vostr'amistatz.

Quar es en totz faitz corteza,

S'es mos cors en vos fermatz

Plus qu'en nulla Genoesa,

Per qu'er merce si m'amatz:

E pois serai meils pagatz,

Que s'era mia'l ciutatz

Ab l'aver qu'es ajostatz

Dels Genoes.

Juiar, voi no se corteso,

Que me chardeiai de chò

Que niente non farò.

Ance fosse vos à peso

Vostr'amia non serò.

Certa ja v'escarnerò,

Provensal mal agurado;

Tal enoio vos dirò,

Sozo, mozo, escalvado,

Ni ja voi non amarò,

Qu'ech un bello mariò

Que voi no se ben lo sò.

Andai via, frar', en tempo

Meillorado.

Domna gent' et essernida, 

Gai' e pros e conoissens 

Vailla m vostre cauzimens. 

Quar jois e jovens vos guida, 

Cortesi'e pretz e sens,

E totz bos ensenhamens; 

Per qu'ieus soi fidels amaire 

Senes totz retenemens, 

Francs, humils e mercejaire, 

Tant fort me destreing e m vens 

Vostr'amors que m'es plazens: 

Per que sera jauzimens 

S'ieu sui vostre bevolens

E vostr'amics.

Juiar, vos semellai mato,

Que cotal rason tegnei.

Mal vignai e mal andei;

Non ave sen per un gato,

Per que trop me decasei,

Que mala cosa parei;

Ne non faria tal cosa

Si sia fillo de rei.

Credi voi que sia mousa?

Mia fe non averei.

Si per m'amor ve cevei

Ogano morrei de frei.

Tropos son de mala lei

Li Provensal.

Domna no siatz tan fera,

Que no s cove ni s'escai;

Ans taing ben, si à vos plai,

Que de mo sen vos enquera

E queus am ab cor verai;

E vos que m gitetz d'esmai,

Qu'eu vos son hom e servire.

Quar vei e conosc e sai

Quan vostra beutat remire

Fresca com rosa de mai,

Qu' él mon plus bella non sai;

Per qu'ieus am et amarai:

E si bona fes mi trai,

Sera peccatz.

Juiar, to provensalesco,

Si eu jaggauza de mi,

No preso un genoi.

No t'enten plus d'un Toesco,

O Sardo o Barbari,

Ni non o cura de ti.

Voi t'acavillar co mego?

Si lo sa lo meu mari

Mal plait aurai consegui,

Bel messer, verre vo di.

No volo questo lati,

Fradello zo voi afi.

Proenzal, va mal vesti,

Largai m'estar.

Domna, en estraing cossire

M'avetz mes et en esmai;

Mas enqueraus preiarai

Que voillatz qu'eu vos essai,

Si com Provenzals o fai

Quant es pojatz.

Juiar, no serò con tego,

Pois aissi te cal de mi.

Meill valra, per Sant Marti,

S'andai à ser Opeti,

Que dar v'a fors un ronci,

Car si juiar.

2701, 3794, 7226, 7698, C.

Era m requer sa costum' e son us 

Amors, per cui plang, plor, sospir e velh; 

Qu'à la gensor del mon ai quist cosselh, 

E m dis qu'ieu am tan aut com poirai sus 

Bela domna; quez ela m'er fiansa 

Qu'amor e pretz e pros m'er e non dans:

Equar ilh es del mon la plus prezans, 

Ai mes en lieis mon cor e m'esperansa.

E non ama tan aut com ieu negus

En pros domna; e quar noi trob parelh

M'entent en lieis, e l'am per son cosselh

Mais qu'anc Tisbe non amet Piramus,

Quar jois e pretz sobre totas l'enansa;

Qu'el' es as pros plazens e gen sonans,

Et als avols ab orgoillos semblans:

Largu'es d'aver e d'onrada cundansa.

Bona domna, aitan arditz e plus 

Fui, quan vos quis la joia del cabelh 

E que m dassetz de vostr'amor cosselh, 

No fon del saut de Gadre Menaudus;

Et à mi tanh mais de pretz e d'onransa

Qu'endreg d'amor fon l'ardimen plus grans: 

Mas ben deu far tan d'ardit vostr' amans 

Qu'el ne muera o n'aia benanansa.

Anc Persavals, quant à la cort d'Artus

Tolc las armas del cavalier vermelh,

Non ac tan gaug com ieu del sieu cosselh.

E fa m morir si co mor Tantalus,

Qu'aisso m veda de que m det aondansa

Leis qu'es gaia, cortez'e gen parlans,

Franqu'et humils ab totz faitz ben estans

E de bon sen e de bela semblansa.

Ja mon Engles no m blasme ni m'acus

Si m lonh per lieis d'Aurengu'e de Montelh, 

Qu'aissi m don dieus del seu bel cors cosselh, 

Que plus valens de lieis no vis hom nus. 

E sieu fos reis d'Englaterr' o de Fransa

Lonhera m'en per far totz sos comans; 

Quar en lieis es mos cors e mos talans,

E de ren als no m ve null'alegransa.

Bel Cavalier en vos ai m'esperansa; 

Equar vos es del mon la plus prezans

E la plus pros no mi deu tener dans, 

Quar vos mi des cosselh e m fos fermansa.

Na Beatritz de Monferrat s'enansa,

Quar totz bos faitz li van ades denan;

Per qu'ieu dauri ab sas lauzors mon can,

E trai m'enan ab sa bela semblansa.

2701, 3794, 7226, 7698.

Eras, quan vei verdejar

Pratz e vergiers e boscatges,

Volh un descort comensar

D'amor, per cui vauc aratges:

Q'una domna m sol amar,

Mas camiatz l'es sos coratges,

Per qu'ieu fauc desacordar

Los mots e'ls sos e'ls lengatges.

Eu soi cel que ben non aio,

Ni enqueras non l'averò

Per abrilo ni per mayo,

Si per madono no l'ò.

Plus fresqu'es que flor de glaio,

Per que no m'en partirò:

Certo que en son lengaio

Sa gran beutat dire no so.

Bella, doussa dama chera

A vos me rent e m'autroi.

Ja non aurai joi enteira

Si je n'ai vos e vos moi.

Molt estes mala guerreira

Si je muer per bona foi;

Mais ja per nuilla maneira

Non partirai de vostre loi.

Dauna, io me tenc à bos,

Qoar es la mes bon' e bera

Anc sees, gaillard' e pros,

Ab que no m fosetz tan fera.

Mout avetz beras faissos

Ab coror fresca novera:

Bostes sui, e sibs ag os

No m sofraisera fiera.

Mas tan temo vostro pleito

Todo 'n soi escarmentado.

Par vos ai pen' e maltreito

E mei corpo lazerado.

La nueit quan jatz en mei leito

Soi mochas vetz respetado.

Por vos ero non porfeito,

Faillit soi en mei cuidado.

Bels Cavaliers, tant es cars

Lo vostr' onrat senhoratges;

Que quada jorno m'esglaio.

Oime! lasso, que farò?

Si celi que j'ai plus chera

Me tua ne sai por quoi.

Ma dauna, fe que dei bos

Ni peu cap santa Quitera,

Mon corasso m'avetz traito

E mout gen faulan furtado.

2701, 3794, 7225-6, 7614, C.

No m'agrad' iverns ni pascors, 

Ni clar temps, ni folh de garrics; 

Quar mos enans mi par destrics 

E totz miei mager gaug dolors; 

E son maltrag tut miei lezer 

E desesperat miei esper; 

Qu'aissi m sol amor e domneis 

Tener gai coma l'aiga'l peis: 

E pois d'amdui me soi partitz 

Com hom issilhatz e marritz, 

Tot' autra vida m sembla mortz

E tot autre joi desconortz.

Pois d'amor m'es fallida'l flors 

E'l dous frutz, e'l gras e l'espics, 

Don gauzi' ab plazens prezics, 

E pretz m'en sobrav' ab honors, 

E m fazi' entre'ls pros caber, 

Ar m'a tornat d'aut bas cazer; 

E si no sembles fols esfreis, 

Anc flama plus tot non esteis

Qu'ieu for'esteins e relinquitz,

E perdutz en fatz et en ditz,

Lo jorn que m venc lo desconortz

Que no merma, com que m refortz.

Pero no m comanda valors,

Si tot son iratz et enics,

Qu'ieu don gaug à mos enemics

Tan qu'en oblit pretz e lauzors:

Qu'enquer posc dan e pro tener,

E far d'iratz joios parer

Sai entre'ls Latins e'ls Grezeis.

E'l marques, que l'espaza m ceis,

Guerreje lai blancs e droguitz:

Et anc pois lo mon fo bastitz

Nulla gens no fes tan d'esfortz

Com nos, cui dieu n'a gent estortz.

Bellas armas, bos feridors,

Setis e calabres e pics,

E traucar murs nous et antics,

E vencer batalhas e tors

Vei et aug; e no posc vezer

Res que m posc' ad amor valer:

Ans vau queren ab rics arneis

Guerras e cochas e torneis,

Don soi conqueren enriquitz.

E pos jois d'amor m'es fallitz

Tot lo mons me par sol un ortz,

E mos cants no m'es mais cofortz.

Anc Alixandres no fes cors

Ni Carles ni'l rei Lodoïcs,

Tan onrat; ni'l pros n Aimerics,

Ni Rotlan ab sos ponhedors

No saubron tan gen conquerer

Tan ric emperi per poder

Com nos, don poja nostra leis:

Qu'emperadors e ducs e reis

N'avem faitz, e castels garnitz

Prop dels Turcs e dels Arabitz;

Et ubertz los camis e'ls portz

De Brandis trosc'al bratz san Jortz.

Doncs que m val conquistz ni ricors? 

Qu'ieu ja m tenia per plus rics 

Quant er' amatz e fis amics, 

E m pascia, n Engles, amors, 

N'amava mais un sol plazer 

Que sai gran terr' e gran aver; 

Qu'ades on plus mos poders creis 

Ai major ir' ab mi meteis.

Pos mon Bel Cavalier grazitz 

S'es de mi lonhatz e fugitz,

Nonca mais no m venra conortz:

Per qu'es major l'ir'e plus fortz.

Bels dous Engles, francs et arditz, 

Cortes, essenhatz e noiritz, 

Vos etz de totz mos gaugz conortz;

Equar viu ses vos fac esfortz.

Per nos er Damas esvazitz

E Jerusalem establitz,

E'l regne de Suri' estortz;

Que'l Turcs o troban en lor sortz.

Los pelegris perjurs faiditz,

Que nos an sai en camp gequitz,

Qui los manten é cort es tortz:

Que quascus val mens vius que mortz.