Guiraut Riquier. Pus astres no m'es donatz + Amors m'auci, que m fai tant abelhir +++

Guiraut Riquier.

I.

La primeira retroencha d'en Guiraut Riquier, facha en l'an 1270.

Pus astres no m'es donatz

que de mi dons bes m'eschaya,

ni nulhs mos plazers no l platz,

ni ai poder que m n'estraya,

ops m'es qu'ieu sia fondatz

en via d'amor veraya;

e puesc n'apenre assatz

el Cataluenha la gaya (en Cataluña, Catalunya la gaya, alegre)

entre ls Catalas valens (entre'ls catalans valens)

e las donas avinens. (y les dones avinens : majes)

Quar dompneys, pretz e valors,

joys e gratz e cortezia,

sens e sabers et honors,

belhs parlars, bella paria

e largueza et amors,

conoyssensa e cundia

troban mantenh e socors

en Cataluenha a tria

entre ls Catalas valens

e las donas avinens.

Per qu'ieu ai tot mon acort

que d'elhs lurs costums aprenda,

per tal qu'a mon Belh Deport

done razon que m'entenda,

que non ai autre conort

que de murir me defenda.

Et ai cor, per penre port,

qu'en Cataluenha atenda

entre ls Catalas valens

e las donas avinens.

E s'ieu entr' elhs non aprenc

so per qu'amors guazardona

servir als sieus, don dan prenc,

no y a mas qu'om me rebona;

quar tant d'afan ne sostenc,

que m'a gitat de Narbona.

E per gandir via tenc

en Cataluenha la bona

entre ls Catalas valens

e las donas avinens.

Tan suy d'apenre raissos

que d'amar ai fallensa,

que nulhs pessars no m'es bos

may selh qu'als verays agensa;

e quar no l say ad estros,

vau per bona entendensa

querre e trobar cochos

en Cataluenha valensa

entre ls Catalas valens

e las donas avinens.

(N. E. ¿En qué lengua se entendería Guiraut Riquier con los catalanes valientes y las mujeres majas? Pues en occitano, está clarísimo.)

II. 

Breu doble d'en Guiraut Riquier, l'an 1265.

Amors m'auci, que m fai tant abelhir

sella que m plai; quar neys no m n'eschai gratz,

ni ai poder ni cor qu'allor me vir,

et es ma mortz qu'ieu ben am, non amatz,

per que mos chans diversa.

Mout ai chantat, que anc no plac auzir

a lieys qu'ieu am: per que m suy acordatz,

pus mas chansos ab precx no vol grazir,

qu'est breu doble fassa, e si li platz,

tenrai via traversa.

Nueg e jorn pes co pogues avenir (nit y día penso com puguera avindre)

en far son grat; per que m suy assaiatz

en tans chantars; qu'estiers non li aus dir (tans, no tants)

los mals qu'ieu tray; et on pus suy sobratz,

yeu la truep pus enversa.

Mos Velhs Deportz, est noms me fa mentir,

qu'ab desconort lo dic; quar no m'aidatz,

mos dobles mals se tersa.

III. 

Serena d'en Guiraut Riquier, l'an 1263.

Ad un fin aman fon datz

per si dons respiegz d'amor,

e l sazo s e l luecx mandatz.

E l jorn que l ser dec l'onor

penre, anava pessius

e dizia sospiran:

"Jorns, ben creyssetz a mon dan,

e l sers

auci m e sos loncx espers."

Tant era l'amans cochatz

de la deziran ardor

del joy que l'er' autreyatz,

qu'elh se dava gran temor

que l ser non atendes vius.

E dizia sospiran, etc.

Nulhs hom non era de latz

a l'aman, que sa dolor

no conogues, tant torbatz

era ab semblan de plor;

tant li era l jorns esquius.

E dizia sospiran etc.

Mout es greu turmen astratz

a selh qu'ab nulh valedor

no s pot valer; donc gardatz

d'est aman, en qual langor (d'este amán)

era l jorn d'afan aizius.

E dizia sospiran:

"Jorn, ben creysses a mon dan, (día, be creixes al meu mal; daño)

e l sers

auci m e sos loncs espers."

IV.

E car diversamen

auch pages apelar,

si com sabon uzar

per obras o per als;

e dels menestairals (menestrals)

aug lo meteis semblan; (escolto lo mateix)

dels mercadiers, que van

o estan, atertal (atretal, autretal)

(mas dels borzes no m cal

aras parlar estiers);

et aug los cavaliers

diversamen nomnar,

e ls clergues apelar,

com hom pot, pus onran,

los noms divarian.

E, si us ai dig desus,

dic que l devers e l'us

son per dreg acorsat,

qu'en generalitat

a trops especials,

que cascus generals

per alcuna razo,

si com de regio,

terras, vilas e gens,

e tot propriamens

es per dever nomnat:

per que m'ai albirat

que fora covinen

de uzar eissamen

de noms entre joglars.

Que non es benestars

car entr' els li melhor

non an de nom honor 

atressi com de fach.

Qu'ieu ne tenc a maltrach

c'us homs senes saber

ab sotil captener,

si de calqu' estrumen

sab un pauc de prezen,

s'en ira el tocan

per carrieiras, sercan

e queren c'om li do;

o autre, ses razo,

cantara per las plassas

vilmen, et en gens bassas

metra queren sa ponha,

en totas, ses vergonha,

privadas et esternas;

pueys ira s n'en tavernas,

ab sol qu'en puesc' aver;

e non auzan parer

en deguna cort bona.

Car hom aquels mensona

ses autre nom joglars,

ni sels, que trasgitars

es lor us ses als far,

ni cels que fan jogar

cimis ni bavastels,

ni d'autres, que capdels

bos non lur es donatz.

Car per homes senatz,

sertz de calque saber,

fon trobada per ver

de premier joglaria,

per metre ls bos en via

d'alegrier e d'onor.

L'estrumen an sabor (los instrumens)

d'auzir d'aquel que sap

tocan issir a cap, (issir : eixí, ixí, eissí)

e donan alegrier:

per que l pro de premier

volgron joglar aver,

et enquer per dever

n'an tug li gran senhor.

Pueis foron trobador,

per bos faitz recontar

chantan e per lauzar (cantán y pera alabá; loar)

los pros et enardir

en bos faitz: car chauzir

los sap tal que no ls fa

ni jes dever non a

del far, tal los ensenha:

per qu'ieu, que qu'en avenha,

no m puesc tener del dir.

Aisi a mon albir

comenset joglaria,

e cadaus vivia

ab plazer entre ls pros.

Mas er es tals sazos,

et es lonc temps avuda,

c'una gens s'es moguda

ses sen e ses saber (sense señ y sense sabé, sabiduría)

de far, de dir plazer,

e senes conoissensa, (y sense coneixensa, coneiximén)

que prendo captenensa

de cantar, de trobar

o d'esturmens tocar

o d'als, ses tot dever,

ab que puesca querer,

per enveia dels bos.

E son tan tost gilos,

can vezo ls bos onrar

als pros, e ve'n afar

mantenen del maldir.

E no s degra sofrir

per ren a mon semblan.

E vey que hom los blan

e ls tem may que ls senatz.

E pueis tant es baisatz

lo noms de joglaria

d'onor, que no y solia

caber aquela gens,

es me greu dels sabens

trobadors; car clamat

non an el temps passat

so qu'er m'avén a dir: (se troben mol poques tildes)

que fesson devezir,

a cui que mielh taisses,

que cascus nom n'ages

per so que saupra far,

e tuch fosson joglar

en general estar

per sol un fag a far,

si pus non y agues,

si com es de borgues.

V.

En son palays, on ela vay jazer,

ha cinc portals, e qui ls dos pot hubrir, (obrí; abrir)

greu passa ls tres, mas leu n'es per partir;

e viu ab gaug sel que y pot remaner;

e poia y hom per catre gras mout les, (cuatre grasons, escalons)

e no y intra vilas ni mal apres,

c'ab los fals son el bari albergat,

que ten del mon pus de l'una mitat. 

Mout y ay cossirat

d'aquest palais, cals es,

e trobi en mon pes

c'aiso es la persona

de cui l'azautz s'adona

en l'autra per vertat.

E l portal perilhat

son aquist que us vuelh dir:

far saber lo dezir,

per amoros semblans

o per ditz mout doptans,

per si o per autrui.

Pero mielhs es de lui,

si s pot gent ayzinar;

car amors ses selar

non pot venir a port.

Veus lo premier trop fort

e perilhos d'intrar!

E l segons es, so m par,

d'umils precx perceubutz,

que sia retengutz

per servir ad honor:

aquest deu far temor

e dopte gran d'obrir.

E l ters es per ver dir

servirs ab gran aizina,

que vezis ni vezina

non la puesca saber,

conoisser ni vezer;

car mout grans perilhs es.

E l cartz es mout cortes:

so es baizars de grat.

E si fos costumat

c'om remazes aqui,

l'amors non agra fi

ni morira tan leu.

Mas lo quinz es trop greu,

qu'es lo faitz, per que mor

l'amors c'om te al cor

entro qu'en es passatz.

E'n Guirautz com senatz

dis o cubertamen.

Le palais d'avinen,

on amors vay jazer,

es sert, al mieu parer,

la persona amada;

e l cinc portal d'intrada

son silh que dig vos ai.

Mas dels portals dis mai

en Guirautz ses mentir:

e qui ls dos pot hubrir,

greu passa ls tres, mas leu n'es per partir.

Mout o saup azaut dir;

car tug son perilhos

li trey, ab que pels dos

sia hom leu intratz.

E qui ls a totz passatz,

a issir lo'n cove,

pus son dezir a ple,

co vos ai dig desus. (desus, dessus, de suso, amún)

Mout o dis bel e clus

selh qu'en sabia l ver:

e viu ab gaug sel que y pot remaner.

El o dis, car poder

del remaner non ha

negus, pus que l desva

sos dezirs, com dig es.

E pueia y hom per catre gras mout les.

Ver dis, segon que m pes,

e que truep cossiran.

Li gra son benestan:

le premiers es onrars,

e l segons es selars,

e l ters es gen servirs,

e l quartz es bos sufrirs.

E cascus es mout lens

tan que i pueia greumens

hom ses elenegar.

E ditz vertat e par

selh que la chanso fes:

E no y intra vilas ni mal apres.

Ver dis, que l descortes

vilan, mal essenhat,

mal noirit, empachat

no y intran per poder

el palais, on jazer

vai amors, ni 'saiar (essaiar: probá, ensayá)

non auzan de puiar (no osen de pujá)

los grazes per lunh fag;

ni cre c'us s'en empag,

car de lor no s cove.

E dis enquer trop be

so de que ditz vertat:

c'ab los fals son el barri alberguat

que ten del mon pus de l'una mitat.

Ben ditz sa voluntat

e pogra de mais dir,

que las nou partz m'albir

que l barris ten del mon,

e que tug aquel son

albergat malamen.

Barris es veramen

ditz so que foras vila

es bastit senes guila

entorn e pres del mur,

per so que pus segur,

tot cant y es estia, -

que ben leu no faria, -

e pus assolassat.

El barri son poblat

silh que venon derrier.

E y so fag li palhier,

escuras e boals,

e y fa hom los cortals,

per tener bestiar. (y s'hi fan los corrals pera tindre bestiá)

Car greu veyretz estar

en barris los melhors

homes dels locx ausors,

ans son mout gen cazat.

Per que fon comparat

a barris gent e be.

Ad ayso no m cove

pus dir, c'assatz s'enten,

mas que dey belamen

de la quinta parlar

cobla, segon que m par. 

en declaran lo ver.

Roman de Jaufre, fragment, E dirai vos de Brunessen

Roman de Jaufre.

(N. E. Voir la version de Raynouard, éd. Ramón Guimerá Lorente.)

E dirai vos de Brunessen

con ieis del castel ricamen

ab donzellas, ab cavaliers.

E l senescals vai s'en primiers,

e ela sec lo cavalcant

en un bel palafre ferant,

on hom de cavalquar no s dol;

e ambla si que par que vol,

adaut e jent, dreit e suau

c'a penas au om son esclau. (c'a pena au hom son esclau)

E fon vestida cosdament (ricament)

d'un cisclaton mout avinent;

e siei cabel delgat e saur

son gent estreit d'un filet d'aur;

e sa bella cara plasent,

on anc non ac affaitament,

anz es ben fina per natura

qu'en nulla sason non peiura

plus al matin que al colgar,

mas ben la ve om mellurar

rellusir e getar clardat,

que tuit en son enluminat

cels que l'anavon environ.

E ac un capel de paon

en son cap mes per la calor,

e portet en man una flor

mout bella e mout ben flairan.

E enaissi vai s'en pensan

com poira Jaufre retener

ni co l fara son cor saber,

ni, cant er ab el, que l dira

ni de cal guisa respondra.

Si m'escomet de nulla ren,

ades li respondrai ab ben;

e se s clama car lo tinc pres

ni del mal que ma jentz li fes,

ni car lo menassei a pendre,

d'aisso consi m poirai deffendre?

Ab blandir et ab jent parlar,

c'aissi pot om tot cor domptar.

E, si Dieu platz, ieu domtarai

aquest, tanz plasers li dirai."

E Jaufres ven daus l'autra part

pensan, que s cuia que fort tart

poira Brunesen convertir,

ni s cuia que puesca avenir

qu'ella per ren s'amor li don;

car tant es de bella faisson

e tant es rica de coraje

e de terra e de linnage (linhage, linatge)

c'a pauc no n es desesperatz.

Mais en aisso s'es affermatz 

que dis que non es ses merce,

pos totz autres bens a en se.

"Doncs non poira ella suffrir

que m veia per s'amor morir;

que mortz sui o tota l'aurai:

mais merce n'aura, si Dieu plai."

E aissi anet longament

pensan, qu'en al re non entent, (pensán, que en atra cosa no entén)

tro que vi Brunesen venir.

E l senescal vai s'enantir

e venc s'en a Jaufre correntz:

"Seiner, ma domna Brunesentz

es aici tot per vostr' amor

per so que us fasa mais d'onor;

e vec la us que us ven acuillir."

Dis Jaufre: "Bel fai a grazir."

Ab tant Brunesentz es venguda,

que mout coindamen lo saluda,

e Jaufres ella eissament,

e apres tota l'autra gent,

cavaliers, domnas e pulcellas, (pucella, pubilla)

car mout n'i avia de bellas.

E Brunesentz l'estent la flor.

"Domna," dis el, "per vostr' amor

la penrai, pos vos la m donatz." (la pendré, pos vos me la donáu)

E pueis cavalcon latz e latz, (y después cabalguen costat a costat)

e las jentz estan entorn els,

de cavaliers e de donzels,

de pulcellas e de borges. (de pubilles y de burguesos)

E tant i estavon espes

c'om no i pot nulla ren parlar,

si fort non l'aven a cridar:

don enueia mout a Jaufre

e a Brunessen mais, so cre;

car non son en luoc on parlar

poguesson miellz de lor afar. (pugueren milló del seu affaire)

Ez enaissi son s'en vengutz

a Monbrun, on an receubutz (Monbrun, Montbrun; la t se pert o perd)

Jaufre a gran procesion.

Pueis Brunesenz e siei baron

an l'en menat sus el palais;

e non cre que hom vis anc mais

miels apparellat de manjar. (Juaquinico Monclús)

Mais no m'o letz aras comtar,

car enant fai meillor auzir:

e per aquo voill m'en giquir. (y per naixó m'en vull abstindre; u dixo)

E cant agron assatz manjat,

il an lor solatz comensat,

e Jaufre a lor o mogut

co s n'anet, cant l'agron batut,

ni con sos ausbercz lo guari

e l drapz, que res non l'envasi.

Pueis demandet del cavallier

que l venc residar el vergier

tres vetz e l venia ferir,

s'es garitz o si pot garir.

Dis lo senescals: "Ben guarra, (va di lo senescal: be guarirá : sanará)

senner, car ja mal no n aura. (siñó, ya que mal no ne tindrá : haurá)

Mas per la fe que dei a vos,

enantz n'i eron vengut dos,

qu'ieu e Symonz i fon vengutz,

que a cascun par els escutz

que cascuns voides los arsos,

e n'aguem los vestirs terros.

E de totz aquelz de Monbrun

feratz altrestal, un e un,

entro qu'ieu dis que lai anesson

tuit ensems e que us n'amenesson:

adonx cre que aguest paor."

“O ieu, que anc non l'ac maior,"

dis Jaufres, "si m sal Dieus ni fes.

Diable, cugiei, m'aguesson pres,

que sai fosson d'enfern ixitz, (ixits, eixits.)

cant los vi entorn mi garnitz.

Mais quant m'agron sai sus poiat

ni ac am ma donna parlat

e vi son cors, so m fon avis,

que fos ab Dieu en paradis,

c'anc puis non ac de ren temensa;

enantz vos dic per ma cresensa,

que, sol qu'ela's tengues ab me,

res no m pogra nozer, so cre."

E Brunesenz a sospirat

e a tan fichament garat (y ha tan fíxamen guaitat : mirat)

Jaufre e aitan dousament (a Jaufre, y tan dolsamen)

que ls oils ins el cor li deisent;

e a ella puiet el vis

lo sanc del cors, si qu'en rogis.

Amdui son malament nafratz

d'un dart, qu'es d'amor enpennatz,

don om non pot son colp veser,

ni garnimenz no l pot tener;

tant fer prim; mais lo colp es gros,

que no i a mesolla ni os,

vena ni nervi que no l senta.

Aissi nafra, can l'atalenta,

durament e jent e suau,

que non ve om son colp ni l'au,

ni ja mais sanat no n sera,

mais per aquel que l colp fara.

E co l pot ferir ne naffrar

pos puis lo i aven a sanar?

Aco us dirai ieu ben per que.

S'ieu ai naffrat vos e vos me,

s'ambedui nos podem garir,

en fol nos laissarem morir;

car quex es de garir cochos

de son mal, tant es angoissos.

Mais can l'uns nafra solamenz,

aqui a mestier mais de senz,

que l nafratz a obz que enqueira

con cel qui l'aura ferit feira,

qu'estiers non pot per ren guerir.

E dirai vos co l pot ferir:

ab servir et ab gent parlar,

ab blandir, ab humiliar,

e que s gart de far avolesas,

e fassa con poira proesas

e que sia a totas genz

humils, amoros e plasenz,

per so que tuit en digan ben;

e gart si sobra tota ren

d'enueg e de far vilanias,

d'erguil e de sobransarias, (d'orgull)

e sia larcz quan s'escaira

segon lo poder que aura;

e que s tenga asaut e jent

e s gart de pacha d'avol gent,

que non lor sia trop privatz.

Mais de tot si' abandonatz

ves celui que nafrar volra,

e qu'en digua ben, can poira,

e sia finz e vertadiers

e a totz aquels plasentiers

que ab leis li puiran valer;

e cels que l poiran dan tener

am atressi e tengua car;

e que sapcha son cor celar.

E veus cal son li dart d'amor

que nafron suau ab dousor,

ez enaissi pot hom nafrar

lo plus dur que l'er ad amar!

Andui son d'aquest dart ferit

et amdui seran leu garit,

sol qu'ensems sian ajustat,

car cascuns n'a gran voluntat.

El palais tenon lor solatz,

car cascuns conta so que l platz.

Mas Brunesentz non au ni ve

faitz ni ditz, mais cels de Jaufre,

ni en ren al re non enten:

don plaing e sospira soven,

e trasal e fremis e mor (trassal)

e pensa ades en son cor

can poira la sason veser

que l puesca entre sos bratz tener.

E Jaufre plain de l'autra part

e mor et esconpren et art,

can ve son cors gai e cortes,

qu'ades mor car ab lui non es.

Aissi an aquel jorn estat,

e Brunesenz a comandat

c'om fassa leitz aparellar,

qu'ira jazer e repausar; (qu'anirá a jaure, tombás, y reposá)

car la calors que n'es annada

l'a un petit de mal greuiada.

Pueis venc a Jaufre mantenent

e dis li tot suau e gent:

"Seiner, vos vos n'iretz gaser, (jazer : jaure : yacer)

e Dieus vos don anuit bon ser

e al matin meillor levar,

qu'ieu m'irai atressi pausar.

Mais paor ai que us en fuiatz (la dona de Puigdemont, la rumana)

ancanuit, can serem colgatz,

aissi con l'autra ves feses."

"Non farai ja," so dis Jaufres,

"que, si m'aiut Dieus ni sos sanz,

anz sai istaria detz anz 

que m n'anes senz vostre comjat

ni menz de vostra volontat."

Dis Brunesentz: "En bon aur,

so que ben dormirai plus segur."

E es s'en ab aitant intrada

e fes castiar sa mainada

que non fasson bruida ni nausa

e que laisen dormir en pausa

Jaufre si com pro cavallier,

que ben cre que l'aia mestier.

Jaufre an ricament colgat

en un lieg gent aparellat,

en que pogra suau dormir,

s'amors no l vengues assaillir.

Mas ves amor non pot valer

benestansa de ben jaser;

c'aitan ben dormiria en pailla

totz hom, pueis amors lo trebailla.

E el es ne si treballatz

que cent ves s'es la nueit giratz,

que non sent si jatz mol o dur

ni gaire no n esta segur,

c'ades pensa de la faisson

de Brunesen, c'al cor li fon,

que totz sos faitz e totz sos ditz

l'a sus sagellatz e escritz.

E pensa s'en nulla maniera

puesca conoiser la carriera

co l puesca son cor descobrir

ni l'amor, c'aissi l fai languir.

E cant a pro pensat, no i ve

via mais de clamar merce,

e dis qu'enaissi lo dira

tan tost con veser la poira:

"Donna, la vostra grantz beutatz

e l vostre cors jent faissonatz,

vostre oil, vostra boca plasent

e l gais ditz c'al cor mi deissent

m'a si destreit, pres e lasat

que no m'avetz poder laissat

de neguna ren qu'el mon sia,

que totz es en vostra bailia

mon cor, mon saber e mon sen,

ma proesa, mon ardimen,

mon delieg e ma voluntat.

De tot m'aves poder enblat,

que tot es vostre mielz que mieu.

E si us avia dig: de Dieu,

non o deuria a mal tener,

car el vos a donat poder,

e per s'amor, domna cortesa,

car vos a dat tant de proesa,

de pres, de sen e de beutat,

devetz aver humilitat

de me, c'aissi m'aves conques

e destreit e lassat e pres

que non veg ni entent ni aug

ni puesc aver delieg ni gaug

senz vostr' amor; e si non l'ai,

atrasag vos dic que morai.

E, per Deu, bela domna pros,

non voillatz qu'ieu mora per vos,

car no m podetz mostrar ni dir

rason per que m deiatz aucir,

mais car vos am: veus tot lo tort!

E si per so voletz ma mort,

peccat farez a mon veiaire. (faretz : vos faréu, tú farás)

Mais nuil dreit no m val ab vos gaire,

que tot es en vostre voler.

Mais merces mi degra valer

que us quer, bella domna cortesa."

Ben sui folz e ben dic folesa, (foll, follia, etc.)

car ja cuit s'amistat aver.

Con la i ausaria querer,

qu'eu no sui d'aquela valor

qu'en mi fos be messa s'amor,

qu'el' es riqua e de gran affar

e puis de beutat non a par;

el mon non a nulla persona

que, s'ella s'amistat li dona,

que non s'en tengua per pagatz.

Donx non sui ieu ben estragatz,

can mi cuit que a mi la don,

c'anc mais no m vi ni sap qui m son? -

Tol t'en, que ja non s'avenria.

Vai t'en e ten deman ta via. -

E, Dieus(.) e con o puoc anc dir?

Qu'ieu ja cuiava ades morir,

can son cortes cors non vesia,

e tot jorn plorava e plagnia; (planher, plagner, plañir)

e ara, cant ab ella son,

que m n'anes, non o tenc a bon. -

Adonx e qual consel penrai?

Que quant la veg, lo m dobla mai

mon mal, mon trebal, ma dolor.

Aisso non fo lo (?) anc amor,

anz es lo peier mal del mon,

qu'en totas guisas mi confon

e m'auci e m ten en destreg,

atrestan ben can non la veg

con can puesc ab ella parlar.

E aisso con puesc ieu durar? -

Tot m'er a soffrir o morai:

mas merce cre que trobarai,

que ja m fes ella bel senblant

e m'a servit et onrat tant,

jent acullit e jent profert

que ben posc conoiser apert

que per entendensa d'amor

o fetz c'a mi donet la flor. -

Ara conosc que non ai sen:

aissi vai de la folla gen,

que moutas sasons s'esdeven

c'uns folz hom si cuiara ben,

s'una pros domna l vol servir,

que de s'amor aia desir

e cuia ben esser amatz,

e aquo es fina foudatz.

De me puesc atrestal veser,

que s'aquesta m'a fait plaser

ni gent aculit ni onrat,

mi fas segur de s'amistat.

Per qual valor, per qual proesa,

per qual beutat, per qual riquesa,

que aia ni que en me sia,

aurai s'amor? - No i conosc via,

mais aquesta c'om ditz d'amor,

que non vol ergoil ni ricor:

donx l'aurai eu, que non son ricx,

mais ben serai verais amicx

senz erguel e senz tot engan

e ll servirai de bon talan. (y la serviré de bon talán)

Aissi tota la nuit si plais

e estet en aquel pantais

que anc de sos oils non dormi.

E Brunesenz plang atressi

e sospira soven e greu

e prega Amor e puis Deu

que d'aquel mal consel li don, (que li dono consell d'aquell mal)

c'aissi l'auci contra rason.

“Car outra rason m'ausi ben

Amors, qu'en me no faill de ren,

qu'ieu fas tot so que m manda far

e am cel cui mi mand' amar.

E s'ieu fas son comandament,

a tort m'auci mon escient. -

A tort? - No fa, anz a gran dreg,

qu'ieu non o faz si con far deg. -

Si fas: non am ieu donx Jaufre? -

Non ieu, car ren no l fas. Per que? -

De tot so que tain ad amic

cuig lo ben amar, car o dic. -

Non fas ges, als i a mestier.

mon parlar non val un denier. -

Si fai. - Non fai; ans dic follor

e n'ai l'enemistat d'amor;

car s'ieu l'ai convengut que l'am,

e non o fas, a tort m'en clam

que si m'auci ni m dona mort,

el aura dreit es ieu n'ai tort. - (es : e : y)

E donx, lassa, que m'en farai,

s'amors no m conseilla? - Non sai;

del tot mi met en sa comanda

e farai tot so qu'ela m manda. -

Amors manda que a Jaufre

renda m'amor, mon cor e me,

e tot lo meta en abandon

per far so que li sia bon,

que ja de ren non l'en desdiga,

qu'enaissi o deu far amiga.

Aquo farai ieu volonteira,

sol que l plassa que m'o enqueira,

car amors non deu jes voler

qu'ieu l'an pregar ni enquerer,

que mos pretz s'en abaissaria.

Donna deu aver seinoria

d'aitant que hom la deu pregar,

e ela deu o escoutar.

E s'aquell' amor non l'agrada,

non l'escout mas una vegada,

que no l deu jes so far entendre

que non l'a en cor as atendre.

E si l'agrada ni tant es,

fassa s'en apregar tres ves,

car ja vergoigna non sera

a aquel que l'amor querra,

s'ella s'en fa tres ves preguar,

ans la'n deura tenir plus car;

c'ades es om plus envegos, (mes envejós)

plus cobes e plus volontos

de causa que l ven a plaser,

can ve que non la pot aver;

e puis, can l'a, es miels garada

que cela que non es presada;

car causa vil non es trop bona:

per que domna, se s'amor dona

ses querre, non es tant honrada

con es cella que n'es pregada.

E per so es dreit qu'ieu esper

qu'el me vengua m'amor querer,

E si non la m quer, con sera? -

Laissarai me morir? - Non ja. -

E annarai l'en pregar eu? - (y aniré a demanálay yo)

Hoc, ans que m lais morir, per Deu. - (Sí, antes de que me dixa morí,)

Donx i aurai eu desonor? -

Non aurai, que forsa d'amor

m'en destreing, que m'en pot forsar,

es ieu non la puesc contrastar,

car en me vol far aparer

sa seinoria e son poder."

Raimon Vidal, nouvelle. So fo el temps c'om era jais

Raimon Vidal, nouvelle.

So fo el temps c'om era jais

e per amor fis e verais

e cuendes e de bon escuelh,

qu'en Lemozi, vas Essiduelh,

ac un cavalier mout cortes,

adreg e franc e gent apres

e a totz afars pro e ric;

e car son nom ades no us dic,

estar m'en fa so, car no l sai

e car el en sa terra lai

no fon ges dels baros maiors,

per que sos noms non ac tal cors

coma de comte o de rei.

Per so us dic que non fon, so crei,

senher mas d'un castel basset;

mas nobles cors, que mans en met

de bas loc en ric et en aut,

li donet que saup far azaut

e d'avinen tot cant anc fetz,

a totz sos jorns: e qu'en diretz?

que tant puget per galhardia

per pretz e per cavalairia

e per armas e per servir

c'a totz si fetz mil tans grazir

que baros qu'en la terra fos,

vas qu'el sera de companhos

menet soven e voluntiers.

Tant ac de covinens mestiers

que cavaliers fon, pro e bo,

qu'en la terra non ac baro,

a qui taisses, que de bon grat

no l fezes de sa cort privat

e poderos ab lui ensems.

E membra m be qu'en cellui temps

que l cavaliers fon pros aissi

ac una domn' en Lemozi,

valent de cors e de paratje, 

e ac marit de senhoratje

e d'onor ric e poderos.

Mout fo l cavaliers coratjos

que celei amet per amor.

E la domna, que de valor

lo vi aital e de proeza,

anc no i volc gardar sa riqueza,

ans lo retenc lo premier jorn;

qu'en Bernartz dis de Ventadorn:

"Amors segon ricor no vai."

E doncx no us cuiatz vos, de lai

cant el se senti retengutz,

c'adoncx fos plus aperceubutz

e plus jais que dabans non era?

Si fo, e de melhor manera

valens e plus abandonatz.

Car bon' amors fug als malvatz

e dona s als bos metedors.

E domn', ab cui treva valors

e val sabers e conoissensa,

com auza far desconoissensa

ni drut recrezen per aver

ni tal que ja non aus parer

ni en cort venir ni anar!

Sabetz, cal drut deu domna far

que per pretz vol menar joven?

Adreg e franc e conoissen,

ardit et en cort prezentier,

e gart, cant penra cavalier

a si servir, que sieus paresca

e qu'e s'amor melhur e cresca,

car aissi l pot far de paratje:

c'anc malvatz no fo de linhatje

ni hom galhartz de vilania;

car lai on valors ven e tria

ven paratjes, e de lai fui

on paubres cors soven s'adui,

que mans n'a faitz bas d'autz baros.

E per so dis en Perdigos:

"En paratje non conosc ieu mai re

so mas que mais n'a cel qui mielhs se capte."

E cascus pot saber qu'es dreitz.

E per so l cavaliers adreitz,

on ricx cors noiric cortezia,

can vi c'a si dons non tanhia

per paratje ni per ricor,

volc enantir tan sa valor

c'ab lieis s'engales pauc o mout.

E non estet en lei de vout

vestitz, ni patz a una part,

ans se carguet guerr' e regart

e fetz per sos vezis assautz,

aisi com dis en Raimbautz: - 

e cels que m vol auzir m'escout -

"Per midons ai cor estout

et humil e baut;

e s'a lieis no fos d'azaut,

ieu m'estera en loc de vout,

e d'als no pensera mout,

mais manger' e tengra m caut

et agra nom Raimbaut."

No volc aver nom Raimbaut

lo cavaliers, mas bon e bel.

E la domna, per far cembel

a la gent que vai devinan,

volc lo sofrir a son deman

e c'om plus bas no ill en dones,

car greu er pros domna c'ades

calque drut hom no ill en devi.

E si no n voletz creire mi,

auiatz d'en Miravalh qu'en dis,

que mai saup d'amor que Paris

ni hom c'anc auzissetz comdar:

"Sabetz, per que deu domn' amar

tal cavalier que l sia onors:

per paor de mals parladors,

c'us non la'n puesc' ocaizonar

d'aiso c'ad onrat pretz s'atanh;

quar plus en bon' amor s'enpren,

nulhs hom no m pot pois far crezen

que ves autra part se vergonh."

Aisi m par issida del ponh

a malparliers domna prezans.

Enaissi l tenc mai de set ans

la domna l cavalier que us dic,

que pres del sieu e que l sofric

son deman e que la preies,

et qu'ella l donet que portes

anels e manjas per s'amor.

Adenan, un jorn de Pascor,

c'aisi servia l cavaliers,

anet, car n'era costumiers,

vezer si dons en son repaire,

e si us cuiatz qu'ella l saup faire

tot cant a bel solatz cove,

ja non cug que i falhatz en re;

c'anc domna mielhs no s'en captenc.

E l cavaliers, sempres que venc,

josta lieis s'anet asezer;

e no foron mas can plazer

las premieiras novas d'abdos.

Mais cel qu'en era bezonhos

e per sobramor apensatz,

co hom cortes et ensenhatz

a si dons deu far, li comensa

l'amor e la long' entendensa

qu'en lieis a fag' e l long servir,

e com li deu tostemps grazir

lo ben e l'onor qu'en lui es;

car be sap e conois manes

que per lieis l'es tot avengut;

e si l tenia en loc de drut

a son jazer ni per privat,

no s cuia que i agues peccat

ni facha nulha leugaria:

e quar lo l dis, per merce l sia,

que non li o torn a nulh mal,

c'amors l'en fors', e no n pot al,

e pois totz jorns pot auzir dire

qu'el mon non a tan greu martire

com lonc esperar, qui l sec fort.

Aisi no l respos nulh conort

la domna, mas iradamens:

"Per Dieu," fai s ela, "malamens

ai messa l'amor que us ai facha,

c'aital anta m'avetz retracha

ni us pensetz anc c'ab mi us colgues.

Non aviatz pro que us ames

e us tengues per mon cavalier?

A mi m'en torn que mal m'en mier;

que per vos n'ai laissatz mans ricx:

mais en Bernartz, lo fis amicx,

o dis, so sabetz, qu'ieu o sai:

"Totz m'en desconosc, tan be m vai,

e s'om sabia, en cui m'enten!"

Tan n'ai fag per ensenhamen

que totz vos n'etz desconogutz.

Aisi, quar voletz esser drutz,

vos tuelh mo solatz e m'amor,

e pensatz de conquerr' alhor

domna, c'ab se vos denh colgar:

c'ab mi non podetz mai trobar

esmenda, patz ni fi ni treva."

Ab tan dejosta lui se leva

cais c'als autres vol far solatz.

E l cavaliers remas iratz,

pensius, e tenc son cap vas terra,

qu'es per amor en manta guerra

ab mant pensamen enoios.

Era s penet, car fon cochos

vas si dons tan de dir son cor,

e maldis celui qu'a nulh for

amet anc, car tot cant avia

fag en set ans, pert en un dia,

ses forfag, e no sap per que. -

En la sala, que be m sove,

on aiso fo c'a celui peza,

ac una donzela corteza,

nepta fo l senhor del castel;

azaut cors ac e gent e bel

e jove; que non ac vint ans.

E aperceup be per semblans

e per fag las novas d'abdos,

e vi l cavalier consiros

per la domna que s'en levet,

e penset, c'anc sol no i ponhet,

c'auzit ac so que no l fon bo.

Ves lui s'en va per occaizo

d'aver solatz, e l cavaliers,

des que la vi, mot voluntiers

josta si li fetz bel estatje,

com a donzela d'aut paratje

deu hom far, cant es ric' e bela. -

Aisi co hom se renovela

solatz per traire cor d'autrui

li vai dizen tan que l'adui

en las novas c'auzir volia.

E l cavaliers li dis: "Amia,

car conosc, que de vos no m gart,

ans car semblatz de bona part

e tals cui no tanh malvestatz,

vos dirai, e sia n celatz,

de vostra domna co m n'es pres;

ieu cug que tant avetz apres,

non per jorns, mas per plan coratje,

que ben sabetz que per paratje

ni que m cuges esser sos pars

non amei, - e sia'n cuiars

eissitz - vostra domn'a mos jorns;

mas amors, que non es sojorns

celui que vol trop aut amar,

la m fetz tan soven remembrar

que mal mon grat lo i aic a dir.

E car anc m'o volc acuilhir

qu'eu la preges, no i gardei re

a lieis servir, ni mal ni be,

ni tort ni dreit, cals que il plagues;

e membra m be, cals c'o disses,

e cug fos n'Arnautz de Maruelh

que mai saup qu'aicel de Nantuelh

d'amor ni d'autre al mieu albir: 

"E can me pes cals es que m fa languir,

consir l'onor et oblit la foldat

e fug mo sen e siec ma volontat."

Aisi m'a volers enganat

e fag amar set ans en van:

eras, can cugei penre plan

e leu so c'avia servit,

es m'avengut so c'ai auzit,

que dis en Folquetz l'amoros:

"Per qu'er peccatz, amors, so sabetz vos,

si m'aussizetz, pus vas vos no m'azire;

mas trop servirs ten dan mantas sazos,

que son amic en pert hom, so aug dire;

qu'ie us ai servit et encar no m'en vire:

mais car sabetz qu'en guizardo enten,

ai perdut vos e l servir eissamen." 

"Aiso no m par del vostre sen,"

dis la donzela, "bels amicx:

assatz toccatz de bas aficx,

vas que de cor semblatz azautz.

Auzatz so qu'en dis en Guirautz

que mai saup d'amor que Tristans:

"E com ja semblari' enjans

aitals balans

c'om ben ames e no sofris!"

E car ma domna no s'en ris

al premier mot e no us dic oc, 

per so us cuiatz que us torn en joc

vostr' afar ni us datz consirier.

E d'en Guillem de san Desdier

qu'en dis, non auzitz anc parlar?

"E cels qu'obra d'amor sap far

jes per un mot no s desesper;

car bona domna son voler

cela soven per essaiar."

Voletz n'en mon conselh estar

o non?" "Oc ieu mout voluntiers,

amiga," dis lo cavaliers,

"e prec vos que m'en conselhetz."

"Ades vuelh doncx que us remembretz

aquesta cobla per intrar,

c'auzitz a'n Guillem Ademar

mantas vetz dir et en mans locx:

“E fara m canezir a flocx,

si no m socor enans d'un an,

car ja dizon que m van brulhan

canetas, e no m sembla jocx:

e si m fai joven canezir,

tot canut m'aura, can que tir,

car bos esfortz malastre vens.

Et a vos remembr' eissamens

aquesta qu'es entre nos ams:

“E cuiatz qu'aisso sia clams

ni que m'en rancur? Non fatz jes;

tota ma rancura es merces,

si be s passa l ditz lo garans;

no sui clamans;

mas be volria ela s chauzis

que no falhis,

tan es adrecha e benestans,

que l maier pans

del pretz caira, si no l soste vertatz,

e sera greu us fis cors ves dos latz."

Ab aital cor vuelh que siatz,

amicx," la donzela respon.

"Et ieu, per lo senhor del mon."

"Car dolors es d'ome que ama,

ab midons, e si tot s'en clama,

no vo n cal, qu'ieu vo n serai bona.

Mas de mieg jorn ad ora nona

es, e vos remanretz aisi;

e non laissetz c'al bo mati,

ans que us movatz ni l cautz s'espanda,

non tornetz a vostra demanda,

aisi co fis amicx deu far;

car ben leu per vos essaiar

o car no i venguetz de sazo

avetz trobat aital de no;

e deu s'en melhurar, so cug;

e dirai vos so que jes tug

no us sabrian dir, si m n'esvelh,

qu'en dis en Guirautz de Bornelh,

e membre us afortidamen:

"Qu'en patz e sufren

vi ja que m jauzira

d'un' amor valen,

si leugeiramen,

per fol sen savai,

no m fezes esglai

so que m'aiudera,

si n fos veziatz;

e feichi m iratz;

per c'autre senatz,

quan m'anei tardan,

poins e pres enan.

E pois sofertera

maiors tortz assatz,

quan m'en fui lunhatz

e fui n esfreidatz;

per que us prec e us man

que sofratz aman.

Be m platz que ill aman

amon soffertan;

Car cil venceran

que be sofriran."

E vos, que avetz sufert tan,

non o perdatz per sol un ser." -

Aisi l fe la nueg remaner

la donzela, cui Dieus ampar.

E non oblidet c'al colgar,

cais qui s vai d'autr' afar parlan,

a si dons non demandes tan

qu'en las novas la fetz venir.

Mas cela que s'en pres albir

aissi com s'era trop sabens

leva la ma, fier l'en las dens

que l sanc li'n fetz issir manes.

"Vai," fai s ela, "maldicha res,

vils senes sen, que vos m'auses 

parlar de tal causa, c'ades

non o compresets ses devet."

E la donzela s'en calet

e tenc se per envilanida

e dis qu'anc mala fo ferida,

que sa domna re non auzi.

Aisi remas tro al mati

que tug levan per la maiso.

E l cavaliers, can vic sazo

c'a si dons degues mai plazer,

josta lei s'anet assezer,

e tornet li a son deman:

mas no l'en calc anar enan;

c'al comensar auzi tal re

que per tot cant hom el mon ve

non ausera mai dir un mot

mai sol aitan, e fon fag tot,

com cels c'apenas s'asegura:

"Cortezia non es als mas mesura,

e vos, amors, no saupes anc que s fos;

per qu'ieu serai tan plus cortes que vos,

c'al maior brui celarai ma rancura."

“E vos o faitz, qu'ieu no n ai cura

mas que denan mi vos ostetz,"

dis la domna, "e que pensetz

d'autre vostr' afar per ja mais."