Raimon de Castelnou.
7226.
Ges, si tot estan suau
Cels qui solion cantar
No lais qu'ades alegrar
No m volha si com solia;
Qu'ancse m platz que cant' e ria,
E tenga solatz e joia,
Si tot pez' à la gen croia.
De dieu e d'amor me lau,
Qu'els me fan jauzen estar,
E tot en patz suffertar
So don autre s plangeria:
E per els jau tal amia
Cui platz mos bes e ma joia,
Tan qu'ieu pretz mens la gen croia.
E si ls aug ieu totz à frau
Pro vetz de me mal parlar,
E de mon joi rancurar.
E si quascus d'els sabia
Lo be que m creis quascun dia,
E la honor e la joia,
Veiratz mazan de gen croia.
E ja miei enemic brau
No m cujon de joi ostar,
Qu'enans me fan esforsar;
Don lor creis ir' e feunia,
E vilana gelozia,
A mi benanans' e joia:
Qu'aissi m vengi de gen croia.
Mas cels en cui pretz s'enclau
Am ieu e dei ben amar,
Qu'on plus me veiran montar
En bes e mais lor plairia.
A mi platz lor cortezia
Lor creissemens e lor joia,
Don fan languir la gen croia.
Domna, cel qui vos mentau
Volh be qu'ieu aia'l cor clar,
Qu'ades quan vos aug nomnar
M'es vejaire qu'ab vos sia.
E si m soi ieu tota via,
Qu'el cor es ab vos en joia
Qu'es londana de gen croia.
Mos pas ades se cambia
De ben en miels tota via,
Qu'ilh es fontana de joia
E ditz mat à la gen croia.
