Bonifaci Calvo.
ni car tengutz entr' esta gen savaia
genoeza, ni m platz ges s'amistatz,
car no i cab hom, a cui proeza plaia.
Mas ab tot so mi peza fort qu'il es
desacordanz, car s'il esser volgues
en bon acort, sos granz poders leumen
sobrera totz cels per cui mal en pren.
Hai, Genoes! On es l'autz pretz honratz
qu'aver soletz sobre l gen, que par qu'aia
totz vostres faitz decazutz e sobratz
tan fort que totz vostr' amics s'en esmaia?
Sia l descortz, qu'entre vos es, jos mes,
e donatz vos luec a tornar los fres
en las bochas de cels que, per conten
qu'avez mest vos, si van desconoissen.
Mas lo contenz es tant mest vos poiatz
que, s'el non chai, greu er que no us dechaia;
qu'om vos guerreia, vos vos guerreiatz;
e qui vos venz, ar no's cug que l n'eschaia
laus ni bon pretz; car no us platz vostres bes;
que l'us a gaug quant a l'autr' es mal pres:
doncs qui venz tan descabdelada gen,
non fai esfortz don pueg em pretz valen.
E si no fos la follors e l peccatz
que nais del vostre descort, tals s'asaia
leumen a far so que mais vos desplatz,
que us for' aclis; car res tant non esglaia
vostres guerriers, ni tant lor desplai ges,
con faria l vostr' acortz, s'el pogues
entre vos tant durar enteiramen
que poguessetz d'els penre venjamen.
Car il sabon que leger no us donatz
de vos venjar, mostron que lur desplaia
zo que pro vetz los avetz malmenatz,
tant que greu es luecs on hom no l retraia
que trenta d'els non esperavon tres
de vos; per c'ab pauc non es Dieus repres,
car de tal guiza vos a tout lo sen
que us sobron cil que no valon nien.
Venecian, ben sapchatz qu'obs vos es
que si' ab vos Dieus contra ls Genoes,
car ab tot zo qu'el vos hi val granmen,
vos an il tout tant qu'en vivetz dolen.
