Pièces attribuées à divers auteurs par un égal nombre de Mss.
Pere de Blai. 3794.
Brunenc ou P. de Brau 7226.
En est son fas cansoneta novella;
Novella es quar eu cant de novel;
E de novel ai cauzida'l plus bella,
Bell' en tot sens, e tot quan fai es bel:
Per que m'es bel qu'ieu m'alegre m deport,
Quar en deport val pauc qui no s deporta.
Jois deporta mi quar am domn' isnella;
Isnella es sella que m ten isnel:
Isnel cor n'ai quar tan gen si capdella,
Qu'il capdella mi ses autre capdel,
Que mais capdel no quier mas per conort:
Per gienh conort qu'om no s pes qui m conorta.
Be m conorta sella qu'es fin' e franca,
Que franca m'er tostemps e m tenra franc:
Franc n'ai lo cor, qu'ab autra non s'estanca,
Ni s'estanca d'amor on son li stanc.
Qu'aissi m'estanc quais que alhor m'enten;
Mas lai enten, vas on qu'alhors entenda.
Quecs entenda que m'amors no s'esbranca,
Qu'enans branca e creis e bruelh' en branc;
Que'ls brancs son fi d'amor clara e blanca
Per vos blanca domna, quar anc cors blanc
Tan blanc no vi quo'l vostre, don aten
Un tal aten que no m plai qu'autr' atenda.
Doncs l'atenda volhatz, domna, qu'eu prenga;
E prenga vos merce del mal qu'eu prenc:
Quar prenc en bel maltrag que de mi s venga,
Ara s venga del gran be que m'en venc;
E quar m'en venc, ieu sofrisc e dezir
U tal dezir que mos cors mout dezira.
Fort dezira qu'eu ab leis plan emprenga
E'l prenga breu, qu'eu n'ard totz e n'esprenc;
Que tant m'esprenc que paor ai qu'estenga.
Ans qu'estenga mas mas junchas li stenc:
E quan m'estenc que lai los olhs no vir,
Lo cor lai vir si que alhors no s vira.
Lai te vira, canso, on mon cor tenc,
Quar de leis tenc tot lo sens e l'albir;
Qu'al meu albir morrai si no s n'albira.
Si s'albira'l gai solatz que m covenc
Tal re m covenc don dei l'afan suffrir;
Qu'eu volh suffrir so qu'autr' om no suffrira.
Bernat de la fon. 7226.
Bernat de Ventadorn. 7698.
Leu chansoneta d'entendre
Ab leu sonet volgra far,
Condet' e leu per apendre,
E plan' e leu per cantar:
Car leu m'aven la razo
E leu latz los motz e'l so,
Per so m'en vuelh leu passar:
Quar de plan e leu trobar
Nuls hom no m pot leu reprendre.
Totz hom qui vol leu reprendre
Leu es repres de parlar;
E qui trop leu vol contendre
Ben leu trobat n'a son par;
E qui mal ditz à lairo,
En dobl' en deu guizardo
Per dreg à prezen cobrar:
Mas ieu per negun afar
No m vuelh en mal dir emprendre.
L'escut e'l basto vuelh rendre
E m vuelh per vencut clamar,
Ans que ves domna defendre
M'avenha ni guerrejar.
Per so la lieis cui hom so
Dei aver franc cor e bo
Per totas domnas honrar;
E si no m ditz mon pezar
Ieu no m dei à lieis atendre.
No dei mos bels ditz despendre
En bona domna blasmar.
Si'l cor m'en devia fendre,
No m'en sai estiers venjar
Mas que l'an querre perdo.
Qu'apres ai sen de Cato,
Qu'ab gent sufrir dei sobrar
Mon amic s'iratz mi par:
Qu'aissi torna'l fuecx en cendre.
Si fin' amors vol deissendre
En leis que m fa tant amar,
Qu'ins él cor merce l'ingendre,
Far hi pot son benestar.
Pus m'a mes en sa preizo
No l lais aver cor fello
Ves mi, que res ajudar
No m pot s'elha m desampar,
Qu'à merce no m vuelha prendre.
Chanso vai midons pregar
Que son befag plus tarzar
No m vuelha ni trop car vendre.
Qu'ieu no l'aus merce clamar;
Mas à sol lo sospirar
Pot be mon fin cor entendre.
Si m puesc à sos pes gitar,
Ja no m'en volrai levar
Tro m denh sas belas mans tendre.
Ogier Niella 7226.
Sainsir (Saint-Cyr) 7698.
Per vos bella douss' amia
Trag nueg e jorn greu martire
Que d'als no pes ni cossire,
Ans vai doblan totavia
L'amors e la bevolensa.
Per qu'ieu ai gran temensa
Que'l dezirier m'aucia,
Q'on plus vos bais, doussa res, e vos toc,
Ieu m'en vau plus prion en aissel foc.
En plus franca senhoria
No pogra mon cor assire;
Qu'ieu no cre qu'él mon se mire
Domn'ab tan de cortezia,
Ni que de beutat vos vensa:
E non ai ges crezensa,
Per nulha ren que sia,
Puesca garir s'ieu no complisc lo joc,
E visques tan cum Eli' et Enoc.
Ai! quantas vez plor lo dia,
E quantas vez mi fai rire
L'amors que m vens e'l dezire
E m destrenh lo cor e m lia,
E'l vostr' onrada valensa
Fez en mon cor semensa
Plus que far non solia.
Ara sai eu qu'ieu ai begut del broc
Don bec Tristans, q'anc pois garir non poc.
Vostr'om sui ses tricharia
E sius platz podetz m'aucire;
Q'hom no m'en pogra devire
Qui'l cor del cors no m trazia.
Quar en vos nais e comensa
Beutatz e conoissensa
Mielhs q'hom dir no poiria,
Que tan destrenh mon fin cor en un loc,
Ben a tres ans qu'anc d'un voler no s moc.
Ni ja als jorns de ma via
Non serai d'autra jauzire.
Tant vos sui hom e servire,
Francs e leials ses bauzia,
Que ses la vostr' atendensa
No volgr' aver Proensa
Ab tota Lombardia.
Quant m'auretz dat so don m'avetz dig d'oc,
Serai plus rics que'l senhor de Maroc.
Al emperair' agensa
E ten à cortezia,
Quant hom li quer, autrejar e ditz d'oc,
Mas ja als faitz no s pren ren qui no l loc.
