Jeu-parti entre Guilhem Augier et Guilhem.
"Guilhem, prims iest en trobar a ma guiza;
troban volh doncs saber
ta voluntat, pos sai tan l'aias miza:
Cal volgras mais aver:
esser rics de terr' e d'aver
entre ls plus rics, o la sciens' apriza
ab lo saber que las set artz deviza?"
"Mais volgr' aver la sciensa conquiza,
que m degues remaner,
que la rictat, que cauza es deviza
c'als rics pot pauc valer,
e leu pot hom d'aut bas cazer.
E ill sciensa non chai, pos s'es assiza:
cel c'a l saber, es rics en sa camiza."
"Cel qu'entre ls rics a gran ricor pleneira
vol e quier plus en sus,
que cen savis pot metr' en una teira,
a chascun donan plus;
c'Aristotils sobre ls prims clus
pres dons, e cel que jatz en la ribeira
lai a Napols: mais am donar que queira."
“Ges per lenga polida, gen parleira,
n'Augier, non lais mon us,
que sciensa vai totas vetz premeira,
tenen los rics enclus,
c'Aleissandre venquet Porus,
e sa gran ost el tornet en paubreira
ab son saber, per qu'ensec en cadeira."
"Guilhem, si l rics pot perdre manentia,
creisser pot atressi,
per que l destrics contra l creisser pars sia;
e l segles vai aissi,
que lo rics viu et a la fi
pot dar als seus tot lo mon, si l'avia,
so c'al savi Deus no volc donar mia."
“L'artz e l sabers c'Aristotils avia
viu, sitot el mori,
e porton l'en man prim clerc garentia,
e l'escriptura di
c'a Salomo pres enaissi
qu'el ac lo sen e l rictat en bailia;
ab lo sen si fes tot quan far volia."
“Aisso que Deus dis ni parti
non part eu ges; mas Frans' aver volria
e l'emperi mais que saber que sia."
"N Augier, no us acordatz a mi,
que paubres es qui mais aver volria;
sens sobre si non cerca manentia."
"Sens de natur' e de lati
a en Romeus, e plai li que rics sia,
e preguem li que d'aquest plag dreg dia." -
En Romeus per jutjamen di
que mais val sens que non fai manentia;
pero a si ditz que l'aver penria.
