Traduction du livre de Sydrac. Lo rey demanda: "Que val mai a beure, lo vis o lh'aiga?"

Traduction du livre de Sydrac.

Lo rey demanda: "Que val mai a beure, lo vis o lh'aiga?"

Sydrac respon: "Lo vis es una pressioza cauza e digna, e es a salut del cors e de l'arma, quar per lo vi pot hom salvar son cors de moltas malaudias e s'arma d'issamen; quar vis es bos per las savias gens que lo bevo atrempadamen et a razo, e no fan per lhuy nulh outratge a lor ni 

ad autra gen: per que aitals gens aprofiecha mais tro beure vi que ayga. 

Mas als fols, que bevo lo vi folamen, ilh ne gasto e'n perdo lo lor e n'aucio la gen e la deraubo e'n prendo l'autrui cauza, e s'en fan aucire e'n fan bregas e baralhas e d'autras fulhias assatz. Ad aital gen valria mais beure l'ayga de la mar que lo vi, quar no n perdrion lo lor ni lor sen ni farian mal a lor ni als autres. Aitals gens non deuria beure vi, ni drehs ni razos non es que o fasso, quar lo vis no fon pas fahs per els, ans lor es defendutz. Lo vis fai als bos lo cors sa e pur e net coratge, e als malvatz fai malvatz cor e fol, e lo cors n'es destruhs manhtas vetz, per que dizem nos que als bos val mais lo vis et als malvatz l'aygua."

- Lo rey demanda: "Cant hom es ardens de batalhar o d'aver paraulas ab alcuna persona, cossi s'en pot hom esquivar?" 

Sydrac respon: “Cant hom es ardens de batalhar o d'aver paraulas ab alcuna persona, ladonx deu hom cossirar en Dieu, e lhi deu sovenir de s'arma, e no fassa cauza que torne a dampnatge del cors ni a perdecio de l'arma ni ad anta de se ni de sos amix; e deu cossirar en altra cauza e combatre se ab son coratge e gitar cela pessa de se, e si de tot no sy pot refreidar, el sy deu moure fors de la gen e parlar ab si mezeis, e batalhar e menassar ab se mezeis, aissy cum si fos denan sela persona; e sela 

arsura, la quals efla lo cor e lo ventre, sy desenflara per la boca e pels membres e per lai on lo cors dezira a deseflar; et en aital manieira sela arsura si refreydara." 

- Lo rey demanda: "Si fa mal qui si vanta de son peccat?" 

Sydrac respon: "Cilh que de son peccat si vanto son ministre del diable, quar tuh lhi mal veno del diable. E silh que sy vanto de so que lo diables lh'aura aministrat ben, es dreh que sia apelatz ministres dels diables, quar ilh anuncio las obras del diable a la gen; e sel fai gran mal e gran peccat e fay peccar los autres per so vantamen, quar tal peccat aura fah, per aventura, per so vantamen; sel que l'auzira lo fara que ja no l feira, e lo vantaires sera colpables del peccat." 

- Lo rey demanda: "Per que femna sy dona leu joia e leu dol?" 

Sydrac respon: “Femna en aquest segle si dona leu joia e dol per bona 

razo, plus que hom no fa; quar femna a lo sanc e la servela plus leugieiramen que hom, e es aissi coma la syma en l'arbre que s'enclina pel ven ad aquela partida on sy vol; e femna es tals que de petita cauza que veia o auia, ela trembla tota per lo sanc que a; quar la frevoleza de so sen lhi fai tost aver joia e tost dol; e si fos savia coma hom, feira ne hom bailieus e senesquals e jutges e senhors. E per aquesta razo quar non an gaire de sen ni fermetat en lor, ans so volatgas de coratge, sy 

demora a far, quar mantenen descuebri so que aura vist e auzit; e per so sy dona tost joia e leu dol, et enans serion desseubudas cen femnas que us savis hom." 

- Lo rey demanda: "Deu hom anar vezer soen son amic?" 

Sydrac respon: "Certas no; quar tu i poirias anar ta soen que tu lo corossarias e lo enoiarias; mas tu lo deves anar vezer a horas e a sazos, non pas soen, quar toh trop so mal; e per aventura el aura a far al res que de te vezer, e si tu venes adonx, tu lhi venras al desus e faras lhi enuoc. E aisso podem saber per te mezeis: sy tu eras en ton ostal o en autre luoc e fazias tos negossis secretz, tu no volrias pas que nulhs hom 

vengues sobre te, e que fos ancaras tos filhs o tos fraires; atretal faras tu a ton amic, sy trop soen lo vas vezer; mas cant hom vol anar a l'ostal de son amic, hom lh'o deu far a saber, e sel que aissy o fai es cortes e ben essenhatz." 

- Lo rey demanda: "Deu hom far layda cara a son amic, quan ve e son ostal?" 

Sydrac respon: "Si tu es en ton ostal ab ta mainada e tos amix ve sobre te, que ti desplassa, tu no lh deves pas mostrar malvatz semblan; mas deves lhi mostrar bel semblan e far plazer e honor a ton poder; quar tro es mielhs que tu sias corossatz en ton coratge e l sapchas retener per ton amic que si lhi fazias ni lh dizias antas ni verguonha. Car si tu lhi mostras malvatz semblan, tu le corrossaras, et aura ti mala voluntat et 

auras corossat te e lhuy, e pueis t'en repentiras; mas sy tu vols tot so esquivar, fai fermar ta porta, e negus no si poyra sobre te metre." 

- Lo rey demanda: "Cossi s pot far que a las vetz .j. hom vencera .iij. homes o .iiij., e alcuna vetz sera vencutz per un sol?"

Sydrac respon: "Batalha es coma Dyeus, quar silh que Dyeu crezo et adoro de tot lor cor e so servizi fan, non an en autra cauza lor entendemen ni lor pessa, ni aver no la devo. Tot atretal deu far cel que batalha fai, quar el deu lo cor e l coratge e sa pessa metre entieiramen en la batalha, e deu oblidar de tot en tot sos autres negossis, e molher e 

efans e sa riqueza, e deu cossirar cossy vencera sa batalha. E si el es caitieus ni paorux, el sera vencutz." 

- Lo rey demanda: "Es santatz de manjar totas viandas?" 

Sydrac respon: "Totas cauzas que Dieus fetz per manjar so sanas, quar la vianda, que es eferma, non es mas de l'efermetat del cors on intra, e del temps: quan lo cors es sas, so que el manja lhi es sa e bo. E cant el es febles o malaudes, pauc de vianda lhi fai mal; per aisso bona vianda e 

sana no mou mas del cors sa e pur e net; que can lo cors es sas, tota vianda lh'es bona e sana; e al cors malaude pauc de vianda lhi notz." 

- Lo rey demanda: "Quals so las gens que plus si vanto del mon?"

Sydrac respon: "Aquilh que mai si vanto que gens del mon, so son tres manieiras de gens. Prumiers fols vielhs que is vanta de sa joventut e recomta de son cors, cant el era joves, vertatz o messongas, e recomta sas baudors e sas fulhias, e si vanta de sa gaieza e de sa pessa, que las gens l'en crezo; e non cuia pas que aquilh a cuy o comta l'en chuflo ni 

l'escarnisco. La segonda manieira es de fol estranh que recomta bordas e fulhia, que el a estat e son pais rix e manens, o que sia vertatz o no: per un que l'en cre, dos non o crezo. La tersa manieira es de ric fol que retraira sas fulhias e sas bordas, e aquilh que l'auzo l'en janglo e lhi bufon en la barba e lh'autreio can que ditz, per sa riqueza.

- Lo rey demanda: "Cossi" ... "las nivols son tant espessas en estieu coma en ivern e aitan escuras e plus altas que en totas las sazos de l'an qu'elas no so e nostras partidas ... d'autra gen, que de totas las sazos de l'an non falho ja mais ni en ivern ni en estieu. Quar can lo firmamens fai son torn e so movemen e l solelhs pren son altre torn, fa estieu a nos e yvern als autres jens del mon. E cant el fa son autre torn, fa estieu ad aquels e yvern a nos; en tal manieira no falhira ja mais yverns ni estieus al mon de tota sazo de l'an. E aquel torns que l solelhs fai, non es ges de la montansa d'una pena; la alteza del firmamen nos apareys e regardamen." 

- Lo rey demanda: "Cossi una nivols apar petita, cossi esdeve tan grans 

que cuebri gran cantitat de la terra?" 

Sydrac respon: "La nivols que apar petita a la vista a son cors es molt 

grans, mas sa grandeza hom non pot saber per la alteza que a, per que par a sa semblansa petita a la vista; e pauc e pauc s'asembla e esdeve grans, et efla aissi la petita nivols sa grandeza encontra lo cel en aut, e hom no la pot vezer. Mas per so que es encontra davas nos e s'espieissa, hom no la pot pas vezer ni de lonc ni de travers, e per sa alteza lo vens la fer e enfla e la fai creisser e espandre e cazer e ploure en la terra et abeurar les bes que y so. E non entendatz que sela ayga venha ni yesca de l'aire, ans y monta de la mar, e a la vetz del fum que la terra geta, e esdeve neula e plueia aissy cum vos podetz vezer."

Guiraut Riquier. Pus astres no m'es donatz + Amors m'auci, que m fai tant abelhir +++

Guiraut Riquier.

I.

La primeira retroencha d'en Guiraut Riquier, facha en l'an 1270.

Pus astres no m'es donatz

que de mi dons bes m'eschaya,

ni nulhs mos plazers no l platz,

ni ai poder que m n'estraya,

ops m'es qu'ieu sia fondatz

en via d'amor veraya;

e puesc n'apenre assatz

el Cataluenha la gaya (en Cataluña, Catalunya la gaya, alegre)

entre ls Catalas valens (entre'ls catalans valens)

e las donas avinens. (y les dones avinens : majes)

Quar dompneys, pretz e valors,

joys e gratz e cortezia,

sens e sabers et honors,

belhs parlars, bella paria

e largueza et amors,

conoyssensa e cundia

troban mantenh e socors

en Cataluenha a tria

entre ls Catalas valens

e las donas avinens.

Per qu'ieu ai tot mon acort

que d'elhs lurs costums aprenda,

per tal qu'a mon Belh Deport

done razon que m'entenda,

que non ai autre conort

que de murir me defenda.

Et ai cor, per penre port,

qu'en Cataluenha atenda

entre ls Catalas valens

e las donas avinens.

E s'ieu entr' elhs non aprenc

so per qu'amors guazardona

servir als sieus, don dan prenc,

no y a mas qu'om me rebona;

quar tant d'afan ne sostenc,

que m'a gitat de Narbona.

E per gandir via tenc

en Cataluenha la bona

entre ls Catalas valens

e las donas avinens.

Tan suy d'apenre raissos

que d'amar ai fallensa,

que nulhs pessars no m'es bos

may selh qu'als verays agensa;

e quar no l say ad estros,

vau per bona entendensa

querre e trobar cochos

en Cataluenha valensa

entre ls Catalas valens

e las donas avinens.

(N. E. ¿En qué lengua se entendería Guiraut Riquier con los catalanes valientes y las mujeres majas? Pues en occitano, está clarísimo.)

II. 

Breu doble d'en Guiraut Riquier, l'an 1265.

Amors m'auci, que m fai tant abelhir

sella que m plai; quar neys no m n'eschai gratz,

ni ai poder ni cor qu'allor me vir,

et es ma mortz qu'ieu ben am, non amatz,

per que mos chans diversa.

Mout ai chantat, que anc no plac auzir

a lieys qu'ieu am: per que m suy acordatz,

pus mas chansos ab precx no vol grazir,

qu'est breu doble fassa, e si li platz,

tenrai via traversa.

Nueg e jorn pes co pogues avenir (nit y día penso com puguera avindre)

en far son grat; per que m suy assaiatz

en tans chantars; qu'estiers non li aus dir (tans, no tants)

los mals qu'ieu tray; et on pus suy sobratz,

yeu la truep pus enversa.

Mos Velhs Deportz, est noms me fa mentir,

qu'ab desconort lo dic; quar no m'aidatz,

mos dobles mals se tersa.

III. 

Serena d'en Guiraut Riquier, l'an 1263.

Ad un fin aman fon datz

per si dons respiegz d'amor,

e l sazo s e l luecx mandatz.

E l jorn que l ser dec l'onor

penre, anava pessius

e dizia sospiran:

"Jorns, ben creyssetz a mon dan,

e l sers

auci m e sos loncx espers."

Tant era l'amans cochatz

de la deziran ardor

del joy que l'er' autreyatz,

qu'elh se dava gran temor

que l ser non atendes vius.

E dizia sospiran, etc.

Nulhs hom non era de latz

a l'aman, que sa dolor

no conogues, tant torbatz

era ab semblan de plor;

tant li era l jorns esquius.

E dizia sospiran etc.

Mout es greu turmen astratz

a selh qu'ab nulh valedor

no s pot valer; donc gardatz

d'est aman, en qual langor (d'este amán)

era l jorn d'afan aizius.

E dizia sospiran:

"Jorn, ben creysses a mon dan, (día, be creixes al meu mal; daño)

e l sers

auci m e sos loncs espers."

IV.

E car diversamen

auch pages apelar,

si com sabon uzar

per obras o per als;

e dels menestairals (menestrals)

aug lo meteis semblan; (escolto lo mateix)

dels mercadiers, que van

o estan, atertal (atretal, autretal)

(mas dels borzes no m cal

aras parlar estiers);

et aug los cavaliers

diversamen nomnar,

e ls clergues apelar,

com hom pot, pus onran,

los noms divarian.

E, si us ai dig desus,

dic que l devers e l'us

son per dreg acorsat,

qu'en generalitat

a trops especials,

que cascus generals

per alcuna razo,

si com de regio,

terras, vilas e gens,

e tot propriamens

es per dever nomnat:

per que m'ai albirat

que fora covinen

de uzar eissamen

de noms entre joglars.

Que non es benestars

car entr' els li melhor

non an de nom honor 

atressi com de fach.

Qu'ieu ne tenc a maltrach

c'us homs senes saber

ab sotil captener,

si de calqu' estrumen

sab un pauc de prezen,

s'en ira el tocan

per carrieiras, sercan

e queren c'om li do;

o autre, ses razo,

cantara per las plassas

vilmen, et en gens bassas

metra queren sa ponha,

en totas, ses vergonha,

privadas et esternas;

pueys ira s n'en tavernas,

ab sol qu'en puesc' aver;

e non auzan parer

en deguna cort bona.

Car hom aquels mensona

ses autre nom joglars,

ni sels, que trasgitars

es lor us ses als far,

ni cels que fan jogar

cimis ni bavastels,

ni d'autres, que capdels

bos non lur es donatz.

Car per homes senatz,

sertz de calque saber,

fon trobada per ver

de premier joglaria,

per metre ls bos en via

d'alegrier e d'onor.

L'estrumen an sabor (los instrumens)

d'auzir d'aquel que sap

tocan issir a cap, (issir : eixí, ixí, eissí)

e donan alegrier:

per que l pro de premier

volgron joglar aver,

et enquer per dever

n'an tug li gran senhor.

Pueis foron trobador,

per bos faitz recontar

chantan e per lauzar (cantán y pera alabá; loar)

los pros et enardir

en bos faitz: car chauzir

los sap tal que no ls fa

ni jes dever non a

del far, tal los ensenha:

per qu'ieu, que qu'en avenha,

no m puesc tener del dir.

Aisi a mon albir

comenset joglaria,

e cadaus vivia

ab plazer entre ls pros.

Mas er es tals sazos,

et es lonc temps avuda,

c'una gens s'es moguda

ses sen e ses saber (sense señ y sense sabé, sabiduría)

de far, de dir plazer,

e senes conoissensa, (y sense coneixensa, coneiximén)

que prendo captenensa

de cantar, de trobar

o d'esturmens tocar

o d'als, ses tot dever,

ab que puesca querer,

per enveia dels bos.

E son tan tost gilos,

can vezo ls bos onrar

als pros, e ve'n afar

mantenen del maldir.

E no s degra sofrir

per ren a mon semblan.

E vey que hom los blan

e ls tem may que ls senatz.

E pueis tant es baisatz

lo noms de joglaria

d'onor, que no y solia

caber aquela gens,

es me greu dels sabens

trobadors; car clamat

non an el temps passat

so qu'er m'avén a dir: (se troben mol poques tildes)

que fesson devezir,

a cui que mielh taisses,

que cascus nom n'ages

per so que saupra far,

e tuch fosson joglar

en general estar

per sol un fag a far,

si pus non y agues,

si com es de borgues.

V.

En son palays, on ela vay jazer,

ha cinc portals, e qui ls dos pot hubrir, (obrí; abrir)

greu passa ls tres, mas leu n'es per partir;

e viu ab gaug sel que y pot remaner;

e poia y hom per catre gras mout les, (cuatre grasons, escalons)

e no y intra vilas ni mal apres,

c'ab los fals son el bari albergat,

que ten del mon pus de l'una mitat. 

Mout y ay cossirat

d'aquest palais, cals es,

e trobi en mon pes

c'aiso es la persona

de cui l'azautz s'adona

en l'autra per vertat.

E l portal perilhat

son aquist que us vuelh dir:

far saber lo dezir,

per amoros semblans

o per ditz mout doptans,

per si o per autrui.

Pero mielhs es de lui,

si s pot gent ayzinar;

car amors ses selar

non pot venir a port.

Veus lo premier trop fort

e perilhos d'intrar!

E l segons es, so m par,

d'umils precx perceubutz,

que sia retengutz

per servir ad honor:

aquest deu far temor

e dopte gran d'obrir.

E l ters es per ver dir

servirs ab gran aizina,

que vezis ni vezina

non la puesca saber,

conoisser ni vezer;

car mout grans perilhs es.

E l cartz es mout cortes:

so es baizars de grat.

E si fos costumat

c'om remazes aqui,

l'amors non agra fi

ni morira tan leu.

Mas lo quinz es trop greu,

qu'es lo faitz, per que mor

l'amors c'om te al cor

entro qu'en es passatz.

E'n Guirautz com senatz

dis o cubertamen.

Le palais d'avinen,

on amors vay jazer,

es sert, al mieu parer,

la persona amada;

e l cinc portal d'intrada

son silh que dig vos ai.

Mas dels portals dis mai

en Guirautz ses mentir:

e qui ls dos pot hubrir,

greu passa ls tres, mas leu n'es per partir.

Mout o saup azaut dir;

car tug son perilhos

li trey, ab que pels dos

sia hom leu intratz.

E qui ls a totz passatz,

a issir lo'n cove,

pus son dezir a ple,

co vos ai dig desus. (desus, dessus, de suso, amún)

Mout o dis bel e clus

selh qu'en sabia l ver:

e viu ab gaug sel que y pot remaner.

El o dis, car poder

del remaner non ha

negus, pus que l desva

sos dezirs, com dig es.

E pueia y hom per catre gras mout les.

Ver dis, segon que m pes,

e que truep cossiran.

Li gra son benestan:

le premiers es onrars,

e l segons es selars,

e l ters es gen servirs,

e l quartz es bos sufrirs.

E cascus es mout lens

tan que i pueia greumens

hom ses elenegar.

E ditz vertat e par

selh que la chanso fes:

E no y intra vilas ni mal apres.

Ver dis, que l descortes

vilan, mal essenhat,

mal noirit, empachat

no y intran per poder

el palais, on jazer

vai amors, ni 'saiar (essaiar: probá, ensayá)

non auzan de puiar (no osen de pujá)

los grazes per lunh fag;

ni cre c'us s'en empag,

car de lor no s cove.

E dis enquer trop be

so de que ditz vertat:

c'ab los fals son el barri alberguat

que ten del mon pus de l'una mitat.

Ben ditz sa voluntat

e pogra de mais dir,

que las nou partz m'albir

que l barris ten del mon,

e que tug aquel son

albergat malamen.

Barris es veramen

ditz so que foras vila

es bastit senes guila

entorn e pres del mur,

per so que pus segur,

tot cant y es estia, -

que ben leu no faria, -

e pus assolassat.

El barri son poblat

silh que venon derrier.

E y so fag li palhier,

escuras e boals,

e y fa hom los cortals,

per tener bestiar. (y s'hi fan los corrals pera tindre bestiá)

Car greu veyretz estar

en barris los melhors

homes dels locx ausors,

ans son mout gen cazat.

Per que fon comparat

a barris gent e be.

Ad ayso no m cove

pus dir, c'assatz s'enten,

mas que dey belamen

de la quinta parlar

cobla, segon que m par. 

en declaran lo ver.

Arnaut de Carcasses, novas del papagai. Dins un verdier de mur serat

Arnaut de Carcasses, nouvelle. novas del papagai.

 

 

 

 

Dins un verdier de mur serat

a l'ombra d'un laurier folhat

auzi contendr' un papagay

de tal razo com ye us dirai.

Denant una don' es vengutz

et aporta l de lonh salutz

e a l dig: “Dona, Dieus vos sal,

messatje soy, no us sapcha mal

si vos dic per que soy aissi

vengutz a vos en est jardi.

Lo mielher cavayer c'anc fos,

e l pus azautz e l pus joyos,

Antiphanor, lo filhs del rey,

que basti per vos lo torney,

vos tramet salutz cen mil vetz

e prega us per mi que l'ametz,

car senes vos no pot guerir

del mal d'amors que l fay languir,

e nuilhs metges no ilh pot valer

mas vos que l'avetz en poder.

Vos lo podetz guerir, si us platz;

sol que per mi li trametatz

joya que l port per vostr' amor,

l'auretz estort de sa dolor.

Encara us dic mays per ma fe

per que l devetz aver merce:

car, si us play, morir vol per vos

mays que d'autra viure joyos."

Ab tan la dona li respon

et a li dig: "Amic, e don

sai es vengutz e que sercatz?

Trop me paretz enrazonatz;

car anc auzetz dir que dones

joya ni que la prezentes

a degun home crestia,

trop vos es debatutz en va.

Mas car vos vey tan prezentier,

podetz a mi, en sest verdier,

parlar o dir so que volres,

que no y seretz forsatz ni pres.

E peza m per amor de vos,

car es tan azautz ni tan pros,

car m'auzetz dar aital cosselh."

"Dona, et ieu m'en meravelh

car vos de bon cor non l'amatz."

“Papagay, be vuelh que sapjatz

qu'eu am del mon lo pus aibit.”

"E vos cal, dona?" "Mo marit."

“Jes del marit non es razos

que sia del tot poderos:

amar lo podetz a prezen;

apres devetz seladamen

amar aquel que mor aman

per vostr' amor, ses tot enjan."

"Papagay, trop es bels parliers;

par me, si fossetz cavayers,

que jen saupratz dona preiar.

Mas jes per tan non vuelh laissar

qu'eu no us deman per cal razo

dey far contr' aissel trassio

a cuy ay plevida ma fe."

"Dona, so vos dirai yeu be:

amors non gara sagramen,

la voluntatz sec lo talen."

"Vos be dizetz, si Dieus m'aiut;

ab tan vos ai yeu doncx vencut,

qu'eu am mo marit may que re

que si' el mon, de bona fe,

e lunh autr' amador no vuelh.

Com auzatz dir aital erguelh

qu'eu am la on mos cors non es?"

"Dona, erguelh non dic yeu ges;

par me que us vulhatz corrossar.

Pero, si m voletz escotar,

ja per razo no us defendretz

d'Antiphanor que non l'ametz.

Be us dic que dreitz es veramen

que devetz amar a prezen

vostre marit mays c'autra re;

apres devetz aver merce

d'aissel que mor per vostr' amor.

No vos membra de Blancaflor

c'amet Floris ses tot enjan,

ni d'Izeut que amet Tristan,

ni de Tisbe cant al pertus

anet parlar ab Piramus,

c'anc nulhs hom non l'en poc tornar?

En lieys vos podetz remirar.

Cal pro y auretz, s'Antiphanor

languis per vostr' amor ni mor?

Lo dieus d'amor e sas vertutz

say que vo n rendran mals salutz,

et yeu meteys, que dezir n'ay

de vos, tot lo mal que poiray,

s'en breu d'ora no m'autreyatz

que, s'el vos ama, vos l'amatz."

"Papagay, si Dieus m'acosselh, 

encara us dic que m meravelh,

car vos tan gent sabetz parlar.

E pus tant me voletz preiar

d'Antiphanor, vostre senhor,

ieu vos reclam pel Dieu d'amor,

anatz vos en, que trop estatz,

e pregui vos que li digatz

qu'eu m'acordaray en breumen

e ilh mostraray tot mon talen.

E si tant es que m vuelh' amar,

d'aitan lo podetz conortar

que pels vostres precx l'amarai

e ja de luy no m partiray.

E portatz li m aquest anel,

qu'el mon non cug n'aya pus bel,

ab sest cordo ab aur obrat,

que l prengua per ma amistat.

E gardatz vos que non estetz:

en sest verdier m'atrobaretz."

Ab tan lo papagays respon:

"Dona," fay s el, "si Dieus be m don,

mot a aisi azaut prezen,

et yeu portar l'ay veramen;

e car avetz tan bel esgart,

saludar l'ay de vostra part.

Dona, sel Dieus que no mentic

vos do d'Antiphanor amic,

e m lays vezer c'abans d'un an

l'ames de cor ses tot enjan."

Ab tan parton lor parlamen.

De layns, car ac gran talen

de la don' e d'Antiphanor,

del vergier joyos ses demor

dreg a son senhor es vengutz

e comta l com s'es captengutz:

premeiramen l'a comensat

lo gran pretz e la gran beutat

de la domna, si m'aiut fes;

e d'aisso a fait que cortes.

Pueys li a dig: "Senher, ja mays

non er noiritz tals papagays,

que tan digua per son senhor

com yeu ay dig per vostr' amor.

Dins el verdier m'aney suau:

no volia qu'en mon esclau

se pogues metre nulha res;

may volri' esser soutz que pres.

La dona trobey veramen,

de vostr' amor li fi prezen,

e tramet vos aquest anel,

qu'el mon non cug n'aya pus bel,

ab sest cordo ab aur obrat,

que l prendatz per sa amistat.

E prendetz lo per su' amor,

que Dieus vo n do be et honor.

Mas jes no say per cal razo

non prenguam sonh ni ochaizo

que puscam el verdier intrar:

jes no vos en say cosselhar.

Mas yeu metray foc a la tor

et al solier, per vostr' amor;

e can lo focs er abrassatz,

poiretz intrar per esperatz

ab vostra dona domneyar,

e lieys tener et abrassar."

Antiphanor respon breumen

"Tornatz premier al parlamen

a lieys parlar, si a vos platz:

doncx sestas razos li mostratz."

Ab tan parto s'en ambeduy.

Mot es lo papagays vas luy

fizels amicx e ses enjan.

Vas lo verdier s'en vay volan.

La dona trobet sotz un pi,

saludet la en son lati:

"Dona, aisel Dieus que vos fetz

vos done so que mays voletz

e us gar de mal e d'encombrier,

sol que lo vostre cavayer

vulhatz amar tan lialmen

com el fay vos ses falhimen."

"Papagay, si m'acosselh Dieus,

si trastotz lo mons era mieus,

tot lo daria de bon cor

per l'amistat d'Antiphanor.

Mas aquest verdier es trop claus

e las gardas non an repaus,

devo velhar tro al mati,

car lunha nueg non prendo fi."

"Dona, e no y sabetz cosselh?"

“Ieu no, e no m'en meravelh,

si vos cosselh non y sabetz.”

"Si fas, dona: ar m'entendetz.

Ieu tornaray vas mo senhor,

c'ay laissat cossiros d'amor.

Encar' anueg l'en menaray ...

al pe del mur l'en aduray:

fuoc grezesc portaray, si us play,

ab que metray fuoc al cloquier

et a la tor et al solier.

E cant lo focs sera enpres,

ilh y corran tug demanes,

que l voldran per fort escantir.

E vos no metatz lonc albir:

pessatz de luy e faitz l'intrar;

adoncx poiretz ab luy parlar.

E s'aquest cosselhs vos par bos,

ab mal grat qu'en aya l gilos

poiretz ab luy aver delieg

e jazer ab el en un lieg."

Ab tan la dona ditz: "Platz me,

et anatz lo querre desse."

Ab tan lo papagays vay s'en

vas Antiphanor, que l'aten.

Sobre son caval l'a trobat,

de son garnimen adobat;

elm et ausberg viest sobre si

e caussas de fer atressi;

sos esperos d'aur tenc caussatz,

s'espaza sencha a son latz.

E l papagays li venc denan.

"Senher," fay s el, "al mieu semblan

anueg veiretz aisela re

que may amatz per bona fe.

Vostra dona us manda per mi

c'anetz vas lieys tot dreg cami

viatz, e cavalguatz suau:

lunhs hom no sapcha vostr' esclau,

ni lunha res, ses devinar,

no puesca saber vostr' afar.

Mas foc grezesc nos fay mestier

en ola de fer o d'assier;

ieu l'enpenray entre mos pes,

faitz me l liurar tost et ades."

Antiphanor isnelamen

li'n fay liurar a son talen.

Tan cavalguero per viguor

que la nueg foro prop la tor.

Las gaitas sono pel cloquier,

l'una va e l'autra l'enquier.

Devo velhar tro al mati,

car lunha nueg no prendran fi.

Ab tan Antiphanor dissen,

et a pauzat son garnimen

de pres son caval, tot entier,

mas solamen son bran d'assier

que volc portar senh a son latz;

e no l'es ops, d'aisso m crezatz,

car ses temens' ab cor segur

es vengutz tro al pe del mur.

E l papagays de l'autra part

intr' el verdier, car trop l'es tart

de metre foc, car so senhor

laisset tot sol senes paor.

Denan la dona venc premiers;

aisi com si fos esparviers

s'anet pauzar denan sos pes,

e pueys l'a dig tot en apres:

"Dona, mo senhor ay laissat

al portal maior dezarmat.

Pessatz de luy e faitz l'intrar,

qu'ieu vauc lo castel abrandar."

"Papagay, per mon essien,

fag n'ay ieu tot l'assermamen.

Las claus del castel ai pres mi:

vec las vos sus aquest coissi!

Anatz metre foc al castel."

Anc may no cug per lunh auzel

fos aitan ricx faitz assaiatz,

com aquest er, ni comensatz.

E l papagays seladamen ...

de las la tor prop del terrier

lor vay metre foc al solier.

Devas quatre locx s'es empres,

e l critz se leva demanes:

"A foc!" crido per cominal.

E la dona venc al portal 

e a ubert senes comjat

de las gachas e mal lor grat.

Antiphanor intr' el vergier:

en un lieg dejos un laurier

ab sa dona s'anet colcar.

E lunhs homs non o sap contar,

lo gaug que fo entre los dos,

cals pus fo de l'autre joyos.

Veiaire lor es, so m'es vis,

c'aquo sia lor paradis;

grans gaugz es entre lor mesclatz.

E l focs fo tost azamortatz,

ab vinagre l fan escantir.

E l papagays cuget morir,

tal paor ac de son senhor.

A l'enans que poc venc vas lor

e es se prop del lieg pauzatz

e a lor dig: "Car no us levatz?

Anatz sus e departetz vos,

que l focs es mortz tot ad estros."

Antiphanor ab cor marrit

s'es levatz e pueys li a dit:

“Dona, que m voldretz vos mandar?”

"Senher, que us vulhatz esforsar

de far que pros tan can poiretz

en est segle tan cant viuretz,"

fay se vas el, baiza l tres vetz.

Antiphanor s'en torna leu

com filhs de rey ab son corrieu.

So dis nArnautz de Carcasses 

que precx a faitz per mantas res

e per los maritz castiar

que volo lors molhers garar,

que ls laisso a lor pes anar,

… que may valra,

e ja degus no y falhira.

 

Biographies, Guillems de Capestaing + Peire Vidals + Bertrans de Born

Biographies des troubadours. 

I.

Guillems de Capestaing si fo us cavalliers de l'encontrada de Rossilhon que confinava con Cataloigna e con Narbones. Mout fo avinenz hom de la persona e prezatz d'armas e de servir e de cortesia. Et avia en la soa encontrada una dompna que avia nom ma dompna Sermonda, moilher d'en Raimon de Castel-Rossilhon, qu'era mot rics e gentils e mals e braus e fers et orgoillos. E'n Guillems de Capestaing si amava la dompna per amor, e cantava de lieis e'n fazia sas cansons. E la dompna qu'era joves e gentils e bella e plaissenz si ll volia ben maior que a ren del mon. 

E fon dich a'n Raimon de Castel-Rossilhon. Et el, cum hom iratz e jelos, enqueric lo faich e saup que vers era, e fetz gardar la moilher fort. 

E quand venc un dia, Raimons de Castel-Rossilhon trobet passan Guillem de Capestaing ses gran compaignia, et aucis lo, e trais li lo cor del cors e 

fetz lo portar a un escudier a son alberc, e fetz lo raustir e far pebrada e fetz lo dar a manjar a la moilher. E quand la dompna l'ac manjat, en Raimons li dis aque el fo. Et ella, quand o auzi, perdet lo vezer e l'auzir; e quand ella revenc si dis: “Seigner, ben m'avetz dat si bon manjar que ja mais no n manjarai d'autre.” E qand el auzi so qu'ella dis, el correc 

sobre lieis ab l'espaza e volc li dar sus en la testa. Et ella s'en anet al balcon e se laisset cazer jos, e fon morta. La novella cors per Rossilhon e per tota Cataloigna qu'en Guillems de Capestaing e la dompna eran enaissi malamen mort, e qu'en Raimons de Castel-Rossilhon avia dat lo cor d'en Guillem a manjar a la dompna. Mout en fo grans dols e grans tristezza per totas las encontradas, e l reclams venc davan lo rei d'Aragon que era seigner d'en Raimon de Castel-Rossilhon e d'en Guillem de Capestaing. E venc s'en a Perpignan en Rossilhon, e fetz venir Raimon de Castel-Rossilhon denan si. E quan fo vengutz, si l prendre fetz e tolc li totz sos chastels e ls fetz desfar, e tolc li tot quant el avia, e lui en menet en preisson. Guillem de Capestaing e la dompna fetz penre e fetz los portar a Perpignan e metre en un monumen denan l'uis de la gleiza, e fetz desseignar desobre l monumen cum ill erant estat mort; et ordenet per tot lo comtat de Rossillon que tuit li cavalier e las dompnas lor venguesson far anoal chascun an; e'n Raimons de Castel-Rossilhon moric dolorosamen en la preison del rei d'Aragon.

(Vore Lo Decamerón en chapurriau, Guiglielmo Guardastagno + Guiglielmo del Rosselló)

II. 

Peire Vidals, si com ieu vos ai dig, s'entendia en totas las bonas domnas e crezia que totas li volguesson be per amor. E si s'entendia en ma domna n'Alazais, qu'era molher d'en Barral, lo senhor de Marselha, lo quals volia melhs a Peire Vidal qu'az ome del mon, per lo ric trobar e per las ricas folias que Peire Vidals dizia e fazia; e clamavan se abdui Rainier. E Peire Vidals si era privatz de cort e de cambra d'en Barral plus qu'ome del mon. E'n Barrals si sabia be que Peire Vidals se entendia en la molher, e tenia lo i a solatz e tuit aquilh qu'o sabion e si s'alegrava de las folias qu'el fazia ni dizia. E la domna o prendia en solatz, si com fazian totas las autras domnas, en que Peire Vidals s'entendia, e cascuna li dizia plazer e lh prometia tot so que lh plagues e qu'el demandava; et el era si savis que tot o crezia. E quan Peire Vidals se corrossava ab ela, en Barrals fazia ades la patz e lh fazia prometre tot so qu'el demandava. 

E quan venc un dia, Peire Vidals si saup qu'en Barrals s'era levatz e que la domna era tota sola en la cambra. Peire Vidals intra en la cambra e venc s'en al leit de ma domna n'Alazais e troba la dormen, et aginolha se davan ella e baizet li la boca. Et ela sentit lo baizar e crezet que fos en Barrals, e rizen ella se levet, e vit qu'el era l fols de Peire Vidal e comenset a cridar et a far gran rumor. E vengron las donzelas de lains, 

quant o auziron, e demanderon: "Quez es aisso?" E Peire Vidals s'en issit 

fugen, e la domna mandet per en Barral, e fetz li gran reclam de Peire Vidal, que la avia baizada; e ploran l'en preguet qu'el en degues penre venjansa. Et en Barrals, si com valens hom et adregz, si pres lo fait a solatz e comenset a rire et a repenre la molher, car ela avia faita rumor d'aisso que l fols avia fait: mas non la poc castiar qu'ela non mezes en gran rumor lo fait e cercan et enqueren lo mal de Peire Vidal, e grans menassas fazia de lui. Peire Vidals per paor d'aquest fait montet en una nau et anet s'en en Genoa. E lai estet tro que pueis passet outra mar ab 

lo rei Richart, que lh fo mes en paor que ma domna n'Alazais li volia far 

perdre la persona. Lai estet longa sazo, e lai fetz maintas bonas chansos, recordan del baizar qu'el avia emblat. E dis en una chanso que dis

"Ajostar e lassar,"

que de leis non avia agut negun guizardo: 

"mas un petit cordo;

si aigui, qu'un mati

intrei dins sa maizo

e lh baizei a lairo

la boca e l mento."

Et en autre loc el dis:

"Plus honratz fora qu'om natz,

si l bais emblatz mi fos datz

o neis autreiatz."

Et en autra chanso el dis:

"Be m bat amors ab las vergas qu'eu colh,

car una vetz en son reial capdolh

l'emblei un bais, don tan fort mi sove.

Ai! Tan mal viu qui so qu'ama no ve."

Aissi estet longa sazo outra mar, que non auzava venir ni tornar en Proensa. E'n Barrals que li volia aitan de be, com avetz auzit, si preguet tan sa molher, qu'ela li perdonet lo fait del baizar e lo i autreget en do. E'n Barrals si mandet per Peire Vidal e si l fes mandar gracia e bona volontat de sa molher, e que vengues a sa molher. Et el venc ab gran alegreza a Marselha, et ab gran alegreza fo receubutz per en Barral e 

per ma domna n'Alazais. E autreget li lo baizar en do qu'el li avia emblat, 

[e fo li tot perdonat.] don Peire Vidals fetz esta chanso que ditz:

"Pos tornatz sui en Proensa," 

[la qual vos auziretz.]

III. 

Ben avetz entendutz los mals qu'en Bertrans de Born remembret que l reis d'Arago avia fachs de lui e d'autrui. Et a chap d'una gran sazo, qu'el n'ac apres d'autres mals qu'el avia fachs, si lo lh volc retraire en un autre sirventes. E fo dich a'n Bertran qu'un chavalier avia en Arago, que avia nom (nEspanhols) n'Espanhols, et avia un bo chastel mout fort que avia nom Castellot et era proprietatz d'en Espanhol et era en la frontereza dels Sarazis, don el fazia gran guerra als Sarazis. E l reis si entendia mout en aquel chastel, e venc un jorn en aquela encontrada, e nEspaingnols si lh venc encontra per servir lo e per envidar lo al sieu chastel, e menet lo charamen, lui ab tota soa gen. E l reis, quan fo dedintz lo chastel, lo fetz penre et menar deforas e tolc li lo chastel. -

E fo vertatz que, quan lo reis venc al servizi del rei Henric, lo coms de Tolosa si l desconfis en Guasconha e tolc li be cinquanta chavaliers; e l reis Henrics li det tot l'aver que lh chavalier devian pagar per la reenzo, et el no l paguet, l'aver, als chavaliers, anz l'en portet en Arago. E lh chavalier eissiron de preiso e pagueron l'aver. - E fo vertatz qu'us joglars, que avia nom Artusetz, li prestet dos cens marabotis, e menet lo ben un an ab se e no lh en det denier. E quan venc un dia, Artusetz joglars si si mesclet ab un Juzieu, e lh Juzieu li vengron sobre e nafreron 

Artuset malamen, lui et un son conpanho. Et Artusetz e l companhs auciseron un Juzieu, don li Juzieu aneron e reclam al rei e pregueron lo qu'el en fezes vendeta e que lor des Artuset e l conpanho per aucire, e qu'ilh li darian dos cens marabotis. E l reis los lor donet amdos e pres los dos cens marabotis. E lh Juzieu los feiron ardre lo jorn de la Nativitat de Crist, si com dis Guilhems de Bergueda en un sieu serventes dizen en el mal del rei:

“E fetz una mespreiso

don hom no l deu razonar,

que l jorn de la naissio

fetz dos crestias brusar:

Artus ab autre son par,

e no degra aissi jutjar

a mort ni a passio

dos per un Juzieu fello."

Don us autre, que avia nom Peire joglars, li prestet deniers e chavals, et aquel Peire joglars si avia grans mals dichs de la vielha reina d'Englaterra, la quals tenia Font-Ebrau, que es una abadia, on se rendon totas las vielhas richas. Et ela lo fetz aucire per paraula del rei d'Arago.

E totz aquestz laitz fachs remembret en Bertrans de Born al rei d'Arago en aquest sirventes que dis:

"Quant vei pels vergiers despleiar

los cendatz grocs, indis" et cetera.

___

Lo reis Henrics d'Englaterra si tenia assis en Bertran de Born dedintz Autafort e l combatia ab sos edificis, que mout li volia gran mal, quar el crezia que tota la guerra que l reis joves, sos filhs, l'avia facha, qu'en Bertrans la lh agues facha far, e per so era vengutz denan Autafort per lui deseretar. E l reis d'Arago venc en l'ost del rei Henric denan Autafort. E quan Bertrans o saup, si fo mout alegres que l reis d'Arago era en l'ost, per so qu'el era sos amics especials. E l reis d'Arago si mandet sos messatges dintz lo chastel, qu'en Bertrans li mandes pa e vi e charn, et 

el si l'en mandet assatz. E per lo messatge per cui el mandet los presens, el li mandet pregan qu'el fezes si qu'el fezes mudar los edifizis e far traire en autra part, que l murs on ilh ferian era tot rotz. Et el, per gran aver del rei Enric, el li dis tot so qu'en Bertrans l'avia mandat a dir. E l reis Henrics si fetz metre dels edifizis plus en aquela part on saup que l murs era rotz, e fo lo murs ades per terra e l chastels pres.

E'n Bertrans ab tota sa gen fo menatz al pavilho del rei Henric, e l reis lo 

receup mout mal, e l reis Henrics si lh dis: "Bertrans, Bertrans, vos avetz dich que anc la meitatz del vostre sen no us ac mestier nuls temps; mas sapchatz qu'ara vos a el be mestier totz." "Senher," dis en Bertrans, 

“el es be vers qu'ieu o dissi, e dissi be vertat." E l reis dis: "Ieu cre be qu'el vos sia aras falhitz." "Senher" dis en Bertrans, “be m'es falhitz."

"E com?" dis lo reis. "Senher," dis en Bertrans, “lo jorn que l valens joves reis, vostre filhs, morit, ieu perdei lo sen e l saber e la connoissensa."

E l reis, quant auzit so qu'en Bertrans li dis en ploran del filh, venc li grans dolors al cor de pietat et als uolhs, si que no's poc tener qu'el no 

pasmes de dolor. E quan el revenc de pasmazo, el crida e dis en ploran: "En Bertrans, en Bertrans, vos avetz be drech et es be razos, si vos avetz perdut lo sen per mo filh, qu'el vos volia mielhs que ad home del mon. Et ieu, per amor de lui, vos quit la persona e l'aver e l vostre castel, e vos ren la mia amor e la mia gracia, e vos do cinc cens marcs d'argen per los dans que vos avetz receubutz." E'n Bertrans si lh chazet als pes, referen li gracias e merces. E l reis ab tota la soa host s'en anet.