Raimon de Miraval.
I.
Anc trobars clus ni braus
non dec aver pretz ni laus,
pos fon faitz per vendre
contra ls sonetz suaus,
coindetz, aissi com eu ls paus,
e leus ad aprendre,
ab bels ditz clars e gen claus;
car per far entendre
non cal trop contendre.
Car tan prenon cabaus
domnas entre ls fis los faus,
fan amor deissendre;
mas no m tanh que las caus,
ni del tot en tot no m'aus
vas lor dan estendre.
Car cilh que m ten en repaus
mi fa ls tortz defendre
qu'a mains drutz vei prendre.
Tot quan mi dons vol volh,
et tot quan li platz acolh
en patz ses rancura;
pos alhors no m destolh
e josta leis me despolh
nutz ses vestidura,
aitan tenc de ric capdolh
que bon' aventura
no m pot far fraitura.
Pos tan l'am e la volh,
en trac peitz e plus m'en dolh,
car cilh no n pren cura.
E s'eu anc dis orgolh
vas domnas, aras m'en tolh
e torn a mezura.
E drutz qu'es d'aital escolh
conquier joi, e dura
si'n bon loc s'atura.
No sai per quals mestiers
amon domnas cavaliers.
S'amors me soana,
no m sai gabar estiers,
que meins en par vertadiers
qui totz sos bes vana.
Per qu'eu volh plus volontiers
dir cortez' ufana
que vertat vilana.
Los maiors lauzengiers
tenc vas mi dons plazentiers
e cil que ls apana.
E si l menres portiers
fos tan gais ni bobanciers
qu'auzes vestir grana,
plus fora rics sos dobliers,
qu'en tela rensana
jagr' en sa cabana.
II.
Si tot s'es ma domn' esquiva
ni m mostr' orgolh ni soan,
ges del seu servir no m las;
ans, car eu vas leis non pas,
li trametrai lai on es
chanso faita de merces;
car per solatz e per chan
creis amors e brot' e rama.
Dins el cor me nais la flama
qu'eis per la boc'en chantan,
don domnas e drutz abras.
E lh sonet son dous e bas,
coind' e leugier e cortes,
per que de grat son apres:
que tals amera tiran
que per mos bels ditz s'abriva.
Per la lengua recaliva
so don eu ai pres lo dan
tan, per pauc no n veng al vas
qu'als fals fenhedors escas.
Ensenh so qu'a lor es bes
quan mi degr' esser promes;
si feira, s'eu saubes, tan
com fai cel que re non ama.
Mas fin' amors m'enliama,
qu'en mi non a ponh d'engan,
ni falsetat non amas;
qu'ab tal domna sui remas,
qu'anc no falhi ni mespres
ni non amet dos ni tres;
per qu'eu autra non deman,
ni farai ja tan quan viva.
Mas car crezet gen badiva,
que de mi s'anes lonhan, -
que m'an levat en tal clas
qu'a pauc de joi no m'an ras, -
ma domna no saup que s fes
qu'anc soferc qu'om la m tolgues;
que tal perdera lauzan
que per autra no s reclama.
Mas lo deziriers m'aflama
e s vai cascun jorn doblan,
tan que m poia sobre l nas. -
Cala, fols, trop en diras. -
No farai, qu'anc no fo res.
Ma domn' e ma bona fes
m'en valgues e l tems d'antan,
que me fos d'alques aiziva.
S'a mon Audiart plagues,
tornar volgr' e mon paes
…
vas leis que tot las m'abriva.
Ben l'en deu penre merces,
qu'anc no lh fi que l desplagues
nulha re petit ni gran,
qu'ins e mon cor non escriva.
III.
Be m'agrada l bels temps d'estiu
e dels auzels m'agrada l chans,
e lh folha m'agrad' e ls verjans,
e lh prat vert mi son agradiu;
e vos, domna, m'agradatz cent aitans,
et agrada m quan fatz vostres comans:
mas vos non platz que re m denhetz grazir,
mas agrada us car me mor de dezir.
Per un dezir, domna, reviu,
que m'es de totz dezirs plus grans,
qu'eu dezir que l rics benestans
vostre cors deziran m'aiziu,
que mos dezirs se dobles en baizans;
e pos tan be us dezir ses tots enjans,
ja no m laissetz al dezirier aucir,
que deziran deu hom d'amor jauzir.
Tot jauzir d'autr' amor esquiu,
mas de vos a jauzir m'enans,
qu'eu jau los bes e cel los dans
de vos que m faitz jauzen pensiu.
Tan sui jauzens de vos que nulhs afans
no m tol jauzir, que l vostre bels semblans
m'esjauzis tan que cel jorn que us remir
no posc estar ses gaug, vas on que m vir.
Mas alques an virat mon briu
lauzengier que viro ls amans
e viron las domnas prezans
e maint gai viron en caitiu.
E si us viratz, domna, per mal parlans,
vostre fis cors tem que s'en vir truans,
per que s viron plazer en escarnir,
e grans lauzors se vir' en gran maldir.
Mas eu dic que, si totz temps viu,
totz temps dirai vostres comans,
e si m dizetz: "Vai o non ans",
als vostres bels ditz m'umiliu.
Sol no m digatz que remanha l demans,
que totz mos ditz ne passari' enans,
que per nulh dig, domna, pogues partir
lo cor ni ls ditz ni ls faitz de vos servir.
Per servir en ric senhoriu
es bos servire benanans,
per que us volh servir totz mos ans,
et anc servidor meins antiu
non ac la bel' a cui servi Tristans,
ans vos farai de bels servizis tans,
tro mos servirs me fass' en grat venir
o vos digatz: "Mon servidor azir".
De grat dezir, domna, que us jauzis, ans
que s vir per ditz mos servirs en soans,
que servire, ditz hom, qu'a dreit se vir,
quand om no il vol sos deziriers grazir.
Leial, be m platz de mon Estiu l'enans,
mas de mi dons es la valors tan grans
que eu e tug li devem obezir,
per que no lh vol ges Miravals mentir.
