Raimon Gaucelm de Bezers.
2701, 7226.
A penas vauc en loc qu'om no m deman:
R. Gaucelm, avetz fag res novel?
Et ieu à totz respon ab bon talan,
Quar totas ves m'es per ver bon e bel;
E m plai quant aug dir de mi: aquest es
Tal que sab far coblas e sirventes.
E no per so qu'ieu volha qu'om del mon
Me don raubas, qu'ieu n'ai pro e sai don.
E per so n'ai joi et alegrier gran,
Quar mant home valen me fan cembel
De lor amor e me venon denan.
Qu'estiers nul temps no gazanhei castel,
Borda ni mas, ni'l quart d'un clarmontes,
Ans me costa que val cinc cents tornes:
Mas non o planc, quar d'aval o d'amon
N'aug mais nomnar lo meu frair' en Ramon.
Pero aquel que dis que trop mal fan
Cels que donon ment plus que fals mezel;
Quar qui dona a lauzor on que s'an,
E grat de dieu que'l mon ten en capdel:
Quar ses donar nuls hom valens non es.
Pero val mais lo dos on plus francs es,
Quan caritatz l'adutz à cor volon,
Lai on merce li fai planca ni pon.
Mas negus hom no vei, don m'es pezan,
Qu'à son manjar negun paupres apel;
E sai ne motz que dins lai on estan
S'acluzon plus no fa son past auzel.
E sai prelatz e terriers e borzes
Que s veston quetz quascus de mes en mes,
Que quascus vent sos vestirs à rescon;
Qu'à nul paupre no vei negus aon.
Negus d'aquest no fan ges lo semblan
De San Marti, que partis son mantel
Ad un paupre qu'anava tremolan;
Et es me greu, quar sai qu'estran mazel
Sera d'els fatz lai on la cremor es
Del foc d'ifern; e sai que mal lor es
Quan hom lor ver en cantan lor despon;
Pero mens pres aquel que mais en gron.
Sirventes vai drech camin à Pales
Al mieu frair' en Ramon Gaucelm, quez es
Savis e ferm; et a fin cor volon
De far bos faitz aitan quant hom del mon.
