Uc Catola.
Ms. de Modène, fol. 208 (D).
"Non posc mudar, bels amics, qu'en chantanz
no us enqueira consi m'aven de vos,
qu'estat m'avez adreiz et amoros,
francs et humils e blos de toz enjanz,
e s'aissi es perduz lo bos talanz
que m'aviaz, quant nos partim amdui,
o si per altra m'avez en refui.
S'al prim vos fi ren que no us fos a grat,
si m'aiut Deus, ben o ai car comprat."
"Bella amiga, ensegnamenz es granz
de dompneiar, qui'n sap esser geignos,
que tuit s'ajoston gai e voluntos;
mas al partir en es chascuns blasmanz.
Mas eu de vos sui jauzenz esloinanz,
e vos de mi no vos blasmaz, zo m cui.
Per zo fai ben qui la mala fin fui,
car toz faiz creis en la fin o s'abat,
per c'ab lo ben prenc eu de vos comjat."
//
