30. Isabella ed Elia Cairel. N' Elyas Cairel, de l'amor

30. Isabella ed Elia Cairel.

Secondo la lezione di O, con alcune delle correzioni dello Schultz (Die prov. Dichterinnen, p. 22).

N' Elyas Cairel, de l'amor

qu'ieu e vos soliam aver, 

voil, sius platz, qem digatz lo ver, 

perque l'avetz cambiat aillor:

qe vostre chanz non vai si com solia, 

et anc vas vos nom sui salvatz un dia, 

ni vos d'amor nom demandetz anc tan 

q'ieu no fezes tot al vostre coman. 

Madomn' Eysabella, valor

joi e pretz e sen e saber 

soliatz qec jorn mantener, 

e s'ieu en dizia lauzor,

e mon chantar, nol dis per drudaria, 

mas per honor e pron q'ieu n'atendia, 

si con joglars fai de dompna prezan; 

mas chascun jorn m'es anada cambian.

N'Elyas Cairel, amador

no vim mais de vostre voler 

qui cambges dompna per aver; 

e s'ieu en disses desonor,

eu n'ai dig tant de be q' om nol creiria, 

mas ben podetz doblar vostra folia;

de mi vos dic qu'ades vau meilluran, 

mas endreig vos non ai cor ni talan. 

Domn', eu faria gran follor,

si stes gair' en vostre poder,

e ges per tal nom desesper,

s'anc tot non aic pron ni honor;

vos remanretz tals com la genz vos cria, 

et ieu irei vezer ma bell' amia

el sieu gen cors grail e benistan,

que no m' a cor menzongier ni truan. 

N' Elias Cairel, fegnedor 

resemblatz segon mon parer,

com hom qis feing de dol aver 

de zo dont el no sent dolor.

sim creziatz, bon conseil vos daria 

qe tornassetz estar en la badia;

e nous auzei anc mais dir mon semblan, 

mas pregar n' ei lo patriarch' Ivan.

Domn' Eysabel', en refreitor

non estei anc mattin ni ser; 

mas vos n'auretz oimais lezer,

q' en breu temps perdretz la color. 

estier mon grat mi faitz dir vilania, 

et ai mentit, q'eu non crei q'el mond sia 

domna tant pros ni ab beutat tan gran 

com vos avez, per q' ieu i hai agut dan.

Sius plazia, n' Elyas, ieu volria 

qem disesses qals es la vostr' amia, 

e digatz lom e no i anetz doptan,

q'eus en valrai, s'ela val ni a sen tan.

Dompna, vos m'enqerretz de grant follia,

qe per razon s'amistat en perdria;

qe per paor qe lauzengier mi fan,

pero non aus descubrir mon talan.

Tenson de Pistoleta et d'une Dame.

Tenson de Pistoleta et d'une Dame.

Bona domna, un conseill vos deman

Que m' el dones, que molt m' es grant mestier;

Qu'en una domna ai mes tot mon talan,

Ni nuilla ren tan no desir ni quier;

E diguas me si laudatz que l' enquera

De s' amistat, o enquar m' en sofrieira;

Qu'el reprovier retrai certanamen:

Qui s cocha pert, e consec qui aten.

Seingner, ben dic, segon lo mieu semblan,

Que ben o fai qui bona domna enquier,

E cel sap pauc qui la va redoptan;

Car anc domna no feri cavalier,

Mas s' el no ill platz que s' amor li profera;

No i a plus dan e neguna maniera;

Que bona domna a tan d' enseignamen;

Qu'ab gen parlar s' en part cortesamen.

Domna, eu tem que, si 'l deman s' amor,

Que m responda so que mal me sabra,

E que s' albir son pretz e sa ricor,

E que m digua que ja no m' amara.

Miel m' er, so cre, que il serva et atenda

Tro qu' il plassa que guazardon mi renda;

E digatz me, segon vostre escien,

Si farai ben o s' eu dic faillimen.

Seingner, totz temps fols a folia cor;

Mas cels es fols que la folia fai,

E cant hom sers lai on non a valor,

Pois s' en penet, que nuill gazaing non a;

Ans deu saber que ja gair' en despenda,

Si 'n pot aver guizardon ni esmenda;

E si 'l conois qu' ill aia bon talen,

Serva si dons en patz e bonamen.

Bona domna, pois aissi me laudatz,

Ieu l' enquerai ades senes faillir,

E tenc per bon lo conseill que m donatz,

Ni ja no 'l voill ni camjar ni gequir;

Que ben sabetz del don, senes faillensa,

Si vol amar, o si a entendensa;

E podetz m' en valer veraiamen,

Sol vos plassa, ni 'l cors vos o cossen.

Seingner, e us prec que la domna m digatz

On eu vos puesc' e valer e servir;

E dic vos ben, e voill que me crezatz,

Qu' ie us en sabrai la vertat descobrir,

E far vos n' ai aisina e cosensa

Mantas sasos, s' en leis en trob faillenssa;

E digatz la ades de mantenen,

E non doptetz ni n' aiatz espaven.

Bona domna, tant es cortes' e pros,

Que ben sabetz s' ieu vos am ni us vol be;

Que tal joi ai quant puosc parlar ab vos

Que de ren al no m membra ni m sove;

E doncs podetz saber a ma semblansa

E conoisser... Mon dig vas vos balansa!...

Vos es cella vas cui mos cors s' aten.

Merce, domna, car tan dic d' ardimen!

Pièces diverses. En aissi cum son plus car, (+ Index)

Pièces diverses. 

Chanson attribuée au Comte de Poitiers et a Prebost de Valence.

En aissi cum son plus car,

Que no solon, mey cossir,

E plus honrat mey desir,

Dey plus plazens chansos far.

E s' ieu tan plazen chanso

Fas, que n' ai plazen razo,

Ben er ma chansos plazens

E guaya et avinens,

Qu'el dig e 'l fag e 'l ris e 'l bel semblan

Son avinens de vos, per cuy ieu chan.

Per que m dey ben esforsar,

Ab lauzar et ab servir,

De vostre ric pretz grazir;

E 'n dey Amors merceiar,

Car de mi vos a fag do,

Que be m ren ric guizardo

Dels greus, durs malstraytz cozens,

E dels plazens pessamens

Qu' ieu ai de vos, cuy am e vuelh e blan

E fug e siec e dezir e soan.

Sens mi fai vos soanar, 

Que no m' en mostra jauzir;

Azautz vos mi fay abelhir,

Dompna, e m fai vos dezirar; 

E siec vos, car m' es tan bo, 

Quan remir vostra faisso, 

E us fug pel brug de las gens, 

E us blan, quar etz tan valens,

E us vuelh, e us col per sufrir derenan,

E us am, quar vey qu' a mon cor plazetz tan.

S' ieu volia ben lauzar 

Vostra lauzor, ses mentir, 

E l' honrar e l' aculhir,

E 'l vostre avinen parlar, 

E las beutatz qu'en vos so,

E 'l bel sen e 'l plazen no, 

E 'l ricx guays captenemens,

Ben sabria 'l meyns sabens

Quals etz, per qu' ieu no us vuelh ges lauzar tan,

Cum mostra vers, ni cum ai en talan.

Neys no m' auzi cossirar

Que ja us prec, ni vos aus dir

Si cum faitz jauzen morir,

Ni no m vuelh dezesperar;

Qu'en la vostr' entencio

Suy ricx, pueys ai sospeysso

Qu' Amors, qu' els ricx autz cors vens,

Mi puesca, aitan leumens,

De vos donar so que ieu li deman,

Fin gaug entier, qu' als no 'lh vau demandan.

Belha dona, ges no m par

Qu 'om deya may obezir

Autra del mon ni servir,

En dreg d' amor, ni honrar;

Et a ben plazent razo

Selh qu' es en vostra preizo,

Qu'el vostr' humils, francs parvens

Fai dels cors mortz vius jauzens;

E 'l mal que m datz son ben, e pro li dan,

E l' ira joys, e repaus li afan.

Na Salvatga, mout m' es gens

Vostre ricx captenemens,

Qu'el dig e 'l fag son gay e benestan,

E 'l vostre cors d' aquelh mezeys semblan.

// Index

Giraud le Roux - be m ten en son poders Amors

Rambaud Orange - Assatz sai d amor ben parlar

Pierre Rogiers. Ges non puesc en bon vers falhir

Bernard de Ventadour. Estat ai cum hom esperdutz

Pierre Raimond de Toulouse. Us novels pessamens m' estai

Bertrand de Born. Be m platz quar treva ni fis

Folquet de Marseille. Los mals d' amor ai ieu ben totz apres,

Guillaume Adhemar. Guillems Adhemars. Ben fora oimais sazos e locs

Arnaud de Marueil. La grans beutatz e 'l fis ensenhamens

Bérenger de Palasol. Aital dona, cum ieu sai,

Cadenet. Oimais m' auretz avinen

Rambaud de Vaqueiras. Ja non cugei vezer

Gaucelm Faidit. Moutas sazos es hom plus volontos

Giraud de Borneil. Aquest terminis clars e gens,

Hugues Brunet. Cuendas razos, novelhas e plazens

Pierre Vidal. Mas nos partim dels Catalas,

Hugues de Saint-Cyr. Un sirventes vuelh far en aquest son d' En Gui

Elias de Barjols. Bon' aventura don Dieus

Raimond de Miraval. Selh que no vol auzir chansos

Marcabrus. Pois l' iverns d' ogan es anatz

Deudes de Prades. Trop ben m' estera, si s tolgues

Aimeri de Péguilain. De fin' amor comenson mas cansos

Elias Cairels. Estat ai dos ans Qu' ieu no fi vers ni chanso

Pierre Cardinal. D'un sirventes faire no m tuelh;

Sordel qui-be-s-membra-del-segle-qu-es-passatz

Boniface Calvo enquer-cab-sai-chanz-solatz

Lanfranc Cigala. Ges eu non sai com hom guidar se deia

Serveri de Gironne - Cerverí de Girona

Guillaume Anelier de Toulouse. Ara farai, sitot no m platz

Guillaume Figueira. Del preveire maior

Guillaume de la Tour - qui sap sufrent esperar

Folquet de Romans - Far vuelh un nou sirventes

Albertet de Gap, ou Albert de Sisteron

Raimond Bistors d' Arles. Aissi col fortz castels, ben establitz,

Amanieu des Escas. A vos, que ieu am desamatz,

Dante de Maiano. Las! so qe m' es el cor plus fis e qars

Tenson d' Albert et de Pierre

Tenson de Pistoleta et d'une Dame

Tenson de Lanfranc Cigala et de la Dame Guillelma de Rosers

Tenson de Guillaume Rainols et de Guillaume Magret

Codelet

Vai Hugonet ses bistensa al franc rey aragones

Descort anonyme. Ab son gai plan e car,

Breviari d' Amor, 1288, Matfres Ermengaus de Bezers, Matfre Ermengaud de Beziers

Aysso es le libre de Senequa

La vie de sainte Énimie - Enimia

Les quatre vertus cardinales - Deudes de Prades

Vie de Saint Trophime, Sant Tropheme

Vie de Saint Honorat

Vie de Saint Alexis

Évangile de Nicodème

Évangile enfance - el nom de dieu vuelh comensar

IX, Gausselm, no m puesc estener

IX.

Gausselm, no m puesc estener

Qu' ab vos iratz no m contenda,

Que talan ay que defenda

Las domnas, a mon poder,

Que vos aug descaptener;

Qu' una m rent cortez' esmenda

Que m' avia fag doler,

Per qu' ieu en lor captener

Tanh que mos bels ditz despenda.

Bernart, ben sapchatz de ver

Que non vezem que ben prenda

A nulh qu' en domna s' entenda:

Per qu' ie us o fas ans saber

Que fol vo' 'n fassatz tener,

Ni qu' ela s' amor vos venda;

E no y metatz vostr' aver,

Que ben poiratz dechazer,

S' aviatz mil marcx de renda.

Gausselm, no us detz plus paor

De mi qu' ieu eys ni temensa;

Qu' en tal domn' ay m' entendensa,

Cui ser e prec et azor,

Que sap valer part valor:

Mas vos y faitz gran falhensa,

Quar descaptenes amor;

Qu' amor melhura 'l melhor

E l' aut auss' e 'l gensor gensa.

Bernart, per so n' ay temor

Quar conosc la mens valensa;

Qu' elas ab bela parvensa

Fan lo for del brezador,

E tornon hom en folor;

E quan l' an en lor tenensa,

Segon que dizon l' auctor,

Meton l' en tan gran error

Don ja non aura guirensa.

Gausselm, e com auzatz dir

Qu' enjans sia en amor fina,

Vas cui tot lo mons aclina?

Qu' ela fai gent esbaudir

L' irat, e 'l paubr' enrequir

Ab una cuenda metzina;

Que ja pueis, al mieu albir,

Hom non pot dolor sentir,

Mas ela 'l sia vezina.

Bernart, garda us de trahir

D' esta vostr' amor frairina,

En cui malvestatz s' aizina:

Mas s' ill voletz ben servir

Ni sos talans ademplir,

Corba ill be soven l' esquina;

E gardatz vos al partir

Que no us puesca escarnir,

Qu' ela sap trop de rapina.

Gausselm, en vos no s tayna

Vilas motz ni lagz a dir;

Per qu' ieu vuelh aissi fenir

Ma razo qu' es bon' e fina.

Bernart, anc d' amor canina

No vim nulh home jauzir;

E si no us voletz gequir,

Tira us lo cat per l' esquina.

                Bernard et Gaucelm.