24. Alberto Malaspina, Rambaldo di Vaqueiras. Aram digatz, Rambautz, si vos agrada,

24. Alberto Malaspina * e Rambaldo di Vaqueiras.

Secondo la lezione riprodotta dal Mahn (Werke der Troubadours, III, 183).

Aram digatz, Rambautz, si vos agrada, 

sius es aissi cum ieu aurai apres, 

que malamen s'es contra vos guidada

vostra domna de sai en Tortones,

don avetz fag manta chanson en bada; 

mas ill a fag de vos tal sirventes 

don etz aunitz et ilh es vergonhada, 

que vostr' amors non l'es honors ni bes; 

per qu'ella s'es aissi de vos lunhada.

Albert marques, vers es qu' ieu ai amada 

l'enganayritz don m'avetz escomes, 

que s'es de mi e de bon pretz ostada; 

mas non puesc mais, que ren non l'ai mespres, 

ans l'ai lonc temps servida et onrada;

mas vos e lieis persegua vostra fes 

c'avetz cent vetz per aver perjurada;

per ques clamon de vos li Genoes,

que, mal lur grat lur empenhes l'estrada.

Per dieu, Rambautz, de sous port guerentia,

que mantas vetz, per talen de donar,

ai aver tol, e non per manentia

ni per thesaur qu' ieu volgues amassar;

mas vos ai vist cent vetz per Lombardia

anar a pe, a ley de croy joglar, 

paubre d'aver e malestrucx d'amia; 

e feraus pro qu' ieus dones a manjar;

e membre vos cous trobes a Pavia.

Albert marques, enuej' e vilania 

sabetz ben dir e miels la sabetz far, 

e tot engan e tota fellonia

e malvestat pot hom en vos trobar,

e pauc de pretz e de cavallaria;

per queus tol hom ses deman Val de Tar; 

Peiracorna perdetz vos per follia;

e Nicolos e Lanfrancos da Mar

vos podon ben apellar de bauzia.

Per dieu, Rambautz, segon la mia esmansa, 

fezetz que fols, quan laissetz lo mestier

don aviatz honor e benanansa;

e sel queus fetz de joglar cavallier, 

vos det enuei, trebalh e malanansa

e pensamen et ir' et encombrier,

e tolc vos joi e pretz et alegransa; 

que, pueys montetz de rossin en destrier, 

non fezetz colp d'espaza ni de lansa.

Albert marques, tota vostr' esperansa 

es en trair et en faire panier

enves totz sels qu' ab vos an acordansa, 

e queus servon de grat e voluntier; 

vos non tenetz sagramen ni fiansa; 

e s' ieu no val per armas Olivier,

vos no valetz Rotlan, a ma semblansa; 

que Plasensa nous laissa castanhier

e tol vos terra e non prendetz venjansa.

Sol dieus mi gart, Rambautz, mon Escudier, 

en cuy ai mes mon cor e m' esperansa, 

a mon dan get vos e tot lur enpier, 

sel de Milan ab lur farsida pansa.

Albert marques, tug li vostre guerrier 

an tan paor de vos e tal doptansa, 

qu'il vos clamon lo Marques putanier, 

dezeretat, deslial, ses fiansa.

* Biografia, secondo il testo edito dallo Chabaneau (op. cit. p. 104):

Albertz marques si fo dels marques de Malespina. valenz homo fo e larcs e cortes & enseignatz; e saub ben far coblas e sirventes e cansos.

/ Versión de Raynouard, Choix... /

IV, Er nos sia capdelhs e guerentia

IV.

Er nos sia capdelhs e guerentia

Selh qui guidet tres reis en Betleem,

Que sa merces nos a mostrat tal via

Per que 'l peior venran a salvamen

Que lo segran de bon cor leyalmen;

E qui per terra ni per manentia

Remanra sai mout hi fai gran folhia,

Qu' ieu non tenc ges lo plus ric per manen

Qui pert vergonha e dieu per avol sen.

Guardatz si fai, qui reman, gran folhia,

Qu' als apostols dis Ihesus veramen

Qu' hom lo seguis, e laisses, qui 'l segria,

Totz sos amicx e son ric cazamen;

Ar es sazos fassam son mandamen,

Quar qui lai mor mais a que si vivia,

E qui sai viu pietz a que si moria;

Qu' avols vida val pauc, e qui mor gen

Auci sa mort, e pueis viu ses turmen.

Qui ves la crotz de bon cor s' umilia

Perdon n' aura per la crotz humilmen;

Et ab la crotz delitz tortz e feunia

Nostre senher qui ac franc chauzimen

Del bon lairo, e 'l fellon fetz dolen,

E perdonet Longi qui s repentia,

Et en la crotz salvet selhs que perdia,

E sufret mort per nostre salvamen;

Malastrucx es qui guazardo no 'l ren.

Qui tot quant es de sai mar conqueria 

No 'l te nulh pro, si falh a dieu ni 'l men; 

Qu' Alixandres, que tot lo mon avia,

Non portet ren mas un drap solamen:

Doncx, ben es fols qui ben ven e 'l mal pren,

Ni laissa joi que no falh nueg ni dia,

Per so que pert que non a mas bailia;

So son li fals cobe desconoyssen,

Cui cobeitatz enguana per nien.

Jamais no y s guap negus bars que pros sia,

S' ar no socort la crotz e 'l monumen,

Qu' ab gen garnir, ab pretz, ab cortezia,

Et ab tot so qu' es belh et avinen

Podem aver honor e jauzimen

En paradis; guardatz doncx que querria

Plus coms ni reis, s' ab honratz faigz podia

Fugir enfern e 'l putnais fuec arden,

On manh caitiu viuran tos temps dolen.

Totz hom cui fai velhez' o malautia

Remaner sai, deu donar son argen

A selhs qu' iran, que ben fai qui envia,

Sol non remanha per cor negligen.

A! que diran al jorn del jutjamen

Selhs qu' estaran per so que ren non tria

Quan dieus dira: “Fals, ples de coardia,

Per vos fui mortz e batutz malamen!” 

Adoncx aura lo pus just espaven.

Pons de Capdueil.