Peire Rogier. Ges en bon vers non posc falhir (Oc = Sí)

Peire Rogier. 

Ges en bon vers non posc falhir

a l'ora que de mi dons chan.

Consi poiri' eu ren mal dir?

Qu'om non es tan mal ensenhatz,

si parl' ab leis un mot o dos,

que totz vilas non torn cortes.

Per que sapchatz be que vers es

que l bon qu'eu dic tot ai de leis.

De ren als no pens ni consir

ni ai dezirier ni talan,

mas de leis quo l pogues servir

e far tot quant l'es bon ni l platz,

qu'eu non cre qu'eu anc per als fos

mas per leis far so que l plagues;

que be sai qu'onors m'es e bes

tot quan fatz per amor de leis.

Ben posc los autres escarnir,

car aissi m saubi far enan

que l melhs del mon saupi chauzir.

Eu o dic e sai qu'es vertatz.

Ben leu manz n'i aura gilos

que diran: "Mens, e no n es res."

Non m'en cal, ni d'aco no m'es,

qu'eu sai ben consi es de leis.

Greus m'es lo maltraitz a sofrir

e l dolors qu'ai per leis mout gran,

don lo cors no m pot revenir

per nulh plai d'autras amistatz,

c'autre jois no m'es dous ni bos,

ni non volh ja m sia promes;

e s'eu n'avia cen conques,

ren no ls pretz mas cel qu'ai de leis.

Doussa domna, soven sospir

e trac greu pen' e gran afan

per vos, cui am mout e dezir;

e quar no us vei, non es mos gratz;

e si ben m'estau lonh de vos,

lo cor e l sen vos ai trames,

si qu'aissi no sui, on tu m ves;

e ls bes qu'eu ai totz ai de leis.

Ailas! - "Que plangz?" - Ja tem morir. -

"Que as?" - Am. - "E trop?" - Eu oc, tan

qu'en mor. - "Mors?" - Oc. - "Non potz guerir?" -

Eu no. - "E cum?" - Tan sui iratz. -

"De que?" - De leis, don sui aissos. -

"Sofre." - No m val. - "Clama l merces." -

Si m fatz. - "Non as pro?" - Pauc. - "No t pes,

si n tras mal?" - Non. - "Quo fas de leis?"

Conselh n'ai. - "Qual?" - Volh m'en partir. -

"No far!" - Si farai. - "Quers ton dan." -

Qu'en posc als? - "Vols t'en ben jauzir?" - 

Oc, mout. - "Cre me." - Ara m digatz! -

"Sias humils, francs, larcs e pros." -

Si m fai mal? - "Sofr' en patz." - Sui pres. -

"Tu?" - Oc. - "S' amar vols e si m cres,

aissi t poiras jauzir de leis."

Mon Tort-n'avetz prec, s'a leis platz,

qu'aprenda lo vers, si es bos,

e pois vol que sia trames

mon Dreit-n' avetz lai en Saves: 

deus sal e guart lo cors de leis.

Bonifaci de Castellana. Guerr' e trebalhs e brega m platz,

Bonifaci de Castellana.

Florissait en 1250. Hist. génér. de Provence. T. II, p. 418.

3794, 7226.

Guerr' e trebalhs e brega m platz,

E m platz quan vei reiregarda,

E m platz quan vei cavals armatz,

E m platz quan vei grans colps ferir,

Qu'enaissi m par terr' estorta;

Qu'aitals es mos cors e mos sens,

E de plag sai quascun jorn mens.

Cil d'Ast prendon tregas e patz,

E perdon tro à Stafarda

Tota la terra qu'es de latz;

Qu'enaissis o ai auzit dir

Que Cunis era lor porta;

Et ar vei que lor es nozens

E no fai pas lors mandamens.

Lo dans dels Proensals mi platz,

Equar degus no s pren garda:

E'ls Frances son tan ensenhatz,

Que quascun jorn los fan venir

Liatz ab una redorta:

E no lor val nul cauzimens,

Tan los tenon per recrezens.

Mout m'enoia dels avocatz

Que'ls vei anar ab gran arda;

E pesa m conseil de prelatz,

Qu'anc nul home no vi jauzir;

Ans qui son dreg lor aporta,

Els dison: aisso es niens,

Tot es del comte veramens.

Los Genoes vei trop mermatz

E'l capitani que ls garda;

E de Ventamila'l comtatz

Perdon que solian tenir:

Donc be m par Genoa morta,

La poestatz n'es non calens

Que lur sol esser defendens.

Enans penria l'esporta

Qu'ieu no li defenda mas gens

Am cavaliers et am sirvens.

Mauri, us jois me conorta,

Qu'ieu sai be que la plus valens

Me vol mais que totz sos parens.