Peire Rogier. Ges en bon vers non posc falhir (Oc = Sí)

Peire Rogier. 

Ges en bon vers non posc falhir

a l'ora que de mi dons chan.

Consi poiri' eu ren mal dir?

Qu'om non es tan mal ensenhatz,

si parl' ab leis un mot o dos,

que totz vilas non torn cortes.

Per que sapchatz be que vers es

que l bon qu'eu dic tot ai de leis.

De ren als no pens ni consir

ni ai dezirier ni talan,

mas de leis quo l pogues servir

e far tot quant l'es bon ni l platz,

qu'eu non cre qu'eu anc per als fos

mas per leis far so que l plagues;

que be sai qu'onors m'es e bes

tot quan fatz per amor de leis.

Ben posc los autres escarnir,

car aissi m saubi far enan

que l melhs del mon saupi chauzir.

Eu o dic e sai qu'es vertatz.

Ben leu manz n'i aura gilos

que diran: "Mens, e no n es res."

Non m'en cal, ni d'aco no m'es,

qu'eu sai ben consi es de leis.

Greus m'es lo maltraitz a sofrir

e l dolors qu'ai per leis mout gran,

don lo cors no m pot revenir

per nulh plai d'autras amistatz,

c'autre jois no m'es dous ni bos,

ni non volh ja m sia promes;

e s'eu n'avia cen conques,

ren no ls pretz mas cel qu'ai de leis.

Doussa domna, soven sospir

e trac greu pen' e gran afan

per vos, cui am mout e dezir;

e quar no us vei, non es mos gratz;

e si ben m'estau lonh de vos,

lo cor e l sen vos ai trames,

si qu'aissi no sui, on tu m ves;

e ls bes qu'eu ai totz ai de leis.

Ailas! - "Que plangz?" - Ja tem morir. -

"Que as?" - Am. - "E trop?" - Eu oc, tan

qu'en mor. - "Mors?" - Oc. - "Non potz guerir?" -

Eu no. - "E cum?" - Tan sui iratz. -

"De que?" - De leis, don sui aissos. -

"Sofre." - No m val. - "Clama l merces." -

Si m fatz. - "Non as pro?" - Pauc. - "No t pes,

si n tras mal?" - Non. - "Quo fas de leis?"

Conselh n'ai. - "Qual?" - Volh m'en partir. -

"No far!" - Si farai. - "Quers ton dan." -

Qu'en posc als? - "Vols t'en ben jauzir?" - 

Oc, mout. - "Cre me." - Ara m digatz! -

"Sias humils, francs, larcs e pros." -

Si m fai mal? - "Sofr' en patz." - Sui pres. -

"Tu?" - Oc. - "S' amar vols e si m cres,

aissi t poiras jauzir de leis."

Mon Tort-n'avetz prec, s'a leis platz,

qu'aprenda lo vers, si es bos,

e pois vol que sia trames

mon Dreit-n' avetz lai en Saves: 

deus sal e guart lo cors de leis.

Pons de la Gardia, Sagardia. Mandat m'es que no m recreja

Pons de la Gardia o Sagardia. (Çagardia, Çaguardia, la Guardia, Garda, Garde.)

7698.

Mandat m'es que no m recreja

De cantar ni de solatz;

E quar plus soven no fatz

Cansos, m'o tenon à mal

Cilh à cui cant e deport abelis:

Et à grat de sos amis

Deu hom far, com que l'en prenda.

Tota corteza fazenda

Solatz, cant e joc e ris,

Moc ben d'amor so m'es vis;

Qu'en totz pretz ajud' e val

Amors trop mai d'autra re, so sapchatz:

Et ades n'es hom coitatz

De far so que ben esteja.

Domn' en cui pretz senhoreja

Ab bel cors plen de bontatz,

Complit de totas beutatz,

Ieu mor; mas à vos non cal.

Pero nuls hom, d'aisso m fauc ben devis, 

Nous er mais de cor tan fis:

D'aisso nous sai pas esmenda.

Non es nul jorn no me venga

Dezir de lei don languis.

Tal talent ai que la vis,

Q'un gran gaug complit coral

M'es quan la vei e mais re tan no m platz:

Quar no pot esser iratz

Nuls hom lo jorn que l maneja.

Lo dezirier e l'enveja

Que m ve de leis par foudatz,

Qu'aissi m soi enamoratz

Que no consir de ren al.

Merce vos clam bela domn' ab clar vis,

Qu'ieu non ai, tan soi conquis,

Poder qu'estiers m'en defenda.

Cel que ma cansos aprenda,

Sia londas o vezis,

Prec que la cant él païs.

El bel cors de lei reial,

Gai e cortes, de Monto molt mi platz,

Qu'en leis es bos pretz prezatz,

E quascus lo li autreja.