Guillem Montanagol, de Toloza. Bel m'es quant d'armatz vei refrim

Guillem Montanagol, de Toloza.

7226.

Bel m'es quant d'armatz vei refrim

De trompas lai on hom s'escrim,

E trazon prim

L'arquier melhor

Nostri e lor,

E vei de senhas bruelha:

Adoncs trassalh

Cor de vassalh

Tro que sos cors s'orguelha.

Coms de Tolza, on plus esprim

Los rics, vos vei de pretz al cim:

E vuelh quaissi m (qu'aissi)

Don dieus s'amor,

Cum part lauzor

Vostre ric pretz capduelha;

Sol qu'à un talh,

Qui araus falh, (ara us)

Mai ab vos no s'acuelha.

La Marcha, Fois e Rodes vim

Falhir ades als ops de prim:

Per qu'ie ls encrim

De part honor

E de valor,

Don quascus si despuelha,

Qu'en tal sonalh

An mes batal

Don non tanh pretz los vuelha.

Jamais no cug que s desencrim, 

Quar trop s'a levat pejor crim

Que'l de Caïm, 

Hom qui l'amor 

Del ric senhor

De Tolos' era s tuelha:

Quar qui defalh

Ni à senhor falh

Greu er que no s'en duelha.

Si'l rei Jacme, cui no mentim,

Complis so qu'el e nos plevim, 

Segon qu'auzim; 

En gran dolor 

Foran ab plor

Frances, qui qu'o desvuelha:

E quar de falh,

Qu'ades no salh,

Tot lo mons lo'n reiruelha.

Engles de flor

Faitz capel e de fuelha.

Nous detz treball,

Neis quius assalh,

Tro qu'om tot vos o tuelha.

7225-6.

Per lo mon fan l'us dels autres rancura,

Li clers dels laics e'l laic dels eissamen;

E li poble s planhon de desmezura

De lor senhors, e'ls senhors dels soen:

Aissi es ples lo mons de mal talen.

Mas er venon sai de ves Orien

Li Tartari, si dieus non o defen,

Que ls faran totz estar d'una mensura.

Per mant forfag e per manta laidura

Qu'an fag e fan clerc e laic malamen, 

Venra si ven esta dezaventura

A crestias, si dieus merce non pren,

Que fass' al Papa metr' atempramen

En so don an li clerc e'l laic conten:

Quar s'il los fai ben d'un acordamen,

No lor pot pueis nozer null' aventura.

A! per que vol clercs bella vestidura,

Ni per que vol viure tan ricamen,

Ni per que vol bella cavalgadura?

Qu'el sab que dieus volc viure paubramen.

Ni per que vol tan l'autrui ni enten?

Qu'el sab que tot quan met ni quan despen,

Part son manjar e son vestir vilmen,

Tol als paubres, si no men l'Escriptura.

Els grans senhors per que no s prendon cura

Que no fassan tort ni fors' à lor gen?

Qu'ieu non tenc ges per menor forfaitura

Qu'om forse'ls sieus com quan l'autrui dreg pren; 

Ans es majer, quar falhis doblamen: 

Quar so de se ni d'autrui no defen 

A son poder ni los sieus, drechamen 

Falh endreg lor tan qu'en pert sa drechura.

Mas totz pobols a de bon sen frachura

Qu'à son senhor fass' en re falhimen:

Quar totz hom deu amar d'amistat pura

Son bon senhor e servir leialmen.

A senhor tanh qu'am los sieus bonamen,

Que lialtatz lor ne fai mandamen

Que l'us ame l'autre tan coralmen

Que no s posca entr'els metre falsura.

Reis Castellas, l'emperi vos aten:

Mas sai dizon, senher, qu'atendemen

Fas de Breto; per que s mou gran rancura.

Quar d'aut rei tanh quant un grand fag enpren

Qu'el trag' à cap o'n segua sa ventura.

Maria de Ventadorn. Gui d'Uisel, be m peza de vos

Maria de Ventadorn.

Sainte Palaye. Manuscrit du Vatican 3207.

Ben avetz auzit de madompna Maria de Ventadorn com ella fo la plus preziada dompna qe anc fos en Lemozin, e aqella qe plus fetz de be e plus se gardet de mal. E totas vetz l'ajudet sos senz e follors no ill fetz far follia; et onret la deus de bel plazen cors avinen ses maestria.

En Guis d'Uisels si avia perduda sa dompna, si com vos aves ausit en la soa canson que dis:

Si be m partetz, mala dompna, de vos, etc.

don el vivia en gran dolor e en tristessa. Et avia lonc tems q'el non avia chantat ni trobat, don totas las bonas dompnas d'aqella encontrada n'eron fort dolentas; e madompna Maria plus qe totas, per so qu'en Guis d'Uisels la lauzava en totas sas cansos. El coms de la Marcha, lo cals era apellatz n Ucs lo Brus, si era sos cavalliers, et ella ll'avia fait tan d'onor e d'amor com dompna pot far à cavallier. Et un dia el dompnejava com ella, e si agon una tenson entre lor; qe'l coms de la Marcha dizia qe totz fis amaire, pos qe sa dompna li dona s'amor ni l pren per cavalier ni per amic, tan com el es lials ni fis vas ella, deu aver autan de seignoria e de comandamen en ella com ella de lui. E madompna Maria defendia qe l'amics no devia aver en ella seignoria ni comandamen. En Guis d'Uisels si era en la cort de madompna Maria; et ella, per far lo tornar en cansos et en solatz, si fes una cobla en la cal li mandet si se covenia qe'ls amics ages aitan de seignoria en la soa dompna, com la dompna en lui. 

E d'aqesta razon madompna Maria si l'escomes de tenson; e dis en aissi:

2701, 7698, C.

Gui d'Uisel, be m peza de vos

Quar vos es laissatz de cantar,

E volgraus i enquer tornar.

Equar sabetz d'aitals razos

Ieu vos deman si deu far engalmen

Domna per drut, quan lo quier francamen,

Com el per lei tot quan tanh ad amor,

Segon lo dreg que tenon l'amador.

Domna na Maria, tensos

E tot cant cujava laissar;

Mas aoras no posc mudar

Qu'ieu no cant à vostre somos.

E respon vos de la domna breumen,

Qe per son drut deu far comunalmen

Com el per lei ses garda de ricor:

Qu'en dos amics non deu aver major.

Gui, tot so don es cobeitos

Deu drutz ab merce demandar;

E domna deu lo autrejar,

Mas deu ben esguardar sazos.

El drut deu far precs e comandamen

Com per amigu' e per domn'eissamen;

E domna deu à son drut far honor

Com ad amic e no com à senhor.

Domna, sai dizen entre nos

Que lai on domna vol amar

Engalmen deu son drut honrar,

Pois engalmen son amoros.

E s'esdeve qu'ell' am plus finamen,

Li dig e'l fag o devo far parven;

E s'a ves leis cor fals ni trichador,

Ab semblan bel deu cobrir sa dolor.

Gui d'Uisels, ges d'aitals razos

No son li drut al comensar;

Ans dis quascus, quan vol pregar,

Mas junchas e de genolhos:

Domna volhatz queus serva humilmen

Com lo vostr'om. E s'ell' enaissi l pren,

Ieu lo jutge per dreg à traïdor

Si s ret pariers e s det per servidor.

Domna, ben es plaigz vergonhos

Ad ops de domna razonar,

Que celui no tenha per par

A cui a fait un cor de dos.

O vos diretz, o no s'estara gen,

Que'l drutz la deu amar plus leialmen;

O vos diretz que son par entre lor,

Que re no l deu lo drutz mas per amor.

Uc de Sant Circ. Longamen ai atenduda

N Uc de Sant Circ.

7225, 7614.

N Uc de Sant Circ si fo de Caersi, d'un borc que a nom Tegra. Fils fo d'un paubre vavassor que ac nom n Arman de Saint Circ, per so que'l castels don el fo a nom Saint Circ, qu'es al pe de Sainta Maria de Rocamaior, que fo destruichs per guerra e derrocatz. Aquest n Uc si ac gran ren de fraires majors de se; e volgron lo far clerc e manderon lo à la scola à Monpeslier. E quant eill cuideron que ampares letras, el amparet cansos e vers, e sirventes e tensos e coblas, eill fach eill dich dels valens homes e de las valens domnas que eron al mon ni eron estat: e con aquel sabers s'ajoglari. El coms de Rodes e'l vescoms de Torena si l leverent molt à la joglaria, con las tensos e con las coblas qu'el feiren com lui e'l bons dalfin d'Alvernhe. Et estet lonc temps en Gascoingna paubres, cora à pe cora à caval. Lonc temps estet com la comtessa de Benauges, e per leis gazagnet l'amistat d'en Savaric de Maleon, lo cals lo mes en arnes et en roba. Et estet lonc temps con el en Peitieu et en las encontradas, pois en Cataloingna et en Aragon et en Espaigna, con lo bon rei Amfos e con lo rei Amfos de Leon e con lo rei Peire d'Aragon; e pois en Proensa con totz los barons, pois en Lombardia et en la Marcha. E tolc moiller e fez enfans. Gran ren amparet de l'autrui saber e voluntiers l'enseingnet à autrui. Cansos fes de fort bonas e de bons sons e de bonas coblas; mas no fes gaires de las cansos, quar no fo enamoratz de neguna. Mas se sap feigner enamorat ad ellas ab son bel parlar, e sap ben dire en las soas cansos tot so queill avenia de lor: e ben las sap levar e ben far cazer, quand el lo volia far, ab los sieus vers et ab los sieus digz. Mas pois qu'el ac moiller non fetz cansos.

2701, 7225-6, 7614, C.

Longamen ai atenduda

Una razon avinen

Don fezes canso plazen,

Mas enquer no m'es venguda. 

Donc s'ieu vol de la razo

Qu'en ai far vera canso, 

Ela sera mieg partida 

Canso joioz' e marrida

Lauzan del be qu'ai avut

E plagnen quar l'ai perdut.

Cui dieus vol be cil ajuda:

Qu'à mi volc ben longamen, 

Que m det lo ric joi jauzen

De vos qu'eras ai perduda. 

Ai! dieus, tan plazen mi fo

Lo jois' e tan mi saup bo,

E tant aic avinen vida! 

Mas aoras m'es falhida, 

Que m sent d'aut bas cazegut

E'l cor de tot joi mogut.

De l'onor qu'ai receubuda

Del vostre cors covinen

Ai mon cor trist e dolen;

Quar vei que'l voler vos muda

Qu'aviatz en la sazo;

Quan dieus volia mon pro.

Ai! tan mi dol la partida!

E si l'amors es fenida,

Mal ai vostre cors vezut

E'l be quei es conogut.

Fola domna pens' e cuda

Que leu pren so que dissen,

E per fol nesci parven

Ai vista tal decazuda,

Qu'estava en ric resso

De valor e de faisso.

Quar cela que foudatz guida

Cuja s'esser enrequida,

Quan ve que siei fag menut

Intran en crim et en brut.

E pos domn' es deissenduda

Per blasme de fallimen

Non a mais retenemen, 

Qu'onors de lonh la saluda.

Quar de justa fallizo

Troba greu domna perdo,

Ans li corr quascus e l crida

Et ans que torn' en oblida

Lo crims a tan corregut

Qu'ilh es tornad' en refut.

Domna, sius es irascuda

Vas me, ges nous me defen

Nius me tolh nius vau fugen; 

Qu'anc, pois vos aic conoguda,

Non agui m'entensio

En autra si en vos no.

Quar vos m'es tant abelida 

Que d'autra no volh guerida, 

Ni ses vos no volh m'ajut 

Dieus, ni m don joi ni salut.

Lai on non es conoguda

Dreitura ni fallizo,

Qui va demandar razo? 

E lai on blasmon fallida

Degr' esser onors grazida:

Mas ieu ai tart conogut 

So que m notz ni m'a nogut.