16. Folchetto di Marsiglia. *
Secondo il testo edito dal Raynouard (Choix des poésies originales des Troubadours, III, 149). (Ed. Ramón Guimerá Lorente.)
Tan m'abellis l'amoros pessamens
que s'es vengutz en mon fin cor assire,
per que noi pot nuls autres pens caber,
ni mais negus no m'es dous ni plazens;
qu'adoncs sui sas quan m'aucizol cossire:
e fin' amors m'aleuza mon martire,
quem promet joy, mas trop lom dona len,
qu'ab bel semblan m'a tengut longamen.
Be sai que tot quan fas es dreitz niens;
e qu'en puesc mais, s'amors mi vol aucire!
qu'a escien m'a donat tal voler,
que ja non er vencutz ni el no vens:
vencutz si sui, qu'aucir m'an li sospire
tot suavet, quar de liey cui dezire
non ai secors, ni d'aillors no l'aten,
ni d'autr'amor non puesc aver talen.
Bona domna, sius platz, siatz sufrens
dels bes qu'ieus vuel, qu'ieu sui dels mals sufrire;
e pueis li mal nom poiran dan tener,
ans m'er semblan quels partam engalmens,
pero sius platz qu'en autra part me vire,
partetz de vos la beutat el dous rire
el gai solas que m'afolleis mos sen,
pueis partir m'ai de vos, mon escien.
A totz jorns m'etz plus bel' e plus plazens,
per qu'ieu vuel mal als huelhs ab queus remire,
quar a mon pro nous pogron anc vezer,
mas a mon dan vos vezon subtilmens.
mas dans non es, so sai, quar nom n'azire,
ans me sap bon, pros domna, quan m'albire,
si m'aucisetz, que nous estara gen,
quar lo mieus dans vostres er eissamen.
Per so, domna, nous am saviamens,
qu'a vos sui fis et a mos ops trayre;
qu'ieus cug prendre e mi no puesc aver,
ieus cug nozer et a mi sui nozens.
per so nous aus mon cor mostrar ni dire,
mas a l'esgart podetz mon cor devire:
ar lous cug dir et aras m'en repren,
e port n'als huelhs vergonha et ardimen.
Donal fin cor qu'ieus ai nous puesc tot dire,
mas per merce so qu'ieu lais per non sen,
restauratz vos ab bon entendemen.
Trop vos am mais, dona, qu'ieu no sai dire,
e s'ieu anc jorn aic d'autr'amor desire,
no m'en penet, ans vos am per un cen;
quar ai proat autrui captenemen.
Vas Nems t'en vai, chansos, qui ques n'azire,
que gaug n'auran, segon lo mieu albire,
las tres domnas a cui ieu te prezen,
car elhas tres valon mais d'autras cen.
* Biografia, secondo il testo edito dallo Chabaneau (op. cit. p. 81):
Folquetz de Marseilla si fo de Marseilla, fils d'un mercadier que fo de Genova, & ac nom sier Amfos; e quant lo paire moric, sil laisset molt ric d'aver. et el entendet en pretz & en valor, e mes se a servir als valens barons & als valens omes & a brigar com lor & a dar & a servir & a venir & anar. e fort fo grazitz & onratz per lo rei Richart e per lo compte Raimon de Tolosa e per en Baral, lo seu seignor de Marseilla. molt trobava ben e molt fo avinenz om de la persona; & entendet se en la moiller del sieu seignor en Baral, e pregava la e fasia sas chansos d'ella. mas anc per precs ni per chansos noi poc trobar merce qu'ella li fezes nuill ben en dreit d'amor; per que totz temps se plaing d'amor en sas chansos. e avenc si que la domna moric, & en Barals lo maritz d'ella el seingner de lui, que tant li fasia d'onor, el bons reis Richartz, el bons coms Raimons de Tolosa, el reis Amfos d'Arago; don el per tristesa de la soa domna e dels princes que vos ai ditz, abandonet lo mon e si s'en rendet a l'orde de Cistel cum sa muiller e cum dos fillz qu'el avia. e si fo faitz abas d'una richa abadia qu'es en Proensa, que a nom lo Torondet; e puois el fo faitz evesques de Tolosa e lai el moric.
Folquetz de Marseilla, si con avetz auzit, amava la moiller d'en Baral so seingnor, madomna n'Alazais de Roca Martina,... e guardava se mout qu'om nol saubes, per so qu'ella era moillier de so seingnor, quar li fora tengut a gran felonia. e la domna si sofria sos precs e sas chansos, per la gran lausor qu'el fazia d'ella. e 'n Barals si avia doas serors de gran pretz e de gran valor. la una avia nom na Laura de Sain Jolran, l'autra avia nom na Mabilia de Ponteves. abdoas estavan con en Baral. e 'n Folquetz avia tan d'amistat con amdoas que semblans era qu'el entendes en cascuna per amor. et madonna n'Alazais si creset qu'el en na Laura s'entendes e queil volgues ben, e si l'encuset el fetz encusar per motz cavalliers e per motz d'autres omes, si qu'ella li det comjat. que no volia plus son prec ni sos ditz, e que s penes de na Laura, e que de leis non esperes mais bens ni onor...
