Helias de Solier. Canso de plangh del gran foc de Tholosa.

Helias de Solier. 

Las joyas del gay saber, p. 148-151; cf. 275. Cette pièce se rapporte au grand feu de Toulouse (1463), sujet traité par le même auteur dans un sirvente (p. 143-147). - Grdr. § 50, p. 81.

Canso de plangh del gran foc de Tholosa.

Am dolor, ses trobar pausa,

vezen l'engoys de Tholoza,

velh cantar am votz ploroza (vull cantá en veu plorosa)

del peryment de tant bes.

Holas, qui guardar la guausa, (v. Hélas!)

en greus sospirs se repausa,

contemplan lo foc engres.

Qui vic ja may tal destressa!

Ni causa tant desquausida

ja may plus no foc ausida,

qu'en senlant fayso vengues. (semblant)

No 's possible que s refessa,

de cent ans, la gran rudessa

que l foc en dos jorns comes.

Aquela mala vesprada

nos portec a totz desayre:

le foc volava per l'ayre,

no y avia mur que tengues.

El fasia per tot passada:

ayga ni vi ni trinquada

no y poc contrastar en res.

Pensar podetz la cridesta

que s menava per la vila

de toquacen e d'esquila:

totz eran d'engoysa ples

de tal orribla tempesta.

Mot es causa desonesta

le gran dapnatge que y es.

Estimar no ce poyria (estimá no se podríe)

aquel mal crusel dapnatge;

car le foc d'engual pasatge, (d'igual)

coma fier e descortes,

quatre cens ostals ardia:

cascus de sos bes perdia 

de sinc partidas las tres.

Per maior tribulacio

requirens nostres pecatz

em estatz dapnificatz

de gran poble que mort es,

he de frutz la perdicio,

qu'es venguda sus l'estio,

d'un crim a pauretat mes.

Mot foc bona la venguda 

del rey de Fransa novel, (del nou rey de Fransa)

car vic l'acsident crusel (ya que va vore l'acsidén cruel)

per totas partz, si cum es.

De la sciutat abatuda (de la siudat abatuda)

la vertat foc conoguda (la verdat va sé coneguda)

per lo rey e sos comes.

Per so le rey se declina

donar grasia, per cent ans,

de talhas als abitans,

e totz autres carx remes,

comensans he prenens sima

en l'an de la millezima 

quatre cens saysanta tres. (1463)

Demostra nos la scriptura (mos demostre la escritura : Biblia)

que per los crims detestables,

qu'eron al mon continuables,

Dieus n'ac a degus merces;

ans peric tota natura:

Nohe, am sa noyritura, (Noé, en sa familia, dessendensia)

sol demorec que visques.

Vie de Saint Trophime. Tostems aus dir c'on deu aver conselh (Bartsch)

Vie de Saint Trophime.

(Raynouard, éd. Ramón Guimerá Lorente.)

Tostems aus dir c'on deu aver conselh

dels ancians e c'on prenna espelh

en lors bels fatz e'n lur ditz eissament:

e car l'antic en lur comensament

pregavan Dieu, lo payre glorios,

tot enaysin lo devem pregar nos

que elh nos don complir nostre dechat

a sa onor e senes falsetat.

Tengut nos an enclaus aquest escrig

nostres clerges, tro c'on lur o a dig,

per pereza e per nesietat: 

mas aras l'an de novel revelat, 

car conoison que per lur gran pereza,

per lur delieg e per lur avareza

an perduda la renda que avien

en Alisquams, tant com ben lo servien; (v. campos Elíseos)

qu'ieu ay auzit que gran devosion

i avien totas gens per lo mon,

e ben de luen s'i fazien portar

sil que morien de sa otra la mar.

Con ayso sie, demandas o als viels,

els o diran plus gent que ieu e miels.

Pero comtan que plus aut de Layon,

encara mays plus aut que de Mascon,

venien mortz que avien elegit

e'n lur gaje layssavan establit

c'on los meses en un vayselh de fust,

mot fort sarat e que fosa ben just.

Cant eran mort, los metien sos parens,

pueys metien lo en lo Roze corent;

entro aval ad Arle deysendien,

car plus en sus decendre non podien,

per la vertut del sementeri sans,

que Dieu sagret, c'om apella Alisquams.

Encaras mais reconta, et es vers,

que de Tolzan e de tot Carcases

e de Franza e de tota Espanha,

foson en plan o foson en montanha,

tant com tenian los regnes de sa mar,

cant eran mort, s'i fazien portar.

E tutz avien tant gran devosion

los avesques e ls contes e l baron

que a penas alons jaser volian:

aytant gran fe al sementeri avian.

E si fazien totz los ricz embaymar (embalsamar)

et an cavalz vo an carris portar;

e li paures que aver non avien,

a lur parens prometre si fasien,

los salesan dedintre e defors: (los salaren de dins y de fora)

e cant fora ben saonat lo cors,

lo portesan en Arle soterar, (lo portaren a Arlés a enterrá : soterrar)

en Aliscamps, lo qual volc Dieus sagrar.

So es l'espelh qu'ieu desus dig avia: (l'espill)

el qual espelh totz fizels si deuria

mirar en so que fasien los antics.

Mais nos semblam los jovenetz mendics, 

car no siguem las pezadas dels viels

que dizien et o fasien mot miels (que dién y u féen mol milló)

que nos non fam, per que laysam estar (que natros no fem)

lo sante luoc que Dieus dignet sagrar.

Mas ges del tot non es nostre lo dans,

ans y an part selhs que rosins anblans

e bels cavals sojornatz e corens

tenon d'aquo que lur ufron las gens.

Per lur deport e per lur quavalquar

dezamparon lo servir de l'autar (desamparen lo serví del altá)

e non mostron tota la veritat

del sante luoc aysi com fon sagrat.

Molt o fan miels de la relegion:

sels que i son, dison en lur sermon

q'ils sont tutz sans e lo lur eysamens:

per que tiran ad els totas las gens,

que non sabon la vera sagrason

que Jezus fes al sementeri bon.

E per aquo quar tota gent non sap

la gran vertut que l sementeri cap,

ieu o diray a tot lo mont per ver:

sol de l'auzir es grans gauc e plaser.

Huc del Valat, 1372, violetta, Per l'amistat, on fort mon cor se fiza,

Huc del Valat.

Las joyas del gay saber, p. 16-19; cf. p. 247. - Grdr. 50, p. 79.

Am aquesta canso e dansa mesclada Huc del Valat, mestre en medecina de Monpeslier, gasanhec la violetta, l'an M. CCC. LXXII. (1372)

Per l'amistat, on fort mon cor se fiza,

de vos, gentils, cuy pretz e laus enansa,

dompna, si us play, vuelh chanso far e dansa,

no per us rims, mas per novela siza

gent deviza:

quar la dousors que l novel temps amena,

s'es tan prehon dins lo mieu cor enclausa,

que d'estar gays no pot jorn aver pausa,

e per causa,

pus que l'ausel en may am la serena.

De tal gaug es m'arma plena

que no m cessi d'alegrar, 

etz on pus me vuelh fondar

en chantar,

mays ay d'amors joy sens pena.

Doncs pel desduyt que m'es datz per estrena,

ceray jhoyos, hondran vos, dona cara,

ses cossentir res per que m torn amara

l'amors de vos, qu'e mon cor jhoy semena

e remena;

quar, pauxs enfant, no sabentz l'aventura

ni l'astre be qu'el mon aver devia,

done mon cor a vostra senhoria,

lo tercz dia

que parlantz fuy segon cors de natura.

Per so doncs, am bona cura,

chan so del vostre cors gay,

quar ayshi, dona, viuray,

si a vos play,

rixs, que jhoy m'en assegura;

e si l'amors se reffrena

de vos, pel mieu cors nafrar … (lacune de deux vers.)

d'amar vos hon pretz germena.

Hanc, pueys que us vy, non agui jorn endura

de gaug entier ni de tot ben sofracha,

ni d'amar vos no mi fec res empacha,

quar fis espers m'en donec am figura

regla pura,

que vos etz mars de jauzimen hornada,

e creys valors e fontz don pretz s'asagua,

per que m'adutz volers dreytz qu'ieu retragua,

que m'apagua

l'onor e l laus de que vos etz dotada.

Sus totas etz coronada,

gentils flors d'umilitat,

amb excellent castetat,

que us ha dat

lo pretz que us a 'nluminada; 

car vos etz de gaug la vena;

don cascus deu vos lausar,

creyser e multiplicar

e pensar

quom dreg d'amor determena.

De motz bos haips e de ricx etz ornada

e de bos faitz complidament garnida,

honrad' etz d'ans e de vielh sen complida,

senes erguelh e de vertat parada

e fonsada,

etz etz ses frau, avinens e jhoyoza,

neta de cors e d'arma fort devota,

humils d'esguart e d'estat sens riota,

no punt lota,

pros en be far etz en totz ditz aondosa.

La vostr' amor grasciosa

m'empenh lo cor a servir

etz a lausar e bendir

e grasir

vos, flor ses par, amorosa;

e quar etz de bos fruytz mena,

pel vostre pretz eyshausar

me vuelh chantan deportar

e jhoy dar,

com nadan fay la balena.

Elucidari de las proprietatz de totas res naturals; palaytz de savieza, Guasto, compte de Foysh

Elucidari de las proprietatz de totas res naturals.

Bibliothèque Sainte Geneviève 1523- 5/4 (1580). 

I. Début du poème dédicatoire, Denkmäler der provenzalischen Litteratur p. 57-59. 

II. fol. 72 d, 75 d et 164. Cf. Appel, Zeitschrift fur rom. Philologie XIII (1889), p. 225 ss. - Grdr. § 57, p. 91. St. p. 69.

I. 

Comensa le palaytz de savieza fayt a istancia del noble princep Guasto, compte de Foysh. (Gaston, Foix)

X. Que ve le comte dins le palaytz.

Dins un palaytz mi sezen l'autre dia

bel donzel vi garnit de gran cundia,

libre legent, entendre no l podia:

per fort dezir de saber tot ardia.

Gen m'avize de sa phizonomia:

semlec ordit per la philozophia;

mantel portec gent foldrat d'azautia,

d'armas senhal, sembel de valentia.

De cor humil l'englozec son vizagge,

e m dissh: "L'estil del libre m'es salvagge,

escur, subtil; yeu requier declaragge.

Sera m util, expres en mon lenguagge."

Quan yeu auzi sa corteza requesta,

estranh mi fo, novel mot e de festa.

A mon avis jorn semlec de tempesta,

tot eviro m'anet rodan la testa.

Ma dona vic le donzel a la porta,

hurtan, cridan, et non ges ab votz morta,

ses trig, me dissh que baysses la conporta:

"Intre dedins, quar nostras armas porta."

Savieza depinh las proprietatz del comte.

"Ceptre d'honor, corona de nobleza,

castel segur, columpna de fermeza,

font de dossor et fluvi de franqueza,

cintel d'amor et anel de proeza.

De drech capdel, flor de cavalaria,

amic fizel, miralh de cortezia,

saphir de pretz, cedre de galhardia,

liri glars netz, tenor de melodia.

Thesaur s'acuelh de valor et s'atura

en son capduelh, aysso l ve per natura.

El vens erguelh, ab humils ha junctura,

per que l recuelh dedins nostra clausura."

Que ve le comte dins le palaytz.

El dins que fo remirec le caragge

de la dona, que parec de paragge.

Emperial semlec son senhoragge,

libre portec et ceptre d'avantagge.

Linx no fo par a lies en gardadura,

ni le solelh, mas semlec nuech escura.

Talh cert no hac ni dex en sa statura;

al sieu voler mermec, crec sa mezura.

A vetz son cap les cels passec d'auteza,

mi no sobrec ad horas de grandeza.

Sa rauba fo partida, be larc teza,

balagtz robis no si fan de beleza.

Mot fo subtil et prima la textura,

uzar no s pot ni rumpre sa costura.

D'estox, retalhs, de scindens' es segura,

per colp de dart, de flecha no peiura.

El sieu miralh vi totas creaturas,

dels elemens lors virtutz et mixturas,

herbas, peyras, metalhs, ni quals naturas

han cels, mars, mons et totas lors mezuras.

Ela mi dissh, auzi de mas aurelhas:

“Guasto de Foyssh, mostrar t'e, per que vuelhas:

no 's tan plazent ambra ni l frug d'abelhas;

lunh temps no vist tan grandas maravelhas."

II.

De las cauzas pertenens ad humanal conservacio.

Resta apres le tractat de las cauzas intrans en humanal compozicio, que digam de las cauzas pertenens adz humanal conservacio. Entre aquestas 

prumier direm de la vianda, quar de l'ayre tractarem en son loc. 

De vianda o aliment. Costanti. Vianda o aliment es substantia convertibla, al corrs donant noyriment, creysshement et sostenement,

ses conversio del qual aliment le corrs per accio de calor soptament si degastaria et a corrupcio vendria, quar aquo que tot jorn si degasta, restauracio no pendria. Mas prumier que aytal converssio si fassa, cove que la vianda sia preparada, apres que sia maschada, apres que el loc de digestio sia alogada; apres cove que sia digerida, et la partida pura de la no pura separada, apres que sia distribuida et ves (enves) quascu membre trameza et destinada, apres que per accio de natura en semlansa dels membres sia transmudada, quar autrament en lor substancia no poyria estre encorporada. Et apres tot aysso si fa sa conversio et sa incorporacio talment que aquo que en la vianda es caut et humit si convertissh en natura de sanc et de carn, aquo que es freg et sec, en natura de nervis et d'osses, et semlantement de (de) las autras 

partidas. Et encorporada la vianda en corrs joves li dona creyssho et noyriment; encorporada en corrs vielh li dona en calor natural, temprament, noyriment, duracio et restaurament, que mantas codicios (condicios) so de vianda. Et sapjas que viandas que en se han natural calor et humiditat, si convertissho de leu en sanc, quar ab el han semlansa et conformitat; mas viandas que no han ab el semlansa si convertissho ab dificultat, et algunas engendro trop sanc, autras pauc, las quals may dono greuch que noyriment. Et sapjas que aquela vianda que es de sanc subtil generativa, es may a natura convenient que autra, 

exceptat que may es convenient ad aquels qui vivo en exercici et tribalh 

vianda de gros sanc generativa. Et aten que vianda engendrant trop sanc ret pauca superfluitat, et engendrant pauc sanc tropa. 

Costanti. Et generalment segon las diversitatz de las viandas so varias las complexios dels membres, lors qualitatz et dispozicios.

Galias. Per que deves saber que megge que vol be reglar vita et sanetat corporal deu atendre la substancia de la vianda, sa qualitat, sa quantitat et si es al qui la pren proporcionada, e l temps el qual es ministrada.

De covit o del dinnar.

Vianda et beuragge a covit o a dinnar so ordenatz talment que prumier  

las viandas so preparadas, apres las personas covidadas, apeladas, les setis els redresso, taulas, toalhas meto, prumier els so lavatz, apres assetjatz.

Les hostes e l senhor so el loc principal, las donas enapres han loc especial.

Los filhs totz et las filhas han loc en lor partida, 

les sieus messagges ponch le senhor no oblida.

Cotels et saliners pauzo prumierament,

pa, tassas o enaps porto segundament. 

Apres meysshes diverses, grans et be copiozes,

porto les servidors aptes et graciozes.

Laun covida l'autre et parlo bel essems; (la un convide al atre)

per donar alegrier sono les instrumens.

Et vis et autres meysshes soven so variatz, 

especias et fruches a la fi ministratz.

Apres, quan es del tot le dinnat afinat, (lo diná)

l'ayga es tantost presta et quascu es lavat.

Gracias fan a l'hoste, mas a Dieu tot prumier, (a Deu primé)

et pueyss els porto beure al prumier et darrier. (radé)

Et quant han totz begut assatz et per talent,

retorna s'en al propri quascu alegrament.

De la cena o sopar. Yzidori. (Isidoro)

Cena es talment dita, quar cenon, don ve aquest nom, vol dire comu. 

Et antiquament fo costuma de cenar o sopar en loc patent et comunal per exquivar deshonestat. 

Papias. Mas quant als temps prezent podem dire que cena pren son nom de cenos, que vol dire umbra, cum quascu per granda avareza fassa en loc rescost et umbros sa cena, [** o es dita cena de cenos, que vol dire ca, car trops homes fan lor cena a guiza de ca] cum tota lor vianda vuelho devorar ses far adz autre partida. 

(** les mots entre crochets se trouvent à la marge, écrits d'une autre main.)

Las condicios conveniens al dinnar so conveniens a cena. Empero aquela cena es mot noblament ordenada, quan si fa en temps convenient, no trop tost ni trop tart, en loc suficient, segur, delicios et be espacios,

quan le senhor joyos dona liberalment,

quar a totz bela cara de l'hoste es plazent;

quan so ls meysshes diverses et apte ministratz,

per que de laun manje hom si l'autre no l platz;

quan les vis so plazens, aptes les servidos,

et quascu covidat a l'autre gracios,

quan so auzitz diverses muzicals instrumens,

torchas so alumnadas claras et resplandens,

viandas ministradas, leugieras, delicadas,

d'espazi prezentadas, et non ges trop cochadas; (no gens rápida)

quar vianda cochoza de ser es mot dampnoza (minjá rápit; fast food)

et non es be gauioza, quan d'escot es penoza; 

quan colchas delicadas apres so adaptadas:

aytals so aproadas cenas per totz lauzadas,

cum crida la scriptura declarant en figura

del rey Gran-Assueri qui optenc tot l'emperi.

D'Alamanha. Yzidori.

Alamanha es nobla a (e) glorioza regio en Europa, que pren aytal nom del fluvi dit Alaman, pres del qual aquel poble fe prumier rezidentia. Autrament es dita Germania, quar es en gens germinoza et mot populoza. Deves orient ha le fluvi dit Danubi; deves miech jorn le fluvi Reni; deves occident et septentrio la mar maior. Et es una Germania nauta que dura entro ls mons Ripheis et entro la mar mediterranea;

l'autra es de ssa le fluvi Reni. Cascuna es mota rica a glorioza et en gens d'armas fortz numeroza. Grandas so de statura, ardidas per natura, so grans cassadors et trebalhadors; de cara graciozes, alegres et gauiozes,

han saurs pels en color, so liberal de cor. Mas les Saxos entre els en totas aquestas cauzas han maior excellencia, qui so ditz Saxos, quar ayshi 

cum saxum, qui es peyra, contra lors enemics so durs et fortz batalhan, per mar et per terra. Mas sobre totz autres pobles valo en mar. Autras proensas ha en cascuna Germania mot excellens, cum es Austria et Bavaria, pres del Danubi, Suevia et Alzacia pres del Rene, et tropas autras. Dels Saxos Germas les Angles descendero, le linagge dels quals en Bretanha la maior persevera, et ressemlo de longura et costumas segon que ditz Beda.

Seneca ou lo savi. Le jugge que servisi pren

Seneca ou lo savi.
(N. E. Raynouard, éd. Ramón Guimerá Lorente)

Le jugge que servisi pren

greu fara lial juggamen.

Jugge qu'en dreit absol lo tort,

per dreit se lia a la mort.

Hom bo laissa per Dieu mal far

e l mal per la pena sessar.

Soven per las autrus foldatz

ve hom les bos mal trebalatz.

Qui vol entiers autrus malan

ni los esseta, no s'engan;

car maldizen ditz falssetatz

e l savi cobre las vertatz.

Savi s'aluenha d'autru huis,

e l fol agacha pel pertuis.

Greu esta savi ses fasenda,

car ades troba on se prenda.

Qui pert son temps de son pro far,

ges, can se vol, no l pot cobrar.

De tals fasendas for ti tracha,

que de trop parlar ve sofracha.

Tres causas malditz Salamos:

hom viel, neci, luxurios,

et home manent messongier,

e paubre ergulos, mal parlier.

Le savi am son gent parlar

se fa a tota gent amar,

e l fol conquista enemixs,

can parla, e pert sos amicxs.

Am lo fol no t'acompanhar,

si no t vols am lu degolar.

Fols es qui vol esser privatz

d'ome que vol seguir foldatz.

Si fil de Dieu devenir vols,

aias merce dels orfanols.

Cala t, si parlar no sabias, (cállate; calla, si parlá no “sabíes”)

que per aisso soptatz no sias.

A covit en autru maiso

sapjas grasir e l pauc e l pro.

Tot paubre que s te per pagatz

a may que l ric trop assedatz.

Lials homs salva son vesi,

e l fals tot en risen l'ausi.

Ton coragge e tas maisos

garda d'ome qu'es bausios.

E gara be la tua causa,

que l savi te la sua clausa.

Bon cossel, si fol le te dona,

no l mespreses per la pressona.

So que a tostems vols establir

de lonc temps deus veser consir.

A far amic fay lonc demor,

mas pueiss l'ama de tot ton cor.

L'amic, cant as lonc temps amat,

ama l, cant poyras, a ton grat.

Re no pres pueiss aquel parel,

c'an renhat lonc temps d'un cossel,

can les veg pueissas sopartir,

que l'us degra l'autre sufrir.

Fizels amic lun temps no fal

per paubrieyra ni per trebal.

Aquel amic tenc per estranh

que a la gran cocha sofranh;

a la cocha conoicheras

si val tos amix ni si l'as.

Als faitz conoicheras las gens, 

que las paraulas van mentens.

Paraula dossa fai amix

et asuauia enemix.

Aias amix, mais no d'un for,

un aias, cui digas ton cor.

Doas forsas ha e ssa ma

qui pot aver amic certa.

Fizel amic la vida val,

e qui ama Dieu a l'aital.

L'amic castia e sselan

e l'enemic en desfizan.

L'amic castia aspramen,

e l'enemic en cossenten.

A tos amix sias lials

a la cocha, ho seras fals.

El mon non a tan dossa causa

d'amic am cui hom parlar ausa.

L'amic castia en apert

e pueiss lausa lo en cobert.

Aquel es vertadiers amix

que t'esenha com te castix.

L'amic que te castia t'ama:

aquel creiss ton be e ta fama.

Aquel amic, a cui non cal

si tu fas be o si fas mal,

te lausara tot quant faras,

e ja de lui no t gausiras.

En ton amic te fizaras

que pus lial l'en trobaras;

e qui e son amic no s fia, 

de far engan lo met en via.

De tot t'acossela am un,

non ges am tot ho am degun.

Non laisses ges l'amic privat

pel novel que no as vezat.

Alba. En un vergier sotz folha d'albespi

Alba.

En un vergier sotz folha d'albespi

tenc la dompna son amic costa si,

tro la gaita crida que l'alba vi.

Oi Deus, oi Deus, de l'alba! Tan tost ve!

“Plagues a Deu ja la noitz non falhis,

ni l meus amics lonh de mi no s partis,

ni la gaita jorn ni alba no vis!

Oi Deus, oi Deus, de l'alba! Tan tost ve!

Bels dous amics, baizem nos, eu e vos,

aval els pratz on chanto ls auzellos;

tot o fassam en despeit del gilos:

Oi Deus, oi Deus, de l'alba! Tan tost ve!

Bels dous amics, fassam un joc novel,

ins el jardi on chanton li auzel,

tro la gaita toque son caramel.

Oi Deus, oi Deus, de l'alba! Tan tost ve!

Per la douss' aura qu'es venguda de lai,

del meu amic bel e cortes e gai,

del seu alen ai begut un dous rai:

Oi Deus, oi Deus, de l'alba! Tan tost ve!”

La dompna es agradans e plazens,

per sa beutat la gardon mantas gens,

et a son cor en amor leialmens.

Oi Deus, oi Deus, de l'alba! Tan tost ve!

Giraut de Cabreira, Ensenhamen. Cabra juglar, non posc mudar

Giraut de Cabreira, Ensenhamen.

Cabra juglar,

non posc mudar

q'eu non chan, pos a mi sap bon;

e volrai dir,

senes mentir,

e comtarai de ta faison.

Mal saps viular

e pietz chantar

del cap tro en la fenizon.

Non sabz fenir

al meu albir

a tempradura de Breton.

Mal t'ensegnet

cel que t mostret

los detz a menar ni l'arson.

Non saps balar

ni trasgitar

a guiza de juglar guascon. 

Ni sirventesc

ni balaresc

non t'auc dire nuilla fazon.

Bons estribotz

non t'eis pelz potz,

retroencha ni contenson.

Ja vers novel

bon d'en Rudel

non cug que t pas sotz lo guingnon,

de Markabrun

ni de negun

ni d'en Anfos ni d'en Eblon.

Jes gran saber

non potz aver,

si fors non eis de ta reion.

Pauc as apres,

qe non sabs jes

de la gran jesta de Carlon,

con eu tras portz

per son esfortz

intret en Espaign' a bandon;

de Ronsasvals

los colps mortals

qe fero'l dotze compaignon,

can foron mort

e pres a tort,

trait pel trachor Ganelon

a l'amirat,

per gran pechat,

et al bon rei Marselion.

Del Saine cut

c'aias perdut

et oblidat los motz e l son;

ren no n diçetz

ni no n sabetz:

pero no i ha meillor chanson.

E de Rotlan

sabs altretan

coma d'aiso que anc non fon.

Conte d'Artus

non sabes plus,

ni del reproier de Marcon.

Ni sabs d'Aiolz,

com anet solz,

ni de Machari lo felon;

ni d'Anfelis

ni d'Anseis

ni de Guillelme lo baron.

De Florisen

non sabs nien

ni de las ganas de Milon.

Del Loerenc

non sabs co venc

...

ni sabs d'Erec

com conquistec

l'esparvier for de sa reion.

Ni sabs d'Amic

consi guaric

Ameli lo seu compaignon.

Raimbaut III, Comte d'Orange. Pos tals sabers mi sortz e m creis

Raimbaut III, Comte d'Orange.

I.

Pos tals sabers mi sortz e m creis

que trobar sai et eu o dic,

mal estara si non pareis,

et er me blasmes si m'en gic;

que cant hom ditz ab la lenga

so que ben en pes non tenga,

non pot aver sordeior dec,

can ditz so que no s covenga.

Ar ai gaug, car sebram dels freis,

e remanon sol li abric

dels auzeletz, et es lor leis

qu'us mais de cantar no se tric,

qu'usquecs s'alegr'en sa lenga

pel novel temps que lor venga;

e dels albres qu'eran tuit sec

lo folhs pels branquils s'arenga.

E qui anc jorn d'amar se feis,

no s tanh qu'eras s'en desrazic,

mas per lo gai temps que pareis

deu quecs aver son cor plus ric;

e qui non sap ab la lenga

dir so que s coven, aprenga

consi ab lo nou temps s'esplec,

c'aissi vol pretz que s captenga.

Estat ai fis amics adreis

d'una que m'enguanet ab tric,

e car anc s'amors mi destreis,

totz temps n'aurai mon cor enic:

qu'aras no volh ab la lenga

dir que s'amors mi destrenga,

per c'us autres ab leis s'abrec

et eu catz so que el prenga.

Ab leis remaigna l malaveis

e l'engans, et ab son amic,

que tals m'a a sos ops conqueis,

don ja non creirai fals prezic;

ans volh qu'om me talh la lenga,

s'eu ja de leis crei lauzenga

ni de s'amor me desazec,

si n sabia perdr' Aurenga.

Be m deu plazer et es ben dreis

qu'anc mais tant en autra non tric;

que Nostre Senher el mezeis

ab pauc de far non i falhic,

qu'a penas saup ab la lenga

dir: "Aitals volh que s devenga." 

La grans beutatz qu'en leis parec,

non volc qu'autra s'i espenga.

Domna, no us sai dir loncs plaideis,

mas de me podetz far mendic

o plus ric que anc no fo reis:

del tot sui en vostre castic,

sol que m digatz ab la lenga

consi volretz que m captenga,

qu'eu ai cor qu'enaissi m'estec

e que ja ves vos no m fenga.

Domna, no us quier ab la lenga

mas qu'en baizan vos estrenga

en tal loc on ab vos m'azec,

e que dinz mos bratz vos senga.

II. 

Escoutatz, mas no sai que s'es,

senhor, so que volh comensar:

vers, estribotz ni sirventes

non es, ni nom no l sai trobar,

ni ges no sai co l me fezes,

s'aital no l podi' acabar,

que hom mais no vis fach aital per home ni per femna en est segle ni en 

l'autre qu'es passatz.

Si tot m'o tenetz a foles,

per tan no m poiria laissar

que eu mon talan non disses;

no m'en poiri' om castiar:

tot quant es no pretz un poges

mas so qu'ades vei et esguar.

E dir vos ai per que: quar s'eu vos o avia mogut e no us o trazia a cap, tenriatz m'en per fol; quar mais amaria seis deniers en mon ponh que mil sols al cel.

Ja no m tema ren far que m pes

mos amics, aquo l volh pregar,

s'als ops no m vol valer manes,

pos m'o profer ab lonc tarzar;

plus leu que cel que m'a conques

no m pot nulh autre gualiar.

Tot aisso dic per una domna que m fai languir ab belas paraulas et ab loncs respeitz, no sai per que. Pot me bon esser, senhor?

Que ben a passat quatre mes,

oc, e mais de mil ans, so m par,

que m'a autreiat e promes

que m dara so que plus m'es car.

Domna, pos mon cor tenetz pres,

adoussatz me ab dous l'amar.

Deus, aiuda, in nomine patris et filii et spiritus sancti. 

Deus, aisso que sera?

Qu'eu sui per vos gais, d'ira ples,

iratz, jauzens mi faitz trobar:

e sui m'en partitz de tals tres

qu'el mon non a, mas vos, lor par;

e sui fols chantaire cortes,

tan qu'om m'en apela joglar.

Domna, far ne podetz a vostra guiza, com fetz n'Aima de l'espatla, que l'estuget lai on li plac.

Er fenisc mon no sai que s'es,

qu'aissi l'ai volgut batejar:

pos mais d'aital non auzi ges,

be l dei enaissi apelar;

e diga l, quan l'aura apres,

cui que s'en volha azautar.

E si hom li demanda qui l'a fach, pot dir que cel que sap ben far tota fazenda, quan se vol.

Marcabrun. A la fontana del vergier, ++

Marcabrun. 

I. Ms. de Paris, fr. 856, fol. 173c (C). - Appel, Provenzalische Chrestomathie, p. 96 (Ap.); Crescini, Manualetto provenzale, Verona 1892 - 94, p. 12 s. 

II. Mss. A C I K R T. Appel, Provenzalische Chrestomathie, p. 101 s. (Ap.). 

III. Ms. du Vaticain 5232, fol. 27a (A), Mss. de Paris, fr. 856, fol. 177a (C), fr. 22543, fol. 5b (R). - Diez, Leben und Werke der Troubadours, 2e éd. Leipzig 1882, p. 37 ss.

I. 

A la fontana del vergier,

on l'erb' es vertz josta l gravier,

a l'ombra d'un fust domesgier,

en aiziment de blancas flors

e de novel chant costumier,

trobei sola, ses companhier,

cela que no volc mon solatz.

So fon donzel' ab son cors bel,

filha d'un senhor de castel;

e quant eu cugei que l'auzel

li fesson joi e la verdors,

e pel dous termini novel,

e que entendes mon favel,

tost li fon sos afars camjatz.

Dels olhs ploret josta la fon

e del cor sospiret preon.

“Jesus,” dis ela, “reis del mon,

per vos mi creis ma grans dolors,

quar vostra anta mi cofon,

quar li melhor de tot est mon

vos van servir, mas a vos platz.

Ab vos s'en vai lo meus amics,

lo bels e l gens e l pros e l rics;

sai m'en reman lo grans destrics,

lo deziriers soven e l plors.

Ai, mala fos reis Lozoics

que fai los mans e los prezics,

per que l dols m'es el cor intratz!” 

Quant eu l'auzi desconortar,

ves leis vengui josta l riu clar.

“Bela,” fi m eu, “per trop plorar

afola cara e colors;

e no vos qual dezesperar,

que cel que fai lo bosc folhar

vos pot donar de joi assatz.”

“Senher,” dis ela, “ben o cre

que Deus aia de mi merce

en l'autre segle per jasse,

quon assatz d'autres peccadors;

mas sai mi tol aquela re

don jois mi crec; mas pauc mi te,

que trop s'es de mi alonhatz.” 

II. 

L'autrier jost' una sebissa

trobei pastora mestissa,

de joi e de sen massissa.

E fon filha de vilana,

cap' e gonel' e pelissa

vest e camiza treslissa,

sotlars e caussas de lana.

Ves leis vinc per la planissa:

“Toza,” fi m eu, “res faitissa,

dol ai gran del ven que us fissa.”

“Senher,” so dis la vilana,

“merce Deu e ma noirissa,

pauc m'o pretz si l vens m'erissa,

qu'alegreta sui e sana.”

“Toza,” fi m eu, “cauza pia

destoutz me sui de la via,

per far a vos companhia;

quar aitals toza vilana

no pot ses parelh paria

pastorgar tanta bestia

en aital loc tan soldana.”

“Don,” fetz ela, “qui que m sia,

ben conosc sen o folia.

La vostra parelharia,

senher,” so dis la vilana,

“lai on se tanh si s'estia,

que tals la cui' en bailia

tener, no n a mas l'ufana.”

“Toza de gentil afaire,

cavaliers fon vostre paire

que us engenret en la maire,

car fon corteza vilana.

Con plus vos gart, m'es belaire,

e per vostre joi m'esclaire,

si fossetz un pauc humana.”

“Don, tot mon linh e mon aire

vei revertir e retraire

al vezoig et a l'araire,

senher,” so dis la vilana;

“mas tals se fai cavalgaire

qu'atrestal deuria faire

los seis jorns de la setmana.”

“Toza,” fi m eu, “gentils fada

vos adastret, quan fos nada,

d'una beutat esmerada

sobre tot' autra vilana:

e seria us ben doblada

si m vezi' una vegada

sobeira e vos sotrana.”

“Senher, tan m'avetz lauzada,

que tota 'n sui enoiada.

Pos en pretz m'avetz levada,

senher,” so dis la vilana,

“per so n auretz per soudada

al partir 'bada, fol, bada!'

e la muz'a meliana.”

“Toza, fel cor e salvatge

adomesg' om per uzatge.

Ben conosc al trespassatge

qu'ab aital toza vilana

pot hom far ric companhatge

ab amistat de coratge,

quan l'us l'autre non engana.”

“Don, hom coitatz de folatge

jur' e pliu e promet gatge.

Si m fariatz homenatge,

senher,” so dis la vilana;

"mas ges per un pauc d'intratge

no volh de mon piuzelatge

camjar per nom de putana." 

"Toza, tota creatura

revertis a sa natura.

Parelhar parelhadura

devem eu e vos, vilana,

a l'abric lonc la pastura:

que melhs n'estaretz segura

per far la cauza doussana."

"Don, oc; mas segon dreitura

cerca fols sa folatura,

cortes cortez' aventura,

e l vilas ab la vilana.

En tal loc fai sens fraitura

on hom non garda mezura,

so ditz la gens anciana."

"Toza, de vostra figura

non vi autra plus tafura

ni de son cor plus trefana."

"Don, lonh anetz;...

que tals bad' en la peintura

qu'autre n'espera la mana."

III.

Dirai vos en mon lati

de so qu'eu vei e que vi:

l segles non cuit dure gaire,

segon qu'escriptura di,

qu'eras faill lo fills al paire

e l pair' al fill atressi.

Desviat a son cami

jovens que torn' a decli,

e donars qu'era sos fraire,

va s'en fugen a tapi,

c'anc dons Costans, l'enganaire,

joi ni joven non jauzi.

Soven de pan e de vi

noiris rics hom mal vezi,

e si l tengues de mal aire,

segurs es de mal mati,

si no i ment lo gazaignaire

don lo reproviers eissi.

Lo mounier jutg' al moli;

qui ben lia ben desli;

e l vilans ditz tras l'araire:

bons fruitz eis de bon jardi

et avols fills d'avol paire

e d'avol caval rossi.

Eras naisson dui poilli,

beill, burden, ab saura cri,

que s van volven de blanc vaire

e fan semblan aseni:

jois e jovens n'es trichaire

e malvestatz eis d'aqui.

Moilleratz a sen cabri,

c'a tal para lo coissi

don lo cons esdeven laire;

que tals ditz: "Mos fills mori",

que anc ren no i ac a faire:

gardatz sen ben bedoi.

Re no m val s'eu los chasti,

c'ades retornon aqui,

e pois un non vei estraire

moillerat del joc coni,

an lo tondres per lo raire

Marcabrus d'aquel trahi.