V, So qu' hom plus vol e don es plus cochos,

V.

So qu' hom plus vol e don es plus cochos, 

E so qu' hom plus dezira ni ten car

Devem quasqus relinquir e laissar,

Quar ben sabem que luecx es e sazos

Qu' el ric senhor qu' es lials perdonaire,

Reys de merce, dreituriers e salvaire

Anem servir, qu' el nos fes de nien,

E 'n sufri mort per nostre salvamen.

Nos podem ben saber que fes per nos

Quan se laisset d' espinas coronar,

Batr' e ferir e de fel abeurar,

E nos rezems del sieu sanc precios.

Ailas! caitiu, quant mal fan lur afaire

Cilh que no y van, e cuidan sai sostraire

A lurs vezis las terras falsamen;

Paor deuran aver al jutjamen.

Qui remanra non er savis ni pros,

Qu' eras no s pot l' us en l' autre fiar,

Per que ditz hom que non pot plus onrar

Lo segle, adoncs remanran vergonhos

Li ric baro, s' el segles dura guaire;

Be son torbat li rey e l' emperaire,

Si remanon guerreyan per argen

Ni per terras, si tot lur falh breumen.

Qui que romaingna, ieu irai volentos,

Qu' hom non pot ges lo ben guazardonar

Que nos a faitz dieus ni 'ls tortz esmendar,

Per qu' ieu lo prec si cum es piatos,

E 'l clam merce aissi cum fes lo laire,

E valha nos la sua doussa maire,

E sans Johans nos valha eissamen

Que nos vencam aquesta falsa gen.

Silh que sabon las leys e las leyssos

E 'ls mals e 'ls bes no i volon ges anar,

Qu' ieu 'n sai de tals qu' amon dezeretar

Mais Crestias que Sarrazis fellos,

E si 'n parlatz, diran vos qu' es peccaire;

E qui s vol far dels autres predicaire

Deuria se predicar eissamen,

Mas cobeitatz tolh a clercia 'l sen.

Reys d' Arago, francs reys e de bon aire, 

Vos servetz dieu de bon cor humilmen;

Qu' el si' ab vos, e tug diguam amen.

Pons de Capdueil.

IV. Fortz chauza es, que tot lo maior dan

IV.

Fortz chauza es, que tot lo maior dan

E 'l maior dol, las! qu' ieu ancmais agues,

E so don dei totz temps plaigner ploran,

M' aven a dir en chantan e retraire;

Que selh qu' era de valor caps e paire

Lo rics valens, Richartz, reys dels Engles,

Es mortz, ai dieus! quals perd' e quals dans es!

Quant estrang mot, e quant greu per auzir!

Ben a dur cor totz hom qui 'l pot suffrir.

Mortz es lo reys, e son passat mil an

Qu' anc tan pros hom no fo; ni no vi res,

Ni ja non fo mais hom del sieu semblan,

Tan larcs, tan pros, tan arditz, tals donaire;

Qu' Alixandres, lo reys que venquet Daire,

No cre que tan dones ni tan messes;

Ni anc Charles ni Artus tan valgues;

Qu' a tot lo mon se fes, qui 'n vol ver dir,

Als us doptar et als autres grazir.

Meravil me qu' el fals secgle truan

Auza estar savis hom ni cortes,

Pus ren no i val belh ditz ni fait prezan;

E doncs per que s' esfors' om pauc ni guayre?

Qu' era nos a mostrat mortz que pot faire,

Qu' a un sol colp a lo mielh del mon pres,

Tota l' onor, tot lo pretz, tot lo bes;

E pus vezem que res no i pot guandir,

Ben deuriam meins duptar al murir.

Ai! senher reys valens, e que faran

Hueimais armas ni gran tornei espes,

Ni ricas cortz, ni belh donar ni gran,

Pus vos no i etz qu' en eras capdelaire?

Ni que faran li liurat a maltraire,

Silh que s' eran en vostre servir mes, 

Qu' atendion qu' el guazardon vengues? 

Ni que faran sels que s degran aucir 

Qu' aviatz faitz en gran ricor venir?

Avol vida e piez de mort auran

E tos temps dol, qu' en aissi lor es pres;

E Sarrazi, Turc, Payan e Persan,

Que us duptavon mais que hom nat de maire,

Creisseran tan d' orguelh tot lor afaire

Que plus greu n' er lo sepulcres conques;

Et dieus o vol, quar si 'l non o volgues,

E vos, senher, visquessetz, ses mentir

De Suria los avengra a fugir.

Jamais non ai esperansa que i an

Reys ni princeps qui cobrar lo pogues;

Pero tug silh qu' el vostre loc seran

Degran saber cum fos de pretz amaire,

E qual foron vostre dui valen fraire,

Lo joves reys e 'l cortes coms Jaufres;

E qui en loc remanra de vos tres

Ben deu aver fin cor e ferm cossir

De totz bos aips enansar e grandir.

Bel senher dieus, vos qu' etz vers perdonaire,

Vers dieus, vers hom, vera vida, merces,

Perdona li, que ops e cocha l' es;

E non gardetz, senher, al sieu falhir,

E membre vos com vos anet servir.

Gaucelm Faidit.