Folquet de Romans. Quan cug cantar ieu plang e plor

Folquet de Romans.

3204.

Folquet de R. si fo de Vianes, d'un borc que a nom Romans. Bons joglars fo e prezentiers en cort; e de gran solatz; e fo ben honratz entre la bona gen. E fetz serventes joglaresc de lauzar los pros et de blasmar los malvatz. E fetz molt bonas coblas.

2701, 7226, C.

Quan cug cantar ieu plang e plor

D'aisso que vei esdevenir;

Qu'à per pauc no mor de dolor,

Quant é mon cor pens e cossir

La perd' el grand damnatge

Qu'a pretz, cortezi' e solatz:

Que si de cantar vos mesclatz

Nius donatz alegratge, (ni us)

Totz diran vos etz fols auratz

Si de tot joi no vos laissatz.

Tornatz es en pauc de valor

Lo segle, qui ver en vol dir;

E'l clergue son ja li pejor, 

Que degran los bes mantener;

Et an aital usatge,

Que mais amon guerra que patz,

Tan lor plai malez' e peccatz:

Per qu'él primier passatge

M'en volria esser passatz;

Que'l mai de quan vei mi desplatz.

E son ves els mezeis trachor

Li rics malvatz, per qu'els n'azir; 

Qu'els an olhs e non an lugor,

Ni'n re no sabon avenir

Que sia d'agradatge;

Qu'aissi ls eissorba cobeitaz,

Engans, feuni' e malvestatz,

Que perdut an paratge:

E per aisso pert sas clardatz

Pretz e valor e lialtatz.

Be volgra fossem d'un senhor

Ab tan de poder e d'albir,

Qu'als avols tolgues la ricor

E no ls laisses terra tenir;

E dones l'eretatge

A tals que fos pros e prezatz,

Qu'aissi fo'l segles comensatz,

E noi guardes linhatge;

E mudes hom lo rics malvatz,

Si com fan Lombart poestatz.

E prec al bon emperador,

Que s'es crozatz per dieu servir, 

Que mov'ab fors' et ab vigor 

Ves la terr' on dieus volc morir,

E mes son cors en gatge

Per nos, e fon en crotz levatz

E per nos batutz e nafratz.

Don fam gran vilanatge,

Quar per nos son tan sufertatz

Los Turcs fals e descofessatz.

Tut deuriam aver paor,

Quar meils no li sabem grazir

So qu'el sofri per nostr'amor;

Qu'el receup mort per mort aucir

Quan volc nostr' omenatge.

Per que fo de bon' ora natz

Totz hom qui l servira crosatz

Ni fara'l sieu viatge;

Qu'anc pos qu'el fo deseretatz

Non ac honor cristiandatz.

Emperaire, si beus pessatz

Com fai dieus vostras voluntatz,

Mout l'auretz bon coratge;

Qu'el vol, et es ver so sapchatz,

Que vos cobretz as eritatz.  (as : las)

Blacasset.

Blacasset.

Si m fai amors ab fizel cor amar

Que mil tans vuelh ses autre jauzimen

Esperar vos ab deziros turmen,

Bona dompna, cui ab fin cor tenc car,

Que d' autr' aver so qu' ieu de vos volria;

E plus no us quier mas que us plassa qu' ieu sia

Vostres, e si trop quier no m sia dans,

Si m forsa en re mo sen sobretalans.

Gentils dompna plazens, no us aus lauzar,

Ni faissonar vostra beutat plazen

Ni l' honrat, car, gentil captenemen

Ni 'l pretz que us te d' autra valor ses par;

Quar, s' ieu lauzan vostre gent cors, dizia

So qu' ieu per ver faissonar en poiria,

Sabrion tug de cui sui fis amans;

Per qu' ieu en sui de vos lauzar duptans.

S' aissi us auzes, dompna, merce clamar

Cum vos dezir ab car voler temen,

Ieu fora ricx; mas ar languisc viven,

Quar sol no m' aus quo us o diga pensar;

Mas si merces, que orguelh humilia,

Vostre gent cors, que m destrenh, destrenhia

Sivals d' aitan que us plagues mos enans,

For' ieu de joy als plus jauzens sobrans.

Ab tal voler fetz amors autreyar

Mon cor a vos cui dezir caramen

Que m fosson tug vostre plazer plazen,

Per qu' ieu volrai tos temps aitals estar;

Quar tan tenc car la vostra senhoria

Que, s' autra m des so qu' a vos non querria,

No s pogra en re cambiar mos talans,

Tant es mos cors d' onrat joy dezirans!

Tos temps vuelh mais doussamen merceyar 

Ab humil cor tot vostre mandamen

Que d' autr' aver ab joy nulh jauzimen

Que nuls hom aus voler ni dezirar;

E ja de vos joys plazens datz no m sia,

Bona dompna, s' ieu d' autra lo prendia;

E s' aman muer, domna, sui merceyans,

Qu' en la mort prenc honor, sitot m' es dans.

Dona, si us platz que fin' amors m' aucia

Vos deziran, ja no us cugetz que m sia

Enuegz en re; ans, si us es plazers grans,

Serai tos temps de ma mort dezirans.