50. Anonimo.
Secondo la lezione pubblicata dal Meyer (Miscell. di filol. e ling. Caix-Canello, p. 233).
Planctus.
En chantan m' aven a retraire
ma gran ira e ma gran dolor.
non chan ges con autre chantaire
que chanta de jois e d'amor:
s' eu chan de boca, de cor plor,
c' a chantar m' es razos contraire;
per que mos chanz a nom chanplor,
que chanz nom pot de plor estraire.
Ben deu cel plorar e dol faire
que pert amic ni bon segnor,
ni ja hom, tro qu' en es perdaire,
non saura d' amic sa valor.
la morz m' a fait conossedor
de mon damnage non a gaire:
tuit cil c' amon prez ni valor
devon doler d' aquest afaire.
Morz nos a tolt lo debonaire,
lo pro patriarcha Gregor,
on avian fait lor repaire
tuit li bon aib e li mellor.
qui veira mais tal guidador
tan pro, tan franc, tan larc donaire !
passat avia de largor
Alixandre que venquet Daire.
De lui fes valors essemplaire
als bos fo francs e mercejaire,
plen d' umiltat e d' alegror.
los crois teni' en tal rancor
per re non li podion plaire.
aras sabron gran e menor
que pert lo filz can mor lo paire.
Assaz podon cridar e braire
Friolan el veizin d' entor,
car be savon lor aversaire
qu' il an perdut lo bon pastor
qui los deffendia d' error
els crois fazia arreras traire.
lairon, predon e raubador
an jois, car manz en fez desfaire.
Dieus non fes rei ni enperaire
dels crois tal justiziador,
tal guerrier ni tal deffendaire
dels sieus ni ab tan de vigor,
que lai on jazia en langor,
que greu si podia sostraire,
n' avion li croi tal paor
que non ausavon vezer l' aire.
Laissus en son sant luminaire,
o son martir e confessor,
meta s' arma lo ver salvaire,
e la deffende de tristor;
car s' anc nulz om per gentill cor,
per lialtat ni per maltraire
deu intrar el palais auchor,
Gregor de Montlonc en es fraire.
Mon chanplor tramet a la maire
de Jesucrist lo salvador,
e quier li com umil pecaire
que prec son filz per sa dolzor
qu' en la celestial baudor
on son li patriarche maire
meta l' arma d' aquest ab lor,
toz om en deu esser pregaire.
A l' archediaque ten cor,
chanplors, que te sia gardaire:
car a del lignage la flor,
be deu al bon oncle retraire.
